Koncert a čitanje
Stróža. Na předwječoru lětušich nazymskich wikow w Stróži wotměje so jutře, pjatk, w 19.30 hodź. w tamnišej starej wowčerni literarno-hudźbny koncert. Axel Thielmann a Marka Cyžowa, potomnikaj serbskeje wučerki a spisowaćelki Marje Kubašec, čitataj w serbskej a němskej rěči z jeje twórbow a rozprawjataj wo wosobinskich dožiwjenjach. Jeju přewodźa jazzowe trio „Sotry wjesela“ z Lipska. Zastup na čitanje a koncert je darmotny.
950 lět cyrkej w Hodźiju
Hodźij. W Hodźijskej cyrkwi wuhotuja sobotu 12. septembra w 13.30 hodź. sympozij a přednoški wo stawiznach a perspektiwje wosady, wo twarskich stawiznach cyrkwje a wuwiću Serbow. Přednošuja dr. Jens Buliš, Trudla Malinkowa, Krystof Rummel a Gerat Krawc. Tomu přizamknje so bjesada w kantoraće. Njedźelu, 13. septembra, woswjeća w 9.30 hodź. w cyrkwi dwurěčne swjedźenske kemše z krajnym biskopom Tobiasom Bilzom. Chóry wosady je sobu wuhotuja. Serbowki ze wšelakich kónčin přińdu w narodnej drasće.
Z nazymskimi płodami warić
Radwor. Rěčna motiwatorka Syće za serbšćinu a regionalnu identitu Zari, Raphaela Wićazowa, wari jutře, štwórtk, 10. septembra, pod hesłom „Serbska kuchnja za swójby“. Wot 16 hodź. móža zajimcy na Radworskim dwórnišću zhromadnje słódne chłóšćenki z nazymskich płodow přihotować. Zarjadowanje wotměje so w serbskej rěči a je wosebje za serbsce wuknjacych dobra składnosć rěč nałožować. Přizjewjenja přijimuja hač do štwórtka w 12 hodź. z mejlku na . Přinošk wučinja pjeć eurow na wosobu.
Do Slepjanskich kónčin
Na babylěćo do Ralbic
Ralbicy. Wjesne towarstwo Ralbicy wuhotuje wospjet Babylěćo w Ralbicach. Pjatk, 11. septembra, so wot 20 hodź. wohnjowi wobornicy wubědźuja. Sobotu wječor w samsnym času Ralbičenjo ze swójskim programom wustupja. Njedźelu, 13. septembra, móža sej wopytowarjo wot 11 hodź. konjacy sport lubić dać, so na čaporowych wikach dźěći rozhladować chiba sej při kofeju přijomnu bjesadu popřeć. Za dźěći změja karusel. Wot 16 hodź. pokazaja přehladku starych kolesow a w 17.30 hodź. wulosuja myta z tombole. Mjez nimi su e-scooter, pawiljon a dobropis za catering. Wječory wuklinča z diskoteku LEDZIBEATZ & syst_h_emfehler. Zastup na kónctydźenske zarjadowanja je bjezpłatny.
Wobydlerski dialog
Wojerecy. Na wobydlerski dialog přeprošuje Wojerowski wyši měšćanosta Torsten Ruban-Zeh štwórtk, 10. septembra, wot 9 do 11.30 hodź. na Łužiske naměsto do Wojerec. Wobydlerjo móža so ze swojimi prašenjemi a starosćemi wosobinsce na njeho wobroćić. Torsten Ruban-Zeh chce prašenja wotmołwjeć a prócuje so wo rozrisanje problemow.
Wuhotuja wjesny swjedźeń
Zhromadnje comicsy rysować
Radwor. Rěčny centrum WITAJ přeprošuje šulerki a šulerjow 3. do 7. lětnika wospjet na comicsowu dźěłarničku. Mjeztym so Šćěpan Hanuš hižo dźewjaty raz zhromadnje z dźěćimi molowanju comicsow wěnuje. Dźěłarnička wotměje so sobotu, 26. septembra, na Radworskim dwórnišću inkluzije. Zajimcy měli so hač do 12. septembra w Rěčnym centrumje WITAJ pod sćěhowacej mejlowej adresu přizjewić: .
Terminy online njeskazać
Budyšin. Techniskeho defekta dla njemóža sej wobydlerki a wobydlerjo Budyskeho wokrjesa tuchwilu žane terminy na zarjadach online skazać. Na swojej webstronje wokrjes wo tym informuje, zo drje móža problem hakle kónc tydźenja rozrisać. Štóž přiwšěm termin na jednym ze zarjadow wokrjesa trjeba, měł sej tutón telefonisce wobstarać. Přehlad telefoniskich čisłow wozjewja wokrjes online pod .
Serbska přirada so schadźuje
Budyšin. Přirada za serbske naležnosće města Budyšin zetka so jutře, srjedu, w 17 hodź. w žurli Röhrscheidtoweje bašty Serbskeho ludoweho ansambla. Na dnjowym porjedźe steji mjez druhim rozprawa wo Budyskej powěsćowej šćežce. Mjez druhim chcedźa tam wo wuwiću ličby wopytowarjow a wo dalšich detailach rozprawjeć. Wo wuslědkach posedźenja drje štwórtk w Serbskich Nowinach informujemy, přiwšěm su zajimcy na zjawne posedźenje jako hosćo prošeni. Woni njech wužiwaja zachod při kasy SLA.
