Budyšin (SN/bš). Prěni raz ptači kwas w swjedźenskej drasće swjeća lětsa dźěći Witaj-skupiny Budyskeje pěstowarnje Glückskäfer. Wčera dopołdnja přepoda šwalča Petra Kupcyna 16 ewangelskich swjedźenskich drastow Budyskeho regiona – wosom za holcow a wosom za hólcow. „Bě to wosebite nazhonjenje za mnje, drasty za ewangelski kwasny ćah šić. Jednotliwe drasty sym hižo šiła, kaž na přikład za Malešansku abo Myšečansku pěstowarnju, ale hišće nic dospołny ćah“, rjekny Kupcyna, kotraž hižo nimale 30 lět profesionelnje šwalči. Za projekt bě do toho rešeršowała a so z ewangelskej drastu rozestajiła. Tak wobhoni so pola sobudźěłaćerki Serbskeho muzeja kaž tež dalšeje bywšeje šwalče, kotrejž so wobě z drastu wuznajetej. Nastała je tuž nimale originalna drasta. Kontakt ke Kupcynej nawjazała bě kubłarka Ludmila Wićaz-Wengerowa, kotraž je nawodnica Witaj-skupiny w Glückskäferu. „Smy so za ewangelski ćah rozsudźili, zo bychmy dźěćom bohatosć a rjanosć tuteje drasty zbližili“, rjekny wona na naprašowanje. Dohromady 20 dźěći mjez třomi a šěsć lětami wuknje bjezposrědnje serbsce.