Koncertuja na druhim městnje
Radwor. Swój lětni koncert přewjedźe Radworski chór Meja njedźelu, 30. junija, w chłódku štomow na farskej zahrodźe při Radworskej cyrkwi, nic kaž hewak před Starej cyrkwičku. Wot 15.30 hodź. poskića swačinu. Koncert započnje so w 16 hodź. Nimo Mejanow wuhotuje program chór Svatobor z čěskeho městačka Sušice južnje Plzenja. Wón přijědźe prěni raz do Łužicy. Wječor wuklinči ze zhromadnym spěwom a bjesadu.
Twarja parkowanišćo
Wojerecy. Při tak mjenowanym zarjadniskim parku na Pforzheimskim naměsće we Wojerecach su tele dny parkowanišćo wutwarjeć započeli. Hač do kónca oktobra maja tam 104 městna za wosobowe awta, tři městna za awta zbrašenych, šěsć městnow za caravany a dwě městnje za busy nastać. Dale nastaja tam 17 sćežorow za wobswětlenje a nasadźa 30 štomow. Dohromady nałoža za parkowanišćo wjace hač 580 000 eurow.
„Mały Muk“ na jewišću
Budyšin. Serbske dźěćace dźiwadło při NSLDź předstaji jutře, srjedu, hru „Mały Muk“, a to w 10 hodź. na hłownym jewišću Němsko-Serbskeho ludoweho dźiwadła.
Na čitanje do „Wódneho muža“
Malešecy. Župa „Jan Arnošt Smoler“ a Domowinska skupina Malešecy přeprošatej štwórtk, 27. junija, w 14 hodź. na čitanje Křesćana Krawca we „Wódnym mužu“ w Malešecach. Awtor čita ze swojeje knihi „Das Ende vom Paradies“. Čitanje zarjaduje so do slěda župnych zarjadowanjow k wozrodźenju serbšćiny w Malešanskej kónčinje. Zastup je darmotny.
Z wuchowarjemi rěče rěčeć
Budyšin. Na swoje přichodne zetkanje přeproša Budyski klub wuchowarjow rěče jutře, 25. junija, we 18 hodź. do Budyskeho hosćenca „Sprjewina pensija“. Tam njezměja tónraz referenta, ale publikum móže sam swoje starosće kołowokoło rěče přednjesć. Rozmołwnaj partneraj budźetaj Jörg Bönisch a Sieghard Kozel. Moderaciju změje Diethold Tietz. Wšitcy su přeprošeni. Zastup je darmotny.
Póńdźe wo poměr k Ruskej
Budyšin. Měšćanski zwjazk Lěwicy přeproša za jutře, wutoru, w 17 hodź. do Budyskeje Röhrscheidtoweje bašty na diskusijne zarjadowanje pod hesłom „Měniš, zo chcedźa Rusojo wójnu? – Zaprajenje němskeje wonkowneje politiki w poměrje k Ruskej“. Z hosćom budźetaj bywši wonkopolitiski rěčnik frakcije Lěwicy w zwjazkowym sejmje Wolfgang Gehrcke a žurnalistka Christiane Reymann. Zarjadowanje moderěruje zapósłanc Sakskeho krajneho sejma Heiko Kozel (Lěwica). Zastup je darmotny.
Termin sej zapisać
Budyšin. Lětuši dnjowy wulět Serbskeho šulskeho towarstwa za seniorow a dalšich zajimcow budźe 28. awgusta. Wobdźělnicy pojědu do Choćebuza-Rogeńca, wopytaja dožiwjensku zahrodu pola Noweje Wsy a Bórkowy, hdźež chcedźa tež čołmikować. Zajimcy měli sej termin hižo nětko zapisać, prosy organizator Měrćin Krawc. Dalše informacije budu sčasom rozpósłane.
Pjelsćić wuknyć
Dołha Boršć. Stare rjemjesło pjelsćenja předstaja jutře, sobotu, wot 9 do 13 hodź. na přirodoškitnej staciji wuchodneje Hornjeje Łužicy w Dołhej Boršći pola Mikowa. Sobudźěłaćerka Jana Uecker zajimcam rozłoži, kak móža kreatiwnje pjelsćene wudźěłki zhotowić. Wobdźělenje je darmotne.
