Komunalny lěs přetworja
Hamorska gmejna da 12 300 młodych štomikow wosadźeć
Hamor (AK/SN). W swojim komunalnym lěsu pola Manjowa a pola Klětnoho chce Hamorska gmejna w přichodźe wjacore tysac nowych štomikow wosadźeć dać a lěs na te wašnje přetworić. Wotpowědny nadawk we wobjimje nimale 120 000 eurow su gmejnscy radźićeljo na swojim wčerawšim posedźenju lěsnistwowej firmje z Duboho (Dauban) přepodali.
„Z tutej naprawu zawěsćimy wobhospodarjenje lěsa w přichodnych pjeć lětach“, sobudźěłaćer twarskeho zarjada Hamorskeje gmejny Franco Piesker rozłoži. „Při tym smy jako gmejna z přikładom, dokelž priwatnym wobsedźerjam lěsa pokazamy, zo je přetworjenje lěsa zmysłapołne a móžne. Tež wjesnjanosta Hendryk Balko (Hamorske wolerske zjednoćenstwo) projekt wita, dokelž so zwjetša jehlinowy lěs poněčim na měšany lěs změni.
Radźićeljo wuradźuja
Radwor. Přichodne posedźenje Radworskeje gmejnskeje rady wotměje so jutře, srjedu, we 18.30 hodź. w sydarni gmejnskeho zarjadnistwa. Mjez druhim póńdźe wo wohnjowoborne wustawki w gmejnje a wo twarske dźěła za busowe zastanišćo w Minakale.
Prěnje serbske blido
Budyšin. Domowinska skupina Budyšin přeprošuje na 1. serbske blido. „Při kofeju a tykancu chcemy so bliže zeznać a do serbskeje rozmołwy přińć“, rěka w přeprošenju. Štwórtk, 11. junija, zetkaja so zajimcy w 16 hodź. w Serbskim domje w rumnosći čo. 301 Załožby za serbski lud. Po kofeju a serbskej bjesadźe budźe dr. Anja Pohončowa wo Maćicy Serbskej, jeje dźěle a wuznamje přednošować. Dale porěči wona wo swojim skutkowanju jako čłonka rěčneje komisije. Přednoškej přizamknje so diskusija.
Z krajnym radu porěčeć
Wutwar statneje dróhi so dlije
Łaz (AK/SN). Posledni twarski wotrězk saněrowanja statneje dróhi S 108 we Łazu traje dlěje hač bě předwidźane. Po tuchwilnym stawje planowanja budu twarske dźěła po wšěm zdaću hakle 17. julija wotzamknjene. Tole zdźěli sakski krajny zarjad za dróhotwar a wobchad (LASuV). Poprawom bě 8. junij jako kónčny termin předwidźany. „Ze zakónčenjom aktualneho wotrězka wot parkowanišća při Cyhelskim haće hač ke kromje wsy do směra na Delni Wujězd budźe cyłkowny wutwar dróhi we Łazu wotzamknjeny“, rozłoži Sigrid Rehak z Budyskeho krajnoradneho zarjada.
Dwoja drasta na mejemjetanju
Wojerecy. Mjeztym třeći raz su dźěći a kubłarki horta „Handrij Zejler“, kiž je w nošerstwje Křesćansko-socialneho kubłanskeho skutka (CSB), zhromadnje meju stajeli a mjetali. Dźěći kubłanišća, kotrež chodźa do 3. lětnika tamnišeje zakładneje šule, běchu sej za to katolsku kaž tež Wojerowsku narodnu drastu woblekli. Při zdrasćenju holcow napadny, kak napjate wone běchu, jako so katolsku drastu zhotowachu. Najwjetši dźěl dźěći ma mjenujcy wuši poćah k Wojerowskej ewangelskej drasće a jenož mało dźěći pochadźa ze skerje katolskeje wokoliny. Mjez dźěćimi kaž tež hotowarničemi nasta při zdrasćenju čiła rozmołwa wo zhromadnosćach a rozdźělach katolskeje a ewangelskeje drasty, wo woznamje barbow a změnje drasty w běhu časa. Wobliča dźěći wo tym swědčachu, kak horde běchu, jako móžachu so skónčnje sobušulerjam pokazać.
