Choćebuz (SN/at). Start projekta za wožiwjenje delnjoserbšćiny „Zorja“ pobrachowacych zajimcow dla njezwrěšći. Nawopak: 21 ludźi je so hač do 30. měrca, kónca přizjewjenskeho časa, požadało. Woni móža sej předstajić, wot 1. septembra w běhu dźesać měsacow w Dešnje delnjoserbsku rěč nawuknyć.

Za projektoweho nawodu Maksimiliana Hasackeho je to zwjeselace. Wšako běchu do toho tež skeptiske hłosy słyšeć. W prěnim lětniku maja městna za wosom do dźesać kursistow. Wužiwaja-li wšitke, je za kóžde městno tróšku wjace hač dweju zajimcow. Mjeztym je proces wuzwolenja zahajeny. Hasacki w Braniborskim serbskim radiju na to skedźbni, zo su so zajimcy „z indiwidualnym projektom“ přizjewili. Tón budu nětko we wosobinskich rozmołwach předstajić, při čimž zdobom wo swójskim zwisku k Serbstwu a wo předznajomosćach w delnjoserbšćinje rozprawja. „Najwažniše je, kotru motiwaciju woni maja so wobdźělić a serbsku rěč běžnje wob­knježić“, projektowy nawoda wuzbě­hny.

A štóž lětsa wuspěcha nima, móže so klětu znowa za přichodny kurs požadać.

Dźěćaca a młodźinska farma we Wojerecach njeje jeno stroweho zežiwjenja dla znata. Tam wobstajnje cirkusowe projekty přewjeduja, kotrež so wšelakim temam wěnuja.

Wojerecy (KD/SN). Tema Afrika steji w srjedźišću aktualneho cirkusoweho projekta na Wojerowskej dźěćacej a młodźinskej farmje. Wobdźělnicy w starobje šěsć do 17 lět zwučuja balansować, na wulkich kulach běhać, žonglěrować a rejwać. Mjeztym zo sobudźěłaćerka farmy Swetlana Richter z dźěćimi a młodostnymi cirkusowe dźěle programa nazwučuje, wěnuje so Alexandra Wagner ze Serbskeho ludoweho ansambla z nimi třom rejam, w kotrychž afriske zwěrjata takrjec k žiwjenju zbudźa.