W Tirolu wjele dožiwili
Wuměnkarjo na wuprawje Serbskeho šulskeho towarstwa pobyli
Budyšin. Tydźeń do swjatkow podachu so serbscy wuměnkarjo na wuprawu do Tirola. Organizowało bě tutu ekskursiju kaž kóžde lěto Serbske šulske towarstwo (SŠT). Lětsa bě cil serbskeje wuprawy wulkotny hotel w awstriskim Kirchbergu pola Kitzbühela. Hižo na tamjězbje krasna wokolina wšitkich wobdźělnikow, čłonow a přećelow SŠT wo tym přeswědči, zo budźe to rjany tydźeń. Hory wokoło Kitzbühela nas powitachu a do pućowanja přeprošowachu.
Prěni dźeń sej dojědźechmy do Jenbacha, hdźež ze Zillerowej dołowej železnicu po tamnišim dole jěducy sej krasnu wokolinu hač do Mayerhofena wobhladachmy. Potom so podachmy ke Krimmlskim wodopadam, hdźež wobdźiwachmy wot deleka wodopad, kiž šusknje tam dohromady nimale 400 metrow do hłubiny.
Za dźědow, wowki a wnučki
Smjerdźaca. Wot lětušeho 6. do 8. julija přeprošuje Serbske kubłanske srjedźišćo Lipa w Smjerdźacej na zhromadne prózdninske dny za dźědow a wowki z jich wnučkami w starobje wot štyrjoch lět. Pod nawodom Lucije Handrikoweje a Marije Wjeńcyneje je stajnje wot 9 do 14 hodź. pisany program přihotowany. Mjez druhim chcedźa zhromadnje paslić a sportować, sej do Budyskeho serbskeho muzeja wulećeć a sej Staru wodarnju wobhladać. Popłatk wučinja 40 eurow na dorosćeneho a 30 eurow na dźěćo. Přizjewić móža so zajimcy z mailku na abo telefonisce pod čo. 01520 8783147.
Swjeća jubilej wsy
Lejno. Ze swjedźenskim kóncom tydźenja dopominaja na 625lětne wobstaće Lejnoho (Geierswalde) pola Wojerec. Jutře přeprošuja w 9.30 hodź. na historiske přechodźowanje po wsy. Zajimcy zetkaja so při wobydlerskim domje. W 14 hodź. přizamknje so mejemjetanje. Nimo programa dźěći změja bursku olympiadu. Njedźelu slěduje w 10 hodź. swjedźenska Boža słužba. K rańšemu piwku přewjedu wot 11.30 hodź. wubědźowanje wohnjowych woborow. W 14 hodź. přeprošuja na Lejnjanski korčmowy kwis.
Zhromadnje spěwać
Mejemjetanje najebać twarnišćo
Na cisternu so zasadnje dojednali
Wotrow (SN/MWj). Gmejna Pančicy-Kukow dyrbi so we Wotrowje nuznje wo to starać, zo by tam stajnje dosć hašenskeje wody było. Z tuchwilnym hašenskim hatom na sewjernej kromje wsy to hižo zaručene njeje. Hat drje stajnje zaso wurjedźa, ale do njeho hižo dosć wody njećeče. Tohodla měješe inženjerski běrow Petera Linke z Kinsporka nadawk, přirunować wjacore warianty, kak hašensku wodu najlěpje zaručeć. Te je wón wčera gmejnskim radźićelam na jich posedźenju předstajił.
Po jeho słowach trjebaja we Wotrowje hladajo na ličbu wobydlerjow a twarjenjow něhdźe 200 kubiknych metrow hašenskeje wody, a to wobstajnje 365 dnjow wob lěto. Runje to je w tuchwilnym haće najwjetši problem, byrnjež wón wulki dosć był. Za něhdźe 100 000 eurow hodźał so hat ponowić, tak planowar rozłoži. Druha warianta je podzemska cisterna. Tajka móhła so z betonowych dźělow runje tak twarić kaž z kumštneje maćizny. To pak něhdźe dwójce telko płaći.
Krótkopowěsće (29.05.26)
Lěsna kupjel Kulow wočinjena
Kulow. Kaž je Kulowske měšćanske zarjadnistwo informowało, je tamniša lěsna a přibrjóžna kupjel na kromje Dubrjenskeho bahna wot dźensnišeho wočinjena. W 13 hodź. zahaji kupanski mišter Uwe Mikel lětušu kupansku sezonu, kotraž najskerje hač do 31. awgusta traje. Kónc tydźenja, swjate dny a w lětnich prózdninach je kupjel wot 11 a hewak wot 13 hodź. přistupna.
Serbja a moderna technologija
Praha. W Praze přewjeduje so wot zawčeraweho mjezynarodna dźěłarnička na temu „Słowniki w swěće modernych technologijow“. Ze Serbskeho instituta wobdźělitaj so dr. Anja Pohončowa kaž tež dr. Fabian Kaulfürst a tam zhromadnje přednošowaštaj. Mjez druhim předstajištaj rěčnej portalej a so předewšěm modulej „Nowa leksika“ wěnowaštaj.
