Přizjewjenje šulerjow
Ralbicy. Starši, kotřiž chcedźa swoje dźěćo do 5. lětnika za šulske lěto 2026/2027 na wyšej šuli w Ralbicach přizjewić, móža to w dobje wot póndźele, 23. februara, hač do pjatka 27. februara po dorěčenju a k slědowacym časam:
póndźelu 8–11 hodź., wutoru 8–13 hodź., srjedu 8–14 hodź., štwórtk 10–18 hodź., pjatk 8–10 hodź.
Wotewrjenske časy ma šula tež na swojej internetnej stronje wozjewjene.
Twarske dźěła na A 4
Budyšin. Na awtodróze A 4 mjez wotjězdkomaj Budyšin-wuchod a Wóspork přewjeduja dźensa a jutře w času wot 8 do 16 hodź. wuporjedźenske dźěła. Mobilneho twarnišća dla je do wobeju směrow w tutym wotrězku stajnje jedna jězdnja zaraćena a spěšnosć na swobodnej jězdni na 80 km/h wobmjezowana. Hladajo na tuchwilne wjedrowe poměry prosy policija wo wobhladniwe jězdźenje.
Veronika Fischer w Budyšinje
Dnjowe hladanišćo informuje
Worklecy. Wutrobnje přeprošuje Zwjazk Caritas Hornja Łužica z.t. na informaciske zarjadowanje do swojeho dnjoweho hladanišća „Při Krabatowym puću“ we Worklecach a to štwórtk, 5. februara, w 19 hodź. Nawodnica hladanskeje słužby Jěwa-Marja Šnajdrowa informuje zajimcow mjez druhim wo poskitkach a posłužbach w domje kaž tež wo móžnosćach financowanja přez hladanske kasy.
Filmowe předstajenje Maćicy
Budyšin. W sydarni čo. 106 w Budyskim Serbskim domje předstaji sekcija „hudźba“ Maćicy Serbskeje štwórtk, 5. februara, w 19 hodź. filmisku dokumentaciju wo serbskich ludowych rejach. Zajimcy su wutrobnje witani.
Pala hodowne štomiki
Chrósćicy. Chróšćenjo, kotřiž chcedźa hišće swój lětuši hodowny štomik wotbyć, móža jón wot pjatka, 6. februara, při wjesnej grilowanskej hěće wotpołožić. Palenje štomikow zahaji so sobotu, 7. februara, w 17 hodź. při gratowni z domyswjećenjom. Po tym je smólnicowy ćah k wjesnemu hrajkanišću planowany.
Do kina w Kamjentnym domje
Budyšin. Budyski Kamjentny dom přeprošuje srjedu, 4. februara, w 20. hodź. na předstajenje filma „Sehnsucht in Sangerhausen“ němskeho režisera Juliana Radlmaiera. Tragikomedija tematizuje generacije přesahowace wosobinske dóńty a staja uniwerselne prašenja za přisłušnosću a identitu. Zastup płaći sydom eurow.
Přednošuje wo módroćišću
Budyšin. We wobłuku swojeje aktualneje wustajeńcy wo módroćišću přeprošuje Budyska Serbska kulturna informacija (SKI) wšitkich zajimcow na přednošk Daniela Häfnera z Choćebuskeho Łužiskeho instituta wo stawiznach a přitomnosći tutoho stareho rjemjesła. Zarjadowanje je štwórtk, 5. februara, w 16 hodź. w rumnosćach SKI w Serbskim domje. Wustajeńca je hišće hač dosrjedź měrca přistupna.
Tři króć gmejnska rada
Předstaja film
Budyšin. Sekcija hudźba Maćicy Serbskeje přeprošuje na dalše zarjadowanje. Štwórtk, 5. februara, w 19 hodź. předstaji w sydarni čo. 106 Budyskeho Serbskeho domu filmowu dokumentaciju serbskich ludowych rejow. Wšitcy zajimcy su wutrobnje přeprošeni.
Radźićeljo wuradźuja
Róžant. Přichodne posedźenje gmejnskeje rady Ralbicy-Róžant wotměje so štwórtk, 5. februara, we 18.30 hodź. w Róžeńčanskej gmejnskej sydarni. Mjez druhim póńdźe wo to, kotre stejišćo gmejna zabjerje, hdyž dóńdu próstwy inwestorow wo twar fotowoltaikowych připrawow na gmejnskich ležownosćach.
Chrósćicy. Tohorunja štwórtk, ale w 19 hodź., zeńdźe so Chróšćanska gmejnska rada w gmejnskim a kulturnym centrumje. Tam chcedźa mjez druhim hospodarski plan za lěto 2026 předstajić a wo nim diskutować.
Worklecy. Tež Worklečanska gmejnska rada zeńdźe so štwórtk, 5. februara, w 19 hodź., a to w horće „K wódnemu mužej“. Radźićeljo chcedźa dalše nadawki we wobłuku saněrowanja wyšeje šule „Michał Hórnik“ rozdawać. Tónraz póńdźe wo suchotwar a wo zatwar durjow.
Awtentiske dožiwjenja z Chiny
Chrósćicy. Přednošk w putniskej hospodźe jutře, sobotu, w Chrósćicach budźe bóle eksotiski hač hewak. Hósć budźe lěkar na wuměnku, kiž je čas swojeho powołanskeho žiwjenja za mjezynarodne pomocne a wuwićowe programy po cyłym swěće dźěłał, tež w Africe a centralnej Aziji. Mjeztym hižo lětdźesatk bydli wěsty čas lěta w Chinje, hdźež skutkuje jako poradźowar za strowotniske programy. Dr. Klaus Hornetz předstaji z fotami a wo swojich dožiwjenja powědajo krajinu, kulturu a wašnja w Chinje pod hesłom „Stawiznički z dźesać lět wšědneho dnja w druhim kraju – nowa domizna bliska a cuza“. Přednošk w němčinje započnje so w 19.45 hodź. Do toho je wot 16 hodź serbske kino za dźěći .
