Budyšin (SN/MiR). Pućowanske dny su w kóždym šulskim lěće wosebity wjeršk za šulerjow a tež wučerjow. Njeje stajnje lochko sej zajimawy cil wupytać. Tomu chce Serbske šulske towarstwo (SŠT) wotpomhać. Wobsah pilotoweho projekta, kotryž Załožba za serbski lud spěchuje, je, digitalizowanje pućowanskich šćežkow. Lětuša maturantka Budyskeho Serbskeho gymnazija Hana Nukec je w lěćnych prózdninach za SŠT dźěłała a so z temu zaběrała. Wona je so jako reporterka na puć podała a za pućowanskimi šćežkami slědźiła. Wosebje pak je sej wona wosebitosće wšelakich kónčinow wotkrywała. Běchu to na přikład wuhlady na wokolinu, wusahowace štomy abo tež městnosće, hdźež móžeš zwěrjata wobkedźbować. Zdobom pomniki na kromje šćežkow je sej wona zapisowała. „Sym mjez druhim we Worklecach rešeršowała a fotografowała. Tak je pućowanska šćežka wo sławnych wosobinach nastała“, wona powěda. Ze swojim wulkim angažementom je Hanka Nukec projekt SŠT sylnje podpěrała.