Přisaha bórze móžna?
Njebjelčicy. Spřećiwjenja nastupajo wólby wjesnjanosty w Njebjelčanskej gmejnje móža so hač do 14. oktobra pola wokrjesa zapodać. To zdźěli na naprašowanje SN hamt za komunalne naležnosće. Dołhož njeje proces zakónčeny, dyrbja hišće z přisahu Měrka Domaški dočakać. Přichodne posedźenje gmejnskeje rady budźe 27. oktobra. Potom móhł Domaška přisahu złožić.
Dale a wjac studentow z wukraja
Drježdźany. Telko požadarjow z wukraja wo studijne městna kaž lětsa nazymu njeje Techniska uniwersita Drježdźany ženje měła: Jich je 12 513. Mjez 6 226 nowačkami w 1. semestrje je 1 590 studowacych z dohromady 104 narodow. Zdobom so wjesela nad rosćacym zajimom za matematiku, přirodowědu a inženjerstwo: Dotal hižo 15 016 požadanjow přetrjechi ličbje lětow 2024 a 2025.
Češa na wulkowikach
Towarstwo za wuwiće Hornjołužiskeje hole a hatow (OHTL) je wčera na starym rybarskim dworje w Małym Holešowje swoju lětušu regionalnu konferencu přewjedło. Tam su mjez druhim dobyćerjow fotoweho wubědźowanja a projektoweho wubědźowanja mytowali.
Mały Holešow (SN/jp). Předsydka towarstwa Madeleine Rynčowa, kotraž je zdobom wjesnjanostka Radworskeje gmejny, je něhdźe 50 zajimcow z Leader-regiona w rumnosćach rybarskeho dwora w Małym Holešowje witała. Pod hesłom „Přiroda a wobswět“ słyšachu tři impulsowe přednoški, wo kotrychž so w přestawce wuměnichu.
Jan Wjenk z Wotrowa wupraja so w zwisku z narěču bamža Leja XIV. před zhromadźiznu UNESCO w Parisu:
Nawjazujo na přednošk bamža Leja XIV. 25. septembra w Parisu, kotryž poruča wšěm ludam přemyslować a jednać, běch hnuty a njemóžach so změrować, myslo na Druhu swětowu wójnu, jako dyrbjach jako štyrilětny hólc na připójsnjenym ručnym wozu pola bura, kotryž měješe jenož hišće konja, we wójnje ćěkać. W pincy pod bróžnju smy spali a ležach na starych durjach na rěpje a neplach za schodom, a znaći z Delan jenož rózarije spěwachu.
Hdyž dźensa bamž Leo XIV. ludźi namołwja, z druhimi rěčeć, myslach tež na swójby z dźěćimi a młodostnymi, kiž su wot wójnow potrjecheni. Nětko zaso započnu w bliskim Zhorjelcu, so z wojerskej techniku zaběrać, bjez zmysła.
W susodstwje na Tuchorskej horje blisko Wujězda běchu atomowe brónje składowane. Tam staj sej, tak steješe w Katolskim Posole, ameriski a ruski general ruku zawdałoj a běchu brónje wotwjezli. Spominamy kóždolětnje na pokutnym dnju z małym nyšporom na to. Dźensa móža rakety kóždu kónčinu docpěć, to njech je kóždemu wědome.
Serbska zakładna a wyša šula Budyšin 80lětne wobstaće woswjećiłoj
Budyšin (SN/MiR). „Štož dźensa smy, su hižo jutře stawizny. A po nami budu dalše generacije šulerjow na tutych šulach wuknyć a so za jich zašłosć zajimować.“ To rjekny šulerka 7. lětnika Serbskeje wyšeje šule Budyšin wčera dopołdnja w awli Serbskeho šulskeho a zetkawanskeho centruma w Budyšinje, skedźbnjejo na to, zo mjeztym 80 lět w sprjewinym měsće serbsku šulu mamy. Do toho běchu so šulerki a šulerjo na ekskursijach po měsće z něhdyšimi stejnišćemi kubłanišća zaběrali. Dale su z podpěru Němsko-Serbskeho ludoweho dźiwadła sćinohru nadźěłali. Před awlu pak bě natwarjena wustajeńca, z kotrejež wuchadźa, zo su 15. oktobra 1946 prěnju wučbu ze 120 šulerjemi w twarjenju Schilleroweho gymnazija podawali. Pozdźišo wuwučowachu na Kurta Pchalekowej, na Butrowych wikach a na Naměsće měra a dźensa činja to na Friedricha Listowej dróze.
Přisaha bórze móžna?
Njebjelčicy. Spřećiwjenja nastupajo wólby wjesnjanosty w Njebjelčanskej gmejnje móža so hač do 14. oktobra pola wokrjesa zapodać. To zdźěli na naprašowanje SN hamt za komunalne naležnosće. Dołhož njeje proces zakónčeny, dyrbja hišće z přisahu Měrka Domaški dočakać. Přichodne posedźenje gmejnskeje rady budźe 27. oktobra. Potom móhł Domaška přisahu złožić.
