Zhudźbnjene basnje zaklinča
Budyšin. Składnostnje 70. narodnin Jana Cyža a 60. narodnin Tima Meškanka wuhotuje Serbski ludowy ansambl w bašće swojeho domu hudźbno-literarny wječor „Zynki a linki“. W Sorabistiskim instituće w Lipsku skutkowacy filologa a historikar Timo Meškank je před lětami basnje spisał a wudał. Ze zběrkow „pój do rejki …“ a „rěč je hrajka ...“ je Jan Cyž loni někotre jeho teksty wubrał a je za spěwne solo a klawěr zhudźbnił. Kompozicije přednjesetaj spěwar Pětr Cyž a pianist Paul Bernewitz prapremjernje. Dalše literarne teksty čita Hanka Rjelcyna, mjez druhim dožiwjenje Jurja Winarja za čas studija w Drježdźanach ze swojim kuzenkom Maksom Rječku a dźědom Timom Meškankom. Hudźbny wječor budźe pjatk, 23. meje, w 19.30 hodź. w bašće Budyskeho Serbskeho ludoweho ansambla. Produkcija z tekstami Tima Meškanka a hudźbu Jana Cyža předstaja posledni raz.
Na filmowy wječor
Pčołki za cyłu swójbu
Budyšink. Składnostnje mjezynarodneho dnja pčołkow, kotryž bě wčera, zarjaduje pčołarske towarstwo Šěracha pjatk, 23. meje, wot 16 hodź. dźěłarničku za cyłu swójbu. Zarjadowanje wotměje so w Domje Šěracha w Budyšinku. Tón dźeń chcedźa tam předstajić, kak so měd dźěła. Zajimcy móža so sami gratu přimać a čerstwje nadźěłany měd woptać.
Radźićeljo wuradźuja
Róžant. Přichodne posedźenje gmejnskeje rady Ralbicy-Róžant budźe štwórtk, 22. meje, we 18.30 hodź., w Róžeńčanskej gmejnskej sydarni. Radźićeljo zaběraja so wospjet z nowej Ralbičanskej pěstowarnju, kotruž nazajtra oficialnje přepodadźa. W dnjowym porjedźe steji, zo zaběraja so z prašenjom, hač přetwarja kaž dotal planowane staru pěstowarnju na hort abo hač měli město toho při šuli nowy hort natwarić.
Přeprošuja na solarnu party
Pančicy-Kukow. Towarstwo Ostsachsen wechselt a VEE Sakska přewjedźetej srjedu, 4. junija, wot 17 do 20 hodź. tak mjenowanu solarnu party w gmejnje Pančicy-Kukow. Za nju móža so zajimcy pod adresu přizjewić. Potom zajimcam tež zdźěla, hdźe so zarjadowanje dokładnje wotměje. Myslene je wone za wšitkich wobsedźerjow domow, kotřiž rozmysluja, kak móhli so přichodnje z pomocu wobnowjomnych energijow z milinu a ćopłotu zastarać. Wobdźělnicy wobhladaja sej solarnu připrawu z bateriju kaž tež ćopłotnu klumpu za přemysłowu jednotku. K tomu poskićuja organizatorojo krótke přednoški w němskej rěči. Wobdźělenje je darmotne.
Literarnje po Łužicy pućować
Wuhotuja prózdninske lěhwa
Mały Holešow. W lětnich prózdninach přewjedźe Njeswačanska přirodoškitna stacija tři prózdninske lěhwa na rybarskim dworje w Małym Holešowje. Dožiwjenski camp w přirodźe wotměje so wot 29. junija hač do 4. julija. Ze sakom, lupu a dalokowidom podadźa so wobdźělnicy w starobje wosom do dwanaće lět do přirody a ju wobkedźbuja. Wobdźělenje płaći na wosobu 180 eurow. W dalšim campje wot 16. do 18. julija steja insekty w srjedźišću. Přinošk za dźěći a młodostnych wot dźesać lět płaći 60 eurow. W slědźerskim campje dźěći wuslědźa, hač w hatach snano tola wódny muž njebydli. Termin je wot 20. do 25. julija a wobdźělenje płaći 180 eurow. Předwidźane je tute lěhwo za dźěći a młodostnych wot dźesać do 14 lět. Zajimcy njech přizjewja so pod abo pod telefonowym čisłom 035933 30077.
Radźićeljo wuradźuja
Worklecy. Přichodne posedźenje Worklečanskeje gmejnskeje rady wotměje so srjedu, 21. meje, w 19 hodź. w Smječkečanskim Domje swjateho Jana. Jedna z temow budźe móst nad Klóšterskej wodu mjez Worklecami a Lejpoldom. Zajimcy su wutrobnje přeprošeni.
Muzejowy swjedźeń z hermankom
Wojerecy. Wojerowski hród a měšćanski muzej přeměnitej so njedźelu, 18. meje, na historiski hermank. Muzejowy swjedźeń skići cyły dźeń luboznje wuhotowane atrakcije, kotrež drje dopomnjenki na dawne časy zbudźa. Na hermanku wočakuja wopytowarjow a wopytowarki wšelke zabawy. Tak móža losować, ryby łójić, pjenjezy bić abo tyzki mjetać. Mjeńši wopytowarjo změja radosć na karuselu abo při tłóčenju jabłukow za brěčku. Lubowarjo potajnych poselstwow njech pohladnu do kristaloweje kule wěšćerki Hariole Verum. Dale změja tam składnosć, so při paslenju zabawjeć a sej modelowu želenicu wobhladać. Klankodźiwadło na předstajenje přeprošuje. Na wodźenjach po hrodźe sposrědkuje Oliver Bettels jako Napoleon Bonaparte historisku wědu. Wo hudźbne wobrubjenje postara so Christian Völker-Kieschnick. Zastup je darmotny.
