Po měsće pojědu bórze elektrobusy
Wojerecy (KD/SN). Strukturna změna ma we Wojerecach takrjec cyle nowe wobličo. Tam pojědźe bórze šěsć nowych elektrobusow typa MAN Lion’s City E12C. Minjeny štwórtk su je před kulisu Hórnikečanskeje energijoweje fabriki přepodali. Kaž statny sekretar w sakskim ministerstwje za infrastrukturu Sören Trillenberg rjekny, „nastawa w měsće moderny paket z jězdźidłami, nabiwanskej infrastrukturu, zamkarnju a inteligentnym wodźenjom wobchada“.
Z dwanaće metrow dołhimi busami, kóždy z 80 městnami za sedźenje a staće, městnomaj za chorobny stoł, klimowej připrawu a ćopłotnej klumpu, chcedźa sej nowych sobujěducych zdobyć a lěpše zwiski k turistiskim a ke kulturnym cilam zmóžnjeć. Wot kónca julija pojědu nowe jězdźidła po pjeć měšćanskich čarach. Kóždy bus móže hač do 250 kilometrow daloko jěć. Na to dyrbi tři a poł hodźiny swoju bateriju nabić. Šoferow busow a sobudźěłaćerjow zamkarnje „nětko za nowe jězdźidła wukubłuja“, rozłoži jednaćelka Wojerowskeje wobchadneje towaršnosće Sandra Trebesius.
Je na času, popłatki znižić
Radźićeljo wjesnjanosće wopłóčkow dla jasny nadawk přepodali
Róžant (JK/SN). Hižo wjacore lěta je něhdyši zaměrowy zwjazk za wopłóčki Při Klóšterskej wodźe čłon wulkeho zaměroweho zwjazka za pitnu wodu a wopłóčki EWAG w Kamjencu. We wšěch tychle lětach njeje so poradźiło wuswětlić, što je so z pjenjezami stało, kotrež su čłonske gmejny něhdyšeho zwjazka jako swójski přinošk płaćili.
Wobchod z regionalnymi tworami
Chcedźa-li wobydlerjo Ralbic a wokolnych wsow nakupować, dyrbja do Kulowa, Rakec, Njeswačidła abo Pančic-Kukowa jězdźić. Znajmjeńša za twory wšědneje potrjeby móža sej tónle puć wotnětka zalutować, přetož maja wot wčerawšeho we wsy wobchod z regionalnymi wudźěłkami.
Ralbicy (SN/MWj). Tak kaž před dobrym lětom na poswjećenju Frenclec-Konjechtec statoka w Ralbicach připowědźene, je tam po fyzioterapeutiskej praksy, dowolowych bydlenjach a tajkich na podruž w minjenych tydźenjach a měsacach nastał nowy wobchod za regionalne wudźěłki. Tón je wot wčerawšeho wočinjeny a hnydom prěnich wćipnych wjesnjanow a kupcow přiwabił. Jim stej mějićelka Angelika Frenclowa a předawarka Michaelis Mjechelina rozłožiłoj, kotre twory w bywšej hródźi statoka poskićuja, zwotkel wone pochadźeja a kak je zapłaćić, hdyž předawarka na městnje njeje.
W Brězni nastawa nowa wohnjowoborna gratownja. Za nju su nawoda ...
Serbske filmy słušeja do poskitkow Nysoweho filmoweho festiwala
Najebać lěćne wjedro je wjace hač 6 000 zajimcow na lětuši 23. Nysowy filmowy festiwal (NFF) přichwatało. W 23 kinach a kulturnišćach w Němskej, Pólskej a Čěskej wužichu składnosć, sej na wšě sto filmow wobhladać.
