Na slědach Serbow we Warnoćicach byli
Hdźe su serbscy gymnaziasća po Druhej swětowej wójnje w čěskich Warnoćicach wuknyli a bydlili, z čim su so we wólnym času zaběrali a hdźe staj Bjarnat Krawc a jeho dźowka Hanka Krawcec skutkowałoj – to chcychu čłonojo Domowinskeje skupiny Pančicy-Kukow sobotu na swojim lětušim skupinskim wulěće zeznać. Wjace hač 30 skupinarjow a hosći, mjez nimi horstka młodostnych, dojědźe sej do čěskeho namjezneho města, hdźež so z Milanom Hrabalom zetkachu. Wón wjedźeše jich po wučbnej šćežce, kotruž su šulerjo Budyskeho Serbskeho gymnazija a chowancy Warnočanskeho biskopskeho gymnazija zhromadnje zestajili.
Wjace hač 30 konjacych zapřahow je so wčera z wulkej ličbu ...
Krótkopowěsće (29.09.25)
Preuß nowy měšćanosta
Kamjenc. Michael Preuß je nowy wyši měšćanosta Kamjenca. 44 lět stary bjezstronski kandidat dósta w prěnim wólbnym přechodźe po nachwilnym wuličenju wčera 73,4 procentow hłosow. Dalšeho kandidata Stefana Seibta z wobydlerskeho zwjazka Zhromadnosć za Kamjenc je 26,6 proc. wobydlerjow woliło.
Artistka smjertnje znjezbožiła
Budyšin. Za čas předstajenja w cirkusu je artistka zawčerawšim popołdnju w Budyšinje smjertnje znjezbožiła. Před něhdźe 80 přihladowarjemi, mjez nimi dźěći, wona z pjeć metrow wysokosće na zemju padny. Mnozy wopytowarjo zarjadowanje nablaku wopušćichu. Policija wopytowarjow namołwja, so po potrjebje pola Wojerowskeje regionalneje centrale přizjewić, zo móhli jich profesionelne psychologisce zastarać.
Juliane Mazalla dobyła
Dochody z dawkow přiběrali
Rakečanska gmejna wjeseli so nad solidnym etatom
Rakecy (JK/SN). Gmejna Rakecy so derje wuwiwa. Wobchad po wsy runje tak derje běži kaž hospodarstwo. To wobkrući na minjenym posedźenju tamnišeje gmejnskeje rady nawodnica financneho zarjada Franciska Pfeiffer hladajo na staw lětušeho hospodarskeho plana gmejny. Tón je wšo druhe hač špatny. Tež wjesnjanosta Swen Nowotny (CDU) je z hospodarskej situaciju gmejny přewšo spokojom.
Dochody z přemysłoweho dawka su wo dwaj procentaj stupali, z wobrotoweho dawka samo wo tři procenty. Nimo toho kónc awgusta wo jedyn procent wyše klučowe připokazanki registrowachu. Tute dochody a zdźěla tež mjenje wudawkow su dobre wuchadźišćo, zo móža wšitke wudawki bjez problemow zapłaćić. Jako dobre je so tež wopokazało, zo su loni wjetšu sumu pjenjez zapołožili. To je gmejnje lětsa přidatnych 15 000 eurow wunjesło. Aktualnje maja zdobom wjac likwidnych srědkow hač spočatk lěta: Z 3,165 milionami eurami móže hłowna komornica tuchwilu dźěłać.
Wobornicy wukubłanje zakónčili
Smječkecy (TS/SN). Swoje wukubłanje je předwčerawšim 16 nowych čłonow dobrowólneje wohnjoweje wobory na wukubłanišću w Smječkecach zakónčiło. Hłowny wukubłar na tamnišim stejnišću Měrćin Nowak přepoda jim wotpowědne wopisma za wotzamknjene, 70 hodźin trajace zakładne wukubłanje. Angažowani wobornicy – žony a mužojo – njejsu sej jenož trěbne znajomosće a kmanosće přiswojili, zo bychu w padźe wohenja spěšnje a efektiwnje jednali, ale su tež zwólniwi, w mnohich druhich a nic jenož nuzowych situacijach w swojich wsach pomhać.
