Nadróžne wobswětlenje w Delanach dale njerozrisane
Smjerdźaca (JK/SN). Na posedźenju gmejnskeje rady Ralbic-Róžanta wjerćeše so wčera w Smjerdźacej wjele wokoło miliny a energije. Tak je wotrjadnik energijoweho předewzaća SachsenNetze Detlef Marko planowane wobnowjenje milinoweje syće w Smjerdźacej rozłožił. Tamniša syć je přetrjebana a dźensnišim žadanjam hižo njewotpowěduje. Tohodla ma so zasadnje wobnowić, štož ma so hižo klětu stać. Za to wobstejitej dwě warianće. Bytostny rozdźěl je wašnje regulowanja, zaswěćenja a hasnjenja nadróžneho wobswětlenje. Jedna móžnosć je to z pomocu kablow wobstarać. Tamna a tuńša warianta předwidźi to z pomocu škričkoweho systema, za kotryž je mjenje kablow trěbnych. Nastajić maja so po woběmaj wariantomaj z LED-techniku wuhotowane nowe lampy. Z nimi hodźa so milina lutować a wudawki gmejny pomjeńšić. Předewzaće SachsenNetze wšitko w swójskej režiji přewjedźe a přewozmje na 15 lět wobhospodarjenje připrawy.
