Radźićeljo wuradźuja
Chrósćicy. Přichodne zjawne posedźenje Chróšćanskeje gmejnskeje rady wotměje so štwórtk, 8. meje, w 19 hodź. w tamnišim gmejnskim a kulturnym centrumje. Mjez druhim předstaja tam projekt spóznawanja hornjoserbšćiny. Dale póńdźe wo prašenje, kotre předewzaće ma šulerjow zakładneje šule na płuwansku wučbu wozyć.
Přeprošuja na wopomnjeće
Wojerecy. Na wopomnjenske zarjadowanje składnostnje wuswobodźenja wot nacionalsocializma přeprošuje štwórtk, 8. meje, město Wojerecy k wopomnišću na Bonhoefferowej. Holcy a hólcy Wojerowskeje wyšeje šule wuhotuja krótki program. Porěčitaj měšćanosta Mirko Pink a nawodnica šule Romy Stötzner. Zarjadowanje je zdobom zakónčenje politisko-historiskeho kubłanskeho projekta „Přećiwo zabyću“ w tymle šulskim lěće. Wopomnjenje započnje so w 13 hodź. Wšitcy zajimcy su wutrobnje přeprošeni.
Pčołkam pomhać
Čěska kapała zahudźi
Wojerecy. Srjedu, 7. meje, wotměje so we wobłuku lětušich Wojerowskich hudźbnych swjedźenskich dnjow koncert serbskich spěwow. Wot 19.30 hodź. zahudźi na hrodźe čěska kapała Lidová muzika z Chrástu. Wona wustupi z programom z albumow „Za čěskimi horami“ a „Weddings&Funerals“. Regionalne spěwy, zwjetša ze Smolerjoweje zběrki we wobdźěłanjach Vojtěcha Koubi a Jaroslava Krčeka, předstaja čěscy hudźbnicy srjedu a štwórtk tež na třoch Wojerowskich šulach, mjenujcy na spěchowanskej šuli, na Zejlerjowej zakładnej šuli a na Lessingowym gymnaziju.
Wotewru wustajeńcu
Budyšin. František Vydra a jeho wuměłske tworjenje stejitej w srjedźišću wustajeńcy „Lužice – má láska“, kotruž wotewru jutře, wutoru, w 17 hodź. w Budyskej Serbskej kulturnej informaciji. Wo hudźbne wobrubjenje postara so serbski spěwotwórc Bernd Pittkunings. Přehladka je hač do 31. julija přistupna.
Sadźa měrowu lipu
Hórnikecy. Składnostnje 80. róčnicy wuswobodźenja wot nacionalsocializma chcedźa jutře, sobotu, w Hórnikečanskej energijowej fabrice měrowu lipu sadźić. K tomu su wšitcy wutrobnje přeprošeni. Zajimcy zetkaja so w 10.30 hodź. Tomu přizamknje so w 11 hodź. wodźenje po trajnej wustajeńcy. W 12 hodź. předstaja film „Kak klinči domizna?“ Felixa Räubera. Do njeho su tež wobrazy ze serbskich wsow sobu zapřijate.
Požohnuja motorske
Ralbicy. Lubowarjo motorskich a mopedow njech přijědu njedźelu, 4. meje, do Ralbic. W tamnišej cyrkwi započnje so w 14 hodź. wosebity nyšpor. Po nim motorske a mopedy požohnuja. Přizamknje so zhromadny wulět.
Porěči wo astrofyzice
Wojerecy. Wojerowska župa „Handrij Zejler“ a Domowinski projekt ZARI přeprošujetej na dalše zarjadowanje we wobłuku rjada „Rěčna swětłownja“ wutoru, 6. meje, we 18 hodź. do Wojerowskeho Domowinskeho domu na Drježdźanskej. Doktorand w Instituće za jadrowu a dźělčkowu fyziku na Drježdźanskej Techniskej uniwersiće Jan Wünscha přednošuje wo astrofyzice. Zajimcy su wutrobnje přeprošeni.
Z kolesom wěsće po puću
Přeprošuja na mejemjetanje
Zastanišćo ponowili
Škotowarjo so zetkaja
Ralbicy. Na dalši škotowy turněr su serbscy seniorojo jutře, wutoru, w 14 hodź. do Ralbičanskeho sportoweho domu přeprošeni. Započatk budźe kaž stajnje w 14 hodź. Tež nowačkojo su wutrobnje witani. Přichodny turněr zarjaduja 27. meje w hosćencu w Kozarcach.
Porěči wo zadołženju
Połčnica. Wokrjesny zwjazk CDU Budyšin přeprošuje na zjawny přednošk jutře, wutoru, we 18 hodź. do Połčnicy. Z hosćom budźe něhdyši ministerski prezident Sakskeje prof. dr. Georg Milbradt. Wón rozjima prašenje, hač woznamjenja stupace nowozadołženje zwjazkoweho knježerstwa poćeženje abo šansu za přichodnu generaciju. Wšitcy su wutrobnje přeprošeni so na diskusiji wobdźělić. Zajimcy njech přizjewja so e-mailnje pod .
Wustajeńca wo runostajenju
Jutrowne jejka wužrawaja
Budyšin. Spěchowanske towarstwo Serbskeho muzeja přeprošuje jutře wot 13 do 16 hodź. na wužrawanje serbskich jutrownych jejkow. Tutu staru techniku wobknježi jenož mało ludźi a tuž chcedźa wědu wo tym zaso šěrić. Dźěći płaća 5 eurow, dorosćeni 7,50 eurow, swójby 16 eurow. Kóždy wobdźělnik dóstanje jedne jejko za debjenje darmo. Kóžde dalše jejko płaći 50 centow, při čimž smědźa so maksimalnje tři přidatne jejka na wosobu kupić. Wobdźělnicy njech přinjesu sej sudobjo za transport jejkow sobu. Wobdźělenje je wot dźesać lět móžne.
Pokazaja film w SKC
Slepo. Film „Pola nas rěka wona Hanka“ pokazaja jutře, sobotu, w 17 hodź. w Slepjanskim Serbskim kulturnym centrumje. Režiserka Grit Lemke budźe přitomna a steji za rozmołwy k dispoziciji. Film zwobraznja indiwidualny poćah ludźi k serbskej kulturje. Zastup je darmotny. Sakski medijowy wustaw zarjadowanje spěchuje.
Swjeći z knižnej premjeru
Starožitnosće znowa wotkryć
Budyšin. Twjerde a papjerjane pjenjezy, medalje, wuznamjenjenja, pohladnicy, literatura, listowe znamki a wšo móžne dalše, štož ludźo zběraja, steja w srjedźišću jutrowneje bursy zběrarjow w Budyšinje. Wona wotměje so wulki pjatk, 18. apryla, wot 9 do 14 hodź. w Budyskim Serbskim domje. Tam móža so zajimcy poradźować dać. Wo ćělne derjeměće budźe postarane..
Wosebity poskitk za prózdniny
Zhorjelc. Pod hesłom „Mission Exoplanet“ wuhotuje Astrocentrum Łužica wot 21. hač do 25. julija wosebity poskitk za prózdniny w Zhorjelcu a wokolinje. 20 dźěći a młodostnych změje w tym času składnosć, dopołdnja slědźersce skutkować a so popołdnju sportowym zaběram wěnować. Mjez druhim chcedźa za nowymi planetami w swětnišću pytać a k nim swětnišćowu łódź pósłać. Nimo toho steja kopańca, kicker a krosnowanje na programje. Zajimcy njech přizjewja so hač do 31. meje e-mailnje pod mission-exoplanet.de.
Zetkanje zabawne a powučne
