Hudźbno-poetiske pućowanje
Choćebuz (NC/KP). Serbska publicistka a basnica Mina Witkojc narodźi so 28. meje před 133 lětami. To běše składnosć za wosebity koncert w Choćebuskim Serbskim muzeju. Serbsko-pólske duwo Walburga Wałdźic a Izabela Kałduńska je hudźbnu hommage na dworje muzeja wuhotował. Serbska spěwarka a pólska wiolinistka stej swój delnjoserbskej basnicy wěnowany album „Za Minu“ něhdźe 20 wopytowarjam předstajiłoj. „Smój za dźewjeć basnjow z pjera Miny Witkojc w našej hudźbnej rěči nowe zynki nadešłoj“, Wałdźic publikumej powědaše. Hudźbnicy stej přitomnych poetisce a hudźbnje na pućowanje po tworjenju błótowskeje basnicy přeprosyłoj. Mjez basnjemi, kotrež běštej hudźbnicy rěč awtorki začuwajo zhudźbniłoj, běchu „Próstwa k poeziji“, „Mejska nóc“, „Požadanje“ a „Widźach rěčku slěbornu“.
Pomhać wobohaća
Wochozy (AK/SN). Čestnohamtske zastojnstwo trjeba wjace připóznaća, wšako je „zastojnstwo nadawk k wužitkej za wšitke generacije“, rjekny Zhorjelski krajny rada dr. Stephan Meyer (CDU) njedawno na forumje Socialneje syće Łužica. Wobdźělnicy ze samopomocy, pomocy susodam, kultury a politiki su we Wochožanskim parku błudźenkow z forumom 15lětne wobstaće socialneje syće Łužica a zdobom 77. róčnicu schwalenja zakładneho zakonja w Němskej swjećili.
Serbske kubłanje w šuli polěpšić
Čim wjace wotmołwow, ćim lěpje
Budyšin (SN/BŠe). Rěčespyt Syće za serbsku rěč a regionalnu identitu ZARI přewjedźe tuchwilu prěni króć woprašowanje w serbskim sydlenskim rumje Hornjeje Łužicy. „Chcemy wuznam serbšćiny přepytować“, wuzběhny nawodnica rěčneho slědźenja ZARI dr. Cordula Rataj-czakowa. Naprašowanje ma zakład za studiju „Serbska rěč w našim regionje“ być, při čimž chcedźa wědomostnicy informacije wo tym dóstać, kak daloko je serbšćina w sakskim dźělu Łužicy rozšěrjena a w kotrej měrje ludźo rěč nałožuja. Woprašowanje je za rěčne slědźenje nuznje trěbne. Poslednja tajka studija bu před wjace hač 40 lětami zdźěłana. Wědomostnicy rěčneho slědźenja ZARI nadźijeja so nowych dopóznaćow wo aktualnym stawje hornjoserbšćiny. „Dwurěčnosć je bohatstwo Łužicy. Ju spěchować měło so na realnej potrjebje orientować“, rěka na internetnej stronje ZARI, hdźež studiju zajimcam nadrobnišo předstajeja.
Serbja w kubłanskim planje
Sakska ma nowy kubłanski plan za pěstowarnje. Prěni raz su w nim naležnosće Serbow naspomnjene. To wjeseli tež tych, kotřiž su so za kulisami politiki za to zasadźowali.
Budyšin/Drježdźany (SN/mb). Wobnowjene dźěłowe směrnicy za pedagogiske fachowe mocy w žłobiku, pěstowarni a horće su zawčerawšim na kongresu w Drježdźanach předstajili. Na zarjadowanju so tež ministerski prezident Michael Kretschmer a kultusowy minister Conrad Clemens (wobaj CDU) wobdźělištaj. Wjele ludźi je na dokumenće, kiž wobjimuje 234 stron, sobu dźěłało, tež Serbja. Katharina Jurkowa, předsydka Serbskeho šulskeho towarstwa (SŠT), kotryž je tež nošer wjacorych serbskich pěstowarnjow, so wjeseli, zo su daledawanje maćeršćiny, kotrež je nam wosebje wažne, do plana přiwzali. To je dobry argument za zdźerženje syće kubłanišćow, w kotrychž dźěći a jich kubłarjo wšědnje serbuja.