Do kina pod hołym njebjom
Budyšin. Za čas Budyskeho lětnjeho dźiwadła pokazaja tež lětsa na Budyskim hrodźe stajnje wutoru w 21.30 hodź. kino pod hołym njebjom. Jako prěni předstaja přichodnu wutoru, 25. junija, film „Gundermann“, kotryž rysuje žiwjenje spěwytwórca a bagrownika Gerharda Gundermanna.
Hdźež literatura nastawa
Do domu Njechorńskeho
Njechorń. Dźeń wotewrjenych duri přewjedźe župa „Jan Arnošt Smoler“ sobotu, 22. junija, wot 14 do 17 hodź. w Domje Měrćina Nowaka-Njechorńskeho. Tam přeprošeja na pućowanje po šćežkach Měrćina Nowaka wokoło Njechornja. W domje poskićeja wodźenja w serbskej a němskej rěči, w ateljeju čita dr. Ruth Thiemannowa. Tež za dźěći budźe zaběra přihotowana. Dale pokazaja zhromadnje ze Serbskim kulturnym archiwom krótkofilmaj wo Měrćinje Nowaku z lěta 1975. Tež kofej a tykanc budźe w poskitku. Župne předsydstwo wšitkich zajimcow na přijomnu bjesadu a na zajimawe popołdnjo cyle wutrobnje wita.
Kak chcemy stari być?
Wojerecy. We Wojerowskej měšćanskej bibliotece na Bonhoefferowej wotměje so jutře, srjedu, w 15 hodź. dalše zarjadowanje w rjedźe „Etika a literatura“ hromadźe z łužiskej jězorinowej kliniku. Pod hesłom „Kak chcemy stari być – kak stari chcemy być?“ porěča wo tym, kotre žiwjenske formy su za staršich ludźi trěbne a kmane.
RCW poskići nowej kursaj
Budyšin/Pančicy-Kukow. W nowym šulskim lěće poskići Rěčny centrum WITAJ wosebitej kursaj za staršich serbšćinu wuknjacych dźěći a dalšich zajimowanych dorosćenych. W Budyšinje wotměje so kurs wot 2. septembra 2019 hač do 13. januara 2020 stajnje póndźelu wot 17.30 do 19 hodź. w Serbskim a šulskim zetkawanskim centrumje na Friedricha Listowej 8. Kurs w Pančicach-Kukowje traje wot 2. septembra hač do 6. januara 2020 a budźe stajnje póndźelu wot 19 do 20.30 hodź. w Šuli Ćišinskeho. Přizjewjenja přijimuje RCW e-mailnje pod abo pod tel. čo. 03591/ 550 400.
Přesadźuja namakane wěcy
Budyšin. Přichodne zjawne přesadźowanje namakanych wěcow wotměje so jutře, wutoru, w 16.30 hodź. w delnim foyeru Budyskeje radnicy. Hižo wot 15.30 hodź. móža sej zajimcy poskićene wěcy wobhladać. Přesadźować chcedźa mjez druhim žonjace a mužace kolesa, mountainbiki, handyje a časniki. Nimo toho přińdu wšelka drasta a dalše mjeńše namakanki pod hamor. Štóž chce něšto kupić, ma to na městnje zapłaćić a wupokaz předpołožić.
Při skale zaklinči folk
Miłoćicy. Rjane dožiwjenje lubi folkowy hudźbny wječor při Miłočanskej skale jutře, sobotu, wot 19 hodź. Wo hudźbu postaraja so kapale Sangre de Muerdago a Grift kaž tež hudźbnik Jacke Schwarz. Při darmotnym zastupje móža wopytowarjo při lěhwowym wohenju sedźo na hudźbu słuchać, abo tež podłu skały dundać a sej zaso raz tam nastate wuměłstwowe twórby zašłych rězbarskich dźěłarničkow wobhladać. Čłonojo towarstwa Kamjenjak zaruča ćělne derjeměće nadźijomnje prawje wjele wopytowarjow z rustikalnej jědźu a napojemi.
