Wjace wobydlerjow
Pančicy-Kukow. W pjećoch gmejnach zarjadniskeho zwjazka Při Klóšterskej wodźe je spočatk tohole lěta ze 7 223 wobydlerjemi 81 ludźi wjace bydliło hač před lětom. Tole wuchadźa ze statistiki, kotruž je předsyda zarjadniskeho zwjazka Stefan Anders wozjewił. Sobu wulki podźěl na tym ma Njebjelčanska gmejna, hdźež je so loni 26 dźěći narodźiło, lěto do toho wosom. Do gmejny Pančicy-Kukow je 105 ludźi přićahnyło, mjeztym zo bě to w lěće 2021 jenož 42. Po wšěm zdaću zwisuje to z ukrainskimi ćěkancami, kotřiž su sem přišli. Do Chróšćanskeje gmejny je 64 ludźi přićahnyło město 39 lěto do toho. Na tamnym boku je 44 wobydlerjow Worklečansku gmejnu wopušćiło, mjeztym zo bě to lěto do toho jenož 29. Nawopačny zjaw bě w gmejnje Ralbicy-Róžant, zwotkelž je jenož 41 wosobow přećahnyło, lěto do toho bě jich hišće 64. Na Pančičanskim stawnistwje mějachu loni dźewjeć wěrowanjow, w lěće 2021 bě jich dźesać.
Seniorojo zaso škotuja
Wo putnikowanju bjesadować
Chrósćicy. K wotewrjenemu putniskemu zetkanju a k wuměnje nazhonjenjow su sobotu, 28. januara, w 19.45 hodź. wšitcy zajimcy do Chróšćanskeje putniskeje hospody přeprošeni. Nic jenož ći, kotřiž su hižo raz putnikowali, ale tež ći, kotřiž chcedźa to hakle činić a pytaja dobru radu a chcedźa wjace zhonić, su lubje witani. Na spočatku poda putnica, za kotruž je so přez Jakubowy puć w jeje žiwjenju wjele změniło, zawodny impuls. Po tym je chwile za bjesadu a rozmołwu. Tež Monika Gerdesowa jako mějićelka putniskeje hospody wšak je hižo často putnikowała, a steji za prašenja k dispoziciji.
Dźiwadło z wječerju a kofejom
Nowoslicy. Dźiwadłowa skupiny Konjecy/Šunow předstaji swoju komediju „Mužojo nimaja sej lochko“ kónc tydźenja dwójce w Nowosličanskej Dinarjec swjedźenskej bróžni, a to sobotu, 28. januara, w 19 hodź. a njedźelu, 29. januara, w 16 hodź. Sobotu poskićuja tam wot 17 hodź. wječer z tradicionelnej serbskej kwasnej jědźu. Njedźelu móža sej zajimcy wot 14.30 hodź. kofej a tykanc słodźeć dać. Skazanki přijimuja pod telefonowym čisłom 0172 3570908.
Wopominaja wopory
Paslić a serbsce wuknyć
Kulow. Pod hesłom „Wuměłstwo a rěč“ wuhotuje Marija Šołćic-Touvenot jutře, štwórtk, serbske kreatiwne popołdnjo w Kulowskim Jakubecowym wustawje. Wot 15 hodź. móža wobdźělnicy pod jeje nawodom dekoratiwne objekty, hodźace so na přikład k ptačemu kwasej abo jutram, zhotowić. Takrjec připódla sposrědkuje Šołćic-Touvenout serbšćinu, a to tež „zajimcam bjez předznajomosćow“. Na kreatiwnym popołdnju měli so znajmjeńša tři wosoby wobdźělić, maksimalnje měło jich dźesać być. Přizjewjenje je móžne pod telefonowym čisłom 035725 144 683.
Poskitk za prózdniny
Budyšin. Kamjentny dom poskića wot 13. do 19. februara kreatiwny camp w zymskich prózdninach. Wón wotměje so w ramiku programa PopIIGo, za kotryž je Domowina kooperaciski partner, a měri so na dźěći w starobje dźesać do 18 lět. Wobdźělenje a přenocowanje so z programa spěchujetej a stej za młodostnych darmotne. Štóž ma zajim, njech so spěšnje přizjewi – městna su wobmjezowane. Wobsah a nawodźa dźěłarničkow swědča wo zajimawym programje.
Spominaja na wopory
Předsydstwo z nowačkami
Nowa Wjeska. Swoju hłownu a wólbnu zhromadźiznu je minjeny pjatk Nowowješćanske towarstwa „Wjesna zhromadnosć“ přewjedło. Něhdźe 50 wopytowarjow je z lisćiny dwanaće kandidatow nowe předsydstwo wuzwoliło. Nimo štyrjoch čłonow dotalneho předsydstwa wuzwolichu tež třoch nowačkow. Su to Jan Helner, Franzisko Wenk a Dominik Čornak. Za předsydu wuzwolichu znowa Křesćana Korjeńka.
