Namołwja cyrkej k jednoće

Montag, 18. Oktober 2021 geschrieben von:

Vatikan (B/SN). Bamž Franciskus wu­zběhny na wotewrjenju swětoweje sy­nody, zo njeje wona žane naprašowanje ludno­sće. „Štóž sej mysli, zo ma wšitko wostać, kaž je stajnje było, čas, w kotrymž smy žiwi, chutnje njebjerje. Bjez Swja­teho Ducha žana synoda njebudźe.“ Na spočatku je Franciskus cyrkej k jed­noće, zmužitosći a angažementej namołwjał. „Mamy drje postupy we wobłuku parti­cipacije, njemóžemy pak njespokojnosć a bědu mnohich pastoralnych sobudźěłaćerjow, wosebje žonow, a dalšich organow w biskopstwach a wosadach přewidźeć.“ Poradźić so ma, zo cyrkej a duchowni zaso wjetšu mjezsobnosć z wěriwymi haja.

Kanclerka Merkel pola bamža

Kak su křesćenjo wolili

Montag, 11. Oktober 2021 geschrieben von:

Mannheim (B/SN). Kak su katolscy a ewan­gelscy wěriwi Němskeje zwjazkowy sejm wolili, je wosebita slědźerska skupina zwěsćiła. Tak je so zwjazanosć křesćanow k CDU/CSU dale pomjeńšiła, na tamnej stronje je jich SPD bóle k sebi wjazać zamó­hła. Katolikojo su z 35 procentami swój křižik pola CDU/CSU stajili (2017: 44 proc.), protestanća ze 24 procentami (2017: 33 proc.). Za SPD rozsudźi so 23 procentow katolikow (2017: 18 proc.) a 30 procentow protestantow (2017: 24 proc.). Ličby bazuja na 41 373 woprašanych wolerkow a wolerjow. Mjez katolikami su Zelenych 13 procentow, FDP 11 proc., AfD 8 proc. a Lěwicu tři procenty wolili. Mjez ewangelskimi wolerjemi běchu za Zelenych 15 proc., za FDP 11 proc., za AfD 9 proc. a za Lěwicu štyri procenty.

Po synodalnej zhromadźiznje

Nowy prezident CCEE

Montag, 04. Oktober 2021 geschrieben von:

Rom (B/SN). Składnostnje 50lětneho wobstaća Rady europskeje biskopskeje konferency (CCEE) wotmě so minjeny ty­dźeń­­ posedźenje w Romje. Tam su 60lětneho arcybiskopa Vilniusa a předsydu Litawskeje biskopskeje konferency Gintarasa Linasa Grusasa na pjeć lět za noweho prezidenta wuzwolili. W USA rodźeny měšnik naslěduje 78lětneho italskeho kardinala Angela Bagnasca, kiž je gremij wot lěta 2016 nawjedował. Rada europskeje biskopskeje konferency ma swoje sydło w šwicarskim St. Gallenje. Wona chce zhromadne skutkowanje biskopow na cyłym kontinenće spěchować. 1971 załoženemu gremijej přisłuša 39 čłonow. Zhromadnje reprezentuja woni katolsku cyrkej w 45 krajach Europy.

Přihotuja swětowu synodu

Praša so za statusom cyrkwje

Montag, 27. September 2021 geschrieben von:

Berlin (B/SN). Za wěrjomnosću a statusom cyrkwjow w Němskej praša so přiběrajcy prelat a nawoda komisariata němskich katolskich biskopow w Berlinje Karl Jüsten. Tež cyrkej steji před dospołnje nowymi wužadanjemi, ale Jüsten je přiwšěm optimistiski, zo móže wona swój wid politice přeswědčiwje posrědkować. „Nimo powšitkowneje sekularizacije stej wěrjomnosć a status cyrkwje seksualnych znjewužiwanjow dla přiběrajcy do prašenja stajenej ... Mamy politice naše předstawy wo mandźelstwje a swójbje sylnišo sposrědkować“, wuzběhny 60lětny zastupjer Berlinskich biskopow napřećo katolskej powěsćerni KNA.

Nuncius namołwja k jednoće

Rjadniske žiwjenje njezańdźe

Montag, 20. September 2021 geschrieben von:

Vatikan (B/SN). Wěšćenjam, zo rjadniske žiwjenje bórze zańdźe, je bamž Franciskus 11. septembra na zhromadźiznje generalneho kapitla karmelitow bjez črijow raznje znapřećiwił: „Žiwjenje w modlitwje škita před psychologizmami, spiritualizmami a wopačnej modernizaciju.“ 95 wot něhdźe 4 000 karmelitow schadźowaše so hač do 14. septembra w Romje, hdźež wuzwolichu mjez druhim noweho 55lětneho nawodu Miguela Margueza Callu za generalneho wyška.

