Chrósćicy (SN/MWj). Po wšěm zdaću nic cyle tak měrnu jutrońčku kaž tamne procesiony mějachu Chróšćanscy křižerjo. Dokelž mějachu někotři křižerjo problemy z konjemi, dyrbjachu hižo ducy do klóštra zastać, zo bychu wjetše wotstawki w procesionje začinili. Pječa so tónle njeměr cyłe popołdnjo jewješe. Wo tym pak po přestawce w Swinjarni a pozdźišo w Pančicach-Kukowje hižo ničo pytnyć njebě. Tam skutkowaše procesion dosć měrny, jako jón abatisa Gabriela Hesse serbsce a němsce witaše. Cyłkownje je w Chróšćanskim procesionje 230 křižerjow jěchało. Mjez nimi bě 14 nowačkow, sedmjo mějachu slěborny wěnčk jubilara přityknjeny.
Njebjelčicy (SN/MiR). Njebjelčanski procesion, kotryž je wosadny farar Michał Nawka wužohnował a domoj witał, měješe lětsa 101 křižerja. W jutrownej nocy prědowaše wón wo wulkim dźiwje, zo bě kamjeń před rowom Jězusa Chrystusa bjez pomocy wotwaleny. Xaver Smoła je lětsa prěni króć kantorstwo přewzał. Smoła zwurazni swoje wjeselo nad tym, zo je Bjarnat Deleńk ze swojim wnučkom Theodorom jako nowačkom a synomaj Tobiasom a Hubertusom jěchał.