Swjeća hody w januaru
Moskwa/Kijew (B/SN). W Ruskej a na Ukrainje swjećachu hody hakle 7. januara. Kaž ruska powěsćernja rozprawja, běchu po cyłym kraju swjatočne nócne hodowne wobrjady. Patriarch Kyril jako najwyši zastupjer ruskeje ortodoksneje cyrkwje je w Moskowskej katedrali Chrysta Wumóžnika Božu mšu swjećił, na kotrejž bě nimo stow wěriwych tež ministerski prezident Dmitrij Mjedwjedew. Ličba wěriwych w Ruskej dale přiběra.
Kniha jenož hišće internetnje
Drježdźany (B/SN). We wědomostnej publikaciji wo Mišnjanskej diecezanskej synodźe (1969–1971) wudawaćelej, prelat Dieter Grande a bywši nawoda Domu biskopa Bena w Smochćicach dr. Peter-Paul Straube, wobswětlatej, kajke běchu puć a nadawki cyrkwje pod ćežkimi wuměnjenjemi socializma w NDR. W Benno-nakładnistwje wušła kniha je wupředata. Dokelž pak je 30 lět po powalenju murje zajim dale wulki, nakładnistwo na swojej platformje wozjewja, zo je cyły tekst knihi nětko internetnje přistupny, a to pod Grande, Dieter / Straube, Peter-Paul, Die Synode des Bistums Meißen 1969–1971. Die Antwort einer Ortskirche auf das Zweite Vatikanische Konzil. Leipzig 2005.
Zjawne hody wupadnyli
Bagdad (B/SN). Chaldejsko-katolska cyrkej w Iraku, jedna z najwjetšich křesćanskich zhromadźenstwow kraja, njeje žane zjawne hody swjećiła. Kaž bě jeje patriarch kardinal Louis Raphael I. Sako w hodownym poselstwje pisomnje wozjewił, respektowachu tak ludźi, kotřiž běchu při protestach přećiwo irakskemu knježerstwu žiwjenje přisadźili abo so zranili. „Njezmějemy wupyšene hodowne štomy w cyrkwjach a na dróhach žane swjedźenje a žane přijeće w patriarchaće“, zdźěli Sako krótko do hód. Chaldejsko-katolska cyrkej w Iraku je z Romom zwjazana cyrkej wuchodosyriskeho ritusa a skutkuje w cyrkwinskim zhromadźenstwje z bamžom w Romje.
Wliw křesćanstwa woteběra
Pakćiki z darami dóšli
Erfurt (B/SN). 70. pomocny transport durinskich kolpingowych swójbow je w Rumunskej, 1 900 pakćikow a dalše dary, su partnerojo dźakownje přijimali. Rozdźělenje je so derje radźiło, tak zo móža so mnohe dźěći w nuzy, swójby a socialne zarjadnišća w regionje Timişoara, Mocrea a Ineu nad darom z Němskeje wjeselić.
Swěčka za synodalny puć
Zhorjelc (B/SN). W Zhorjelskej Jakubowej katedrali swěći so nětko dwě lěće wosebita swěčka za synodalny puć. Po słowach biskopa Wolfganga Ipolta pokazuje wona na „ryzy znamjenja časa“ a rozeznawa mjez „časowym duchom a mainstreamom“. Němscy biskopja so na to dojednachu, zo ma so w kóždej katedrali tajka swěčka swěćić, kotraž dopomina na zhromadny puć wosadow.