Kónčna rozprawa předleži

Synoda přihotowana

Montag, 13. September 2021 geschrieben von:

Vatikan (B/SN). Nazymu zahaji so swě­towa synoda katolskeje cyrkwje, we wo­błuku kotrejež maja biskopja a lajkojo dwě lěće wuradźować. Za to su minjeny tydźeń na nowinarskej konferency při­hotowanski dokument čłonam synody přepodali, zwurazni nawoda vatikan­skeho sekretariata synody kurijowy kardinal Mario Grech. W oktobrje so wu­radźowanja synodalneje zhro­madźizny oficialnje zahaja, potom klětu w lěću ­bu­- dźe druha kontinentalna faza. Zakónčaca synodalna zhromadźizna biskopow a lajkow ma so w oktobrje 2023 wotměć. Na synodalnym procesu chcedźa po cyłym swěće samozrozumjenje katolskeje cyr­kwje sylnić a regionalnje kaž tež ­mje­zy­- narodnje wažne temy přichoda zdźěłać.

Rozprawa swětoweje cyrkwje

Pomhać žonam w Afghanistanje

Montag, 06. September 2021 geschrieben von:

Vatikan (B/SN). Jezidiska nošerka No­beloweho měroweho myta Nadia Murad je na priwatnej awdiency z bamžom Franciskusom wo tym rěčała, kak móhła katolska cyrkej podpěrać wosebje žony, etnisko-nabožnu ludowu skupinu jezidow a dalše narodne mjeńšiny w Afghanistanje. Bamž jej pomoc přilubi. 28lětnu wojowarku wo čłowjeske prawa bě teroristiska milica Islamski stat (IS) w lěće 2014 zawlekła. Na dramatiske wašnje wona tero­rej do Němskeje wućekny. Wot toho­ časa­ wojuje Murad jako wosebita posołka přećiwo wikowanju z ludźimi a wo to, złóstnistwa IS pochłostać. Lěta 2018 spožčichu jej a kongoleskemu lěkarjej Denisej Mukwegej Nobelowe měrowe myto. Wobeju počesćichu za wurjadny bój přećiwo seksualnej namocy w času wójnow a wojerskich konfliktow.

Ličba ateistow dale přiběra

Bamž radźi so šćěpić dać

Montag, 30. August 2021 geschrieben von:

Vatikan (B/SN). We wosebitej widejowej powěsći je bamž namołwjał so šćěpić dać, dokelž je to „akt lubosće za sebje, za swójb­nych a přećelow kaž tež za wšě ludy“. Pontifeks měni, zo je to jednore wašnje, so na dobro wšěch zasadźić, wosebje najčućiwišim napřećo. Widejowa powěsć je dźěl swět wopřijaceje šćě­pjenskeje kampanje powšitkownowužitneje ameriskeje organizacije Ad Council „It’s up to you“ (Zaleži na tebi).

Wjace kanonikow biskopa woli

Drježdźany (B/SN). Drježdźansko-Mišnjanski biskop Heinrich Timmerevers je spočatk awgusta nowe statuty tachantskeho kapitla swjateho Pětra Drježdźany wobkrućił. Hłowna nowosć je, zo prop­staj z Lipska a Kamjenicy kaž tež farar z města Gera jako čestni tachantscy kapitu­larojo přez swoje zastojnstwo nimo­ regularnych kapitularow biskopa wola. Po statuće staj tachantskaj fararjej w Drježdźanach a Budyšinje na kóždy pad wobdźělenaj, nimo toho ma znajmjeńša jedyn Serb jako kanonik krute městno w tachantskim kapitlu. Nowy tachant­ski kapitl chcedźa 14. nowembra 2021 we wobłuku nyšpora w Budyskej tachantskej cyrkwi spřisahać a zapokazać.

Ćěkancam lěpje pomhać

Montag, 23. August 2021 geschrieben von:

Aachen/Berlin (B/SN). Katolski pomocny skutk missio starosći so wo sylnje wohroženych němskich staćanow a něhdyšich domoródnych pomocnikow němskeho wójska a jich přistajenych w Afghanistanje. Wosebje wohrožene su tež žony a křesćanske mjeńšiny po přewzaću mocy přez radikalnych islamistiskich talibanow. „Hnydomna pomoc a podpěra ćěkancam ma so čujomnje zwyšić, ale tež susodne kraje maja so sylnišo podpěrać, dokelž přichadźeja jim dźeń a wjace ćěkancow. Wosebje Indiska budźe prawdźepodobnje wulke syły ćěkancow z Hindukuša přijimać“, praji missio.

Nabožina wažna za towaršnosć

Online-kemše mnohich docpěli

Montag, 16. August 2021 geschrieben von:

Münster (B/SN). Wjele wosadow je w času koronapandemije Bože słužby přez kanal Youtube wusywało. Nicole Stock-hoff z biskopstwa Münster měni: „Digitalne komunikaciske formy wobohaćeja, njemóža pak kemše na městnje narunać. Prezencne kemše maja so znowa zesyl­nić a so z kwalitatiwnje naročnymi swjedźenjemi stać.“ Přiwšěm běchu wosady překwapjene, kelko starych ludźi je na zakładźe internetneho poskitka Bože słužby sobu swjećiło. Docpěli su tež ludźi, kiž hewak do cyrkwje njechodźa.

Biskop Biedenkopfa wuzběhnył

Anzeige