Hladar w zwěrjencu być
Wojerecy. Zwěrjenc we Wojerecach přeprošuje na wosebity projekt pod hesłom „jónu hladar w zwěrjencu być“. Zajimcy su sobotu, 5. septembra, přeprošeni, so na wšědnym dźěłowym dnju zwěrjenca wobdźělić. Mjez druhim budu zwěrjata picować. Štóž chce tole jónu dožiwić, měł so pola sobudźěłaćerki Silke Kühn přizjewić, a to telefonisce pod 03571 20937708 abo z mejlku na . Akcija traje něhdźe štyri hodźiny. Zajimcy měli znajmjeńša wosom lět stari być. Wobdźělić smě so maksimalnje wosom wosobow. 14. nowembra projekt wospjetuja.
Na zhromadne spěwanje
Budyšin. Zwjazk serbskich spěwarskich towarstwow prosy zajimcow na zhromadne spěwanje w septembrje. Jutře, wutoru, we 18 hodź. njech wšitcy do chóroweje rumnosće Serbskeho ludoweho ansambla přińdu. Tam potom na zwučene wašnje zhromadnje na spěwach dźěłaja a so w technice spěwanja wukmanjeja.
Kajka ma biblioteka być?
Radwor. Měšćanska biblioteka Budyšin přeprošuje zajimowanych wobydlerjow na zhromadne rozmyslowanje wo bibliotece přichoda. Jutře, wutoru, wot 17 do 19 hodź. je za to termin w Radworskim gmejnskim zarjedźe. Přizjewjenja njejsu trěbne. Zhromadnje z wobydlerjemi chcedźa přistajeni biblioteki wo tym rozmyslować, kajka ma biblioteka być, zo bychu ludźo tam prawidłownje chodźili a sej knihi wupožčowali.
Wuhotuja lětni koncert
Radwor. Chór Meja přeprošuje njedźelu, 30. awgusta, na lětni koncert na farsku zahrodu w Radworju. Program započnje so w 16 hodź. Wot 15.30 hodź. poskića swačinu. Nimo chórowych twórbow předstaji dźěćaca rejowanska skupina Łužičanka wšelke choreografije. Zastup sej nježadaja, nad darami pak so wjesela.
Po nocomaj hejsować
Konjecy. Komuž chce so kónc tydźenja prawje hejsować, njech dojědźe sej na DSF-party do Konjec. Swój program zahaji Konječanska młodźina na towarstwowym dworje dźensa, pjatk, wječor w 20.30 hodź. Sobotu wuhotuja wot 21 hodź. program na dwěmaj flooromaj.
Serbske wiki w Grodku
Grodk. Składnostnje 725lětneho wobstaća Grodka změja njedźelu, 30. awgusta, serbske wiki na swjedźenišću na Łučnej hasy. Mjez druhim zahudźi tam orchester Serbskeho ludoweho ansambla.
Na instrumenće so wuspytać
Wojerecy. Hač dźěći, młodostni abo dorosćeni – wšitcy zajimcy su sobotu, 29. awgusta, do Wojerowskeje hudźbneje šule witani. Wot 14 do 17 hodź. móža wopytowarjo bjezpłatnje instrumenty wuspytać a swójski hłós zeznać. Tež najmjeńši su witani. Na třoch etažach změja poskitki za zajimcow kóždeje staroby. Wot 15 hodź. zaklinča w foyeru wosebje lěćne zwuki. Poskitk šule wopřija něhdźe 20 instrumentalnych předmjetow. Šulerki a šulerjo hudźa we wšelakich ansamblach abo skupinach. Wosebje požadane su dobropisy za kursy k zeznaću kubłanišća.
Dźeń muzeja z pisanym programom
Kak KI medije změnja?
Budyšin. Kamjentny dom zarjaduje jutře online-dźěłarničku we wobłuku rjada „KI žerje wěrnosć. We wobłuku dźěłarnički so wobdźělnicy intensiwnje z kumštnej inteligencu (KI) a jeje wuskutkami na medije zaběraja. Eksperta za medije Clemens Kießling rozłožuje wot 18.30 hodź. na přikład, kak je so němska krajina medijow pod wliwom KI wuwiwała. Z pomocu konkretnych přikładow znazornja Kießling, kak móža ludźo wobsahi spóznać, kotrež je kumštna inteligenca generowała. Přizjewjenje trěbne njeje. Dalše informacije podawaja na webstronje Kamjentneho domu pod .
Zahon z najwjace dypkami
Njeswačidło. Na wšěch 32 škotowarjow je so wčera, wutoru, na mjeztym wosmym škotowym turněrje seniorow wo dypki wubědźowało. Z 2856 dypkami je Mikławš Zahon turněr w Knježim hosćencu w Njeswačidle dobył. Jeho slědowaštaj Uwe Siegler a Manfred Hörauf. Přichodny škot budźe 29. septembra w Kukowje.
