Swójby zhromadnje sportuja
Chrósćicy. Wot 13. oktobra změja swójby w Chrósćicach zaso składnosć zhromadnje sportować. Poskitk, kotryž nawjeduje socialny dźěłaćer Rěčneho centruma WITAJ Křesćan Lebza, je zaměrnje na potrjeby staršich a dźěći w starobje třoch hač do šěsć lět přiměrjeny. Při tym steji předewšěm zhromadny čas w srjedźišću. Dźěći so pohibuja a pokazaja hrajersce swoju wušiknosć. Tež starši so aktiwnje wobdźěla, ale wužija zdobom składnosć so wuměnjeć. Zakład koncepta je, zo su přirodne, wšědne poćahi za strowu towaršnosć přewšo wažne. Čim stabilniše tute zwiski, ćim mjenje profesionalneje podpěry je trěbne. To je zaměr, kotryž RCW z projektom sćěhuje. Poskitk so hač do 17. nowembra přewjedźe. Zajimcy móža so hišće pod přizjewić.
Domizniska stwa z jubilejom
Zornowc a swětnišćo
Wotewru wustajeńcu
Budyšin. „Serbske duchi a swětleška w zelenym“ rěka nowa wustajeńca, kotruž štwórtk, 8. oktobra, w 17 hodź. w Budyskej Serbskej kulturnej informaciji wotewru. Swoje twórby wustajeja tam Marija Šołćic, Norbert Völkel a Felicia Touvernot. Wo hudźbne wobrubjenje postara so spěwna skupina Přezpólni. Wšitcy zajimcy su wutrobnje na wotewrjenje přehladki přeprošeni.
Wodźenje po kěrchowje
Budyšin. W lěće 1926 su Budysku Tuchorsku cyrkej nutřka přetwarili a na nowej zapadnej emporje pišćele zatwarili. Instrument bě Leopold Kohl hižo lěta 1857 za krajnostawski wučerski seminar zhotowił. Karl Eduard Hering wužiwaše pišćele za wukubłanje seminaristow. Štó je na pišćelach hišće hrał a čehodla su je do Tuchorskeje cyrkwje přesadźili, zhonja zajimcy sobotu, 10. oktobra, wot 16 hodź. při wodźenju po Tuchorskim kěrchowje wot Evelyn Fiebiger. Woni zetkaja so při Cyhelskim nasypje. W 17 hodź. přizamknje so mały koncert z organistom Michaelom Vetterom a spěwnej skupinu Consonare.
Swjeća zběhanku
Radźićeljo wuradźuja
Minakał. Přichodne posedźenje Radworskeje gmejnskeje rady budźe jutře, srjedu. Tute startuje we 18.30 hodź. Tónraz zetkaja so radźićeljo w Minakałskej wohnjowobornej gratowni. Mjez druhim zaběraja so woni z mjezyrozprawu wo komunalnym ćopłotnym planowanju w Minakale a z hladanjom zelenišćow podłu pućow na teritoriju gmejny. Zajimcy su wutrobnje witani.
Za kulisy Carity pohladać
Kamjenc. Hornjołužiski zwjazk Carity přeprošuje pod hesłom „Caritas zwjazuje generacije“ na dźeń wotewrjenych duri sobotu, 10. oktobra, wot 14 do 18 hodź. na Zapadnu dróhu 22 w Kamjencu. W 15 hodź. předstaja Kamjenski Katolski dźěćacy dom swjateho Bjarnata z hudźbnym přinoškom. W 15.30 hodź. slěduje klankowa hra „Žabjacy kral“. Po tym informuja w fachowymaj přednoškomaj wo postajenju pacienta (Patientenverfügung) a wo priwatnym zadołženju.
Hrajkanišćo móža ponowić
Hory (AK/SN). Gmejna Halštrowska hola so nad spěchowanjom Leaderoweho regiona łužiska jězorina wjeseli. Tole zdźěli komornica Stefanie Arndt na zašłym posedźenju gmejnskeje rady. Pjenjezy dóstachu za přetwar a ponowjenje zjawneho hrajkanišća w Zabrodźe. Projekt płaći cyłkownje 87 000 eurow. Za njón spěchowaše so jim 61 000 eurow, štož wotpowěduje 70 procentam. Gmejna planuje nowe hrajkanske nastroje, škit přećiwo zranjenjam na zemi a nowe zelenišća. Hač do awgusta 2027 chcedźa naprawu zwoprawdźić.
Wotewru wustajeńcu
Budyšin. „Serbske duchi a swětleška w zelenym“ rěka nowa wustajeńca, kotruž wotewru štwórtk, 8. oktobra, w 17 hodź. w Budyskej Serbskej kulturnej informaciji. Swoje twórby wustajeja tam Marija Šołćic, Norbert Völkel a Felicia Touvenot. Wo hudźbne wobrubjenje postara so spěwna skupina Přezpólni. Wšitcy zajimcy su wutrobnje na wotewrjenje přehladki witani.
Zhromadnje spěwać
Budyšin. Zwjazk serbskich spěwarskich towarstwow přeproša na dalše zhromadne spěwanje, a to wutoru, 6. oktobra, we 18 hodź. w chórowej rumnosći Serbskeho ludoweho ansambla.
