Boršć. Na kolesowu wuprawu po łužiskich hatnišćach kołowokoło wjeskow Cympl a Chrjebja z ornitologom Jörgom Kasperom přeprošuje přirodoškitna stacija wuchodna Hornja Łužica sobotu, 21. junija wot 10 do 15 hodź. Zetkanišćo je wódny młyn w Boršći na Młynskej dróze 3. Zamołwići proša wo telefoniske přizjewjenje pod 035893 508571.

Lěćny swjedźeń w zahrodźe

Slepo. Ponowjenske dźěła na cyrkwinskej zahrodźe su zakónčene a na třěše Slepjanskeje cyrkwje maja nětko solarnu připrawu. To chce wosada woswjećić a přeprošuje wosadnych a zajimcow njedźelu, 22. junija, wot 14 hodź. na lěćny swjedźeń na zahrodźe z namšu, tykancom a kofejom kaž tež swójbnej zabawu. Wot 16.30 hodź. zahudźi skupina Serbska reja.

Na jubilejny swjedźenski ćah

Njeswačidło. Kak najlěpje swoju łuku z kosu posyčeš, nawuknješ sobotu, 21. junija, w času wot 9 do 14 hodź. we wo­sebitym kursu, kotryž poskićuje Nje­swačanska přirodoškitna stacija. Wo přizjewjenje pod tel.-čo. 035933 30077 abo z mejlku na naturschutzstation-nesch­ so prosy. Poskitk je ­darmotny. Zetkanišćo zhonja zajimcy po přizjewjenju. Na samsnym dnju wječor w 21 hodź. přeprošuje přirodoškitna stacija na darmotnu ekskursiju „Nócna mjetel při swěcy“. Zetkanišćo je parko­wanišćo při kwětkacym wobchodźe w Dubom (Dauban). Tež tu proša zamołwići wo přizjewjenje pod mjenowanymaj kon­taktomaj.

Chrósćicy. We wobłuku swjedźenskeho tydźenja 800. róčnicy prěnjeho naspomnjenja Chrósćic přednošuje rozhłosownica Monika Gerdesowa wo temje „Chrósćicy – stacija na Via Regii za putnikow něhdy a dźensa“. A to jutře štwórtk, 19. junija, w 19 hodź. w swjedźenskim stanje na nawsy.

Poetry-akademija w Radworju

Radwor. Pod titulom „Lost poetry zetka Łužicu“ zarjaduje hižo mnohe lěta we Łužicy aktiwna jewišćowa poetka, Jessy James LaFleur z wuchodneje Belgiskeje, nowe wudaće poetry-akademije w Radworskim Słodeńku. Nimo organizatorki jimaja so pjatk, 20. junija, w 19 hodź. tež młodźi wuměłcy Alina Stark, Jonas ­Pjetaš, Josephine Ziegler a Sam Ziemeck słowa.

Barokna hudźba w Malešecach

Malešecy. W swjedźenskim tydźenju 800. róčnicy Malešec wuhotuje hudźbny ansambl Weimar Baroque pjatk, 20. ju­nija, w 19 hodź. swjedźenski koncert w tamnišej cyrkwi. Sobuzałožićel ansambla Hans Christian Martin je dźensa kantor při Silbermannowych pišćelach w Chróstawje. Wosebite ćežišćo w repertoirje ćělesa su twórby J. S. Bacha. Zastup je darmotny, wo pjenježny dar pak proša.

Njebjelčicy. Přichodne posedźenje Njebjelčanskeje gmejnskeje rady wotměje so srjedu, 18. junija, w 19 hodź. w Njebjelčanskej gmejnskej sydarni. Radźićeljo porěča mjez druhim wo tym, hač hodźał so stary puć Lindach wot Miłoćic do Njebjelčic za trening jězbneje šule wužiwać. Wotpowědny namjet jutře radźićelam předstaja. W njezjawnym dźělu chcedźa wo tym wuradźować, kak hodźała so hospodarska situacija gmejny polěpšić.

Ručne zwónčki zaklinča

Smochćicy. Chór ručnych zwónčkow ewangelskeje wosady swjateho Michała z Kassela koncertuje štwórtk, 19. junija, w 19.30 hodź. w Smochčanskim kubłanišću swjateho Bena. Chór wobsteji mjeztym 25 lět a njewobrubja w swojej wosadźe jenož bohosłužby, ale wuhotuje po wšej Němskej tež koncerty. Wjackróć poby wón hižo w Smochćicach. Zastup budźe štwórtk darmotny, prosy so wo dary.

Powjedu po pohrjebnišću