Policija (21.07.25)
Při wočerstwjenišću kradnyli
Niža Wjes. Njeprošeny wopyt mějachu w nocy na sobotu při wočerstwjenišću w Nižej Wsy pola Rakec. Tam su so njeznaći namócnje do bydlenskeho woza zadobyli a wšelake wěcy w hódnoće 40 eurow pokradnyli. Po wšěm zdaću zachadźachu chětro rabiatnje, přetož wěcna škoda wučinja na wšěch 500 eurow, kaž policija rozprawja.
WiesenBeats posledni raz
Minjeny kónc tydźenja je so Sulšečanske sportnišćo zaso na pisanu festiwalnu ležownosć přeměniło. Z wosmym wudaćom so swjedźeń WiesenBeats w znatym formaće najprjedy raz skónči.
Sulšecy (LMZ/SN). Z wjele prócu Sulšečanskeje młodźiny nasta lětsa na sportnišću wospjet swjedźenišćo, kotrež hodźi so nastupajo profesionalitu a atmosferu lědma přetrjechić. Rejwanišćo z jewišćom, technobunker a stan za šlagry skićichu wopytowarjam wulku hudźbnu wšelakorosć. Z neonowymi barbami, samopaslenymi dejmantami a dalšimi dekoraciskimi wosebitostkami je angažowana młodźina wjeski znowa jónkrótny areal stworiła. Tež wolejbulowe hrajnišćo su Sulšečenjo lětsa zaso do małeho přibrjoha z lěhakami a lampionami přetworili.
Wobrazy a hudźba zakuzłali
Klóšterska zahroda wulkotna kulisa za njewšědnje rjany wječor
Pančicy-Kukow (SN/MWj). Miły lětni wječor, na jewišću cunja hudźba, serbske reje, artistika a show z wohenjom, tysacy swěčkow w pisanych wobrazach a k tomu słódnosće za žołdk a kyrk – to bě měšeńca, kotraž je sobotu 1 400 wopytowarjam Nocy tysac swěčkow w klóšterskej zahrodźe w Pančicach-Kukowje wokřewjace hodźiny wobradźiła. Organizatorojo Křesćansko-socialneho kubłanskeho skutka wokoło Sonje Hejdušcyneje móžachu so na wjedrowu připowědź spušćeć, tak zo je so jich próca přihotowanja zadaniła. Tójšto ludźi, kotřiž chcychu sej hakle wječor lisćik kupić, su bohužel domoj pósłać dyrbjeli, dokelž bě maksimalna ličba wopytowarjow docpěta.
Krótkopowěsće (21.07.25)
Chłódnu šćežku natwarili
Rań. „Chłódna šćežka“ rěka 30 kilometrow dołhi kolesowarski puć njedaloko města Rań (Großräschen) we wokrjesu Hornje Błóta-Łužica, kiž je změnje klimy přiměrjeny. Je to prěni swojeho razu po cyłej Němskej. Hižo wobstejacy puć su wědomostnicy z kameru za ćopłotne wobrazy analyzowali. Na tym zakładźe wjedźe čara k wotpočnišćam, pitnym studnjam a kupanišćam.
Žane spěchowanje za strowotu
Krušwica/Rěčicy. Za prěni mediciniski zastaranski centrum (MVZ) w komunalnym nošerstwje w Hornjej Łužicy, kotryž chcedźa w požnjencu wotewrěć, njejsu spěchowanje ze sakskeho socialneho ministerstwa dóstali. Krušwičanski wjesnjanosta Tristan Mühl (Swobodni wolerjo) praji, zo dyrbja start MVZ tohodla z kreditom znajmjeńša 300 000 eurow financować.
Trojorěčna zběrka lyriki wušła
Imobilija ze serbskim koloritom na předań
Nižozemjan Jan Pierre van Ede je hród přetwarił a jón ze žiwjenjom pjelnił
Znajerjo impozantneje imobilije njewědźa so ducy nimo hroda we Wysokej pola Wóslinka zrudneho napohlada dohladać. Hród je hižo dlěje njewobydleny a ležownosć je njehladana. Hižo loni w aprylu bě so nuzowe přesadźenje ležownosće bjezwuspěšnje skónčiło, dokelž njebě za to dosć zajima. Lětsa stejitej hród a ležownosć z pódlanskimi twarjenjemi, kotrež su pomnikoškitane, znowa na lisćinje nuzowych přesadźenjow.
Mnozy ludźo so na historiske wosebitosće objekta dopominaja. Wo tym swědča mjez druhim wšelake přinoški w serbskim dźeniku. Kónc Druheje swětoweje wójny dyrbjachu so tam młodźi mužojo, mjez nimi tež někotři ze serbskimi korjenjemi, na wójnsku słužbu přihotować. W aprylu 1945 pak woni wot tam twochnychu. Po wójnje potom přebywachu w hrodźe ćěkancy, kotrež z domoródnymi wottorhanju hroda we Wysokej zadźěwachu. W nazymje samsneho lěta zaćahny najprjedy zakładna šula, pozdźišo starownja a na to dźěsćownja do hroda.