Započnu móst twarić
Róža Domašcyna čita
Budyšin. Čitanje z Róžu Domašcynej budźe jutře, pjatk, we 18.30 hodź. w Budyskim tachantskim wobchodźe. Spisowaćelka předstaji swoju kónc zašłeho lěta wušłu knihu „Wurzelwesen“. Dale čita wona z planowaneje knihi, kotraž wuńdźe 2026, a ze staršich twórbow. Wuběr knihow Róže Domašcyneje su jutře na předań. Tute awtorka kupcam tež rady signuje. Zastup płaći wosom eurow.
Koncertuje w cyrkwi
Rakecy. Pod hesłom „Swětła nadźije“ wotměje so jutře, pjatk, w 19.30 hodź. w Rakečanskej ewangelskej cyrkwi koncert z hudźbu a inspiraciju. Křesćanski spěwytwórc a producent modernych duchownych pěsnjow Albert Frey jón z dalšimaj hudźbnikomaj wuhotuje.
Předstaji Bamborak
Budyšin. Maćica Serbska přeprošuje na wječorny přednošk, kotryž planuja štwórtk, 15. meje, w 19 hodź. w Budyskim Serbskim domje. Korla Baier předstaji swój TTS system (Text to speech) Bamborak, kotryž je w zašłych lětach wuwił. Z nim móže kompjuter hornjoserbske teksty awtomatisce předčitać. System dźěła z neuronalnymi syćemi. Trenowali su jón z wjacorymi tysac sadami. System předstaja live a to serbsce.. Zajimcow wutrobnje witaja.
Premjera z elewomaj
Budyšin. Hrajkajo serbsce nawuknyć a při tym samo swoju stwu zrumować, je wobsah studijoweje inscenacije „Zhubjene a namakane“ serbskeho činohrajneho studija. Hračko změje jutře, 15. meje, w 19.30 hodź. swoju premjeru w Budyskim Dźiwadle na hrodźe. Originalnu němsko-jendźelsku hru awtorki Rike Reiniger su do wjele rěčow přełožili. Tež we Łužicy měješe hra hižo w lěće 2005 w hornjoserbskej a w delnjoserbskej rěči wulki wuspěch z NSLDź. Po dwaceći lětach móže publikum hru nětko znowa dožiwić, a to z elewomaj Bernadet Šnajderec a Ole Schmidt. Režiju ma Torsten Schlosser.
Młodźinski festiwal Youco
Přednošuje wo Namibiji
Zetkaja so w stolicy
Drježdźany. Přichodne zetkanje Serbow w Drježdźanach budźe srjedu, 14. meje, we 18 hodź. Tónraz zetkaja so wobdźělnicy zaso w korčmje Am Thor na Hłownej dróze 35. Ju su mjeztym zaso wotewrili a nimaja jenož noweho čěskeho wobhospodarja, ale tež čěske piwo a posłužbu, zdźěli organizator Benedikt Dyrlich.
Předstaji Bamborak
Budyšin. Maćica Serbska přeprošuje na wječorny přednošk, kotryž planuja štwórtk, 15. meje, w 19 hodź. w Budyskim Serbskim domje. Korla Baier předstaji swój TTS system (Text to speech) Bamborak, kotryž je w zašłych lětach wuwił. Z nim móže kompjuter hornjoserbske teksty awtomatisce předčitać. System dźěła z neuronalnymi syćemi. Trenowali su jón z wjacorymi tysac sadami. System předstaja live. Přednošk budźe w serbskej rěči. Zajimcow wutrobnje witaja.
Koncertuja w zahrodźe
Přepodadźa wjesne srjedźišćo
Pančicy-Kukow. Hdźež je w Pančicach-Kukowje wjele lět hosćenc ze žurlu stał, je minjene lěta nowe wjesne srjedźišćo nastało. Nětko chcedźa komunikacisku arenu zjawnosći přepodać. Za to wšitkich wjesnjanow njedźelu, 11. meje, w 15 hodź. wutrobnje přeprošuja.
Wo powołanjach so wobhonić
Kamjenc. Nimale 94 regionalnych předewzaćow z rjemjesła, posłužbow, industrije a strowotnistwa předstaja so sobotu, 10. meje, wot 9 do 14 hodź. na powołanskich wikach w Kamjencu. Tute budu w sportowni a na dworje bywšeho gymnazija napřećo lětanišću. Na městnje zhotowja zajimcam samo wobrazy za swoje požadanje, a to darmotnje. Wo dobru naladu postara so rejowanska skupina „Kamenz Can Dance“.
Kapałnicy koncertuja
Ralbicy. Drježdźanski hólči chór kapałnikow wuhotuje njedźelu, 11. meje, w 14 hodź. nyšpor w Ralbičanskej cyrkwi. Wšitkich k tomu wutrobnje přeproša. Na kóncu budźe zběrka za kapałnikow.
