Podlěša požadansku dobu
Drježdźany. Towarstwo za wuwiće wjesnych kónčin we Łužiskej jězorinje je požadansku dobu swojeho lětušeho wubědźowanja pod hesłom: „Młodźina stwori region!“ hač do 25. septembra podlěšiła. Wobdźělić móža so skupiny, towarstwa abo iniciatiwy młodostnych a młodych ludźi w starobje wot 14 do 25 lět kaž tež kubłanišća, na přikład šule. We wubědźowanju pytaja za inowatiwnymi projektami a idejemi, kotrež přisporjeja na přikład rjemjesło abo tradicije kaž tež zhromadnosć, runoprawosć a demokratiju w LEADER-regionje Łužiska jězorina. Cyłkownje su sumu 8 000 eurow mytowanskich pjenjez wupisali. 15 najlěpšich projektow mytuja. Nadrobniše informacije dóstanu zajimcy telefonisce pod čisłom 0351 8408212 abo online pod: . Tu nadeńdu tež požadanske podłožki.
Wjesny swjedźeń w Drěwcach
Politiski přednošk a diskusija
Budyšin. Prof. dr. Theres Matthieß, junior-profesorka za empiriske slědźenje wo demokratiji na uniwersiće w Göttingenje, přednošuje štwórtk, 4. septembra, w 19 hodź. w Kamjentnym domje wo temje „Mjez politiskej njespokojnosću a nowej kulturu politiskeho sobuskutkowanja“. Drježdźanjanka zaběra so mjez druhim z dźeń a bóle so pozhubjowacej rólu klasiskich demokratiskich stronow w Němskej. Dźensa su strony za mnohich přeelitarne, přemało transparentne a so přejara na wukonjenje mocy fiksěruja. Referentka wotmołwi na prašenja kaž: Što strony poprawom su? Kotre funkcije wone maja a što su jich słabosće? W diskusiji po přednošku chce so prof. dr. Theres Matthieß zhromadnje z přitomnymi wo wotewrjenych prašenjach wuměnjeć: Kak wupada demokratija přichoda a što su móžne nowe puće politiskeho wobdźělenja.
Ruska aktiwistka porěči
Do hwězdow hladać
Załom. Hwězdarnja w Załomju při Sprjewi přeprošuje přichodnu sobotu, 6. septembra, na prěni němsko-čěski swjedźeń. Budźe-li njebjo jasne, chcedźa tam wot připołdnja w 12 hodź. słónco wobkedźbować. Nimo toho wabi wustajeńca wo astronomiskich wobkedźbowanjach a wo archeo-astronomiji do zarjadnišća. Dźěći móža paslić abo z pomocu satelitow za pokładom pytać. Popołdnju maja přednoški wo hwězdarni za dźěći a nawječor za dorosćenych w němčinje a čěšćinje w programje. Wot 21.30 hodź. móža wopytowarjo měsačk a planet Saturn wobkedźbować. Njedźelu, 7. septembra, wot 18.30 hodź. durje hwězdarnje znowa wotewru. W času mjez 17.28 a 22.55 hodź. móža zajimcy z pomocu techniskich srědkow zaćěmnjenje měsačka wobkedźbować.
Planet měra
Kamjenc. W Kamjencu wotměje so njedźelu, 7. septembra, popołdnjo za swójby z wuměłskej akciju. Pod hesłom „Zhromadnje za měrliwy swět“ su dźěći, młodostni a dorosćeni wot 15 do 17 hodź. na Šulske naměsto přeprošeni. Tam chcedźa wšitcy zhromadnje mjez druhim 11 króć 16 metrow wulki puzzle ze symbolemi měra zestajeć. Tež druhe lóštne akcije přihotuja.
