Kino w Kamjentnym domje
Budyšin. W Budyskim Kamjentnym domje pokazuja jutře, 27. nowembra, w 20 hodź. film „Treasure – Familie ist ein fremdes Land“. Předłoha za tragikomisku dramu je roman „Too Many Men“ awstralsko-ameriskeje awtorki Lily Brett, w kotrymž poda so nan ze swojej dźowku na zhromadne pućowanje po Pólskej, zo by z njej swoje židowske swójbne korjenje wotkrył.
Nóc krótkofilmow w bibliotece
Wojerecy. Přećeljo krótkofilma móža sej jutře, 27. nowembra, wot 18 hodź. we Wojerowskej měšćanskej bibliotece šěsć dobyćerskich filmow lětušeho srjedźoněmskeho filmoweho festiwala KURZSÜCHTIG z kategorijow animacija, dokumentarny film, fikcija a eksperimentalny film wobhladać. Filmotwórcy pochadźeja ze Sakskeje, Saksko-Anhaltskeje a z Durinskeje. Organizatorojo přeprošuja na zhromadnu diskusiju po předstajenju filmow. Zastup je darmotny.
Štomy lětsa njezměja
Budyšin. Štóž je sej minjene lěta božodźěsćowy štomik z Budyskeho měšćanskeho lěsa wupytał a jón hakle krótko do hód podrězał, tónle tradiciju lětsa pokročować njemóže. Dobreho wothłosa w zašłych lětach dla su wobstatk młodych štomikow tak jara redukowali, zo lětsa žane štomiki pušćeć njemóža. Potrjeba bě w zašłosći wjetša hač wobstatk. Plantaža dyrbi w decembru tuž začinjena wostać, měšćanske zarjadnistwo zdźěli. Wone pak so nadźija, zo so wobstatk štomikow hač do hód 2025 zaso wožiwi.
Dźeń wotewrjenych duri a wiki
Grit Lemke z filmom w Kufa
Wojerecy. Zhromadnje z Medijowej syću Łužica přeprošuje Wojerowska Kulturna fabrika (Kufa) na zarjadowanje z předstajenjom filma serbskeje filmowče Grit Lemke „Pola nas rěka wona Hanka“ a to njedźelu, 24. nowembra, w 19 hodź. do rumnosćow Kufa na Piwarskej hasy 1 we Wojerecach. Z hosćom je tež serbski spěwotwórc Jacke Schwarz, kotryž před předstajenjom filma wustupi. Režiserka Grit Lemke přeprošuje na zhromadnu rozmołwu na kóncu zarjadowanja.
Na Chrysta krala do Chrósćic
Chrósćicy. Dekanatne dušepastyrstwo Worklecy přeprošuje serbskich katolskich młodostnych njedźelu Chrysta Krala, 24. nowembra, w 14 hodź. na nyšpor do Chróšćanskeje cyrkwje. Zajimcy njech přiwjezu sej swoje šmóratko sobu. Po tym su wšitcy na zhromadnu swačinu a překwapjenku na tamnišej farje přeprošeni.
Pochod přećiwo antisemitizmej
Gmejnska rada w Chrósćicach
Chrósćicy. Wjesnjanosta Chróšćanskeje gmejny Marko Kliman přeprošuje wutrobnje na zjawne posedźenje gmejnskich radźićelow, kotrež wotměje so štwórtk, dnja 21. nowembra, w 19 hodź. w sydarni „Łužica“ w gmejnskim a kulturnym centrumje. Na dnjowym porjedźe stejitej mjez druhim schwalenje wustawkow wo postajenju sadźbow ležownostneho dawka a diskusija wo wustawkach za psyči dawk.
Informuje wo monitoringu
Dołha Boršć. Přirodoškitna stacija Wuchodna Hornja Łužica přeprošuje wšitkich zajimcow sobotu, 23. nowembra, w 17 hodź. na přednošk swobodneho wodźerja po přirodźe Stephana Kaasche do Wódneho młyna na Młynskim puću 3 w Dołhej Boršći (Förstgen). Wón rozprawja wo nazhonjenjach ze swojej přewodźerku, psycu Animu, z kotrejž je w zwisku z monitoringom wjelkow w lěsach Zhorjelskeho wokrjesa po puću.
Gymnazij wotewrěje durje
Budyšin. Šulerjo a wučerjo Budyskeho Serbskeho gymnazija přeprošuja wutoru, 19. nowembra, wot 15.30 hodź. wšitkich zajimcow wutrobnje na swój dźeń wotewrjenych duri. Mjez druhim wotewru tam w 16.30 hodź. mału wustajeńcu wo žiwjenju a skutkowanju serbskeho wědomostnika Mikławša Joachima Wićaza (15.3.1921–27.6.1998). Pochadźacy z Kamjeneje pola Radworja běše wón jedyn z najwuznamnišich informatikarjow NDR a je mjez druhim prěni ličak na blido wuwił.
Mužojo zaspěwaja
Pančicy-Kukow. Tradicionalnje wotměje so posledni nazymski koncert w běhu lěta na předwječoru pokutneho dnja w Pančicach-Kukowje. Jutře, wutoru, w 19 hodź. wustupi w awli tamnišeje Šule Ćišinskeho Serbski muski chór Delany. Spěwarjo wokoło dirigenta Mateja Kowarja zawjesela publikum z lóštnymi serbskimi ludowymi pěsnjemi runje tak kaž ze spěwami našich słowjanskich susodow. Dale zaklinča kompozicije, kotrež su za delanskich spěwarjow nastali. Zastup płaći sydom eurow. Organizatorojo wjesela so nad bohatym wopytom.