Poskićuja dźěłarnički
Wojerecy. „Što činiš noweho na jewišću?“. Tak mjenuje so rjad zetkanjow, na kotrychž steja dźěłarnički kaž tež wuměna wo dźiwadłowym dźěle z dźěćimi w srjedźišću. Projekt spěchuje lajske dźiwadło a skići kreatiwne rěčne rumy. Serbske šulske towarstwo a ZARI jón zhromadnje přewjedźetej. Přeprošeni su wšitcy, kotřiž z dźěćimi dźěłaja: kubłarjo, wučerjo kaž tež starši, wšojedne hač dźiwadłowu skupinu hižo maja abo hač chcedźa nowu wutworić. Terminaj stej 30. septembra we Wojerecach w Domje Domowiny a 24. oktobra w Budyskim NSLDŹ. Přizjewjenja a dalše informacije pod: .
W rejowanju so wuspytać
Kulow. Rejowanske dźěłarnički poskićuja Kulowske rejwanske skupiny jutře, sobotu, wot 10 do 17 hodź. w sportowni. Wšitcy, kotřiž rady rejuja abo chcedźa sej rejwanje wotkryć, su lubje witani. Mjez druhim zwučuja jazzowe, moderne a dźěćace reje kaž tež musical. Wot 15 do 17 hodź. budźe zjawna prezentacija. Wobdźělenje płaći dźesać eurow za kóždu dźěłarničku.
Domchowanka w młynje
Krótkopowěsće (26.09.25)
Serbja do zakładneho zakonja!
Berlin. Wjetšina zwjazkoweje rady je zwjazkowe knježerstwo dźensa najebać wotpokazowacy wotum wuběrkow namołwjała, přiwzaće domoródnych mjeńšinow kaž serbskeho ludu do zakładneho zakonja přihotować. Ministerski prezident Schleswigsko-Holsteinskeje Daniel Günther (CDU) wopodstatni zhromadnu iniciatiwu ze Sakskej a Braniborskej jako „přiměrjenje wuwiću towaršnosće“.
Piloća helikopterow zwučowali
Budyšin. Piloća wukubłanskeho kursa helikopterow zwjazkoweje policije su wjacednjowske zwučowanja přewjedli. K tomu słušachu taktiske zwučowanja po cyłej Němskej. Wčera připołdnju lećeše 13 helikopterow nad Budyšinom. To do toho běchu hižo přez Braniborsku, Bayersku, Sewjerorynsko-Westfalsku, Porynsko-Pfalcowsku, Delnju Saksku, Saksko-Anhaltsku, Saksku a Durinsku lećeli.
Ochranowske hesła 2026 wušli
Na Radworskej kupje maja nowe schadźowanišća
Radwor (SN/MkWj). Čłonojo Radworskeho kupoweho zjednoćenstwa su wčera we wobłuku dźěłoweho wuradźowanja swoje najnowše wudobyće prěni raz wužiwali. Tři nowe móžnosće za přebywanje su tam w běchu minjenych tydźenjow nastali. Drjewjane konstrukcije z třěchu skića stajnje něhdźe dźesać ludźom městno a narunaja dotalne drjewjane wotpočnišća, kotrež běchu po wjele lětach dodźeržane. Forma budkow je podobna twarjenjam, kotrež běchu tam minjene lěta krok po kroku nastali: Nimo předawanišća w susodstwje hłowneho drjewjaneho twarjenja je to małe jewišćo z třěchu za kulturne skupiny, kotrež na swjedźenjach kaž na Dnju muži na kupje wustupuja.
2 000 eurow na dobro dźěći darili
W Delanach jara kreatiwni
50. jubilej Ralbičanskeje šule z dźěłarničkami za šulerjow zahajili
Ralbicy. „Dźitaj z puća! Naš Flitzer přijědźe!“, tak klinčeše wčera w šulskim domje w Ralbicach, jako tam šofer-šuler ze samotwarjenym awtom po chódbje smaleše. Tutón wobraz derje zjima, kak su jubilej 50lětneho wobstaća Ralbičanskeje noweje šule zahajili, mjenujcy z wjele kreatiwitu, zhromadnosću a wjeselom. Tři dny jubilej nětko swjeća. Wčera běchu mnohe dźěłarnički za šulerki a šulerjow spřihotowane. Wot techniki přez wuměłstwo a hudźbu abo tež přirodowědu – za kóždeho bě něšto pódla. Tak móžachu so šulerjo mjez druhim wo wobnowjomnych energijach, wo projektach UNESCO we Łužicy abo wo optice informować. Wosebje zajimowachu so za praktiske poskitki kaž elektrotechniku, robotiku pod nawodom Michała Cyža, za 3-D-ćišćenje abo zhotowjenje małych wěcow. W sportowej hali wabjachu poskitki kaž rejowanje pod nawodom rejowanskeju wučerkow dorostoweho studija SLA do pohibowanja. Derje wopytany bě tohorunja projektowy chór.