Wjesny swjedźeń we Wotrowje
Wotrow. Wotrowčenjo swjeća kónc tydźenja swój wjesny swjedźeń. Z natočenjom piwa zarjadowanje pjatk we 18 hodź. zahaja. Sobotu wotměje so wot 15 hodź. mjez druhim wolejbulowy turněr. Wječor w 20 hodź. chce wjesna młodźina hosći z programom zawjeselić. Njedźelu poskićuja nimo rańšeho piwka tež wobjed. Popołdnju so wohnjowi wobornicy wubědźuja.
Słuchohra we Łužiskim centeru
Wojerecy. Marija Šołćic, motiwatorka za serbsku rěč we Wojerowskej kónčinje, přeproša njedźelu, 31. awgusta, w 14 hodź. do Łužiskeho centera na wotewrjenje wustajeńcy składnostnje jeho 30lětneho wobstaća. Mjez eksponatami je tež štom bajow, z kotrehož zaklinči serbsko-němska słuchohra. Dialogi za to su wobdźělnicy intensiwneho kursa serbšćiny DOMOJ po třoch a poł měsacach wučby nahrawali.
Na swjedźeń swěčkow
Njeswačidło. Wjesne kulturne a domizniske towarstwo Njeswačidło přeprošuje sobotu, 30. awgusta, wutrobnje na swjedźeń swěčkow. Prjedy hač so Njeswačanski park z 3000 swěčkami wobswětli, wotměje so we wosadnej cyrkwi we 18.30 hodź. koncert ze Salon-filharmonikarjemi z Lipska. W repertoiru maja operowe a operetowe melodije, wurězki z filmoweje hudźby kaž tež walčiki. Hižo w 17.30 hodź. chcedźa jěcharjo wopytowarjow w hrodowym parku z kwadrilju zawjeselić.
Twarja mjez wotjězdkomaj
Budyšin. Hač do 12. septembra přewjeduja so hišće twarske dźěła na awtodróze A4 mjez Budyskimaj wotjězdkomaj zapad a wuchod. Wot 20 do 6 hodź. je w kóždym směrje jedna z jězdnjow zaraćena.
Zarjadniski zwjazk so zetka
Pančicy-Kukow. Přichodna zjawna zhromadźizna Zarjadniskeho zwjazka „Při Klóšterskej wodźe“ budźe wutoru, 2. septembra, w 19 hodź. w sydarni twarjenja zarjadniskeho zwjazka w Pančicach-Kukowje. Na dnjowym porjedźe stejitej mjez druhim rozprawa wo stawje lětušeho etata a wothłosowanje wo njeplanowanych wudawkach za projekt „Marijina hwězda INNOVATIV“.
Smolerjec kniharnja přeproša
Budyšin. Na knižnu premjeru knihi „Z Prahi do Palestiny. Reportaže z wichorojtych časow.“ přeprošuje Smolerjec kniharnja wšitkich čitarjow. Wudawaćel Friedrich Pollack a lektor Michał Nuk předstajitaj jutře, 28. awgusta, w 19 hodź. putace dožiwjenja serbskeho nowinarja a wšudźebyła Jurja Wićaza – wot Balkana přez Istanbul a Jerusalem hač k pyramidam při Nilu. W knize namakaće tež dotal njewozjewjene dopomnjenki na powójnski nawrót Jurja Wićaza do Europy.
Serbscy seniorojo škotowali
Jubilej města sobu woswjećić
Běła Woda. Město Běła Woda woswjeći štwórtk, 28. awgusta, swój 90. jubilej spožčenja měšćanskeho prawa a přeprosy wšitkich zajimcow wot 15 hodź. na oficialny dźěl swjedźenja na tamniše torhošćo. W 19 hodź. předstaja w sociokulturnym centrumje Telux inscenaciju dźiwadłoweho krucha Shakespeara „Othello“ we wobłuku Łužiskeho festiwala. Zastupne lisćiki předawaja online pod: .
