Marek Krawc rozprawja wo aktualnje rozjimanych temach w Čěskej
Złaté Hory. Čěska chce drohometale pod Jeseníkom (Altvatergebirge) wudobywać. Geologojo mějachu zwěsćić, hač so to zadani. Fachowcy statneho předewzaća Diamo, kotrež geologiske točenja přewjeduje, su před tydźenjomaj swoje daty wozjewili. Blisko Zlatych Horow, małeho městačka na sewjernej kromje Jeseníka, su wjace złota namakali, hač běchu wočakowali. Po studiji předewzaća leži tam při bywšich podkopkach skoro jědnaće tonow drohometala, z kotrychž hodźała so połojca wuryć. Ladislav Pašek, zastupowacy direktor Diama, zdźěli, zo bě jeho firma hač do 250 metrow pod bywšimi šachtami točiła. Při tym běchu zwěsćili, zo wupřestrěwaja so woršty złota hišće dale do horow, a zo su samo šěrše. Pašek trochuje, zo je drohometal 30 miliardow krónow (1,24 miliardow eurow) hódny. Nimo złota je předewzaće tež na 8,6 tonow slěbra, 25 000 tonow cynka, 5 600 tonow kopora a 1 600 tonow wołoja storčiło. „A hišće dalši metal, mjenujcy galium, smy tam našli. Tutón słuša do najdrohotnišich surowiznow w Europskej uniji“, wě Ladislav Pešek.
