Koncertuja w cyrkwi
Wulke Zdźary. Nalětni koncert wuhotuje Slepjanski serbski folklorny ansambl sobotu, 18. apryla, w cyrkwi we Wulkich Zdźarach. Započatk je we 18 hodź. Zastup je darmotny, dary pak su witane. Syć za serbsku rěč a regionalnu identitu Zari kaž tež Załožba za serbski lud koncert podpěrujetej.
W narodnej drasće na bal
Ćisk. Ćišćanska serbska rejwanska skupina přeprošuje jutře, sobotu, na mjeztym dźesaty bal w narodnej drasće. Wón započnje so w 19 hodź. w hosćencu „K zelenemu wěncej“. Zastup płaći wosom eurow. Někotre zbywace zastupne lisćiki hišće maja. Přeprošeni su wšitcy, kotřiž chcedźa k dujerskej hudźbje rejwać. Žony njech so narodnu drastu – wšojedne z kotreho regiona – wobleku, to pak njeje wuměnjenje.
Dźeń měšćanskeho lěsa
Meju na probu nastaja
Z krajnym radu rěčeć
Radźićeljo wuradźuja
Worklecy. Přichodne posedźenje Worklečanskeje gmejnskeje rady wotměje so štwórtk, 16. apryla, w 19 hodź. w horće „K wódnemu mužej“. W zjawnym dźělu zaběraja so radźićeljo z aktualnym stawom saněrowanja wyšeje šule „Michał Hórnik“ a rozsudźa wo dalšich twarskich nadawkach za nju. Nimo toho póńdźe wo hospodarski plan 2026 a wo prašenje, po kotrym puću radźićeljo přichodnje podłožki za swoje wuradźowanja dóstanu.
Pančicy-Kukow. Tohorunja štwórtk w 19 hodź. zetkaja so čłonojo gmejnskeje rady Pančicy-Kukow na wuradźowanje w awli „Šule Ćišinskeho“. Tež woni chcedźa lětuši hospodarski plan wobzamknyć a wo wužiwanju srědkow z tak mjenowaneho Sakskeho fondsa rozsudźić. We wobłuku twarskich naležnosćow změja mj. dr. podłožki za přetwar a saněrowanje tykowaneho domu na blidźe.
Wodźenje po hrodźišću
Pytaja pomocnikow
Połpica. Za serbski prózdninski camp wot 9. hač do 14. awgusta 2026 w Połpicy (Halbendorf) nad Sprjewju pytaja prózdninskich pomocnikow, kotřiž so rady z dźěćimi zaběraja a sej přicpěwaja dźěći dohladować. Za pomocnikow su přebywanje, zastaranje a wulěty darmotne, woni dóstanu 25 eurow kapsneho pjenjeza wob dźeń kaž tež 100 eurow honorara. Nimo toho so jim jězbne wudawki zarunaja. Štóž je znajmjeńša 18 lět stary, njech so pola zarjadowarja Schullandheime e. V. pod telefonowym čisłom 03591 22285 abo z mejlku na přizjewi.
Rěčna hodźina zapósłanče
Kamjenc. Zapósłanča Sakskeho krajneho sejma Elaine Jenčec (CDU) přewjedźe přichodnu wobydlersku rěčnu hodźinu póndźelu, 13. apryla, w swojim Kamjenskim běrowje na Zapadnej 4. Wot 15 do 17 hodź. móža wobydlerjo tam swoje naležnosće přednjesć. Termin dojednać móža sej zajimcy pod telefoniskim čisłom 03578 305383 abo z mejlku na .
Chronikarjo so zetkaja
Wuměłske rjemjesło w muzeju
Twarske dźěła přestorčene
Radwor. Poprawom mějachu so dźensa wobšěrne dróhotwarske dźěła w Radworju zahajić. Kaž Budyski krajnoradny zarjad zdźěli, pak bu wutwar dróhi dr. Marje Grólmusec wot nawsy hač ke kromje wsy do směra na Chelno přestorčeny. Přičina su ćeže při dodawanju trěbnych twaršćiznow. Nowy termin je nětko 4. meja. Hač so z tym tež wotzamknjenje twarskich dźěłow přesunje, štož bě dotal srjedź oktobra předwidźane, krajnoradny zarjad zdźělił njeje.