Informuja wo Krabaće
Wojerecy. We Wojerowskim Łužiskim centeru, napřećo Brězanec kofejowni, wotewri Krabatowe towarstwo zhromadnje z projektom ZARI – syću za serbsku rěč a identitu Krabatowu stwu. W tutym zwisku přeprošujetej projektna koordinatorka Krabatoweho towarstwa Simona Kurthec a rěčna motiwatorka projekta ZARI Marija Šołćic swójby z dźěćimi na čitanje z knihi „KRABAT und das Geheimnis der Schwarzen Mühle“ a to štwórtk, 28. awgusta, w 14 hodź. Nimo toho poskićuja tam dalše interaktiwne hry z postawami serbskich bajow kaž tež zhromadne paslenje. Wobdźělenje je darmotne.
Lětni koncert chóra Meja
Předstaji energijowe drustwo
Radwor. Marcel Bellmann, manager za škit klimy w Radworskej gmejnje, přeprošuje wšitkich zajimowanych na informaciske zarjadowanje wo załoženju noweho energijoweho drustwa do jědźernje Radworskeje šule a to jutře, wutoru, 26. awgusta, we 18.30 hodź. Tam předstaji naćisk wustawkow drustwa a poda dohlad do prěnjeho projekta, natwara ćopłotneho zastaranja w Minakale. Wón prosy wo přizjewjenje z mejlku na abo telefonisce pod čisłom 035935 21639.
Na škot do Lejna
Lejno. Serbscy seniorojo su jutře, 26. awgusta, w 14 hodź. na swój tradicionalny škotowy turněr do Lejnjanskeho hosćenca přeprošeni. Nowačkojo su kaž přeco lubje witani. Přichodne škotowanje serbskich seniorow budźe wutoru, 30. septembra, 14 hodź. w „Knježim hosćencu“ w Njeswačidle.
Gmejnska rada w Malešecach
Wjace wo šupje zhonić
Budyšin. Na informacisku rozmołwu wo temje „šup“ přeprošujetaj Budyski měšćanski hajnik Werner Winde a zapósłanc Sakskeho krajneho sejma Marko Šiman wšitkich zajimcow póndźelu, 25. awgusta, w 16.30 hodź. do Budyskeje młodownje (Při zwěrjencu 1). Ze Sewjerneje Ameriki pochadźacy šup je so w Europje w běhu minjenych sto lět jara spěšnje rozmnožił. Něhdźe milionaj tutych inteligentnych zwěrjatow je tuchwilu w Němskej žiwych. Lěto a bóle sej wone tež sydlišća ludźi jako žiwjenski rum wotkrywaja, tak tež město Budyšin. Wšožrački zawostajeja hustohdy škody w zahrodach, domach a bróžnjach.
Wjeselo za dorosćenych
Wojerecy. Dorosćeni móža so jutře, sobotu, wot 18.30 hodź. na dworje Wojerowskeho hrodu raz tak prawje wucychnować. Za to su tam hoberski skakanski hród a dalše nastroje za ćělnu zabawu w formaće XXL natwarili. Hosći wočakuja nimo toho słódne napoje, přikuski z grila, live-hudźba kaž tež rejowanske rytmy DJa TWO PIECES. Zastup při kasy do zwěrjenca płaći wosom eurow.
Hwězdy w Hórnikecach
Zahaja Kamjensku Boršć
Kamjenc. Z wulkim koncertom zahaja jutře, pjatk, 22. awgusta, w 19.30 hodź. na měšćanskim torhošću lětušu Kamjensku Boršć. Program wuhotuje Kamjenski dujerski orchester zhromadnje z dujerskim orchestrom z čěskeho Kolína a muskim spěwnym towarstwom z Kamjenca-Jěžowa. Wjerškaj Kamjenskeje Boršće stej swjedźenskej ćahaj póndźelu, 25. a štwórtk, 28. awgusta. Něhdźe 1 700 dźěći a młodostnych poda so běłu drastu zwoblěkane, z pletwami z kwětkow kaž tež z chorhojemi a woponami po něhdźe dwaj kilometraj dołhej čarje z nutřkowneho města won na swjedźenišćo Boršće.
Na „Běłu nóc“ do klinikuma