Wulke twarnišćo w starym měsće
Dźěći z horta wohnjowych wobornikow wopytali
Worklecy/Smječkecy. „Wotkryjemy sej Worklecy a wokolinu“ je hesło tohole prózdninskeho tydźenja we Worklečanskim horće „K wódnemu mužej“. Tak podachmy so wutoru do swojeho bjezposrědneho susodstwa a wopytachmy wohnjowu woboru w Smječkecach. Měrćin Nowak nam nadawki wobornikow nazornje rozkładźe. A to nic jenož za blidom! Holcy a hólcy smědźachu so sami wuspytać, woheń zamiškrić a wobkedźbować, kak spěšnje mała škrička k wulkemu wohenjej rosće. Tež telefonat z wuchowanskej dispatchernju běše dźěl programa. Po tym zo běchu dźěći čisło 112 wolili, mějachu same daty dale dać a nuzowu situaciju wopisać. To bě přewšo napjate dožiwjenje. Wulke wjeselo knježeše, jako smědźachu mali wopytowarjo z hadźicu a z wohnjohašakom płomjenja podusyć.
Zawěsće dźěći doma wjele rozprawjachu. Snano so tón abo tamny, ta abo tamna z nich rozsudźi, so pozdźišo sam/a z wobornikom stać.
Měrćinej Nowakej a kameradam w Smječkecach zapłać Bóh za rjane dožiwjenje! Christina Měškankowa
Policija (18.07.25)
Warnuja před wobšudnikami
Budyšin. Žołmu wobšudniskich telefonatow je policija wčera w Hornjej Łužicy zwěsćiła. Z Kamjenca, Kumwałda, Załomja a Lubija je wjace hač dźesać wotpowědnych pokiwow wobydlerjow dóšło. Na zbožo nihdźe škoda nastała njeje. Zo by tak wostało, měli ludźo kedźbliwi być. Wobšudnicy přizjewja so jako policisća a mjenuja samo čisło swojeho běrowa, najskerje zo by to wěrje podobnje klinčało. W někotrych padach běchu tež pozdatni swójbni při aparaće. Zwjetša woni ludźom napowědachu, zo bě so njezbožo stało, zo je něchtó zemrěł a zo dyrbi zawinowar do jastwa. Tomu móhło so z kawciju wotwobarać. Za to žadachu wot zawołanych hač do 50 000 eurow. Policija namołwja ludźi, so wobwliwować njedać a cuzym na žadyn pad pjenjezy abo debjenki přepodać. Kohož su skućićeljo zazwonili, njech so pola policije přizjewi.
Skulptury digitalnje dožiwić
Muzej nowu internetnu stronu „Na slědach kamjenjow“ wuwił
Wojerecy (AK/SN). Z nowej internetnej stronu Wojerowski měšćanski muzej zmóžnja, zo wopytowarjo skulpturowe wuměłstwo a jeho stawizny na žiwe wašnje a digitalnje dožiwjeja. Tole zdźěli nawodnica muzeja Kerstin Noack.
„We Wojerecach mamy dźensa něhdźe sto skulpturow. Wone steja mjez platowymi bydlenskimi domami, na zelenišćach a při hłownych dróhach“, Noack rozłoži. „Wone powědaja wo wosebitym času, kotryž měješe wizije wo mjezynarodnych zetkanjach a zmužitosć, wuměłstwo samozrozumliwje w zjawnym rumje prezentować.“ Z nowej internetnej stronu „Na slědach kamjenjow“ chce muzej tónle wotrězk měšćanskich stawiznow zajimowanym wužiwarjam zbližić. Tale strona přeprošuje tomu, sej skulptury wobhladać, so dopominać a dale myslić.
Za čo trjeba zawod hajk při skale?
Budyšink/Plusnikecy (UM/SN). Malešanska gmejnska rada je na swojim zašłym posedźenju próstwu firmy ProStein, kotraž skału w Plusnikecach wobhospodarja, jednohłósnje wotpokazała. Předewzaće bě namjetowało, zo ležownosć bjezposrědnje južnje pódla swojeho terena wot gmejny přewozmje a za to k skale wjeducu dróhu Budyšink-Plusnikecy saněruje. Kaž ze stejišća gmejnskeho zarjadnistwa wuchadźa, „je potrjechena ležownosć z hajkom wobrosćena. Tónle hajk wulki dźěl hary a procha, kotryž ze skały wuchadźa, wotpopadnje.“ Budyšink ćerpi tak a tak sylnje hary a smjerda dla, wšako stej nimo skały tež awtodróha a mlokowy kombinat w bliskosći.
