Marija-Tereza Krawžic nowa młodźinska referentka
Marija-Tereza Krawžic je wot lětušeho awgusta młodźinska referentka w zarjedźe Domowiny. Wotrostła bě wona w Chrósćicach a je so po maturje na Serbskim gymnaziju w Budyšinje do Berlina podała, zo by tam socialne dźěło studowała. Dostudowawši swój bachelor dźěše do Lipska, hdźež přizamkny masterski studij w samsnym předmjeće. Po zakónčenju studija něšto lět w Lipsku w pěstowarni dźěłała.
„Lětsa pak sym pytnyła, zo je čas, zo so do Łužicy nawróću“, Marija-Tereza Krawžic w swojim běrowje w Serbskim domje powěda. Swoje nadawki wona hižo trochu znaje, wšako bě bywšu młodźinsku referentku Virginiju Hanuzowu před něšto časom hižo někotre měsacy zastupowała. Nětko pak chce so młodźinska referentka najprjedy z aktualnymi potrjebami młodostnych w serbskej Łužicy rozestajeć. Zhromadnje ze serbskim młodźinskim towarstwom Pawk prosy wona tuž předsydow młodźinskich klubow a towarstwow sobotu, 14. nowembra, na tak mjenowanu „Klub-šef-etažu“ do Radworskeho Słodeńka. Z młodostnymi chce so Krawžic wo tym dorozumić, kotre projekty abo kajku podpěru sej woni přeja.
Wumrěć chcyć a wěčnje žiwy wostać – Krabat
Budyšin (SN/MiR). Wo temje Krabat su zašłe lěta mnohe wuměłske twórby nastali, mjeztym nowa profesionalna jewišćowa twórba za klankodźiwadło. Johannes Kürschner a Moritz Schönbrodt staj kuzłarski kruch „Krabat stirbt · zemrěje · wumrějo“ za klanki na kiješku a dudlawu (Drehorgel) stworiłoj. Pjatk staj wonaj dopołdnja šulerjow a wječor dorosćenych zajimcow w Budyskim dźiwadle na hrodźe zahoriłoj. „Njeje lochko, młodostnych wo tym přeswědčić, zo je klankodźiwadło wuměłski žanr, kiž jich puta. Ručež pak do zahajenja předstajenja dudlawu zasłyša, namakaja spěšnje měr a so do jednanja zanurja“, rjekny na naprašowanje SN hudźbnik a komponist Johannes Kürschner.
Dorost za klasisku hudźbu zahorić
Na 4. mjezynarodnym festiwalu komorneje hudźby „Klasika w zymje“ wočakuje zajimcow staršeje a młódšeje generacije spočatk lěta 2027 wjele nowosćow.
Budyšin (SN/MDź). „Předewšěm w njeměrnych časach kaž tutych mam za wosebje wažne, sej kreatiwnosć wobchować a dale tworić. Wuměłstwo je duša swěta a dowola nam zastawać a předychać“, nawodnica hudźbneho festiwala Klasika w zymje, Franziska Pietsch, wčera na nowinskej konferency w Budyskim Serbskim domje zwurazni. Hižo štwórty raz wuhotuje wona klětu festiwal w kooperaciji z hudźbnikami a hudźbnicami z cyłeje Europy, serbskimi komponistami a prěnjotnje tež z Budyskej wokrjesnej hudźbnej šulu. „Jako w nazymje 2022 w ramiku smyčkoweho koncerta prěni raz na žurli Serbskeho muzeja hudźach, běch sej wěsta, zo so nawróću. Sym so nablaku do města zalubowała“, huslerka Pietsch wuzběhny.