Druhi hrodowy koncert
Njeswačidło. Lětuši druhi hrodowy koncert je zajutřišim, njedźelu, w 15 hodź. na Njeswačanskim hrodźe. Wjeselić móža so hosćo na Drježdźansku mecosopranistku Elisabeth Letocha. Ju přewodźa na klawěrje Pi-Wei Chuang. Na wosebite wašnje zjednoća spěwarka najwšelakoriše hudźbne žanry kaž operetu, musical, filmowu hudźbu a šansony. Koncert mjenuje so „Gelassenheit“. Pod tymle hesłom wotewru po přestawce wustajeńcu samsneje wuměłče. Njeswačanske domizniske a kulturne towarstwo wšitkich zajimcow lubje přeproša.
Hudźbni šulerjo koncertuja
Radwor. Ke kóncej šulskeho lěta 2018/2019 wotměje so jutře, štwórtk, we 18.30 hodź. w Radworskim hosćencu „Meja“ zhromadny koncert Budyskeje wokrjesneje hudźbneje šule a Radworskeje zakładneje a wyšeje šule. Nimo instrumentalistow na drjewjanych a blachowych instrumentach, na akordeonje a gitarje wustupitej chóraj zakładneje a wyšeje šule. Zastup je darmotny, organizatorojo pak proša wo dar.
Porěči wo wurywanjach
Wojerecy. Kotre informacije zdobywaja archeologojo z wurywankow a čehodla su rubježne wurywanja tak problematiske? Wo tym porěči Marcel Steller jutře, 13. junija, w 17 hodź. w kaminowej stwě Wojerowskeho hrodu.
Moluja na dźěłarničce
Njechorń. Spěchowanski kruh za serbsku ludowu kulturu přewjedźe wot pjatka hač do njedźele tohole tydźenja molersku dźěłarničku w Domje Měrćina Nowaka w Njechornju. Wuměłski nawod změje Maja Nagelowa. Mjez druhim zaběraja so wobdźělnicy z portretowanjom, molowanjom w přirodźe a z molowanjom na wulkich łopjenach. Wuslědki chcedźa we wustajeńcy pokazać.
Kniha změje premjeru
Budyšin. „Znaki pominaki kopolaki“ rěka kniha Měrany Cušcyneje, Róže Domašcyneje a Měrki Mětoweje. Nowostka změje zajutřišim, štwórtk, w 19.30 hodź. premjeru w Budyskej Smolerjec kniharni. Ze swojimi tekstami pućuja awtorki kaž podłu rjećaza po Łužicy. Njewšědnu poetisku wuprawu wobrubjeja fotografije Jürgena Maćija a hudźba Jana Cyža.
Wuhódnoća wólby
Budyšin. Wuhódnoćenje zašłych wólbow Budyskeje měšćanskeje rady steji w srjedźišću přichodneho stajneho blida CDU jutře, srjedu, w 19 hodź. w Budyskim hosćencu „Spreepension“. Tam chcedźa wólbny bój a jeho wuslědki posudźować a wo tym rěčeć, kotre móžnosće maja, w nowej měšćanskej radźe swójske zaměry přesadźić. Stajne blido CDU je zjawne zarjadowanje a wotměwa so stajnje druhu srjedu měsaca.
Starobiskop Reinelt přijědźe
Dóstanu podpěru
Wojerecy. Nad pjenježnej podpěru 1 000 eurow smě so Wojerowska wódna straža wjeselić. Wotpowědny šek přepoda jej wutoru po swjatkach załožba Town& Country, podpěraca po cyłym kraju kóžde lěto 500 towarstwow a zarjadnišćow, kotrež so za dźěći a młodostnych zasadźeja. Wódna straža stara so wo wukubłanje młodych wuchowanskich płuwarjow z rozdźělnymi socialnymi wuměnjenjemi. W lěću zaručeja woni kupanje w jězorach a kupjelach kaž tež sanitetnu słužba na zarjadowanjach.
Countdown za wubědźowanje
Miłoćicy. Hišće hač do 12. junija móža dźěći w starobje pjeć do dwanaće lět swoje rysowanki a mólby za molowanske wubědźowanje składnostnje lětušeho klóšterskeho a swójbneho swjedźenja 23. junija w klóštrje Marijinej hwězdźe zapodać. Twórby z mjenom, adresu a starobu njech pósćelu zajimcy Křesćanskosocialnemu kubłanskemu skutkej w 01920 Miłoćicach, Krótki puć 8. Jury najrjeńše dźěła wuzwoli a za nje 23. junija atraktiwne myta přepoda.
Ponowja dróhu
