Kolesuja na slědach Serbow
Malešecy. Towarstwo Nadźija w Malešecach přeprošuje na kolesowansku jězbu wuchodnje Budyšina pod hesłom Serbske impresije. Jězba po dwanaće kilometrow dołhej čarje přez Brězynku, Klukš a Stróžu wotměje so pjatk, 31. julija, a započnje so w 16 hodź. při Malešanskej cyrkwi. Wobdźělenje płaći pjeć eurow na wosobu. Wobdźělnicy njech přijědu ze swójskim kolesom. Přizjewjenja přijimuja pod telefonowym čisłom 0173 4537977.
Nutřkowne mocy sylnić
Worklecy. Kurs za zesylnjenje swojich nutřkownych mocow wotměje so za tydźeń we Worklecach, a to sobotu, 18. julija, wot 15 do 20 hodź. a njedźelu, 19. julija, wot 14.30 do 18.30 hodź. Jón nawjeduje Brazilčanka Karin Flores, wo přełožk za wobdźělnikow stara so Franciska Šejdźic. We wobłuku kursa su wobdźělnicy přeprošeni, sami sebje wědomišo začuwać a nowe formy bliskosće k druhim wotkryć. Wobdźělenje na woběmaj dnjomaj płaći 99 eurow, za jednotliwy dźeń 63 eurow. Přizjewjenja přijimuja pod .
Radworčenjo kónc januara wola
Radwor (SN/BŠe). Wohnjowoborne awta w Radworskej gmejnje běchu wospjet tema posedźenja gmejnskeje rady. Tónkróć dyrbješe gremij wo tym rozsudźić, hdźe maja so awta zaměstnić. Radworska a Minakałska wobora stej loni nowej awće typa HLF 10 dóstałoj. Nawoda woborow w gmejnje, Jens Gruber, přitomnym rozkładźe, hdźe móhli tamne jězdźidła zaměstnić, tak zo plan wohnjoweje wobory dodźerža. Namjet bu ze zamołwitymi za wohnjoškit a katastrofy wokrjesa wothłosowany a tež komunalny a prawniski zarjad je tomu přihłosował. Po diskusiji rozsudźichu so radźićeljo za předstajeny namjet Jensa Grubera. Mjeńše jězdźidło z Radworja typa TSF budźe w Chelnje zaměstnjeny. Za to dóstanje Radworska wobora tamniše jězdźidło. Minakałske mjeńše jězdźidło typa TSF-W pak přewostaja woborje we Łupoji. Tam stejace jězdźidło typa MTW ma gmejna předać.
Dale dojednachu so radźićeljo zawčerawšim na termin, na kotrymž ma so wjesnjanostka resp. wjesnjanosta gmejny wolić. To budźe klětu 31. januara.
Dorost baćonow po 18 lětach
Pěskecy. Wobydlerjo w Pěskecach maja lětsa wosebitu přičinu so wjeselić. Po 18 lětach je porik baćonow wuspěšnje młodźeći woćahnył. Po nimale dwěmaj lětdźesatkomaj je to prěni lehnjenski wuspěch we wsy.
Zakład za tute wuwiće połožichu angažowani wjesnjenjo hižo w lěće 2020. W swójskej iniciatiwje natwarichu na wusłuženym milinowym sćežoru nowe baćonjace hnězdo. Po tym zo njeběchu ptaki dotalne hnězdo hižo přiwzali, dokelž bě tam 2009 błysk zadyrił, nasta na gmejnskej ležownosći pódla hatka nowa móžnosć hnězdźenja. Ideju za nowe hnězdo mějachu wjesnjenjo, kotřiž projekt zhromadnje z młodostnymi z wulkim angažementom zwoprawdźichu. Jich zaměr bě, baćonam w Pěskecach zaso kmane městno za lehnidło skićić.
Na nabožnym tydźenju Budyskeje wosady je so tele dny 36 dźěći 1. ...
Krótkopowěsće (10.07.26)
Wjesnjanostu napominali
Malešecy. Wotrjad krajnoradneho zarjada Budyšin za prawniski dohlad nad gmejnami je Malešanskemu wjesnjanosće Matthiasej Seidelej (CDU) z disciplinariskim jednanjom hrozył, jeli w zwisku z planowanym twarom zakładneje šule dale prawa gmejnskeje rady ignoruje. Nimo toho je financowanje twara wokomiknje njewěste. Wo tym informuje Steffen Lehmann, předsyda frakcije AfD.
Bombu wuspěšnje znješkódnili
Choćebuz. Bomba z Druheje swětoweje wójny, kotruž běchu dźěłaćerjo spočatk tydźenja na twarskej ležownosći při Choćebuskim dwórnišću namakali, je znješkódnjena. Něhdźe 3 000 ludźi dyrbješe wčera kónčinu, hdźež 250 kilogramow ćežka bombu ležeše, wopušćić. Tež tramwajki, ćahi a busy njesmědźachu tam jězdźić.