Radźićeljo wuradźuja
Njebjelčicy. Přichodne posedźenje Njebjelčanskeje gmejnskeje rady wotměje so štwórtk, 26. januara, w 19 hodź. w Pěskečanskej wohnjowobornej gratowni. Najwažniši dypk dnjoweho porjada drje budźe předstajenje solarneho parka w Pěskecach a diskusija k tutej temje.
Chrósćicy. Tohorunja 26. januara, ale hakle w 19.30 hodź. zetkaja so Chróšćanscy gmejnscy radźićeljo w gmejnskim a kulturnym centrumje. Mjez druhim póńdźe wo wobzamknjenje w njezjawnym dźělu zašłeho posedźenja.
Poskića kurs čěšćiny
Budyšin. Štóž ma zajim na rěčnym kursu čěšćiny wot 20. julija do 17. awgusta w Praze abo wot 13. awgusta do 4. septembra w Českich Budějovicach, njech w Rěčnym centrumje WITAJ hač do 15. měrca swoje přizjewjenske podłožki woteda. (Póstowe naměsto 2, 02625 Budyšin, e-mail: ). Wotpowědny formular a dokładne informacije su na internetnej stronje www.witaj-sprachzentrum.de pod „rěčne kursy – čěšćina“ přistupne.
Pomhaja darmotnje
Kamjenc. We wobłuku cyłoněmskeje iniciatiwy „Lěwica pomha“ poskićuje měšćanski zwjazk Lěwicy Kamjenc-Radeberg wotnětka stajnje štwórtk wot 14 do 18 hodź. darmotne poradźowanje. Wone wotměje so na Budyskej dróze 8 w Kamjencu. Štóž wysokich wudawkow za milinu a płun abo bjezdźěłnosće dla pomoc trjeba abo štóž chce wědźeć, kotre móžnosće podpěry eksistuja abo štóž trjeba pomoc při wupjelnjenju formularow je wutrobnje witany. Nadrobniše informacije podadźa sobudźěłaćerjo pod telefonowym čisłom 03578/ 21 42 669.
Płuwać wuknyć
Budyšin. Zakładny płuwanski kurs poskićuja w zymskich prózdninach wot 13. do 21. februara w Budyskej Röhrscheidtowej kupjeli. W tym času wobdźělnicy wšědnje wot 8.30 hač do 10 hodź. zwučuja. Wobdźělenje na wosobu płaći 160 eurow. Přizjewjenja přijimuje personal kupjele wosobinsce abo e-mailnje pod .
Nominuja kandidata
Łaz. Zjawna sobustawska zhromadźizna CDU k nastajneju kandidata za wólby Łazowskeho wjesnjanosty wotměje so jutře, štwórtk, w 19 hodź. w Lěsnym hosćencu při Slěbornym jězoru w Bjedrichecach (Friedersdorf).
Radźićeljo wuradźuja
Róžant. Předstajenje přizwoleneje twarskeje naprawy a doby realizowanja nowotwara Ralbičanskeje pěstowarnje budźe jedna z temow přichodneho posedźenja gmejnskeje rady Ralbicy-Róžant štwórtk, 19. januara, we 18.30 hodź. w sydarni gmejnskeho zarjada w Róžeńće. Dale póńdźe wo busowe zastanišćo w Hrańcy a wo popłatki za Ralbičansku sportownju.
Na popołdnjo za swójby
Budyšin. „Barby rejuja!“ rěka hesło popołdnja za swójby, na kotrež přeproša Budyski Serbski muzej njedźelu, 22. januara. Zarjadowanje wotměje so we wobłuku wuměłskeje wustajeńcy „Wšo je krajina. Serbski moler Jan Buk“. Wot 15 hodź. čaka na wopytowarjow wotměnjawy program. Zajimcy budu so móc po wustajeńcy wodźić dać, mały pokład pytać, so z wuměłskim paslenjom k temje mozaik zaběrać a rejwać. Štóž ma lóšt, njech sej drastu ze swojej najlubšej barbu zwoblěka, přetož hesło rěka „Barby rejuja“.
Pytaja rjemjeslnikow
Próstwu wo baru zapodać
Porěči wo putnikowanju
Chrósćicy. Lutherowy putniski puć steji w srjedźišću přichodneho zarjadowanja kulturneje zymy sobotu, 14. januara, w 19.45 hodź. w Chróšćanskej putniskej hospodźe. Putniski puć bu 2017 wotewrjeny. Wón ćehnje so mjez Wormsom a Eisenachom a je něhdźe 400 kilometrow dołhi. Historiski pozadk je pućowanje Luthera 1521 z Wittenberga k Reichstagej we Wormsu a wróćo, hdźež so potom za dlěši čas w hrodźe Wartburg schowa. Putnica Friedeborg Seitz z Mannheima je pěši po tymle Lutherowym puću pućowała a sobotu w Chróšćanskej putniskej hospodźe wo swojich dožiwjenjach a impresijach rozprawja. Na přednošk w němskej rěči su wšitcy zajimcy lubje witani.
Rabiner budźe z hosćom