Kubłarka horta Lysann Wilmsmeyerowa a rjadowniska wučerka Ines Kirsteinowa běštej z holcami a hólcami z wulkej prócu serbske rejki nazwučowałoj, ke kotrymž dźěći wótře serbsce spěwachu. Skónčnje wuzwoli sej Aaron Leticiju za mejsku kralownu.
Farsku bróžnju zachowaja
Farsku bróžnju w Poršicach ponowić a za to pjenjezy nazběrać bě zaměr, kotryž bě sej tamniše spěchowanske towarstwo před połtřeća lětom stajiło. Mjeztym su tole zwoprawdźili.
Poršicy (UM/SN). Štóž před třomi lětami nastate fota Poršiskeje farskeje bróžnje z jeje dźensnišim napohladom přirunuje, tomu rozdźěl hnydom napadnje. Na starych wobrazach widźiš jasnje njerunosće třěchi, dokelž běchu hrjady zdźěla dodźeržane. Mjeztym so bjezporočna čerwjenobruna třěcha w słóncu błyšći. Město bywšich skóncowanych třěšnych wutwarkow ma wopytowar nětko zaćišć, zo jemu nowe małe wokna přimikotaja.
Wobydlerjo Budyskeje starownje „Paul Gerhardt“ móža so wotnětka ...
Młodostni měli so spěšnje přizjewić
Tele dny zhonja šulerjo 9., 10. a 12. lětnika swoje wuslědki zakónčacych pruwowanjow. Mnozy hišće njewědźa, kak móhło za nich po šuli dale hić. Tójšto absolwentow chce sej lěto chwile brać a so w powołanskim swěće rozhladować. Mjez druhim su hišće swobodne městna za socialne dźěło.
Krótkopowěsće (09.06.26)
Rozsud sejmika pruwuja
Drježdźany. Rozsud Budyskeho wokrjesneho sejmika wo zachowanju Kamjenskeje porodźernje so juristisce pruwuje. Jedyn čłon sejmika je pola zarjadniskeho sudnistwa w Drježdźanach přećiwo wobzamknjenju wosebiteho sejmika z 31. meje 2026 skóržbu a zdobom prawniski škit zapodał. Sudnistwo je sej wot wokrjesa krótkodobnje stejišćo žadało, čemuž je wokrjes hnydom wotpowědował.
Projekty sej spěchować dać
Rakecy. Leaderowy region Hornjołužiska hola a haty přewostaja 400 000 eurow spěchowanskich pjenjez za projekty. Mjeztym wone hižo 8. króć k tomu namołwja, so na wubědźowanju wo projekty za zwoprawdźenje wuwićowych strategijow w Leaderowym region wobdźělić. Spěchowanska doba traje hišće hač do klětušeho. Mjez druhim podpěruja předewzaća we wobłukomaj zakładne zastaranje abo žiwjenska kwalita.
Wjace wučerjow wotrjadować
Naše zežiwjenje – pisanosć, potrjeba abo wužadanje?
Strowota njeje samozrozumliwa. Kóždy je wjesoły, hdyž ju ma. Što pak móžeš za swoju strowotu činić? Z tym zaběra so serija Serbskich Nowin, za kotruž wjacori awtorojo pisaja. (3)
Naša strowota a prawje zežiwjenje stej faktaj, kotrejž za mnje bjezposrědnje hromadźe słušatej. Myslu sej, zo je to wjetšinje z was tohorunja znate. Mnohe chorosće maja direktny abo indirektny zwisk z našim zežiwjenjom. Mnohotnosć zežiwidłow dźensnišeho časa přinjese wulke šansy, ale tež wužadanja. Tak dyrbimy wosebje na runowahu mjez trěbnej energiju a wažnymi wutkami dźiwać.
Ja sym Raphaela Wićazowa, 44 lět, bydlu ze swójbu w Radworju a sym studowana zežiwjenska wědomostnica. Hižo dlěje hač 25 lět přewodźa mje strowe zežiwjenje w powołanskim, ale tež priwatnym žiwjenju. Chcu wam tule w přichodnych měsacach někotre zajimawostki k strowemu zežiwjenju podać. Při tym nochcu wěste chorosće do srjedźišća stajić a kak móžeš jim zadźěwać, ale chcu praktiske pokiwy za wšědny dźeń podać.