Cyrkej znowa poswjeća
Radwor. W Radworju róžowcowu njedźelu, 4. oktobra, Křižnu cyrkej znowa poswjeća. Swjedźenski nyšpor z procesionom z postawu maćerje Božeje zahaji so w 14 hodź. Po tym móža sej zajimcy cyrkej wobhladać a wot Pětra Kubańka nadrobnosće ponowjenja zhonić.
Na nazymski swjedźeń
Mały Holešow. Njeswačanska přirodoškitna stacija wuhotuje njedźelu, 4. oktobra, wot 10 do 17 hodź. nazymski swjedźeń na rybarskim dworje w Małym Holešowje. Nimo mnohich kulinariskich poskitkow wočakuja wopytowarjow klankodźiwadło, hudźbna zabawa a přirodowědna ekskursija. Dale prezentuja přehladku wšelakich družin tomatow a mytuja najwjetši kirbs, kiž wopytowarjo sobu přinjesu.
Rozprawja wo pućowanju
Radwor. „Mjez Euphratom a Tigrisom“ rěka hesło přednoška Bena Bělka póndźelu, 5. oktobra, w 19.30 hodź. w Radworskim Słodeńku. Awtor pućuje z wopytowarjemi w duchu po Kuwaiće, Iraku a Kurdiskej.
Přeprošuja na koncert
Wuměłča w srjedźišću
Budyšin. „Za špihelom woprawdźitosće“ je hesło wječora z hudźbu, baletom, přednoškom, čitanjom a rozmołwu štwórtk, 1. oktobra, w 19.30 hodź. na žurli SLA w Budyšinje. W srjedźišću steji serbsko-pólska molerka, grafikarka a ilustratorka Božena Nawka-Kunysz a jeje wuměłske skutkowanje. Zarjadowanje rysuje jeje žiwjenski puć wot dźěćatstwa w Hornjej Łužicy přez studij w Pólskej hač k jeje skutkowanju jako mjezynarodnje připóznata wuměłča.
Radźićeljo wuradźuja
Nowa Wjeska. Přichodne posedźenje Worklečanskeje gmejnskeje rady wotměje so štwórtk, 1. oktobra, w 19 hodź. w towarstwowym domje w Nowej Wjesce. Hłownje póńdźe wo aktualny staw twarskich dźěłow na Worklečanskej wyšej šuli a wo přepodaće dalšich nadawkow, mjenujcy za kładźenje kachlicow a twar solarneje připrawy.
Na rozmołwu do Baraki
Nuknica. Zapósłanča Sakskeho krajneho sejma Elaine Jenčec přeprošuje hromadźe ze sakskim ratarskim ministrom Georgom-Ludwigom von Breitenbuchom (wobaj CDU) na wobydlersku rozmołwu do Nukničanskeje Baraki. Zarjadowanje wotměje so pjatk, 2. oktobra, wot 18.30 hodź. W srjedźišću rozmołwy steja temy, kotrež wjesnu kónčinu nastupaja. To su mjez druhim ratarstwo, hońtwa, wjelk a běrokratija. Wobmjezowaneje ličby městnow dla njech so zajimcy přizjewja, a to hač do 30. septembra z e-mailku pod .
Radźićeljo wuradźuja
Njebjelčicy. Přichodne zjawne posedźenje Njebjelčanskeje gmejnskeje rady je jutře, wutoru, w 19 hodź. na žurli gmejnskeho zarjadnistwa. Radźićeljo zaběraja so z mjezyrozprawu wo dotalnym spjelnjenju hospodarskeho plana 2026. Nimo toho póńdźe wo zrěčenje, z kotrymž chcedźa wuměnjenja za kredit změnić. Dale stejitej na dnjowym porjedźe twarskej předewzaći w Miłoćicach, ke kotrymajž dyrbja so radźićeljo wuprajić. Zajimcy su na posedźenje wutrobnje witani.
Přeprošuja na dwory
Brětnja. Žiwe rjemjesło a wjesne žiwjenje móža wopytowarjo dworoweho swjedźenja jutře, sobotu, wot 10 hodź. w Brětni pola Wojerec dožiwić. W 11 hodź. předstaja dźiwadło za dźěći, poł hodźiny pozdźišo pokazaja młodźi wobornicy swoje kmanosće. W 12 hodź. demonstruja historisku młóćawu, štož w 16 hodź. wospjetuja. Wot 14 hodź. Serbska dźěćaca rejwanska skupina na wobdźělenych dworach zarejuje. Na Mjetaškec dworje budu wječor reje. Njedźelu přeprošuja w 9.30 hodź. na Božu słužbu a po tym na rańše piwko.
Koncertuja w cyrkwi
Pančicy-Kukow. Koncert pod hesłom „Pod hwězdnišćom“ wuhotuje chór ewangelskeje wosady Emmaus z Willicha nad Delnim Rynom jutře, sobotu, we 18 hodź. w klóštrje Marijina hwězda w Pančicach-Kukowje. Zaklinča twórby Albrechta Haafa z „Kantate Camiono de Santiago“ a Bobbija Fischera z „Missa Latina, Magnificat“. Zastup je darmotny.
Wiki dźěćaceje drasty
Budyšin. W Montessorijowej šuli na Budyskej Tzschirnerowej wotměja so jutře, sobotu, dalše wiki dźěćaceje drasty. Wot 14 do 16 hodź. poskićuja tam trjebanu drastu, hrajki a dalše wěcy za přijomnu płaćiznu.