„Štó my smy? – Worklecy!“
Berlin (SN/jp). Dołho njebě jasne, hač smědźa so šulerjo 10. lětnika Serbskeje wyšeje šule „Michał Hórnik“ Worklecy na zwjazkowym finalu „Młodźina trenuje za olympiju a paralympiju“ w Berlinje wobdźělić. Te dźě wotměwa so runje w pruwowanskim času. Dnja 26. měrca smy wozjewili, zo je kultusowe ministerstwo přesunjenju pruwowanjow přizwoliło, tak zo su so Worklečanscy wolejbulisća srjedu do Berlina na cyłoněmske wubědźowanje podać móhli.
W skupinskej fazy pokazachu dobry wukon. Přećiwo šulam z Bayerskeje, Badensko-Württembergskeje a Schleswigsko-Holsteinskeje su sadźbu stajnje jenož snadnje wotedali. Pod smužku Worklečenjo jednu sadźbu dobychu. Skupinsku fazu zakónčichu na poslednim městnje. Samsny wječor wopytachu šulerjo w stolicy štwórćfinalnu hru champions league w mjetańcy.
Wulka škoda w pěstowarni
Pěstowarnja „Chróšćan kołć“ ma nachwilnje ze swojeho domu do Ralbičanskeje stareje pěstowarnje přećahnyć. Dokelž su wodowody skóncowane, dyrbja špundowanje wutorhać a wodu wusrěbać.
AfD spyta skandalizować
Drježdźany/Berlin (dpa/SN/MG). Strona AfD sej po njeluboznym podawku na Slepjanskej wyšej šuli, hdźež běchu šulerjam we wobłuku projekta pozdatnje pornografiski material pokazowali, politiske konsekwency žada. Frakcija strony w Sakskim krajnym sejmje chce nětko šulski zakoń swobodneho stata nowelěrować. Starši měli wjace móžnosćow dóstać, wo eksternych projektach sobu rozsudźeć, rjekny předsyda frakcije Jörg Urban. Nimo toho chcedźa pedagogisku kwalifikaciju projektow zahe dosć přepruwować. „Hewak měł stajnje wučer pódla być“, wón doda.
Tež w zwjazkowym sejmje su so zapósłanče a zapósłancy wčera w aktualnej hodźinje zdźěla wótrje z temu rozestajeli. Předsyda frakcije AfD Tino Chrupalla sej žadaše, srědki za załožbu Amedeja Antonija tak dołho šmórnyć, doniž njejsu wšě projekty přepruwowane. Zapósłanc CSU Konrad Körner znapřećiwi: „Dźensa chceće jednotliwy pad z wólbneho wokrjesa knjeza Chrupalle na skandal po cyłym kraju rozšěrić.“ Zapósłancy Lěwicy a SPD zwuraznichu tohorunja swoje njezrozumjenje za debatu.
Fararka kritizuje skandalizowanje
Slepo/Berlin (SN/mb). Zwjazkowy sejm měješe dźensa připołdnju na namjet frakcije AfD hodźinu wo „porno-eklaće“ na Slepjanskej wyšej šuli debatować, kaž bě powěsćernja dpa wčera na zakładźe zdźělenki prawicarskeje opozicije připowědźiła. Oficielnje dźe po dnjowym porjedźe wo załožbu Amadeu Antonio, kotraž je projekt šulerjow 9. lětnika financowała. AfD wšak chce pozdatnje politisce jednostronski wliw załožby tematizować, tak jeje kubłanskopolitiski rěčnik Götz Frömming. Składnostnje pada wón zdźěli, zo samo wo zběhnjenju šulskeje winowatosće diskutuja, dokelž stat přećiwo woli staršich šulerjow z „gender-projektami“ dubioznych organizacijow wobćežuje.