Dalši nakład „Małeje wjery“
Změja jedyn lokal
Pančicy-Kukow (SN/MWj). Přichodny čestnohamtski wjesnjanosta Njebjelčanskeje gmejny móhł prawdźepodobnje Tomaš Klar z Miłoćic być. Jeho mjeno budźe jeničke, kotrež wolerjo na wólbnym lisćiku nańdu, hdyž 6. septembra wolić póńdu. Kandidaturu 55lětneho samostatneho třěchikryjerskeho mištra je wólbny wuběrk minjeny pjatk w zarjadniskim zwjazku Při Klóšterskej wodźe wobkrućił (SN rozprawjachu). Kaž předsyda wólbneho wuběrka Stefan Anders na posedźenju gremija rozłoži, je Tomaš Klar njewotwisny kandidat. Tuž trjebaše wón podpisma znajmjeńša 20 podpěraćelow, kotrež tež dósta.
Jenički wólbny lokal za wólby wjesnjanosty budźe w gratowni Njebjelčanskeje wohnjoweje wobory. W Miłoćicach a Pěskecach, hdźež su wjesnjenjo dotal tohorunja swój hłós wotedać móhli, hižo wólbnej lokalej njebudźetej. Hladajo na snadnu ličbu wolerjow wo tym rozmysluja, listowe wólby tohorunja w Njebjelčicach wuličić a nic separatnje we wólbnym předsydstwje w Pančicach-Kukowje. Tole pak hišće dorozsudźene njeje, Anders informowaše.
Artistika na puću zadźiwała
Policija (09.07.26)
Wuměnkarku wobšudźili
Kamjenc. Z woporom wobšudnikow je so wutoru popołdnju wuměnkarka pola Kamjenca stała. Njeznaći běchu na nju zazwonili a jej napowědali, zo je bratrowča ćežke wobchadne njezbožo zawiniła. Wobšudnicy žadachu sej kawciju a rentnarka přepoda před swojimi chěžnymi durjemi njeznatej wosobje 5 000 eurow. Policija w tym zwisku wospjet namołwja, podhladne telefonaty hnydom skónčić a policiju informować. Wšojedne wo kotru stawiznu so jedna – njedawajće cuzemu čłowjekej pjenjezy abo drohoćinki!
Magiski wječor dožiwili
Prěnje zarjadowanje noweho rjada w klóšterskej zahrodźe
Pančicy-Kukow (SN/MWj). Premjeru wosebiteho razu je wčera něhdźe 50 wopytowarjow zahrody klóštra Marijineje hwězdy w Pančicach-Kukowje dožiwiło. Tam wotmě so prěni raz wječor noweho rjada „Kultura a kulinarika“, organizowany wot Křesćansko-socialneho kubłanskeho skutka. Kaž jeho sobudźěłaćerka Sonja Hejdušcyna rjekny, bě zaměr lětnjeho wječora, zahrodu ze wšitkimi zmysłami dožiwić a při tym hudźbnu mnohotnosć z kulinariskimi wosebitosćemi zwjazać. Hosći njewitachu jenož ze škleńčku proseccom, ale tež z rjenje wupyšenymi blidami, nastajenymi mjez předawanskim pawiljonom a lodowej pincu.
Papagaje smorčeli a kašlowali
Wosebje na wsach drje je lědma domjacnosće, w kotrejž njeje domjaceho zwěrjeća. Mjeztym zo so psyk a kóčka poměrnje husto jewitej, su bóle eksotiske zwěrjata skerje rědke. Wo nich a jich plahowarjach na wšelakich městnach Łužicy rozprawjamy w lětnjej seriji Serbskich Nowin. (1)
K wuspěšnemu powołanskemu žiwjenju słuša zmysłapołna wólnočasna zaběra abo hobby – to bě a je žiwjenske hesło dr. Jurja Žura w Pančicach-Kukowje. Wón bě w młodych lětach zahority sportowc-kolesowar, pozdźišo běchu eksotiske ptački, hłownje papagaje, jeho wulka lubosć. Započało je so to hižo w dźěćatstwje, jako bě jeho nan husćišo rjaneho ptačka wutykał. Zahoritosć za po barbach najwšelakoriše a žiwjenskim wašnju přewšo zajimawe ptački je za čas jeho studija skótneje mediciny rostła a hač do dźensnišeho wostała. Žiwjenje z eksotami bě za dr. Jurja Žura połne jónkrótnych dožiwjenjow a zajimawych nazhonjenjow.
