Lejno (AK/SN). Při Lejnjanskim jězoru so móhłrjec wari – ale nic horcoty dla. „Štwórte lěto zasobu dyrbimy z twarnišćemi žiwi być. Kóždy raz su poćežowanja, wužadanja a rozdźělne wobmjezowanja. To wšo je zwjazane z mjenje dochodami“, praji Alfred Tempel, mějićel pobrjóžneje bary „Ostufer“ mjez wuchowanskej stražu a policajskim běrowom.

Wón měni, zo jeho přepozdźe a w njedosahacej měrje informuja. Wjacore razy je to na posedźenjach gmejnskeje rady Halštrowskeje Hole narěčał. „K barje so dóstać je tuchwilu ćežko. Pobrachuje prawe­ wupisanje, štož myli“, wón praji. „Čehodla so wosrjedź sezony twari? Gmejna je w tym nastupanju mało sensibelna.“ Dokelž je puć špatnje wupisany, druhdy tež wotpadkowe awto puć hač k barje namakało njeje. Nimo toho su wandalojo někotre pokazowaki a informaciske taflički skóncowali. Dale so Alfred Tempel hněwa, zo kupanski wobłuk w jězoru woznamjenjeny njeje. To móhło ke konfliktam mjez kupacymi a wodźerjemi čołmikow wjesć.

Mały Wosyk. Přichodny škotowy turněr serbskich seniorow wotměje so jutře, wutoru, w sportowym domje w Małym Wosyku (Kleinhähnchen). Započatk je w 14 hodź. Nowačkojo su kaž přeco wutrobnje witani. Dalši turněr budźe 28. julija w Radworskim „Słodeńku“.

Kak so něhdy kupachu

Budyšin. Historiske romany a filmy pokazuja často drastiski wobraz wo hygieniskich poměrach w srjedźowěku. We woprawdźitosći pak běchu runje tehdy zjawne kupjele jara woblubowane. W Budyšinje bě w srjedźowěku samo wjacorych tajkich městnow. Wone a tehdyša hygiena ćěła steja w srjedźišću přednoška Rica Heyla jutře, wutoru, w Budyskej měšćanskej bibliotece. Započatk je w 19 hodź., zastup je darmotny. Přizjewjenje njeje trěbne.

Radźićeljo wuradźuja

Wiki rjemjesła je towarstwo Dwórnišćo inkluzije Radwor sobotu prěni raz na arealu bywšeho Radworskeho dwórnišća zarjadowało. Wopytowarjo móžachu sej rjemjeslniske wudźěłki kupić abo sej sami něštožkuli zhotowić. Wiki nimaja jónkrótne wostać.

Radwor (SN/BŠe). Něhdźe 15 rjemjeslnikow wobdźěli so zawčerawšim, sobotu, najebać horcotu na prěnich rjemjeslniskich wikach na ležownosći bywšeho Radworskeho dwórnišća. Prěni raz bě tamniše towarstwo na wosebitu přehladku přeprosyło. Pozadk toho je Leaderowy projekt, kotryž so 30. junija skónči. We wobłuku projekta je towarstwo prawidłownje dźěłarnički přewjedowało, na kotrychž zaběrachu so wobdźělnicy ze starym rjemjesłom. „Z wikami chcemy projekt zakónčić“, praji předsydka towarstwa Raphaela Wićazowa. Tuž spřistupnichu organizatorojo wobdźělene rjemjesła hišće raz wjetšemu publikumej. W běchu projekta je sobudźěłaćerka towarstwa Sylwia Weße styki z regionalnymi rjemjeslnikami nawjazała. Za přihot wikow tule syć rady wužiwaše.

Ze Šćežku bajow je město Budyšin wo dalšu atrakciju bohatše

Budyšin (CS/SN). Runje tak kaž dźěćo w maćernym žiwoće wot spłodźenja hač do naroda dźewjeć měsacow trjeba, je tež najnowše „dźěćo“ města Budyšina dźewjeć měsacow wot ideje hač k zwoprawdźenju trjebało: Budyska Šćežka bajow. Pjatk su ju w přitomnosći sakskeje ministerki za turizm Barbary Klepsch zjawnosći přepodali.

We wobłuku wubědźowanja „Ab in die Mitte“ dóstachu za šćežku myto we wobjimje 40 000 eurow. Dalše spěchowanje pochadźeše z Leaderoweho programa (30 000 eurow) a ze srědkow serbskeho komunalneho programa (11 500 eurow). Tež ze swójskeje kasy je město Budyšin pjenjezy přidało. W awgusće 2025 dósta Studijo za bjezkónčne móžnosće nadawk, šćežku zarjadować. 12. septembra wotmě so prěnja dźěłarnička, na kotrejž ideje za projekt zběrachu. Lětsa w měrcu móžachu zastupjerjo města sobu dožiwić, kak w Drježdźanskej lijerni Ihle fi­gury nastachu. Te su před něšto dnjemi w Budyšinje nastajili.