Budyšin (SN/MG). Hdźež bě njedawno hišće wosebita wustajeńca, tam Tomasz Raczynski nětko pilnje fotografuje. Suknje a jaki Wojerowskeje, Mužakowskeje a Wochožanskeje narodneje drasty su dźensa wobsah jeho dźěła, wšako chce muzeologowka Andreja Pawlikowa kompletny magacin serbskich drastow za datowu banku muzeja dokumentować. Tohodla je eksterny fotograf nadawk dóstał, profesionelne fota wubranych dźělow drastow zhotowić. Najwjetše wužadanje za njeho je, drasty stajnje perfektnje połožić. Ale tež wuswětlenje je wažne, wšako dyrbja barby stajnje originalej wotpowědować. Loni je wón hižo rjad mólbow muzeja w depoće fotografował. Dohromady nimale 7 000 objektow wobsedźi serbska drastowa zběrka, kotruž składuja w muzeju na Budyskim hrodźe. Rewizija zběrki wobsahuje fotografowanje, wuměrjenje a zapakowanje do židźaneje papjery a tyzkow bjez kisaliny resp. do škitnych wobalkow. To je wažny přihot za přećah do noweho domu na Lawskich hrjebjach. „Kóžda drasta dóstanje nětk tež swoje čisłowane stejnišćo.

Budyšin (SN/bn). Poslednje předstajenje inscenacije Činohrajneho studija při Němsko-Serbskim ludowym dźiwadle „Zhubjene a namakane – ein Herz und andere Dinge“ je wčera něhdźe 50 wopytowarjow do Budyskeho Dźiwadła na hrodźe přiwabiło. Dwurěčna hra Rike Reininger słuša w hornjoserbskim přełožku Dorotheje Šołćineje k repertoirowym krucham NSLDź a bu za 18. inscenaciju rjadu „Studio hraje“ lochce přiměrjena; režiju měješe nawoda studija Torsten Schlosser na starosći. Wot wšeho spočatka zamóštaj elewaj Bernadet Šnajdrec a Ole Schmidt nic jenož najmłódšich přihladowarjow, na kotrychž so produkcija w prěnim rjedźe měri, ale tež dorosćeny publikum putać. Předewšěm z hudźbnymi a pantomimiskimi přinoškami zasłužištaj sej dorostowej hrajerjej sceniski aplaws, po kónčnym wobrazu prošachu wopytowarjo jeju ze sylnym přikleskom wjacekróć wróćo na jewišćo.

Po dotal šěsć koncertach so lětuša Kulturna zahroda Serbskeho ludoweho ansambla na druhi połčas hotuje. Hač do 23. awgusta slěduje stajnje sobotu hišće raz runje telko wustupow, při čimž je wotměna stilow nadal zaručena.

Bukecy (SN/mb). Bukecy słušeja wot najnowšeho k hudźbnym městnosćam na kraju lěta 2025 (Serbske Nowiny su rozprawjeli) – a k tutomu wusahowacemu wuspěchej w kóždolětnym wubědźowanju za gmejny a města z maksimalnje 12 000 wobydlerjemi pod režiju Hudźbneje rady Němskeje a Zwjazkoweho zjednoćenstwa chór a orchester je Bukečanske Serbstwo bytostnje přinošowało. Tak su w spožčenju třećeho zwjazkoweho myta we wysokosći 6 000 eurow na to skedźbnili, zo „gmejna kładźe wulku hódnotu na lochko přistupne hudźbne poskitki a wusko hromadźe dźěła z lokalnymi serbskimi zajimowymi zwjazkami, zo bychu serbsku rěč a kulturu spěchowali.“