Kolesowar awto zadźeržał

Budyšin. Ćěkaceho šofera je wutoru w Budyšinje kolesowar zadźeržał. 51lětny šofer bě ze swojim Hyundaijom z dwórnišća do směra na Póstowe naměsto jěł a při pósće najskerje přewysokeje spěšnosće dla kontrolu nad jězdźidłom zhubił. Najprjedy prasny wón do parkowaceho Seata a po tym na lěwym boku do BMWja. Na to chcyše so wón zminyć, to pak so nimokuli. Na Karla Marxowej zadźerža jeho kolesowar, z tym zo so ze swojim kolesom wosrjedź puća prěki stupi. Dohromady nasta na jězdźidłach něhdźe 10 000 eurow škody. Po dorěčenju ze statnym rěčnistwom sej přiwołani policisća jězbnu dowolnosć italskeho jězdźerja wobchowachu. Nimo toho změje so wón za to zamołwić, zo je z městna njezboža ćeknył.

Wosebje na wsach drje je lědma domjacnosće, w kotrejž njeje domjaceho zwěrjeća. Mjeztym zo so psyk a kóčka poměrnje husto jewitej, su bóle eksotiske zwěrjata skerje rědke. Wo nich a jich plahowarjach na wšelakich městnach Łužicy rozprawjamy w lětnjej seriji Serbskich Nowin. (4)

Hdyž so njewjedro bliži, so štrusy w swojej farmje we Łazu k zemi tuleja. „Čim zdaleniše njewjedro je, ćim wyše štrusy swoju hłowu dźerža. Hdyž njewjedro bliže přińdźe, wone wušo hromadźe steja. Štrusy druhdy pokazuja, kajke wjedro budźe“, 52lětny Enrico Gabel rozprawja. Powołanski šofer wjedźe připódla we Łazu „Štrusacu farmu při Sprjewi“, kotraž wot lěta 2005 wobsteji. Dźensa plahuja tam 50 do 60 štrusow. Prěnje štrusy běchu honačej Gustav a Paul kaž tež někotre žónki. Młodźata wostanu maksimalnje hač do staroby dweju lět na farmje. „Při plahowanju a picowanju dźiwamy na přirodnosć“, Enrico Gabel powěda. Wšo dźe bjez někajkeje chemije. Hdyž su zwěrjata dwě lěće stare, je zarězaja. To činja hnydom wonka při płoće, zo bychu štrusam njetrjebawši stres zalutowali.

Trójka prěni raz putnikow zastaruje

Krupka (SN/StŠ). Hdyž putnicy rano stawaja, po puću plester na mozle trjebaja a wječor sprócni wotpočuja, so tući třo wo wšitko staraja: „Móžeš bjeze wšeho prajić, zo smy rano stajnje ći prěni a wječor zwjetša ći posledni. A haj – smy takrjec SOS-team a za zastaranje putnikow zamołwići“, praji z lochkim posměwkom Stani Wencl, kotryž přisłuša lětsa kaž hižo loni skupinje młodych putnikow do Krupki. Lětsa pak njeběži 18lětny sobu, ale stara so zhromadnje ze swojim bratrom Feliksom a ze Stankom Fryču wo zastaranje putnikow kaž tež transport jich wačokow. „Nimamy klasiske rozrjadowanje, kóždy čini poprawom wšitko, hač warić, wopłokować abo pomazki mazać“, tak Stanko Fryča, kotryž runja přećelomaj prěni raz zastaranskemu teamej přisłuša. Trójka je z dwěmaj busomaj po puću, zwjetša trochu před putnikami. „Dorěčimy sej zwjetša dźeń do toho, što na druhi dźeń k jědźi poskićimy a přihotujemy. Potom to po puću nakupimy, wšako nimamy wulke móžnosće, wšitko dočasa wobstarać a w awtomaj chłódźić.“

Mjenje busow we wokrjesu

Budyšin. Wot přichodneho tydźenja hač do kónca lěta budźe w Budyskim wokrjesu na wjace hač 40 čarach kónc tydźenja a swjate dny mjenje busow zasadźenych. Lutowansku naprawu běše wo­krjesny sejmik kónc meje wobzamknył, zo móhł porodowu staciju w Kamjenskej chorowni hač do kónca lěta financować. Přehlad zwiskow wozjewja krajnoradny zarjad online na stronje www.landkreis-bautzen.de/fahrplanaenderungen-11922.php.

Mólbu Dürera bórze restawruja

Praha. Jenož hišće něšto tydźenjow maja zajimcy składnosć, sej wołtarny wobraz „Róžowcowy swjedźeń“ Albrechta Dürera w Praze wobhladać. Mólbu z lěta 1506, kotraž je z wobstatkom zběrki Narodneje galerije, chcedźa wot septembra restawrować, štož traje něhdźe pjeć lět.

Institut na nowym kanalu