Dale a wjac studentow z wukraja
Drježdźany. Telko požadarjow z wukraja wo studijne městna kaž lětsa nazymu njeje Techniska uniwersita Drježdźany ženje měła: Jich je 12 513. Mjez 6 226 nowačkami w 1. semestrje je 1 590 studowacych z dohromady 104 narodow. Zdobom so wjesela nad rosćacym zajimom za matematiku, přirodowědu a inženjerstwo: Dotal hižo 15 016 požadanjow přetrjechi ličbje lětow 2024 a 2025.
Češa na wulkowikach
Padustwo zwrěšćiło
Wojerecy. Njeznaty muž je minjenu njedźelu we Wojerecach podarmo spytał, staršu žonu nadpadnyć. 85lětna bě z kolesom w měsće po puću, jako wona pytny, zo wotzady přijězdźowacy kolesowar spyta, jeje ručnu tobołku z koša spakosćić. To pak so jemu njeporadźi, dokelž bě tobołka přidatnje přiwjazana. Cuzy so na to zminy. Wuměnkarka pak přizjewi so na to pola policije, kotraž pad dale přepytuje.
Při najkrasnišim wjedrje su sej čłonojo Budyskeje župy „Jan Arnošt Smoler“ z busom do kónčin wokoło Slepoho dojěli. Rodźenu Trjebinjanku dr. Ruth Mroskojc běchu sej jako wěcywustojnu přewodźerku po kónčinach jeje domizny přeprosyli. Hižo w busu poda wona wobdźělnikam župneho wulěta dohlad do wosebitosćow Slepjanskich kónčin a pozdźišo tež wo slepjanšćinje kaž tež wo mjenach dworow a ležownosćow.
Prěnja stacija wuprawy běštej zakładna a srjedźna šula w Slepom. Tři holcy w Slepjanskej drasće nas serbsce spěwajo z chlěbom a selu witachu. Wjednica zakładneje šule Nadine Stelzerowa nas wo dobrych nazhonjenjach, ale tež wo problemach informowaše. Tak wojuja wo ministerialnu podpěru, wšako njeliča jako prawa „serbska šula“. Zahubne je, zo na přikład pobrachowacych wučerjow dla tydźensce prawidłownje 14 hodźin serbšćiny wupaduje. Hibićiwy nawoda tamnišeje srjedźneje šule Jan Hrjehor nas po rumnosćach wodźeše. Wobdźiwachmy nowu sportownju a biblioteku kaž tež wurjadnje wuhotowane fachowe kabinety.
Jednaćel a lěkarski direktor nowe wusměrjenje domu předstajiłoj
Kamjenc (SN/StŠ). „Chorownja swjateho Jana w Kamjencu je za strowotniske zastaranje w regionje njeparujomna a tohodla chorownja wostanje!“ Z tutym jasnym wuprajenjom je so wčera popołdnju nowinarska konferenca zahajiła. Na nju bě nawodnistwo domu přeprosyło, takrjec jako reakciju na tydźenja we wokrjesnym sejmiku předstajenu analyzu, po kotrejž njeje jenož zawrjenje porodneje stacije a gynekologije znjesliwe, ale po kotrejž je cyły dom mjenje abo bóle njetrjebawši. Tole nawodnistwo Kamjenskeje chorownje raznje wotpokazuje.
„Po strowotniskich kriterijach za chorownje w Sakskej smy jasnje jako chorownja za zakładne zastaranje ludnosće w nuzowym padźe w našej wokolinje zarjadowani. Tutomu nadawkej połnje wotpowědujemy – dźeń wote dnja, cyłe lěto. Tole so tež w ličbach wotbłyšćuje. Tak mějachmy poslednje lěto jeničce w našej nuzowej ambulancy na wšěch 11 000 pacientow zastarać. K tomu přińdu pacienća, kotrychž smy stacionarnje lěkowali“, wujasni lěkarski direktor chorownje dr. Krystof Bětnar.
Chrósćicy. Wot 13. oktobra změja swójby w Chrósćicach zaso składnosć zhromadnje sportować. Poskitk, kotryž nawjeduje socialny dźěłaćer Rěčneho centruma WITAJ Křesćan Lebza, je zaměrnje na potrjeby staršich a dźěći w starobje třoch hač do šěsć lět přiměrjeny. Při tym steji předewšěm zhromadny čas w srjedźišću. Dźěći so pohibuja a pokazaja hrajersce swoju wušiknosć. Tež starši so aktiwnje wobdźěla, ale wužija zdobom składnosć so wuměnjeć. Zakład koncepta je, zo su přirodne, wšědne poćahi za strowu towaršnosć přewšo wažne. Čim stabilniše tute zwiski, ćim mjenje profesionalneje podpěry je trěbne. To je zaměr, kotryž RCW z projektom sćěhuje. Poskitk so hač do 17. nowembra přewjedźe. Zajimcy móža so hišće pod přizjewić.
Domizniska stwa z jubilejom
