Poslednje posedźenje zhromadźizny zarjadniskeho zwjazka Při Klóšterskej wodźe we wólbnej dobje 2014 do 2019 wčera w Pančicach-Kukowje bě z wotstawkom najkrótše minjenych pjeć lět. Po dobrej štwórć hodźinje móžachu zastupjerjo pjeć gmejnow chětro ćopłu rumnosć hižo zaso wopušćić.

Pančicy-Kukow (SN/MWj). Prjedy hač so Chróšćanska, Njebjelčanska a Pančičansko-Kukowska gmejnska rada jutře skonstituuje, dyrbjachu so dotalni zastupjerjo pjeć gmejnow zarjadniskeho zwjazka Při Klóšterskej wodźe hišće raz schadźować. Přičina bě, zo dyrbjachu dalše twarske nadawki za tuchwilny přetwar běrowoweho twarjenja w Pančicach-Kukowje přepodać. Tak ma Bosćij Smoła z Wu­dworja w domje kachlicy za nimale 30 000 eurow kłasć. Molerske dźěła wukonja Čižankec­ předewzaće z Konjec. Firma z Lubija z wotnožku w Biskopicach přewozmje za 7 100 eurow špundowanske dźěła a zawod z gmejny Haselbachtal připrawi­ za nimale 25 000 eurow škit před słóncom.

Jatřob (SN/at). Wjesny swjedźeń su Jatřobjenjo minjenu sobotu 600. róčnicy prěnjeho pisomneho naspomnjenja swojeje wsy wěnowali. Młodźi a starši wobydlerjo zetkachu so na Halamec statoku. Hospozy běchu słódne tykancy napjekli, pilni organizatorjo mału, ale powabnu fotowu wustajeńcu wo wjesnym žiwjenju zestajeli a za tombolu wulku ličbu mytow wobstarali.

Wobhladać móžachu sej wjesnjenjo kaž tež jich hosćo zwjetša z Wulkodubrawskeje gmejny runje tak nowiny kaž tež w němskej a serbskej rěči wušłe knihi a brošurki z minjenych 60 lět. Mjeńše dźěći molowachu z krydu na wjesnej dróze, a knježiła je lóštna wjesna zabawa.

2,3 milionow eurow spěchowanja za spěšny internet dóstali

Trjebin (CK/SN). Trjebinski wjesnjanosta Waldemar Locke (CDU) bě hakle něšto dnjow w zastojnstwje, jako přija 17. decembra 2017 w Berlinje přizwolenje spěchowanskich srědkow Zwjazka za wu­twar šěrokopasmoweje syće, runje tak tež jeho kolegaj Reinhard Bork ze Slepoho (njestronjan) a Helmut Krawc (SPD) z Dźěwina (Groß Düben). Zwjazk financuje projekt z 3,6 milionami eurow. Nětko je Swobodny stat Sakska 2,3 miliony eurow přidał. Přizwolenje přepoda předwčerawšim statny sekretar sakskeho hospodarskeho minister­stwa Stefan Brangs w Trjebinje. Tři gmejny maja swójski podźěl 671 000 eurow płaćić. Tón pak dóstanu pozdźišo z financnym wurunanjom za digitalny wu­twar wróćene.

Dohromady jedna so wo 6,7 milionow eurow. „Nětko móže so digitalna doba započeć“, wjesela so wjesnjanosća. Při wutwarje šěrokopasmoweje syće w zarjadniskim zwjazku Slepo/Dźěwin/Trjebin přizamknu 1 384 domjacnosćow a 205 předewzaćow. Za to trjebaja 64 kilometrow­ hłuboko­twarskich dźěłow, 357 kilometrow škleńčnonićoweho kabla a 104 kilometry prózdnych rołow.

Protecy (BG/SN). 13. woranski dźeń w Protecach (Prietitz) pola Kamjenca zapo­ča so minjenu njedźelu z dołhim rynkom čakacych awtow. Sta wćipnych podachu so na wotžnjaty zahon při hłownej dróze mjez Kamjencom a Halštrowom. Wšitcy chcychu widźeć, kak konje a oldtimerowe traktory kaž za čas pradźědow a prawowkow brózdy ćahaja. Wjace hač dźesać worarjow je so tam ze swojimi konjemi wobdźěliło, mjez nimi San­dro Zieschang z Hornjeho Wu­jěz­da ze swojimaj čornolěsnymaj liškomaj. Wosebita atrakcija pak běštej wołaj Manfreda­ Traupy z Radeberga. Wonej stej tež z Biskopičanskeho indianskeho dźiwadła pod hołym njebjom znatej.