Krótkopowěsće (18.05.26)
Astrocentrum toči w Delanach
Nowoslicy. W zwisku ze seismiskim přepruwowanjom granitoweho spódka zahaji Astrocentrum Łužica (DZA) dźensa blisko Nowoslic točenje do něhdźe 300 metrow hłubiny. Lětsa w februarje běchu hižo w Chrósće točili. Dokelž dźe w Delanach wo móžne zaměstnjenje Einsteinoweho teleskopa, je za to – hinak hač w Chrósće – Drježdźanska Techniska uniwersita zamołwita, tak nowinski rěčnik DZA Stephan Witschas.
Serbski sejm so schadźował
Wojerecy. Serbski sejm so za wužiwanje alfabeta mjeńšinowych rěčow, tež serbšćiny, na formularach za SEPA-přepokazanki zasadźuje. Wotpowědnje zdźělence Stanisława Nawki su so na posedźenju nimo toho z wusměrjenjom gremija zaběrali a zwěsćili, za maja dweju woleneju sejmarjow, „kotrajž njejstaj na kóždy pad našeho měnjenja“. Z tym staj přiwisnikaj prawicarskeje strony a politiki měnjenaj.
Horu Říp njezwohidźić
Kałaty narodninski postrow
Dom towarstwow čile wužiwaja
Na dźeń muzejow
Budyšin. Budyski Serbski muzej přeprošuje tutu njedźelu, 17. meje, pod hesłom „Muzeje z wjeselom wotkryć“ na darmotny wopyt. Wot 17 do 18 hodź. powjedźe muzeologa Alexander Pólk po wustajeńcy „Nowa Doba. Serbja w powójnskim času a zažnej NDR“. Zdobom stej trajna a wosebita wustajeńca přistupnej.
Wjac hač mejemjetanje
Němcy. W Němcach maja cyły kónc tydźenja program kołowokoło mejemjetanja přihotowany. Wjesny klub wuhotuje zdobom wjesny swjedźeń. Mjez druhim móža wopytowarjo MAGPIE Open Air dožiwić. Dalše mejemjetanja budu mjez druhim sobotu we Wotrowje, Róžeńće a Chrósćicach a njedźelu w Njebjelčicach.
Meja njeje, swjedźeń budźe
Policija (15.05.26)
Z e-bikom napadnył
Wojerecy. Na Dróze měra we Wojerecach bě 36lětny w nocy na štwórtk z e-bikom po puću. Při tym pak wěsće na swojim jězdźidle njesedźeše. Policisća němskeho muža zadźeržachu a zwěsćichu, zo bě wón napity. Test je wobkrućił, zo ma 2,96 promilow alkohola w kreji. Po zdaću běše muž tež konop konsumował. Tuž přikazachu zastojnicy přepytowanje kreje a zakazachu jemu dale jěć. To změje za njeho konsekwency, wón dóstanje wozjewjenku.
Smě přistajeny z radźićelom być?
Personalija Njebjelčansku gmejnsku radu wospjet zaběrała
Njebjelčicy (SN/MiR). Na posedźenju gmejnskeje rady w Njebjelčicach wutoru wječor su radźićeljo wobzamknyli, tamnišemu towarstwu Kamjenjak z. t. nowe zrěčenje wo wotnajeću ležownosće předpołožić. Te wšak je hižo dlěje nadźěłane. Do toho běše předsyda towarstwa Hubert Lange skutkowanje wuměłskeho a kubłanskeho towarstwa rozjimał. Zdobom je wón wjesnjanostu a gmejnskich radźićelow wospjet na areal přeprosył. Gmejna skedźbni na to, zo na ležownosći wjacore kontejnery steja. Lange zwurazni, zo su kontejnery mobilne a so lochko wotwjesć hodźa, runje tak kaž bydlenski wóz. Tuž twarskemu prawu njepodleža.
Rjemjesło steji w srjedźišću
1024. Budyske nalěćo, kiž wotměje so wot 29. hač do 31. meje w měšćanskim centrumje, Budyšanow kaž tež mnohich hosći lětsa wospjet z hudźbu a rejemi wabi. Tónraz změje swjedźeń štyri wobsahowe ćežišća.
Budyšin (CS/SN). Tak chce Budyšin partnerstwo z městom Heidelbergom, kotrež mjeztym 35 lět wobsteji, hódnoćić. Dźeń čestnohamtskeho zastojnstwa, kotryž so po cyłej Němskej hižo 23. meje swjeći, přestorči so w sprjewinym měsće na 1024. Budyske nalěćo. Wospjet spožča zasłužbnemu wobydlerjej abo wobydlerce wuznamjenjenje „Wutroba za Budyšin“ za čestnohamtske zastojnstwo. Na kóždolětnym dnju towarstwow ma rjemjesło w srjedźišću stać. Tuž změja tam přehladku frizěrowanja a předstaja rjemjesło kowanja.
Pod nawodom Katrin Matkec (prědku klečo) je w Serbskim kubłanskim ...
Krótkopowěsće (15.05.26)
Centrum slědźenja we Łužicy
Choćebuz. Łužica ma so ze srjedźišćom slědźenja stać. 1,8 miliardow eurow zwjazkowy slědźenski centrum za to k dispoziciji staji. 1,2 miliardźe eurow z toho dóstanje hač do lěta 2038 Mediciniska uniwersita Łužica. Zbytk pjenjez zasadźa za planowany park wědomosće ,,Science Park“ blisko Choćebuza.
Budyšan w narodnym mustwje
Kamjenica. Rodźeny Budyšan a bywši šuler Serbskeho gymnazija Budyšin Amadeus Zamora Gonzalez je za narodne koparske mustwo Nikaraguwy nominowany. 19lětny złoži lětsa maturu na sportowym gymnaziju w Kamjenicy a pojědźe po tym z narodnym mustwom U20 we wobłuku swětoweho mišterstwa na hru přećiwo Južnej Africe. Něhdy je pola Budissy Budyšin a Traktora Malešecy hrał.
Starosća so spalernje dla
Do Krabatoweho młyna
Čorny Chołmc. W Krabatowym młynje w Čornym Chołmcu wjesela so jutře, 14. meje, wot 10 do 18 hodź. na wopyt muži. Na swjedźeń ze słódnej jědźu pak su tež swójby přeprošene. Wosebje dźěći, ale tež starši wopytowarjo móžeja so tam při wšelakich hrach zabawjeć. Do Čornochołmčanskeho něhdyšeho hosćenca přeprošuje wjesny klub wot dopołdnja w 10 hodź. na zhromadny dźeń zajimcow wšitkich generacijow.
Na party do Delan
Konjecy. W towarstwowym domje w Konjecach stara so pjatk, 15. meje, DJ Frank Wjesela wo dobru naladu. Wot 19 hodź. wotměje so tam ultimatiwna party. Rejować móžeće po rytmje discofoxa z 1980tych a 1990tych lět. Zastup je darmotny.
Honače napřemo spěwaja
Jaseńca. W Jaseńcy, w Bóšičanskej gmejnje, na Jasčanskej 14 wotměje so njedźelu, 17. meje, napřemospěwanje honačow. W 9.30 hodź. so hodźinske wubědźowanje zahaji. Popłatk za wobdźělenje wučinja jedyn euro. Wobsedźerjo honačow njech přizjewja so hač do pjatka, 15. meje, pod telefoniskim čisłom 0152 04656374. Přihladowarjo su witani.