Wo wukubłanju so wobhonić
Herman Woko turněr dobył
Lejno. Prěni škotowy turněr serbskich seniorow w tutym lěće je so wčera w Lejnjanskim Kubicec hosćencu wotměł. Škotowarka a 35 škotowarjow je so na nim wobdźěliło. Mjez nimi bě nowačk Mikławš Zahon. Herman Woko je turněr z nahladnymi 3 347 dypkami před Bosćijom Rječku (2 661) a Herbertom Krječmarjom (2 568) dobył. Přichodne kartyplacanje wotměje so 24. februara w 14 hodź. w Karstenowej piwowej stwičce w Pančicach-Kukowje.
Pokazaja swětnišćowu show
Wojerecy. Němski centrum za powětrowe a swětnišćowe lětarstwo (DLR) pokaza swoju swětnišćowu show lětsa tež we Wojerecach. We Łužiskej hali přeprošuja na putacu jězbu do přichoda, a to 19. meje wot 16.30 do 18 hodź. Interaktiwny jewišćowy program je za dźěći w starobje wot dźewjeć do 13 lět mysleny. Zastup je darmotny. Lisćiki móža sej zajimcy pod www.lausitzhalle.de skazać. Dalše předstajenja budu 19. a 20. meje za šulske rjadownje. Hač do 6. februara přijimuja přizjewjenja pod .
Spěwarki wuhotuja koncertaj
Baćoń. Žónski ansambl Jarobinka wuhotuje pod nawodom Walburgi Wałdźic a z huslerku Izabelu Kałduńskej pjatk, 30. januara, w 19 hodź. w Baćońskej cyrkwi koncert. Zastup je darmotny, po koncerće proša wo dar. Nazajtra wustupi ansambl zhromadnje z Praskim chórom Kormorni sbor Entropija w Praze, a to w Betlémskej kapli na Źižkovje. Započatk je tam 18.30 hodź.. Towarstwo Společnost přátel Lužice koncert sobu organizuje.
Informuja wo hladarni
Worklecy. Pod hesłom „Dohlady a informacije wo poskitkach našeho domu a móžnosće financowanja přez hladanske kasy“ wotměje so štwórtk, 5. februara, w 19 hodź. informaciske zarjadowanje w dnjowej hladarni Carity „Při Krabatowym puću“ we Worklecach. Tam poskićuja pomocy potrěbnym ludźom městnosć zetkawanja a zhromadneje zaběry, jich swójbnym pak podpěru při hladanju staršich ludźi. Kaž nawodnica Jěwa-Marja Šnajdrowa zdźěli, posrědkuja wopytowarjam informaciskeho zarjadowanja přehlad, što so we Worklečanskej hladarni stawa a kotre poskitki maja.
Radźićeljo wuradźuja
Seniorojo škotuja
Lejno. Prěni lětuši škotowy turněr serbskich seniorow wotměje so jutře, wutoru, w Lejnjanskim Kubicec hosćencu „K lipje“. Započatk budźe w 14 hodź. Nowačkojo su kaž přeco wutrobnje witani.
Serbske blido w Drježdźanach
Drježdźany. Přichodne serbske blido w Drježdźanach wotměje so srjedu, 28. januara. Wobdźělnicy zetkaja so we 18 hodź. w dnjowej barje Loewe na Hłownej dróze 46-48. To je napřećo korčmje Am Thor, hdźež je so serbske blido minjene měsacy wotměwało.
Porěči wo Minje Witkojc
Choćebuz. Stajne blido Miny Witkojc schadźuje so jutře, wutoru, w 19 hodź. w Choćebuskim Serbskim muzeju. Tam porěči kuratorka Anja Jahnojc wo wuslědkach swojeho slědźenja wo Minje Witkojc. Předewšěm póńdźe wo přećelstwo Miny Witkojc a Marjany Domaškojc a jeju basnjenje. Nimo toho budźe dosć chwile za wuměnu a rozmołwu.
Wo njewšědnym putnikowanju
Chrósćicy. Nic jenož dźensa, ale tež hižo w dawnych časach běchu so ludźo z Łužicy na putnikowanje podali. Tak tež młody młynk Jurij Wawrik z Kukowa, kotryž z towaršomaj 1842 z Łužicy do Roma nóžkowaše. Wo tutym putnikowanju a při tym dožiwjenych dyrdomdejach je knihu napisał. Wona skića jónkrótny dohlad do dožiwjenjow a strachow tajkeho tradicionalneho putnikowanja. W Chróšćanskej putniskej hospodźe přednošuje wo tym jutře, sobotu, w 19.45, hodź. stawiznarka dr. Lubina Malinkowa. Wona je čaru Wawrika zrekonstruowała a so za tym prašała, kotre slědy je putnikowanje w žiwjenju Wawrika a we Łužicy zawostajiło. Je to zarjadowanje z rjadu „Sorabistika po puću“ składnostnje 75lětneho jubileja Serbskeho instituta. Samsny dźeń w 16 hodź. poskićuje so w putniskej hospodźe serbske kino za dźěći.
Přeprošuja na karnewal
