Pod hesłom „Jewišću zdar – dźiwadło zwjazuje“ su so dźěći Serbskeje zakładneje šule Budyšin a zakładneje šule Polevsko njedawno na wosebity zetkawanski kónc tydźenja zešli, zo bychu swój zhromadny projekt zakónčili. W srjedźišću steješe trojorěčna čěsko-serbsko-němska prapremjera zhromadnje wuwiteje hudźbneje dźiwadłoweje hry „Mam ideju“. Z profesionelnymi dźiwadźelnikami dźěći swoje mysle, swoju hudźbu a swoju fantaziju na jewišću předstajichu. Nimo samotwarjenych hudźbnych nastrojow a kreatiwnych rekwizitow prezentowachu w jewišćowej hrě mašiny přichoda, kotrež běchu z papjercoweho kartona natwarili. Z tójšto humorom a pisanymi idejemi předstajichu mjez druhim „hairbuster“, kotryž frizuru po přeću kuzła. Tež sushi-mašina abo křesło, kotrež wužiwarjej chribjet masěruje abo tykanc napječe,­ stej přihladowarjow zahoriłoj. Tak njebě hra jenož předstajenje na jewišću, ale žiwy wuraz kreatiwity dźěći a jich wjesela na přichod.

W Małym Holešowje pola Njeswačidła je nimo rybarskeho dwora hišće wjace zajimawostkow. Wauerec swójba bydli hižo w štwórtej generaciji na wjac hač 100 lět starym ratarskim statoku, kaž Monika Wauerowa (zady nalěwo) powěda. Jeje pradźěd a prawowka staj statok lěta 1896 twarić započałoj. Před štyrjomi lětami je so dźowka Susann (zady naprawo) z Drježdźan sem přesydliła a z mandźelskim nětko alpaki plahuje. To so tež dźěsćomaj Evje a Edgarej lubi. Foto: SN/Bojan Benić

25 lět WITAJ w Delnjej Łužicy

Choćebuz. Z dnjom serbskich pedagogowkow a pedagogow Rěčny centrum WITAJ w Delnjej Łužicy dźensa 25lětny jubilej swojeho wobstaća woswjeći. Na swjedźenskim zarjadowanju w klubowni delnjoserbskeho internata w Choćebuzu wobdźěli so tež předsyda Domowiny Dawid Statnik. Po programje powjedźetaj nawodnica a wotrjadnik RCW dr. Beata Brězanowa a Bernd Melcher.

Wuběrk faworita wuzwolił

Drježdźany. Twarski wuběrk města Drježdźany je na swojim wčerawšim posedźenju naćiski noweho Carolineho mosta wobjednał. Na wuradźowanju su radźićeljo ze štyrjoch zapodatych naćiskow faworita wuzwolili. Při tym jedna so wo ideju planowarskeho zjednoćenstwa LAP/ Knight Architects. Spočatk septembra ma měšćanska rada doskónčnje wo tym rozsudźić.

Hara nad Sakskej

Ćisk (JT/SN). Wšěm přećelam dźiwadła je Ćiskowski dwór minjeny kónc tydźenja swoje wrota za dźiwadło pod hołym njebjom wotewrił. Předstajejo kriminalnu komediju „Dokal jenož z Klunkerjec Jackom“­ wot Andreasa Keßnera smědźachu lajscy dźiwadźelnicy Ćiskowskeho kulturneho towarstwa swoje talenty swobodnje rozwiwać. Dohromady 250 přihladowarjow je inscenaciju na třoch wupředatych předstajenjach dožiwiło.

„Po tróšku bóle ludowych hrach w zašłych lětach smy něšto druhe zahrać chcyli – kriminalnu komediju na přikład“, Katja Tillich powěda. Wona je sobuzałožerka­ dźiwadłoweje skupiny z mjeztym něhdźe 15 sobustawami a předstaješe komisara Eugena Seitza. Dalši sobuskutkowacy běchu Anett Zahrodnikowa jako Hermine Schwarz, Jens Zahrodnik jako jeje syn Jockel, Dana Bräuer jako přichodna dźowka Gina kaž tež Katrin Pollack jako susodka Ilse Klammroth. Rólu Klunkerjec Jacka přewza Silvia Grimm.