Budyšin (SN/bn). „East tales“ (stawiznički wuchoda) mjenuje mjezynarodnje renoměrowany serbisko-pólski cyłk Duo Alianda koncertny program, z kotrymž so wčera lětuše Łužiske hudźbne lěćo zahaji. Saksofonist Michał Knot a akordeonist Bogdan Laketic prezentowaštaj na arealu bywšeho Budyskeho Woclo- a sudobjotwarstwa swojorazne swójske wobdźěłanja twórbow přewažnje jendźelskich mištrow baroka, kotrež (zdźěla) z adapcijemi tohorunja jendźelskeho rocka wudospołništaj. Na wysokim rjemjeslniskim niwowje zahorištaj publikum na přikład z kompozicijemi Henryja Purcella abo Johna Dowlanda a klasikarjemi skupinow The Beatles abo Queen. W běhu programa dźakowaštaj so za přeprošenje do Budyšina, hdźež prěni raz zahudźištaj, kaž tež za rjanu překwapjenku: „Smój hižo wjace hač 1 000 króć po wšěm swěće wustupiłoj, ale žonop za to hišće ženje dóstałoj njesmoj.“
Dźensa před 80 lětami, 13. februara 1945, bu z najzrudnišim dnjom za saksku stolicu Drježdźany. Dotal njebu wulkoměsto nad Łobjom, kotrež bě swojich krasnych baroknych twarow dla swětoznata metropola, wot ameriskich a jendźelskich lětadłow bombardowane. Sowjetska armeja steješe hižo sto kilometrow wuchodnje nad łužiskej Nysu, hdyž aliěrowane komanda přikaza Drježdźany přez bombardowanje zničić. Dwě hodźinje do połnocy 13. februara k 14. dnju tutoho měsaca zahaji so hoberski nalět ameriskich a jendźelskich wójnskich lětadłow na z ćěkancami z wuchodneje Němskeje a ze zranjenymi wojakami přepjelnjene wulkoměsto.
Hodźinje dołho mjetachu bomby na Stare a Nowe město a na dalše bydlenske wobwody Drježdźan. Domy so sypnychu a palachu so, tohorunja hasy, dróhi a naměsta, dokelž so tež palace bomby na město mjetachu. Rano zahe 14. februara docpě dalša žołma lětadłow město a tak cyły druhi dźeń dale a tež hišće 15. februara Drježdźany njesměrnje bombardowachu. Dohromady 3 450 bombowcow wospjet na město lećeše a swoje mordarske bomby mjetaše.
Před 80 lětami, njedźelu, 7. julija 1946, po připołdnju su so w Koslowje pola Kupkec skupiny serbskich młodostnych z 23 wsow zetkali. Na kóncu wójny běše Koslow chětro zničeny. Nětko započachu młodostni hromady rozpadankow rumować. Pilnych dźěłaćerjow zawjeseli chór z Konjec/Šunowa ze spěwami, kiž potom wšitcy sobu spěwachu. Z akciju w Koslowje je so brigadowanje serbskeje młodźiny zahajiło. Ličba brigadow zwyši so na 56. Pozdźišo rozšěrichu so aktiwity na akciju „Wo naš wšědny chlěb“, kotrejež ćežišćo bě socialne polo. A bórze spěwachu w Serbach:
„Bratře, sotra, pój ty k nam,
do dźěła, brigady,
słaby je dźens kóždy sam,
mócne su brigady.“
Regina Herrmannowa z Wermsdorfa, diplomowa designerka a wuměłska rjemjeslnica, kotraž so tež ze serbskimi powěsćowymi postawami zaběra, je šěsć wšelakich puzzlow wudała. Tute su wěnowane zmijej, lutkej, připołdnicy, hadźacemu kralej, wódnemu mužej a błudničce. Kóždy ma 266 dźělow a hodźi so za dźěći runje tak kaž za dorosćenych. Dalšej puzzlej z wobrazomaj křižerskeho procesiona a jutrownymi jejkami je Załožba za serbski lud wudała. Kóždy ma 1000 dźělow.
W Lipšćanskim nakładnistwje Veles je druhi nakład Otfrieda Preussleroweje knihi „Mała wjera“ w hornjoserbskim přełožku wušoł. Štóž ju hišće nima, móže sej knihu nětko zaso kupić.
Nasćěnowu protyku „Serbske tradicije w Dolnej Łužycy, 2. dźěl 2027“ z rozkładźenjemi na zadnich stronach a z jara rjanymi fotami je Heiner Stephan wudał. Dalši kalender z titulom „Sächsische Heimat“ za přichodne lěto wuda Krajne towarstwo Sakski škit domizny z Drježdźan. Tež knižna protyka „Oberlausitzer Familienkalender 2027“ nakładnika Franka Nürnbergera je hižo na předań.