Informuja wo jutrach
Pančicy-Kukow. „Jutry w Serbach“ je titul noweje multimedialneje wustajeńcy w komunikaciskej arenje w Pančicach-Kukowje. Krótko do jutrow su mału přehladku zestajeli. Tam wustajeja mjez druhim křižerski grat a seklu. Widejofilm skedźbnja na film „Křižerki“. Dale su někotre dźěła rězbarja Alojsa Šołty ze Žuric wustajene. Přehladka je we witrinach wjetšeho z dweju pawiljonow widźeć.
Na dźeń wotewrjenych duri
Nawuknu wosebite spěwanje
Budyšin. Spěwny kurs „Běły hłós (słowjanske wašnje kyrkoweho spěwanja) a serbske spěwy“ za žony wotměje so wot 29. hač do 31. meje w Serbskim ludowym ansamblu (SLA) w Budyšinje. Kurs nawjeduja Serbowka Walburga Wałdźic kaž tež Witold Kozłowski a Marzena Motyl z Pólskeje. Krótka prezentacija wuslědkow kursa budźe njedźelu, 31. meje, 16.30 hodź. w SLA w Budyšinje. Štóž so za kurs abo prezentaciju zajimuje, njech přizjewi so z mejlku na walburga.walde@ gmail.com. Městna su wobmjezowane.
Powjedu po wječornych hasach
Kamjenc. We wobłuku wustajeńcy składnostnje 800. róčnicy Kamjenca wotměje so tam jutře, srjedu, w 20 hodź. wječorne wodźenje po měsće. Zajimcy měli so w Muzeju zapadneje Łužicy přizjewić. Tam zhonja, hdźe so wodźenje započnje. Wobdźělenje płaći 6,50 eurow na wosobu.
Herbert Krječmar dobył
Njeswačidło. Třeći lětuši škotowy turněr serbskich seniorow je wutoru w Njeswačidle Herbert Krječmar z 2 928 dypkami dobył. Druhe městno wobsadźi Wolfgang Kühn (2 758), třeće Manfred Hörauf (2 485). Cyłkowne hódnoćenje nawjeduje Herbert Krječmar.
Zhromadnje spěwać
Budyšin. Zwjazk serbskich spěwarskich towarstwow (ZSST) přeprošuje na dalše zhromadne spěwanje. Wone wotměje so wutoru, 7. apryla, we 18 hodź. w chórowej rumnosći Serbskeho ludoweho ansambla.
Pochoduja za měr
Kamjenc. Měrowej zwjazkaj z Kamjenca a Budyšina namołwjatej ludźi, so jutrownu póndźelu, 6. apryla, wot 15 do 17 hodź. na demonstraciji za měr, wotbrónjenje a zrozumjenje mjez ludami wobdźělić. Wona zahaji so na Kamjenskim torhošću před radnicu, hdźež porěči wyši měšćanosta Michael Preuß. Po tym poćahnu zhromadnje hač k wopomnišću w Knježim dole.
Serwis je wobmjezowany
Budyšin. Serwis přizjewjernjow jězdźidłow Budyskeho wokrjesa w Budyšinje, Kamjencu a Wojerecach je tutón tydźeń wobmjezowany. Přičina je, zo su wjacori sobudźěłaćerjo schorjeli. Tohodla móža naležnosće jenož wobdźěłać, hdyž je sej wobydler do toho online termin wujednał. Wuwzaća su wotzjewjenja jězdźidłow a jara nuzne pady.
Pjenjezy a pohladnicy měnjeć
Budyšin. . Kóžde lěto ćichi pjatk přewjeduje Budyske numismatiske towarstwo w Serbskim domje wulku bursu za wšitkich, kotřiž pjenjezy, medalje, pohladnicy, fota, listowe znamki abo druhe wěcy zběraja. Na přichodnu bursu 3. apryla předsyda towarstwa Matthias Koksch wšitkich zajimcow wot 9 do 14 hodź. přeprošuje.
