Lěćny projekt z perspektiwu
Miłoćicy (SN/MiR). Słódna wóń droždźoweho ćěsta ćehnje z Miłočanskeje skały přez bliski lěs. Pod třěchu zetkanišća je słyšeć čiła bjesada. Maritta Milbradt-Lange dawa krótke pokazki, kak maja tam běłu maćiznu walkowace dźěći dźěry, kotrež při ćahanju ćěsta na blachu nastawaja, wuhładkować. „To pak je wotpohlad. Chcemy dźěći k tomu pohnuwać rěčeć a mjezsobne styki nawjazać“, rozjasnjuje předsyda towarstwa Kamjenjak Hubert Lange, kiž bě ideju za mjezy překročacy projekt lěćneho campa ze zetkanjom čěskich, němskich a serbskich dźěći zrodźił. Z podpěru towarstwa Valtenbergwichtel z Wjazońcy, kotrež je tydźenski poskitk financielnje spěchował, je so wuměna poradźiła.
So z nawodnicu rozžohnowali
„Šule pandemiju njećěrja“
Drježdźany (SN/MG). Je tomu hižo něšto wjace hač tři lěta, zo započinachu slědźerjo Drježdźanskeje uniwersitneje kliniki šulerkam a šulerjam kaž tež wučerkam a wučerjam na Serbskim gymnaziju w Budyšinje krej wotewzać. Přičina wzda so wobdźělnikam studije tehdy chětro spodźiwna: Wuslědźić chcyše team wokoło prof. dr. Bernera a dr. Armanna mjenujcy, w kotrej měrje wuskutkuja so šule na wuwiće pandemije.
Nětko su prěnje wuslědki wozjewili a tute wopodstatnja měnjenje wšelakorych fachowcow: Šule njeběchu we wosebitej měrje ćěrjak pandemije. Nawopak, wone zarjaduja so do cyle „normalneho“ wuwića ličbow a padow, kaž tež do incidentnych kwotow. Hižo w lěću 2022 wozjewi studijny team na internetnej stronje Ärzteblatt.de prěnje wuslědki a hižo tam bě tendenca wuslědźenjow wotwidźomna.
Što pak nam nětko pomha, zo je so na 13 šulach mjez 10 a 50 procentami šulerstwa a wučerstwa w ramiku studije na imunizaciju přepytować dało? Na to namakaja slědźerjo cyle jednoru wotmołwu: „Wuslědźić chcychmy, kotru rólu hraja dźěći a młodostni w šulach za wuwiće pandemije“, pisaja w zakónčacym dossieru.
Dźěćaca knihownja a kniharnja k čitanju wabitej
Na kursu robotiki swójski roboter zhotowili
Budyšin (SN/MiR). Dwanaće wobdźělnikow je so minjeny tydźeń w Budyskej digitalnej manufakturje „Dźěłań dźeń“ na Sukelnskej z temu rozestajiło, kotraž towaršnosć dźeń a bóle zaběra. Tam su přewjedli zakładny kurs robotiki. Poskitk je wobłuki kaž elektroniku a programěrowanje, sensory, motory a dalokoposłužowanje kaž tež informacije wo kumštnej inteligency wopřijał. Dźěłarnička słužeše dale k tomu so w CAD-rysowanju wupruwować kaž tež z 3D-ćišćom a rězanjom dźělow z pomocu lazer zaběrać.
48 idejow za rěč
Budyšin (SN/mb). Na druhim wubědźowanju idejow pod hesłom „Rěč zwjazuje. Rěc zwězujo. Sorbisch verbindet“ Załožby za serbski lud je so 48 projektow wobdźěliło. Jury budźe so 13. požnjenca schadźować. Hač čłonojo gremija samsny dźeń dospołnje rozsudźa abo hakle na druhim terminje, je hišće wotewrjene. Jury přisłušeja Syman Blum, Bjarnat Cyž, Jěwa-Marja Čornakec, Robert Engel, Lawrencija Hawšec, Uta Henšelowa, Manfred Hermaš, Stephan Hornak, Šarlota Kušcyc, Ole Schmalfuß, Angela Šurmanowa a Leńka Thomasowa.
