Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow ­prócuja. K tomu ­přinošować chce naša serija z pokiwami z weterinarneje ­mediciny. (73)

Chorosće, kotrež so wot čłowjeka na zwěrjo a nawopak přenjesu, tak mjenowane coonosy, dźeń a dale přiběraja. Ze zašłosće su nam hesła kaž AIDS abo koronawirus znate. Njedawno wozjewi so sta­tistika, zo přiběraja pady infekcijow z liškowym šlebjerdakom (Fuchsbandwurm) pola čłowjeka w Europje, přede­wšěm w Awstriskej, w Šwicarskej, w Francoskej a w Němskej. Při tym njenatyknu so wosoby jenož přez njemyte jahody z lěsa, ale tež přez ekskrementy drobneho skotu. Tohodla měli so psam a kóčkam prawidłownje medikamenty přećiwo parazitam dawać.

Před krótkim sym přinošk wo tuberkulozy pola čłowjeka nadešła. Je to chorosć, kotraž trapješe čłowjestwo přez lěttysacy. Tež dźensa hišće schori a zemrěje wjele ludźi na nju. Při tym njeje dokładnje jasne, hač je so wubudźak suchoćiny (Schwindsucht/Tuberkulose) jednoho dnja wot čłowjeka na howjado abo nawopak přenjesł.

Miłoćicy (SN/MWj). Z nowymi temami a wupruwowanymi formatami pokročuje Křesćansko-socialny kubłanski skutk tež w lěće 2026 swoje woblubowane ze­žiwjenske seminary. Kaž zamołwita za zjawnostne dźěło Uta Große zdźěli, wočakuje zajimcow w klóštrje Marijina hwězda w Pančicach-Kukowje a na Wojerowskej dźěćacej a młodźinskej farmje wotměnjawy program kołowokoło stroweho zežiwjenja.

Rjady seminarow „Zetkanišćo strowe zežiwjenje“, „Zetkanišćo strowota“ kaž tež „Klewernje a kreatiwnje warić“ skića tež lětsa zajimawe impulsy, praktiske pokiwy a móžnosć wuměny. Wšitke terminy a temy za 2026 su hižo jasne a online na wozjewjene. Tam móža so zajimcy tež přizjewić.

Sulšečanska młodźina wo zastaranje na lětnym swjedźenju so starała

Sulšecy (KH/SN). Na swój tradicionalny lětny swjedźeń je towarstwo Bratrowstwo Kulowskeje wosady sobotu do Sulšec přeprosyło. Žurla tamnišeho kulturneho domu bě derje pjelnjena a wopytowarjo so wjeselachu, zo tam znate mjezwoča wuhladaja.

Ralbicy. Dźeń wotewrjenych duri wuhotuje Ralbičanska serbska wyša šula wu­toru, 13. januara. Delanscy šulerjo a wučerjo zajimcam swoju šulu předstaja, ­informuja wo cyłodnjowskich poskitkach a zmóžnja jim samo wopyt wučby. Dopołdnja šulerjo wokolnych šulow do Ralbic přijědu. Wot 17 do 19 hodź. su potom wšitcy dalši zajimcy přeprošeni sej šulu wobhladać. Za staršich přichodneho 5. lětnika je we 18 hodź. na prěnim ­poschodźe w rumnosći čo. C02 wosebite informaciske zarjadowanje.

Poradźuja wo zesamostatnjenju

Kamjenc. Darmotne informaciske za­rjadowanje za wšitkich, kotřiž chcedźa so zesamostatnić, wotměje so jutře, wu­toru, 13. januara, wot 16 do 18 hodź. w rumnosćach Kamjenskeje IHK na Haydnowej 2. W seminarnej formje zajimcy zhonja, na čo měli při zesamo­statnjenju dźiwać.