Jónkrótnosć regiona pokazali
Nowy Miłoraz (AK/SN). „Nowy Miłoraz steji za zdźerženje wjesneje zhromadnosće w ćežkich časach strukturneje změny. Wjes, kotraž bu hač do kónca lěta 2024 přesydlena, wobohaća serbsku identitu w Slepjanskej wosadźe“. To wuzběhny krajny rada Zhorjelskeho wokrjesa dr. Stephan Meyer (CDU) minjenu sobotu k 23. hwězdnym kolesowanju.
Po dwanaće čarach – mjez druhim ze Zgorzelec, z Wojerec, Budyšina a Niskeje – bě sej ca. 1 600 wobdźělnikow do Noweho Miłoraza dojěło. „Hwězdne kolesowanje steji za to, štož naš wokrjes wučinja: pohib, zhromadźenstwo a žiwa zhromadnosć njehladajo na mjezy“, krajny rada wujasni. Zarjadowanje, tak wobkrući, ma jónkróćnosć regiona pokazać. K tomu słušeja po jeho słowach tež žiwa serbska kultura, wosebita Łužiska krajina a zhromadnosć ludźi z Němskeje, Pólskeje a Čěskeje.
Krótkopowěsće (02.06.26)
Porodźernju zawru kónc lěta
Kamjenc. Porodźernja Kamjenskeje chorownje swj. Jana so kónc lěta zawrěje. Maćerje móža tam hišće hač do 31. decembra dźěći porodźić. Po tym pak so durje doskónčnje zawru. Dalše wobhospodarjenje njeje móžne, dokelž by deficit, kotryž wotrjad měsačnje wuhospodarja, přichod cyłeje chorownje wohrožał. To zdźěli dźensa nawodnica komunikacije klinikuma Stephanie Hänsch.
Serbaj ze sportowcomaj lěta
Wětnicy. Tereza Maćijec a Jurij Bobka staj zašły pjatk sportowy kristal za sportowcow lěta dóstałoj. Sakska mišterka we wysokoskoku bu za swoje wuspěchi w lochkoatletice za towarstwo OSLV Budyšin wuznamjenjena. Jurij Bobka wuznamjeni so za swoje wukony a wuspěchi jako wolejbulist towarstwa Viktoria Worklecy.
Spěchujetej třěchu sotrownje
Po woleńcy so rozhladowali
„Domjaca apoteka“ – spěšna pomoc z medikamentami
Strowota njeje samozrozumliwa. Kóždy je wjesoły, hdyž ju ma. Što pak móžeš za swoju strowotu činić? Z tym zaběra so serija Serbskich Nowin, za kotruž wjacori awtorojo pisaja. (2)
Medikamenty bjez recepta (skrótka OTC) hraja wažnu rólu w strowotniskim systemje. Wone zmóžnjeja pacientam wjace swobody, wolóžeja lěkarjow a znižeja chorobnym kasam kóšty. Mnozy ludźo tele srědki jim dowěrjejo wšědny dźeń wužiwaja. Přiwšěm měli so prašeć, hač tute srědki jenož, dokelž móžeš je swobodnje kupić, woprawdźe přeco wěsće skutkuja?
Mnozy wěrja, zo je swobodnje k dispoziciji stejacy lěk awtomatisce njestrašny. To pak so myla. Rozsudne je dozěrowanje: Štóž přewjele srědkow bjerje, je předołho wužiwa abo samo wopačne lěki lapnje, móže swojej strowoće škodźeć.
Policija (01.06.26)
Bydlenski dom ewakuowali
Kamjenc. W nocy na njedźelu je w pincy bydlenskeho domu na Wernera Reifowej w Kamjencu woheń wudyrił. Při tym je so tak jara kuriło, zo dyrbjachu cyły dom ewakuować. Zdźěla wuchowachu wobydlerjow z wjerćatym rěblom z jich bydlenjow. Zranił so na zbožo nichtó njeje. Nimale 50 ludźi wosta přez nóc w bliskej sportowni. Druzy móžachu k přiwuznym a znatym hić. Dom so tuchwilu wužiwać njehodźi.