Kriterije za pohódnoćenje su na přikład kreatiwita, inowacija, synergije a wudźeržliwosć (Nachhaltigkeit). Cyłkownje mytuja 17 idejow: šěsć króć z 1 000 eurami, štyri króć z 3 500 eurami, štyri króć z 5 000 eurami a trójce z 10 000 eurami. Mjez namjetami, kotrež su ludźo zapodali, namakaš wšelakore projekty, kotrež so z narodnej drastu, serbskimi stawiznami a bajemi zaběraja. Dalše wěnuja so tworjacemu wuměłstwu, dźiwadłu, hudźbje a medijam, tež w digitalnej formje. Wuwiće serbskich hrow a widźomniša serbšćina w zjawnosći stej dalšej temje nimo namjetow za wuwiwanje wšelakich koncepcijow.
Z nowej nawodnicu w Jaworje přebywali
Miłoćicy (SN/MiR). Hortowe dźěći z Malešanskeho dźěćaceho dnjoweho přebywanišća „K wódnemu mužej“, kotrež je w nošerstwje Serbskeho šulskeho towarstwa, wočakuje kóžde lěto wosebity wulět. Prěni prózdninski tydźeń podadźa so woni z nawodnicu kubłanišća a kubłarku na třidnjowski přebytk do Jawory. Samozrozumliwe je, zo kubłarjo, kotřiž dźěći, kotrež su němskeho pochada, přewodźeja, z nimi serbsce rěča.
Direktorka Serbskeje zakładneje „Šule Ćišinskeho“ w ...
Modelowa šula za naslědne zežiwjenje
Budyšin (SN/MiP). Za šulerjow 7. lětnika Budyskeho Serbskeho gymnazija běše wutora wosebity dźeń, wšako njemějachu regularnu wučbu. Město toho je Sakska centrala za přetrjebarjow (VZS) z nimi zakónčacy dźeń zhromadneho projekta pod hesłom „Naslědne zežiwjenje“ přewjedła. Na dohromady třoch dnjach w běhu šulskeho lěta su šulerjo w dźěłarničkach na tutej temje hižo dźěłali. Budyski Serbski gymnazij słuša nětko k třom modelowym šulam za naslědne zežiwjenje w Sakskej. Kubłanske dźěło VZS je wažny wobstatk cyłkowneje Sakskeje strategije za kubłanje w zmysle naslědnosće.
„Čehodla jěmy, štož jěmy – štó abo što nas wobwliwuje? Zežiwidła we wotpadkach – kak to wobeńdu? Što słuša scyła k strowemu zežiwjenju? – W projekće smy ze šulerjemi za wotmołwami na tajke a dalše prašenja pytali a je tež namakali“, praj nam Silvia Melde, zežiwjenska poradźowarka Wojerowskeje filiale VZS. Wona je projekt na Serbskim gymnaziju zahibnyła a chwali spěšnu zwólniwosć a wulku podpěru zamołwitych šule. „To njeje samozrozumliwe! Na druhich šulach to hinak dožiwjam“, wona doda.
Šuler z Kulowa je mjez najlěpšimi
We wobłuku 26. sakskeho wubědźowanja za informatiku je pjeć šulerkow a 30 šulerjow wosebite wuznamjenjenje přijało. Wone słušachu k najlěpšim wobdźělnikam wubědźowanja na polu informatiki.
W cyłku bě so 5 500 wuknjacych z wjace hač 200 zakładnych, wyšich kaž tež šulow za spěchowanje wuknjenja a gymnazijow jako najlěpše talenty po cyłej Sakskej na wurisanju wobdźěliło. 350 wučerjow a wučerkow je swojich chowancow aktiwnje a zwjetša čestnohamtsce podpěrało. Patronatstwo wubědźowanja ma sakski kultusowy minister Christian Piwarz.
24. junija su dobyćerjo na Wysokej šuli Žitawa/Zhorjelc swoje myta přijeli. Hižo dopołdnja w 10 hodź. běchu sej šulerjo a šulerki do wysokeje šule, hdźež běchu wosebite dźěłarnički přihotowane, dojěli. Zdobom mějachu wobdźělnicy składnosć, wšelke temy wopřijace přednoški sćěhować. Potom pak bě napjatosć wulka. Přetož dźěći a młodostni hač do toho wokomika njewědźachu, kotre městno su wobsadźili. Nimo wopisma přijachu myta kaž tablety, on-ear słuchatka a notebooki.
