Bóšičanski třiróžk wohroženy
Bóšicy (SN/MiR). Gmejnscy radźićeljo Bóšičanskeje gmejny so na swojim posedźenju wutoru njemało dźiwachu. Mjeztym dołho planowane a přihotowane zarjadowanje „Bóšičanski třiróžk“, kotryž gmejna 27. a 28. apryla wuhotuje, je wohrožene. Katrin Ullrich z Njeswačanskeho gmejnskeho zarjada dósta pismo z krajneho zarjada za dróhotwar a wobchad (LASuV) a bě přewšo překwapjena. Wšako sej sobudźěłaćerka LASuV žada, zo maja šoferojo, kotřiž chcedźa za čas motorsportoweho zarjadowanja z Wětrowa abo do wsy jěć, pólny pućik z Wbohowa wužiwać.
Dale ma křižowanišćo Bóšicy/Nowe Bóšicy po połojcy wotewrjene wostać a zjawny wobchad ma so z amplu rjadować. Bóšičanski wjesnjanosta Stanij Ryćer (rjemjesło Bóšicy), kiž je zdobom iniciator dwudnjowskeho a daloko přez mjezy gmejny zajim zbudźaceho eventa, je Budyski wokrjes wo pomoc prosył. „Wot wokrjesa, policije, strowotnych zarjadnišćow a wot druhdźe mjeztym wšitke dowolnosće předleža. A LASuV je nam před lětomaj na 2. Bóšičanskim třiróžku zdźělił, zo směmy zarjadowanje lětsa přewjesć.“
We wsy maja wosebitu pěc
Pjekarski mišter Stefan Richter je sej w Kubšicach dawne přeće spjelnił. To pak njeje jenož za sebje činił, wšako profituje z toho cyła wjesna zhromadnosć, kaž bě hižo njedawno widźeć.
Kubšicy (UM/SN). Wjace ludźi hač hewak bě před dnjemi na parkowanišću Richterec pjekarnje w Kubšicach. Hdźež normalnje awta kupcow přijědu a wotjědu, steješe skupina swjedźensce zdrasćenych ludźi. Ze skupiny wusahowaše wulki muž w swětłej drasće pjekarja, kiž pjekarski blach na drjewjanej łopaći balansowaše. Kubšiski pjekar Stefan Richter bě na premjeru wosebiteho razu přeprosył.
„Njeje ničo rjeńšeho hač chlěb w drjewjanej pjecy pjec“, wón praji a prěnje chlěby za pěc přihotuje. Do toho bě wón z wohenjom pěc na něhdźe 300 stopnjow wutepił, štož je štyri hodźiny trało. Wuspěch pokaza so hižo za něšto mjeńšin, přetož chlěby, z kotrymiž chce Richter swoju drjewjanu pěc poswjećić, su hižo napoł spječene.
Kolesowa zamkarnja je nowy cyłodnjowski poskitk na Pestalozzijowej ...
Krótkopowěsće (11.04.24)
Na konferency w Helsinkach
Helsinki. Kubłanska referentka Domowiny Katrin Suchec-Dźisławkowa a jednaćel Serbskeho šulskeho towarstwa Andreas Ošika přebywataj tele dny w Helsinkach. Tam wobdźělitaj so na zetkanju kubłanskeje skupiny FUEN. Mjez druhim rozestajataj so z kubłanskim systemom šwedskeje mjeńšiny w Finskej.
Liča z wjace nadpadami wjelkow
Drježdźany. Hladajo na miłe temperatury a z tym móžnosće swój skót na pastwach pasć, warnuje sakske fachowe zarjadnistwo wjelk před nadpadami rubježneho zwěrjeća. Kaž fachowcy wčera zdźělichu, měli plahowarjo skotu škitne naprawy přepruwować a spěšnje škody wotstronić. Zarjadnišćo wuchadźa z toho, zo dyrbja plahowarjo skotu z wjace wjelčimi nadpadami ličić.