Digitalna doba tema w zešiwku
Tež we Łusču meju mjetali
Nalětni koncert chóra Lipa
Pančicy-Kukow. Chór Lipa přeproša zhromadnje z Křesćansko-socialnym kubłanskim skutkom Sakskeje wšitkich zajimcow na nalětni koncert, kiž wotměje so njedźelu, 31. meje, w 15.30 hodź. na zahrodźe zežiwjenskeho a zeloweho centruma w klóštrje Marijina hwězda w Pančicach-Kukowje. Program wuhotuja Lipjenjo zhromadnje z Błótowskim žónskim chórom z Lubina, kiž wustupi w błótowskej serbskej drasće, a z Lipkami. Chór Lipa zanjese z přewodom klawěra wurězki z oratorija „Nalěćo“ kaž tež spěwy wo lubosći a přećelstwje. Lipki přednjesu tři nowe nazwučowane spěwy z instrumentalnym přewodom a Błótowski žónski chór zaspěwa wjacehłósne pěsnje, kotrež su něhdy na přazy spěwali. Wot 15 hodź. poskićuja kofej a tykanc.
Pytaja serbskich spěwarjow
Policija (28.05.26)
Rozestajenje w měsće
Budyšin. K zasadźenju policije je wčera wječor na Budyskej Kotołskej blisko Centera na Žitnych wikach dóšło. Po prěnich informacijach je tam skućićel z wótrym nastrojom do wopora kłół a jón zranił. Hač jednaše so wo nóž, wotłamanu blešu abo podobne, njeje dotal jasne, tohorunja nic, kak ćežko bu wopor zranjeny. Policija bě z wjacorymi jězdźidłami zasadźena a tónle pad dale přepytuje.
Stare črije zapakował
Zhorjelc. Njewšědne wobšudnistwo je wutoru w Zhorjelcu zwrěšćiło. Tam bě 64lětny muž do wobchoda na Drježdźanskej dróze zastupił, zo by karton wróćił, kiž bě we wobchodźe kupił. Do kartona pak njeje wón pistolu za pryskanje barby, kotraž poprawom do kartona słušeše, połožił, ale do njeho stare črije a DVDje zapakował. Sobudźěłaćer pospyt wobšudnistwa spózna a zawoła policiju. Zastojnicy wupisachu wotpowědne přizjewjenje. Zhorjelski kriminalny rewěr pad nětko dale přepytuje.
Maja problem z wudawkami
Dźěwinska gmejna dyrbi krute předpisy za hospodarski plan dodźeržeć
Brězowka (AK/SN). Pjenježne połoženje Dźěwinskeje gmejny wostanje dale jara napjate. Gmejnska rada drje bě spočatk měrca hospodarski plan 2026 jednohłósnje wobzamknyła. Dohladowanski zarjad Zhorjelskeho wokrjesa pak jón njeschwali. Tole rjekny komornica Dana Piehl na zašłym posedźenju gmejnskeje rady. „Mamy problem z wudawkami. Ze swojimi planowanymi winowatosćemi njejsmy dźěłakmani“, wona podšmórny. „Jenož z krutymi předpisami wokrjesa móžemy swoje pjenježne połoženje polěpšić.“
Prěnje žadanje je, zo ma gmejna hospodarski strukturny koncept 2026 hač do 2029 dale wjesć a předźěłać. Dale ma Zhorjelski wokrjes přichodnje wšitkim wudawkam nad tysac eurami přihłosować. Dotalny hospodarski strukturny koncept předwidźi zalutowanja we wobjimje 24 000 eurow. Mjez druhim maja 10 000 eurow za adwentnički wuměnkarjow zalutować, 4 000 eurow za prezenty rentnarjam a 1 200 eurow za abonement digitalnych nowinow přez komunu. Dale zalutuje Dźěwinska gmejna něšto wjace hač 5 200 eurow z nowym zrěčenjom za milinu.
Kak biosferowe rezerwaty nastachu
Stróža (CS/SN). W Stróžanskim Domje tysac hatow je krótko do swjatkow prěni raz mjezynarodny hósć přednošował. Astrid M. Eckert je lěta 2005 z Delnjeje Sakskeje do USA wupućowała a wuwučuje wot toho časa jako historikarka na wysokej šuli Emory University Atlanta w USA. Hromadźe z dalšimi wědomostnikami wobdźěleše so wona na interdisciplinarnej dźěłarničce.
W swojim přednošku Eckert wobswětleše, kak so wobaj němskej stataj hač do 1990 programej UNESCO „Čłowjek a biosfera“ (MAB) wěnowaštej. Program bě wusměrjeny na racionalne wužiwanje a škit přirodneho wobswěta a jeho ressourcow. Čłowjek wobhladuje so jako dźěl přirodneho wobswěta, ale tež jako zawinowar problemow. Spočatnje wopřijimowaše program 14 slědźerskich ćežišćow. Z nich pak zwosta jenož jenički, mjenujcy zachowanje přirodnych kónčin a jich genetiskeho materiala.
