Z ratarjemi so solidarizowali
Policija pozdatny nadpad přepytuje
Budyšin (SN/BŠe). Na internetnej stronje Facebook skedźbni wobydler z Budyšina na pad, kotryž bě so minjenu wutoru njedaloko Mosta swjateho ducha stał. Tam staj pozdatnaj wukrajnikaj młodostneho z nožom nadpadnyłoj. Powěsć so spěšnje w syći rozpřestrě a tež strona AfD reaguje a ma nadpad za „atentat na žiwjenje“. Kaž policija na naprašowanje SN zdźěli, je jim pad znaty a zastojnicy přepytuja njewobkrućeneho podhlada dla w zwisku ze strašnym zranjenjom ćěła. Wozjewjenka policiji předleži.
Z wopisowanja nadpada wuchadźa, zo staj wukrajnikaj młodeho muža narěčałoj a so jeho woprašałoj, hač chce wón drogi kupić. Młodostny spyta ćeknyć, při čimž staj skućićelej jeho z nožom nadpadnyłoj. Młody muž pak móžeše so wuwinyć.
Krótkopowěsće (19.01.24)
Přihotuja jutrowny seminar
Budyšin. Serbske młodźinske towarstwo Pawk hotuje so na lětuši jutrowny seminar Młodźiny europskich narodnych skupin (MENS) w Budyšinje. W martrownym tydźeńju wočakuja někak 60 młodostnych z cyłeje Europy. Z jednaćelku MENS zetkachu so štwórtk zo bychu program a financowanje seminara wothłosowali.
Organizatorojo NFF přeprošuja
Großhennersdorf. Filmowy festiwal Nysa (NFF) wotměje so lětsa wot 14. do 19. meje a to hižo 21. raz. Wjace hač 900 filmowych přinoškow w kategorijach hrajny a dokumentarny film kaž tež krótkofilm je lětsa dóšło – wjace hač hdy prjedy. Na 21 městnosćach podłu Nysy w Čěskej, Pólskej a Němskej njeposkićuje festiwal publikumej jeno filmowe předstajenja, ale tež koncerty, čitanja, wustajeńcy a partyje.
Busy zaso po planje po puću
Budyšin. Hładkich dróhow a wjele sněha dla njejsu wot wčerawšeho popołdnja w Budyskim wokrjesu busy jěli. Informaciju rozšěrichu zamołwići za bliskowobchad mjez druhim po socialnych medijach. Wot dźensnišeho ranja busy zaso po planje jědu, přiwšěm móhło k zapozdźenjam dóńć.
Na popołdnjo swójbow
Budyšin. Sobudźěłaćerjo Budyskeho Serbskeho muzeja přeprošuja na popołdnjo swójby „Ducy domoj“. Te budźe njedźelu, 21. januara, wot 15 hodź. Wobdźělnicy móža tu wustajeńcu z fotografijemi Jürgena Maćija interaktiwnje zeznać. Dźěći pasla leporelo, nowolětki a maski za ptači kwas abo póstnicy. Za dorosćenych poskićuja organizatorojo w tym času kuratorske wjedźenje z Jürgenom Maćijom a Alexandrom Pólkom. Jeli sněh hišće leži, twarja wšitcy zhromadnje sněhoweho muža abo sněhowu žonu. Twarcy najrjeńšeho eksemplara dóstanu myto. Za wšitkich je přikusk přihotowany.
Pinocchio je po puću
Budyšin. W Budyskim dźiwadle pokazaja sobotu, 20. januara, w 17 hodź. přidatnje inscenaciju PINOCCHIO. Carlo Collodis je ze swojej stawiznu wo starcu Gepetto ze swojej žiwej drjewjanej klanku literarnu twórbu napisał, kotraž je do dźensnišeho jara woblubowana. Inscenacija je napjata a pohonjuje swójsku fantaziju. Dźiwadłownicy poručeja hru za dźěći w starobje wot šěsć lět.
