Wochozy. Na přednošk pod hesłom „Ochranowska bratrowska wosada a Serbja“ přeprošuje sobotu, 28. měrca, towarstwo Šwjelic bróžnje we Wochozach. Započatk budźe we 18 hodź. Historikarka dr. Lubina Malinkowa, wědomostna sobudźěłaćerka Serbskeho instituta, chce w swojim přednošku tež Wochožansku perspektiwu zapřijeć.

Wukubłaja wodźerjow po měsće

Budyšin. Lětsa wotměje so zaso kurs ludoweje uniwersity w kooperaciji z Budyskej turistiskej informaciju za wšitkich zajimcow, kotřiž chcyli so z wodźerjom po sprjewinym měsće stać. Dokładny termin njeje hišće znaty. Teoretiske wukubłanje ma so hač do kónca lěta wotměć, praksa ma hač do meje 2027 trać. Zajimcy móža so hižo nětko přizjewić, a to e-mailnje pod abo pod telefonowym čisłom 03591 42016.

Přednošuje wo mjetelach

Łaz. Na přednošk wo mjetelach w Šwicarskej a Južnym Tirolu přeprošuje tamniše spěchowanske towarstwo jutře, 27. měrca, do Domu Zejlerja a Smolerja we Łazu. ­Započatk je we 18 hodź. Přednošować budźe Mario Trampenau, ranger w biosferowym rezerwaće Hornjołužiska hola a haty.

Malešecy. Syć za serbsku rěč a regio­nalnu identitu Zari přeproša štwórtk, 26. měrca, na interaktiwny přednošk pod hesłom „Slubić a darić je wjele“. W Malešanskim „Wódnym mužu“ wěnuje so dr. Christiana Piniekowa „dźensnišemu serbskemu žiwjenju a móžnosćam přichoda“. Nimo toho čaka kwis „wo ­stawiznach regiona a medialnych móžnosćach serbšćiny“ na wopytowarjow. Zarjadowanje započnje so we 18 hodź., zastup płaći pjeć eurow.

Nowa přehladka w Kamjencu

Kamjenc. Wosebitu wustajeńcu „Innehalten“ spřistupnja galerija w sakralnym muzeju w Kamjencu wot štwórtka, 26. měrca, w tamnišej cyrkwi swj. Hany. Přehladka wopřijima wubrane, mjezwoča a hłowy zwobraznjowace kamjentne skulptury Cvetanki Kiriloveje Schnorrbusch. Z Bołharskeje pochadźaca wuměłča bydli mjeztym we Łužicy a je so w zašłych lětach mjez druhim na rězbarskej dźěłarničce při Miłočanskej skale, na festiwalu „Farbtonale“ kaž tež na projekće „Kolizija wuměłstwow“ w Budyšinje wobdźěliła. Wernisaža započnje so w 19 hodź. Wustajeńcu móža sej zajimcy hač do 19. julija wobhladać.

Radźićeljo wuradźuja

Drježdźany. Pod hesłom „Słowjanska nóc po puću“ prezentuje Drježdźanski klub Chemiefabrik pjatk, 27. měrca, dalšu „hudźbnu jězbu do dalin na potajnstwa bohateho wuchoda Europy“. Wot 21 hodź. chcetej so skupinje The Ukrainians z Londona a Die Ukrainiens ze stolicy Sakskeje z měšeńcu punk rocka, speed folka, ludowych pěsnjow a spěwow ko­zakow wo „ekscesiwne zynki do rejki“ postarać. Nimo toho nadźijatej so mjezynarodnje wobsadźena Kapela Polska, wospjet zhromadnje z hosćemi najrjeńše pólske spěwy zanjesć a mustwo DJjow BeskidBeatz, wopytowarjow hač do rańšich zerjow do pohiba pohnuć móc. Zastup płaći 20 eurow.

Malešecy. Přichodne posedźenje Malešanskeje gmejnskeje rady wotměje so jutře, wutoru, w 19 hodź. w Malešanskim wjesnym towarstwowym domje. Na dnjowym porjedźe steji rozsud wo twarskich dźěłach za ponowjenje mosta w Barće kaž tež za přetwar busowych zastanišćow. Dale zaběraja so radźićeljo z móžnosćemi wěrowanja w Lichańskim hrodźe.

Štó chce šić nawuknyć?

Pančicy-Kukow. Kurs šića za započatkarjow wotměje so srjedu, 25. měrca, wot 18 do 20 hodź w klóštrje Marijina hwězda w Pančicach-Kukowje. Wobdźělnicy nawuknu zakłady šića a móža sej na ­kóncu prěni samozešity dźěl drasty abo druhi wudźěłk sobu domoj wzać. Mały wuběr płatow steji k dispoziciji, toho­runja šijawa. Štóž sam šijawu ma, móže ju sobu přinjesć. Wobdźělenje płaći 45 eurow. Zajimcy njech přizjewja so pod .