70 lět w słužbje bamžow
Přeje sej žiwu cyrkej
Drježdźany (B/SN). Sakski ministerski prezident Michael Kretschmer (CDU) je ewangelsku cyrkej pohonjował, so hišće bóle za towaršnosć angažować. Stat je žiwy wot wuměnjenjow, kotrež njemóže wón sam dać, nic jeno wot zakonjow a prawow, ale tež wot normow a hódnotow, rjekny Kretschmer před sobustawami synody Ewangelskeje cyrkwje w Němskej (EKD). Cyrkwinski parlament ma swoju zhromadźiznu z ćežišćowej temu „Měrowa etika“. „Ja přeju sej žiwu cyrkej“, rjekny Kretschmer w swojim postrownym słowje a pokaza na rólu ewangelskeje cyrkwje na kóncu NDR 1989. „Bjez angažowanych cyrkwjow, bjez angažowanych fararjow a fararkow njeby nazymski přewrót móžny był“, rjekny ministerski prezident.
Diakonija wita koaliciju
Přeća božemu dźěsću słali
Engelskirchen (B/SN). W hórskej krajinje wotewrěchu tež lětsa zaso wosebity hodowny póstowy zarjad. Prěni dźěłowy dźeń běše 14. nowember, kaž tamniši póstowy jandźel a dalši pomocnicy Němskeho pósta zdźělichu. Dźěći móžachu zaso swoje listy z přećemi božemu dźěsću abo rumpodichej pósłać. Póst w Engelskirchenje je jedyn ze sydom specielnych hodownych zarjadow po cyłej Němskej, a tajke wužiwaja rady dźěći z tu- a wukraja. Lětsa smědźachu poslednje listy tři dny do patoržicy na póstowym zarjedźe předležeć. Loni dóstachu tam něhdźe 288 000 listow.
Spěwacy adwentny kalender
Magdeburg (B/SN). Ewangelska cyrkej w srjedźnej Němskej (EKM) je lětsa prěni króć tak mjenowany spěwacy adwentny kalender w dohodownym času zarjadowała. Krajny biskop Friedrich Kramer zanošuje tam wšědnje cyrkwinski znaty adwentny spěw, ale tež mjenje znate adwentne kěrluše ze spěwarskich. Widejo za słuchanje a sobuspěwanje pokazuja hišće hač do jutřišeho, 24. hodownika, pod www.ekmd.de/advent.
Křesćanske wosady nastawaja
Z „Jězusowymi črijemi“
New York (B/SN). Firma za produktowy design je tak mjenowany „Jězusowy črij“ kreěrowała a z hrónčkom „Walk on water“ (Běž po wodźe) za to wabiła. Wone 25 porow čriji wupadaja kaž sportowe črije a běchu spočatk oktobra w běhu minutow wupředate. 97 komorkojtych pucherjow w póduši běhanskich čriji su ze swjećenej wodu z rěki Jordana pjelnjene. Křižik debi šnórowanje, zady na jazyku je čerwjeny dypk, symbolizowacy krej Jězusa. Na wonkownej stronje wobeju čriji je w čornej barbje napisane MT.14:25. To je pokazka na sćenje swj. Mateja w Nowym zakonju a poćahuje so na to, zo bě Jězus po morju kročo so k stražnikam bližił, kotřiž pak spachu. Jězus jich wustróžanych tróštowaše ze słowami: „Njebojće so, ja to sym!“ Por Jězusowych čriji płaćeše 3 000 dolarow.
Wosady hromadu połožili
Prawicarstwu so spřećiwjeć
Drježdźany (B/SN). Ewangelska cyrkej w Němskej (EKD) chce prawicarske tendency w swójskim sobustawstwje přepytować. To praji prezeska synody EKD Irmgard Schwaetzer. Synoda bě so hižo před lětami z tematiku zaběrała. „Dyrbimy wědźeć, hač tež přisłušnicy cyrkwje prawicarske nahlady zastupuja a kak móžemy so z tym rozestajeć.“ Nimo toho ma so etnografisce wuslědźić wobchad cyrkwinskich wosadow ze socialnopolitiskimi a kulturnymi wužadanjemi. Z prawicarstwom so rozestajeć je nadawk kóždeho křesćana.
