Berlin (B/SN). Za kulturneho statneho ministra Wolframa Weimera su cyrkwje najwjetši kulturni nošerjo Němskeje a zdobom „elementarny wobstatk našeje kulturneje identity“. Minister wopyta historisce wuznamnu ewangelsku wopomnjensku cyrkej kejžora Wylema w Berlinje a přepoda jeje załožbje spěchowanske srědki dźewjeć milionow eurow, zo móhli pomnikoškitany dom saněrować.
Nowa jednaćelka EWTN
Köln (B/SN). Nowa jednaćelka katolskeho telewizijneho sćelaka EWTN w němskorěčnym rumje je Theresia Theuke. Zamołwjaca strategiske a organizatoriske wuwiće chce wona swětowu medijowu syć EWTN dale wuwiwać a nowej generaciji ewangelij posrědkować: „zmužiće, wěrnje a na inspirowace wašnje“. Jeje předchadnik Martin Rothweiler bě sćelak w Němskej wutworił a 25 lět nawjedował. Wón je nětko programowy direktor.
Bamž na kupje Lampedusa był
Rom (B/SN) Zakónčace dokumenty wšěch sydom kontinentalnych konferencow k synodalnemu pućej su nětko zjawnje w interneće na stronje Němskeje biskopskeje konferency přistupne. Wobkedźbowali su so mjez druhim přinoški ze 40 europskich krajow z konserwatiwnymi a progresiwnymi pozicijemi pod hesłom „Jednota w mnohotnosći“.
Ortodoksne jutry
Kijew/Moskwa (B/SN). Jutry w ortodoksnych cyrkwjach běchu minjeny kónc tydźenja. Terminy wobliča so po julianskim abo gregorianskim kalendrje, 2025 swjećimy zrowastanjenje na samsnym dnju. Ukrainjenjo smědźachu hakle njedźelu wot ranja swjećić, dokelž njesmědźachu w nocy dom wopušćić. Ruska je jutrońčku bjez přestawki wójnu w Ukrainje dale wjedła.
Samowólnosć Chiny
Vatikan (B/SN). Knježerstwo w Pekingu je bjez wothłosowanja ze Swjatym stołom biskopa Shen Bina do Shanghaija přesadźiło, hačrunjež wobsteji wot lěta 2018 zrěčenje mjez Chinu a Vatikanom wo zasadźenju biskopow, zdźěli rěčnik Vatikana Matteo Bruni.
Přećiwo přiběracej běrokratiji
Swětowe koparske mišterstwo traje lětsa tak dołho, zo by čłowjek na to tukał, zo su hižo nimo. Ale ně, mamy woprawdźe hišće jedyn tydźeń z kopańcu. Dokelž su Češa a runje tak Němcy turněr hižo dawno wopušćili, dyrbi kóždy Serb kaž kóždy druhi fan na swěće za team być, kiž je woprawdźe wažny – za dobru hru. A tajke su byli a hišće snano budu. Hdyž pak na swětowe mišterstwo hladam, přemysluju tež wo Europeadźe. Nic wo zašłej, kotruž sym jako wulki swjatk dožiwić směł, a tež nic jenož wo přichodnej za dwě lěće. Přemysluju powšitkownje wo tym, što tutón turněr w Serbach a za Serbow najskerje rěka.
K wjećbje přećiwo zapadnym politikarjam namołwjała je w Iranje woblubowana nowina Hamshahri. Wona je kolažu pod hesłom „Lisćina tych, kotřiž čakaja na wjećbu iranskeho ludu“ z jich portretami wozjewiła. Mjez druhim widźiš na tutej tež zwjazkoweho kanclera Friedricha Merza (CDU) a francoskeho prezidenta Emmanuela Macrona. Na prěnim městnje staj prezident USA Donald Trump a israelski prezident Benjamin Netanjahu zwobraznjenaj.
Argentinski kopar Antonio Rattín, kotrehož dla běše swětowy koparski zwjazk FIFA žołte a čerwjene karty zawjedł, je w minjenym tydźenju w starobje 89 lět zemrěł. W swětowych mišterstwach 1966 w Jendźelskej nochcyše wón trawnik wopušćić, kaž běše jemu sudnik to přikazał. Jenož policisća, kotrychž běchu na pomoc wołali, su Argentinjana na kóncu přeswědčili, zo njech na sudnika posłucha.
Před dobrymaj lětomaj je domjacy lěkar swoju praksu w Chrósćicach zawrěł. W druhich kónčinach Łužicy je situacija podobna. Mnohim ludźom je to zarězk, kotryž so dołho dale wuskutkuje. Štóž fachoweho lěkarja trjeba, jědźe dawno hižo do Kamjenca, Wojerec abo Budyšina. Za někotrežkuli lěkowanje jědu pacienća samo hač do Drježdźan abo Zhorjelca. Dźěławi dyrbja za to dźeń dowola wzać. Za staršich ludźi, kiž sami awto nimaja, je kóždy lěkarski termin logistiske wužadanje. Štóž je na bus abo ćah pokazany, je často wjacore hodźiny po puću – za termin, kotryž traje snano jenož 15 mjeńšin. Tu njeńdźe jenož wo medicinske zastaranje. Dźe wo prašenje, kak žiwjenjahódny ma wjesny rum w přichodźe być. Politika rěči wo runohódnych žiwjenskich poměrach. Tola štóž je na wsy we Łužicy žiwy, dožiwja husto to nawopačne. Mjeztym zo je w městach wuběr lěkarskich praksow dosć wulki, je kóžda wjesna praksa, kotraž so zawrěje, dalša dźěra w syći medicinskeho zastaranja ludźi.