Hnujace spěwy wo žiwjenju
Policija (18.01.24)
Njezbožo z kolesom
Wojerecy. 56lětna wodźerka awta marki BMW je wutoru z dróhi Měra naprawo na dr. Wilhelma Külzowu dróhu wotbočiła. Při tym wona kolesowarku přewidźa. 45lětna bu lochce zranjena. Wěcna škoda wučinja něhdźe 600 eurow.
Maja nowe předsydstwo
Wobdźělenje gmejny so zadaniło
Rakecy (JK/SN). Bjez wuskutkow wostanje na wčerawšim posedźenju Rakečanskeje gmejnskeje rady nastorčena diskusija wo nowym popłatku za pitnu wodu. Diskusiju bě we wobłuku wobydlerskeje rěčneje hodźiny Jitkowčan Swen Helm nastorčił, kotryž měješe wobmyslenja ke kalkulacijam kaž tež modalnosćam, kak nowy popłatk wobydlerjam wozjewja. Po jeho měnjenju by so popłatk dyrbjał jeničce na přetrjebane mnóstwo wody poćahować a wobličić, to rěka bjez zakładneho popłatka. Nimo toho njeje wón z wašnjom spokojom, kak bu změna popłatka wobydlerjam wozjewjena. Změna popłatka měła so wobydlerjam hižo dočasnje wozjewić a nic hakle z přichodnym čisłom hamtskeho łopjena (januar 2024), kotrež ani wšitcy wobydlerjo njedóstanu a so potom dźiwaja, zo dóstanu nowu zličbowanku. K zakładam a kalkulaciji popłatka kaž tež formje wozjewjenja wotmołwištaj wjesnjanosta Swen Nowotny (CDU) a jednaćel Rakečanskeje zastaranskeje tzwr Markus Mörbe. Tón pokaza na to, zo su aktualne wobličenje a kalkulaciju za to hižo dočasnje přewjedli.
Skónčnje zaso camprować
Zetkanišćo na farskim dworje
Za starej murju w Poršicach chowa so drěmaca drohoćinka
Poršicy (UM/SN). Dojědźeš-li sej z Budyšina do Poršic, napadnje ći cyrkej ze žołtej štyriróžkatej wěžu a płonej třěchu. Ju wobdawa murja z pólnych kamjenjow. Mjez cyrkwju a murju je kěrchow – historiska drohoćinka. Njeje pak to jenička drohoćinka tu w Poršicach. Na druhim boku dróhi wuhladaš dalšu murju. Ta pak njezda so na prěni napohlad kedźbyhódna być. Ručež pak wokoło křiwicy jědźeš a přez wuski zajězd na faru hladaš, so jeje dohladaš. Murja je impozantna, z pólnych kamjenjow twarjena, z mócnymi wrotowymi wobłukami a wysokej třěchu.
Financy za spěšny internet zaručene
Budyski wokrjes je wčera informaciju wo spěchowanju Sakskeje za dalši wutwar spěšneho interneta přijimał. Nětko su financy zaručene, dźěła za zwoprawdźenje móža zaměrnje pokročować.
Budyšin (SN/at). Na zakładźe „Programa šěre blaki“ Zwjazka za lěta 2023-2025 wokrjes Budyšin zastaranje ze spěšnym internetom we wjesnych kónčinach dale wudospołnja. K tomu je wokrjesny sejmik loni 4. decembra wobzamknył, trěbne wupisanje po cyłej Europje přihotować a wozjewić. Wuměnjenje za to su přizwolene spěchowanske srědki, wo kotrež je so wokrjes pola Zwjazka požadał.
Loni w oktobrje zapodate požadanje bě wuspěšne. Financna podpěra płaći za clusteraj 12 a 15, kotrejž mjenuje wobzamknjenje wokrjesneho sejmika mjez dohromady pjeć analyzowanymi clusterami prioritnej. Za dźěła w clusteru 12 přewozmje Zwjazk 60 procentow kóštow, za cluster 15 połojcu. Zbywacej sumje zaruči Sakska. Tohodla je sakski hospodarski minister Martin Dulig (SPD) přirjadnicy Budyskeho krajneho rady, dr. Romy Reinisch, wčera dwě přizwolenskej informaciji swobodneho stata přepodał.
