Budyšin (SN/MiP). Za šulerjow 7. lětnika Budyskeho Serbskeho gymnazija běše wutora wosebity dźeń, wšako njemějachu regularnu wučbu. Město toho je Sakska centrala za přetrjebarjow (VZS) z nimi zakónčacy dźeń zhromadneho projekta pod hesłom „Naslědne zežiwjenje“ přewjedła. Na dohromady třoch dnjach w běhu šulskeho lěta su šulerjo w dźě­łarničkach na tutej temje hižo dźěłali. ­Budyski Serbski gymnazij słuša nětko k třom modelowym šulam za naslědne zežiwjenje w Sakskej. Kubłanske dźěło VZS je wažny wobstatk cyłkowneje Sakskeje strategije za kubłanje w zmysle naslědnosće.

„Čehodla jěmy, štož jěmy – štó abo što nas wobwliwuje? Zežiwidła we wotpadkach – kak to wobeńdu? Što słuša scyła k strowemu zežiwjenju? – W projekće smy ze šulerjemi za wotmołwami na tajke a dalše prašenja pytali a je tež namakali“, praj nam Silvia Melde, zežiwjenska poradźowarka Wojerowskeje filiale VZS. Wona je projekt na Serbskim gymnaziju zahibnyła a chwali spěšnu zwólniwosć a wulku podpěru zamołwitych šule. „To njeje samozrozumliwe! Na druhich šulach to hinak dožiwjam“, wona doda.

We wobłuku 26. sakskeho wubědźowanja za informatiku je pjeć šulerkow a 30 šulerjow wosebite wuznamjenjenje přijało. Wone słušachu k najlěpšim wobdźělnikam wubědźowanja na polu informatiki.

W cyłku bě so 5 500 wuknjacych z wjace hač 200 zakładnych, wyšich kaž tež šulow za spěchowanje wuknjenja a gymnazijow jako najlěpše talenty po cyłej Sakskej na wurisanju wobdźěliło. 350 wučerjow a wučerkow je swojich chowancow aktiwnje a zwjetša čestnohamtsce podpěrało. Patronatstwo wubědźowanja ma sakski kultusowy minister Christian Piwarz.

24. junija su dobyćerjo na Wysokej šuli Žitawa/Zhorjelc swoje myta přijeli. Hižo dopołdnja w 10 hodź. běchu sej šulerjo a šulerki do wysokeje šule, hdźež běchu wosebite dźěłarnički přihotowane, dojěli. Zdobom mějachu wobdźělnicy składnosć, wšelke temy wopřijace přednoški sćěhować. Potom pak bě napjatosć wulka. Přetož dźěći a młodostni hač do toho wokomika njewědźachu, kotre městno su wobsadźili. Nimo wopisma přijachu myta kaž tablety, on-ear słuchatka a notebooki.

Smjerdźečanske Serbske kubłanske srjedźišćo LIPA kroči w swojej tradiciji z nowymi idejemi dale, so na zetkanišćo serbskich swójbow a serbstwu přichilenych ludźi wuwiwać.

Smjerdźaca (SN/MiR). Mjeztym něhdźe wosom lět ležachu rekwizity a klanki w fundusu Serbskeho šulskeho towarstwa (SŠT), kotrež běše něhdy Mikławš Krawc w swojich inscenacijach zasadźił. Z přistajenjom Hanki Šěnec – zamołwita za rěčne projekty – a Michelle Mikławškec – zamołwita za swójbne kubłanje – wotewrě Serbske šulske towarstwo nětko wulku šansu, wuměłstwo klankarstwa na dobro towarstwa wožiwić. Dźěći, ale tež dorosćeni su z wulkimi wočemi před kulisu na zahrodźe LIPY w Smjerdźacej sedźeli, jako tam z klinkačkom na předstajenje klankodźiwadła witachu.

Michelle Mikławškec je nowa sobudźěłaćerka w Serbskim kubłanskim srjedźišću LIPA w Smjerdźacej. Dźensa 22lětna pochadźa z Rachlowa pola Kulowa. Po maturje na Wojerowskim Lessingowym gymnaziju je so wona na studij socialneje pedagogiki a managementa na Fachowu wysoku šulu do Drježdźan podała. Loni w awgusće je so wona pola Serbskeho šulskeho towarstwa za dźěłom prašała a krótko po tym je dźensniša Wojerowčanka w Ralbičanskim dźěćacym dnjowym přebywanišću dźěłała. „Při tym sym žłobik w Smjerdźacej kaž tež pěstowarnju a hort w Ralbicach zeznała“, wona powěda.