Chcedźa pomnik znowa postajić
Policija (10.04.24)
Nimale dwójce tak spěšnje
Kulow. Zastojnicy Wojerowskeho policajskeho rewěra a wobchadneje stražowanskeje słužby su póndźelu dopołdnja na statnej dróze S 95 w Kulowje kombinowanu kontrolu spěšnosće přewjedli. Při wotbóčce wodočisćernje do směra na Wóslink je 50 km/h dowolenych. Wot 450 jězdźidłow, kotrež nimo měrjenskeje připrawy jědźechu, bě 122 přespěšnych. 70 šoferam kiwa pokuta, tamnym warnowanje. Najspěšniši bě wodźer VWja z Budyskim čisłom, kotrehož błysknychu ze 97 km/h. Wón změje nětko 400 eurow pokuty płaćić, dóstanje dwaj dypkaj w Flensburgu a dyrbi měsac nóžkować.
Elektrokoleso pokradnyli
Budyšin. W nocy na póndźelu su paduši na Budyskej Ostwaldowej elektrokoleso pokradnyli. Woni zadobychu so do pincy wjaceswójbneho domu a wzachu koleso typa Cube w hódnoće něhdźe 3 200 eurow sobu.
Železny kwas woswjećiłoj
Rozsudźa wo namjetach
Pančicy-Kukow. W sydarni zarjadniskeho zwjazka Při Klóšterskej wodźe wotměje so jutře, štwórtk, w 17 hodź. zjawne posedźenje gmejnskeho wólbneho wuběrka. Wón rozsudźi wo přizwolenju wólbnych namjetow za komunalne wólby 9. junija. Zajimcy su wutrobnje witani.
Bal narodneje drasty
Ćisk. Serbska rejwanska skupina Ćisk přeprošuje na 9. bal narodneje drasty sobotu, 13. apryla, w 19 hodź. na žurlu Ćišćanskeho hosćenca „Zeleny wěnc“. Witani su wšitcy, kiž maja wjeselo a radosć při rejwanju a dujerskej hudźbje – hač w narodnej drasće abo nic. Wo dobru naladu a hudźbu stara so dujerska kapała z Wjelceja. Zastup płaći 7,50 eurow. Zajimcy njech přizjewja so pod telefonowym čisłom 0172 2017468.
W lěsu so informować
Wobchad přez jednu rołu
Tunl pod Limasom wot jutřišeho hač do nowembra saněruja
Budyšin (SN/MWj). Dołho připowědźene a wobšěrnje přihotowane saněrowanje tunla pod Limasom (Königshainer Berge) so jutře započnje. Potom powjedźe wšón wobchad na awtodróze A 4 přez južnu rołu tunla, zo móhli sewjernu rołu do směra na Drježdźany hač do nowembra 2024 saněrować. Jutře něhdźe w 22 hodź. chcedźa sewjernu rołu za wobchad zawrěć. W južnej role budźe potom do kóždeho směra jedna jězdnja k dispoziciji. Awtodróhowa tzwr wšitkich šoferow prosy, wašnje jězdźenja twarnišću přiměrić a wobchadne pokiwy dodźeržeć, praji rěčnik předewzaća Tino Möhring.
Žiwjenje na městnje žarowanja
Axel Hettig so za žiwjenjo- a wobswětoškit angažuje. Na Kinajchtskim lěsnym pohrjebnišću ma wón wosebity nadawk. Nic pak jenož tam so wón wo ptački a njetopyrje stara.
Wojerecy (SiR/SN). Kěrchowy a pohrjebnišća su w prěnim rjedźe městnosće rozžohnowanja a žarowanja. Wone pak su zdobom městnosće čiłeho žiwjenja. Štóž hižo raz na Kinajchtskim pohrjebnišću bě, je zawěsće hižo wjewjerčki, insekty, ptački a zwěrjata wobkedźbował. Tam měješe Axel Hettig njedawno wosebitu misiju. 57lětny je z gratom a rěblom na pohrjebnišćo přišoł, zo by nowe kukawče na štomy powěsnył.
