Kamjenica (dpa/SN). Kóždy wosmy dźěławy w Sakskej dźěła w rjemjeslniskim powołanju. Z tym je swobodny stat jasnje nad cyłoněmskim přerězkom, sakska regionalna direkcija Zwjazkoweje agentury za dźěło wčera zdźěli. Sakska ma runja­ Saksko-Anhaltskej 11,8 procentow rjemjeslnikow a je z tym w zwjazkowym přirunaju na štwórtym městnje. Na prěnim městnje je Durinska z 12,3 procen­tami. W sakskim přirunanju stejitej Zhorjelski­ a Rudnohórski wokrjes w statistice prědku: Tam dźěła kóždy šesty w rjemjesle.

Breitenbuch za spjeće Łobja

Drježdźany (SN). Sakski wobswětowy minister Georg-Ludwig von Breitenbuch (CDU) je so za planowane spjeće Łobja pola Děčína wuprajił. Tuta naprawa, kotruž planuje čěske knježerstwo za lěto 2029, změje wulke dobroty za swobodny stat hladajo na ekologiju rěki a jeje spušćomniše wužiwanje za łódźnistwo. Rizikow za přirodu, kwalitu wody a wobstatk rybow dla je sakske knježerstwo spjeće Łobja dotal stajnje wotpokazało.

Zwadna inwesticija Red Bull

Rom (B/SN) Zakónčace dokumenty wšěch sydom kontinentalnych konferencow k synodalnemu pućej su nětko zjawnje w interneće na stronje Němskeje biskopskeje konferency přistupne. Wobkedźbowali su so mjez druhim přinoški ze 40 europskich krajow z konserwatiwnymi a progresiwnymi pozicijemi pod hesłom „Jednota w mnohotnosći“.

Ortodoksne jutry

Kijew/Moskwa (B/SN). Jutry w ortodoksnych cyrkwjach běchu minjeny kónc tydźenja. Terminy wobliča so po julianskim abo gregorianskim kalendrje, 2025 swjećimy zrowastanjenje na samsnym dnju. Ukrainjenjo smědźachu hakle njedźelu wot ranja swjećić, dokelž njesmědźachu w nocy dom wopušćić. Ruska je jutrońčku bjez přestawki wójnu w Ukrainje dale wjedła.

Samowólnosć Chiny

Vatikan (B/SN). Knježerstwo w Pekingu je bjez wothłosowanja ze Swjatym stołom biskopa Shen Bina do Shanghaija přesadźiło, hačrunjež wobsteji wot lěta 2018 zrěčenje mjez Chinu a Vatikanom wo zasadźenju biskopow, zdźěli rěčnik Vatikana Matteo Bruni.

Přećiwo přiběracej běrokratiji

Wo ruskim pospyće, Polakow a Čechow mjez sobu našćuwać

Český Těšín/Ciezsyn (SN/LuNo). Ruske prowokacije w srjedźnej Europje so kopja. W běhu minjeneho měsaca su to ryzy teroristiske napady w Němskej a Europje byli, na přikład na lětanišćo w Lipsku abo na brónjenske twornje w Pólskej, Słowakskej a Estiskej. Na wuchodnej mjezy NATO so prawidłownje truty „zabłudźa“. Póndźelu je pólske ministerstwo narodneho zakitowanja zdźěliło, zo su při pobrjohu Baltiskeho morja pola Jarosławieca ruski trut našli.

Ruske strategije prowokacije pak su tež subtilniše, kaž je so kónc žnjenca na čěsko-pólskej mjezy pokazało. Wobydlerjo we wokolinje městow Ciezsyn a Český Těšín dožiwichu w interneće wulku kampanju, w kotrejž rěkaše, zo chce Pólska dźěl Čěskeje wobsadźić. Ciezsyn je, po­dobnje Zhorjelcej, dźělene namjezne město, z pólskej a čěskej połojcu. Wo tute město a jeho wokolinu stej stataj něhdy wojowałoj. Dźensa – po generacijach, kiž to hinak njeznaja – njeje dźělenje hižo tema­. Hač na małe wuwzaće: Přeco hišće njejstej stataj něhdźe 370 hektarow wopřijacy areal mjezy jasnje definowałoj.

Modelka Gloria-Sophie Burkandt, najstarša dźowka šefa CSU Markusa Södera, je knihu wo swojej generaciji napisała, kotraž póndźelu pod titulom „Generacija KI – w nowym swěće čłowjescy wostać“ wuńdźe. W předsłowje piše 27lětna, zo wěnuje ju „wšěm tym, kotřiž wědźa, zo smy runje w času wulkeje kulturneje změny žiwi, a kotřiž su zwólniwi do­kładnje připosłuchać, wuknyć a mosty twarić“.

Najwjetši mórski park wětrnikow w Němskej je energijowe předewzaće EnBW wčera wotewrěło. Wón leži w Sewjernym morju něhdźe 110 kilometrow před kupu Helgoland. Dohromady steji tam 64 wětrnikow danskeho zhotowjerja Vestas, kiž maja cyłkownu kapacitu 960 megawattow. Předewzaće EnBW je ně­hdźe 2,4 miliardy eurow do projekta inwestowało.

„Móžemoj serbować? Sy so po mojim zašłym naprašowanju polěpšił?“, woprašach so zaso raz agenta kumštneje inteligency (KI). Sym dźě na nowostki wćipny. W minjenych tydźenjach sym nastawki čitał a podcasty słuchał, hdźež rěkaše, zo su najnowše modele KI mócniše, hač sej myslimy. Štož jich dźěławosć nastupa, su wušikniše, wobrotniše a klewerniše hač čłowjek. Strach so najlěpje předawa, tola wjeršk zašłych dnjow bě pozitiwna informacija, zo su robotery w běhu 88 hodźinow matematiski problem rozrisali, kotryž ludźo w běhu sto lět wujasnić njezamóchu. (Kaž so pozdźišo wopokaza, je realita kaž přeco pisaniša.)

Hinaše su powěsće wo hororu kumštneje inteligency a připowědźenja kónca swěta. Zabudźemy pak, zo je antichryst ciwilizaciji hižo wjackróć hrozył a zo smy wot ličakow dawno wohroženi, dokelž so banki, milinarnje, wobchad w powětře a na kolijach digitalnje rjaduja.