Budyšin/Lipsk (SN/at). Stejnišća za spo­srědkowanje medijoweje kompetency w Hornjej Łužicy su jasne. Medijowa rada Sakskeho krajneho wustawa za priwatny rozhłós a nowe medije SLM je na njedawnym posedźenju spěchowanje partnerow w dohromady 15 regionalnych kruhach skutkowanja po cyłej Sakskej wobzamknyła. Zwjeselace je, zo móže Medijowa syć Łužica swoje dźěło hač do 31. decembra 2027 pokročować. K jeje partneram słušatej zdobom Załožba za serbski lud a Domowina.

Mjez spěchowanymi projektnymi nošerjemi su za wobłuki Budyšin, Kamjenc a Radeberg Budyski Kamjentny dom, za kónčiny Zhorjelc, Lubij a Žitawa Kulturna- a dalekubłanska towaršnosć zwr Ludoweje uniwersity „Třikrajowy róžk“ w Lubiju a za wobłuki Wojerecy, Niska a Běła Woda Wojerowska kulturna fabrika.

SLM podpěra Medijowu syć Łužicu tež hižo w prěnjej spěchowanskej dobje, kotraž traje hišće hač do kónca lěta. Mjez poskitkami su hłownje přednoški wo bjezstrašnym hibaju w interneće, ale runje tak, kak šmóratko prawje posłužuješ. Poskitki informuja tež w serbskej rěči.

Hač wjesne hrajkanišćo abo wědomosć za dźěći – njeje žaneje temy, kotrejež so 16-lětna Wěteńčanka Klara Bjedrichec w swojim prózdninskim dźěle njejima. Tak so na jednym dnju wobhoni, štó sej tuchwilu rady kotry słód lodu popřeje, a na druhim dnju wo kubłanskopolitiskim prašenju rešeršuje. Štóž ma kaž wona jedynku w serbšćinje a w požadanju poskićuje, „wšitke nadawki wukonjeć, kotrež maja so činić“, je we wšědnej produkciji serbskeho dźenika wosebje witany. Hižo rańše posedźenje je drje po jeje měnjenju „přeco jara zajimawe“, ale „to dźe poměrnje spěšnje a druhdy dyrbju so koncentrować, zo bych wšitko zrozumiła.“

Jej so jara lubi, zo móže „kaž prawa redaktorka“ sobu dźěłać. A hdyž je wotewrjenych prašenjow, ma „přeco přećelnu Milenku Rječcynu poboku, kotraž mi rady pomha.“ Do toho běše Klara hižo dwójce składnostnje akciskeho dnja „genialsozial“ nadawki za Dźěćiznak přewzała. Honorar za dźěło w ramiku tuteje akcije so za socialne projekty wužiwa. Po abiturje chce Klara najprjedy lěto po swěće pućować. W tutym času móže potom zdobom rozsud wo powołanju dozrawić.

Za bulom honi 17lětny Julius Paška w mustwje SJ Chrósćic abo w lěćnej přestawce z bratromaj na sportnišću – za čas swojeho prózdninskeho dźěła w našej redakciji je so samo wo europskim mišterstwje pjera jimał a přilopk pisał. Kaž je we Worklecach bydlacy šuler 11. lětnika Serbskeho gymnazija sam prajił, „tu pisaš teksty a něšto noweho nazhoniš, njewariš kofej abo njerjedźiš kamorčki.“ Sobustaw Chróšćanskeho a dekanatneho młodźinskeho kružka a Worklečanskeho młodźinskeho kluba spěwa w 1. Serbskej kulturnej brigadźe a pisa tež priwatnje rady teksty. To pytnješ na jeho rjanej dobrej serbšćinje, tohodla so wjeselimy, zo smy w perspektiwje Juliusa na powołanske žiwjenje – „něšto z dźěćimi abo redaktor Serbskich Nowin“ – jedna opcija.

Njech so ludźo w přichodźe tak za rěč zajimuja kaž tuchwilu za drastu – to přeje sej Katalin Porackojc. 41lětna je wot najnowšeho takrjec oficielnje nowa šefredaktorka Noweho Casnika, funkciju je hižo wot lońšeho komisarisce wukonjała. Zo by so intensiwnišo lubowanej delnjoserbšćinje wěnowała, běše dźowce Martiny Golašojc najsylniši motiw, do redakcije NC zastupić. Žurnalistisce je runja maćeri hižo wjacore lěta za serbski program RBB dźěłała. Běžnje serbowała je pak hakle jako sobudźěłaćerka w běrowje Domowiny w Choćebuzu, čehoždla je tehdomnišemu zastupowacemu jednaćelej třěšneho zwjazka Haraldej Kóńcakej dźakowna, zo wón ze wšěmi konsekwentnje serbowaše.