Antisemitizm dale prezentny
Wočakuje wobćežne reformy
Osnabrück (dpa/SN). Katolska cyrkej Němskeje steji před wobšěrnym nutřkocyrkwinskim diskusijnym a reformowym procesom, při kotrymž maja lajkojo a klerikalni zasadne prašenja rozjimać. Osnabrückski biskop Franz-Josef Bode widźi swoju cyrkej w zasadnym konflikće mjez reformerami a konserwatiwnymi. „Synodalny puć je napinacy a trjeba swój čas“, rjekny wón powěsćerni dpa. Dwě lěće trajacy proces běchu wčera w tachantskich cyrkwjach Němskeje zahajili. Při tym su jeno za to zhotowjene swěčki zapalili. Hižo na swojej nalětnjej konferency w Lingenje běchu so biskopja na diskusijny proces z lajskej organizaciju, Centralnym komitejom katolikow Němskeje, dojednali. W štyrjoch forumach chcedźa nětko wo wjacorych ćežišćach diskutować. Su to prašenje mocy w cyrkwi, žiwjenske formy měšnikow, splažnosć abo zastojnstwa a słužby žonow w cyrkwi. Biskop Bode warnuje před přewulkimi wočakowanjemi na woběmaj stronomaj. „Njeje derje proces wuměny zahajić, hdyž wuslědk hižo znajemy.
Dopomina na přesćěhanych
Vatikan (B/SN). Na dnju chudych duši je bamž Franciskus na wosud přesćěhanych křesćanow dopomnił. „Mamy dźensa hišće přesćěhanych křesćanow, wjace hač w prěnich lětstotkach“, rjekny wón na Božej mši w Priscilla-katakombach. W mnohich krajach je křesćan być złóstnistwo a zakazane“, rjekny bamž. Zdobom přiwoła wón kóždemu, zo by swój wosud Bohej dowěrił: W Božimaj rukomaj smy my wěsći, wšojedne, što so stawa.“
6. dekada wo měr zakónčena
Bonn/Kassel (B/SN). „Měrowy klima“ bě tema dekady, kotraž wotmě so wot 10. do 20. nowembra w němskich cyrkwinskich wosadach a měrowych iniciatiwach. Pod motom skedźbnichu nošerske organizacije na zwiski klimoweje změny a jeje konsekwency za měr. „Što ma wot nas ludźi zawinowana změna klimy z měrom činić, a kak ma dale hić, budźe wona sobu wina na přichodnych wójnach a konfliktach?“, přinjese Jan Gildemeister wot měroweje dekady naležnosć na dypk. W dźěłowych materialijach maja šansy a móžnosće widźomne być, kak ma so konfliktam, zawinowane přez klimu, zadźěwać. Nětko chcedźa wuslědki wuradźowanjow zwoprawdźić.
Dźakny nyšpor z biskopom
Dialog ze židami pěstować
Berlin (B/SN). „Přećelstwo z dźěćimi Israela słuša k žiwjenju wučomnikow Jězusa.“ Tale dźensniša sada bamža Franciskusa bě před 70 lětami za wjetšinu utopija. Ćeža lětstotki trajaceho křesćanskeho antijudaizma a nacionalsocialistiskeje propagandy je ćežke brěmjo, kotrež njeda so za někotre lěta wottřasć. Tele nazhonjenja dyrbjachu tež zběrać sobustawojo towarstwow za křesćansko-židowske zhromadne dźěło, zjednoćenych w Němskej koordinaciskej radźe. Zmužitosć, wutrajnosć a wobstajnosć, z kotrymiž so za křesćansko-židowske zhromadne dźěło zasadźeja, su wobdźiwajomne. To płaći wosebje za židow, kotřiž su so jenož něšto lět po wójnje wo zhromadne dźěło z křesćanami prócowali. To je dar křesćanam, kotryž měła Němska biskopska konferenca dźakownje přiwzać a skutkowanje towarstwow podpěrać.
Što sej ludźo přeja?