Koncert a kermušne reje
Radwor. W rjedźe lětušich nazymskich koncertow wustupi jutře, sobotu, w Radworskim hosćencu „Meja“ žónski ansambl Jarobinka. Započatk budźe w 19 hodź. Organizatorojo wjesela so nad bohatym wobdźělenjom. Koncertej přizamknu so kermušne reje.
Inženjer we wustajeńcy
Hórnikecy. Twarski inženjer Eberhard Dučman steji w srjedźišću wustajeńcy „Mjez łužiskim drjewowym twarskim wuměłstwom a industrijnym twarjenjom“ w Hórnikečanskej energijowej fabrice. Přehladku wotewru njedźelu, 17. nowembra, w 11 hodź. Na šěsć stacijach je skutkowanje Dučmana dokumentowane, wot jeho němsko-serbskeje swójby přez studij w Praze hač k jeho nowym technologijam za industrijne twarjenja a bydlenjotwar. Wustajeńca je wěnowana 20. posmjertninam a 100. narodninam inženjera, wysokošulskeho wučerja a łužiskeho pomnikoškitarja. Zastup je darmotny.
Radźićeljo wuradźuja
Zetkaja so w sakskej stolicy
Drježdźany. Třeći serbsko-němski dźěćacy kružk w Drježdźanach přewjedźe so sobotu, 16. nowembra, wot 10 do 13 hodź. Zajimcy zetkaja so na Böhmische Str. 27 w Nowym měsće. Nadja Herbigowa planuje „aktiwity za kóždu dźěćacu starobu“. Wobdźělnicy měli stare nowiny, hable a fale za pječenje sobu přinjesć. Serbska bjesada je zaručena, tak móža wopytowarjo „nowych znatych zeznać“.
Sobu do Choćebuza jěć
Chrósćicy. Za kubłansku jězbu Kamjenskeje župy „Michał Hórnik“ sobotu, 30. nowembra, do Choćebuza su hišće městna swobodne. Wobdźělnikow wočakuje wodźenje po měsće, zhromadny wobjed z čłonami župy Delnja Łužica a wopyt Serbskeho muzeja kaž tež adwentnych wikow. Přinošk na wosobu płaći 20 eurow. Zajimcy so njech w regionalnym běrowje Domowiny pod telefonowym čisłom 035796 96254 abo pod slědowacej e-mejlkowej adresu přizjewja .
Wulět do kraja fantazije
Spomnjeće a knižna premjera
Kamjenc. Składnostnje 80. róčnicy załoženja wotnožki koncentraciskeho lěhwa Groß Rosen w Kamjencu wuhotuje towarstwo Autorenkreis Lausitzer Almanach jutře, štwórtk, wopominanje w radnicy Lessingoweho města. W 15 hodź. chcedźa na něhdźe 200 smjertnych woporow spominać. Zdobom prezentuja šeste wosebite wudaće Łužiskeho almanacha z titulom „Das Kriegsende 1945 in Ostsachsen“. Zajimcy njech wobhonja so pod wo ewentualnych městnach.
Zhromadnje warić a serbować
Radwor. Motiwatorka za serbsku rěč projekta ZARI Raphaela Wićazowa přeprošuje štwórtk, 14. nowembra, we 18 hodź. do Radworskeho Dwórnišća inkluzije na zarjadowanje „Serbska kuchnja: Kwasna jědź“. Tam chcedźa zhromadnje warić a serbować. Wona prosy wo přizjewjenje pod .
Filmy k temje „mnohotnosć“
Budyšin. Budyski Kamjentny dom přeprošuje w kooperaciji z filmowej iniciatiwu Drježdźany z.t. dźensa, 12. nowembra, pod hesłom „Queer, offen & für alle“ na kino z krótkofilmowym programom, kotryž tematizuje wšelakorosć a mnohotnosć w našej towaršnosći. Na wopytowarjow čaka dohromady pjeć wubranych filmow z programa Drježdźanskeho filmoweho swjedźenja, mj. dr. „My Orange Garden“ režiserki Anny-Sophije Richard. Pask je tam filmowe myto w kategoriji „sprawnosć splahow“ zdobył. Filmy su w němskej rěči resp. z němskimi podtitulemi. Po programje přeprošuja organizatorojo publikum do rozmołwy a diskusije. Kamjentny dom wotewri swoje durje w 19 hodź., filmowy program zahaji so w 20 hodź. Zastup je darmotny, wo pjenježny dar so prosy.
Čita wo wupućowarjach
Na přednošk „Lóšo wuknyć“
Smjerdźaca. Serbske šulske towarstwo přeprošuje wšitkich zajimcow na přednošk wo temje „Lóšo wuknyć“, a to jutře, 12. nowembra, we 18.30 hodź. do Serbskeho kubłanskeho srjedźišća LIPA w Smjerdźacej. Tema je wosebje za staršich dźěći w předšulskej starobje zajimawa. Wuknjenska poradźowarka Kerstin Šěnowa předstaji móžnosće spěchowanja wuknjenja. Wobdźělenje płaći dźesać eurow na wosobu.
Gmejnska rada w Radworju
Radwor. Wjesnjanostka Radworskeje gmejny Madeleine Renčowa přeprošuje srjedu, 13. nowembra, na zjawne posedźenje gmejnskeje rady. Wone wotměje so tónraz w domje gmejnskeho zarjada w Radworju na Dróze Alojsa Andrickeho čo. 2 we 18.30 hodź. Na dnjowym porjedźe steji mjez druhim wobzamknjenje wo wužiwanju směrnicow w zwisku z płoninami za fotowoltaikowe připrawy na gmejnskim teritoriju.
Młoda awtorka z hosćom