Hdyž so Haškec mać a Měrćin Fetzt Nicht zetkataj
Budyšin (SN/MiR). Zrědka su so hosćo na čitanju w Budyskej Smolerjec kniharni telko smjeli kaž wčera wječor. Bjez dźiwa tuž, zo so wulkej ličbje wopytowarjow domoj hić nochcyše, po tym zo běchu literarne chłóšćenki zašłych lět dožiwili. W bjesadźe mnozy zwuraznichu, zo bychu akteram rady hišće dalšu hodźinku připosłuchali. Towarstwo přećelow Smolerjec kniharnje bě na literarny wječork pod hesłom „Haškec mać a pater Liborius“ přeprosyło. Čłonojo towarstwa předstajichu šibałe powědki a wjesołe štučki mj. dr. ze Serbskeje protyki, z Paternostra a Šeršenja.
Z Wuhladkomdo Texasa
Stefan Šmit w rozmołwje z Romanom Nukom wo wosebitym wusyłanju
Knježe Nuko, produkujeće runje najnowše wusyłanje Wuhladka, kotrež chceće sobotu za tydźeń, 7. nowembra, wusyłać. Składnostnje 25. lětneho jubileja budźe to wosebite wudaće Wuhladka. Što přihladowarjow wočakuje?
Tónkróć njewočakuje našich přihladowarjow, kaž su to poprawom zwučeni, magacin z wjacorymi tematiskimi přinoškami. Ně, w přichodnym Wuhladku pokazamy dokumentaciju, film „Nowa domizna Texas – na slědach serbskich wupućowarjow“. Tutón film je eksperiment a kročimy z nim tež nowe puće. Přetož dźěl dokumentacije je z pomocu kumštneje inteligency (KI) nastał. A tak podamy so w filmje z Janom Kilianom a něhdźe 600 Serbowkami a Serbami z łódźu Ben Nevis do noweho swěta. Jězba běše tehdy, před wjac hač 170 lětami, strašna a chětro tragiska. Wjac hač 80 wupućowarjow njeje měsacy trajacu jězbu přežiwiło.
Wozmjeće přihladowarjow potajkim sobu na jězbu do Texasa. Je to ryzy fiktiwny film? A kak sće scyła na tutu temu přišli?
Hosćo sobu spěwali a rejowali
Mjeńšiny a film
Premjera LitMiksa w internaće
Prapremjera po přikładźe Nagela
Hudźbne herbstwo Jana Pawoła Nagela hajić, drohoćinki słowjanskich komponistow wuslědźić a wozjewjeć a nic naposledk nowe serbske twórby wudawać – tute nadawki nakładnistwo ENA mjeztym 20 lět spjelnja. Jubilej je mějićelka Liana Bertók minjeny kónc tydźenja z koncertomaj we Łužicy woswjećiła.
Na česć Budarja, Kocha a Brězana
Měsačne literarne dopołdnjo, kotrež Němsko-Serbske ludowe dźiwadło (NSLDź) hižo wjele lět poskićuje, je so wčera na česć Jurja Brězana, Jurja Kocha a Bena Budarja wotměło. W Dźiwadle na hrodźe přednjesechu wurězki z jich twórbow.
Budyšin (SN/jp). Jednu njedźelu wob měsac zetkawaja so lubowarjo literatury k zhromadnej snědani a po tym na hodźinku čitanja ze wšelakich twórbow. Wčerawši poskitk běše wosebity wjeršk: W srjedźišću stejachu serbscy spisowaćeljo Beno Budar, Jurij Koch a Jurij Brězan, dokelž bychu měli abo mějachu lětsa wosebity jubilej. Beno Budar by lětsa swoje 80. narodniny woswjećił. Składnostnje jubileja Anna-Maria Brankačkec někotre basnje z repertoira Bena Budarja recitowaše. Nimo toho předstaji něhdźe 60 zajimcam wujimk z jeho knihi „Cowboy Tom abo dyrdomdej ze zaka“. Zamołwita za literarne dopołdnjo, něhdyša dramaturgowka Eveline Günther, je so rozsudźiła, basnički a twórby z poćahom k Budyšinej wupytać, hdźež bě Budar bydlił, prjedy hač do Hornjeho Hajnka přećahny.
