Najwjetša solarna připrawa na wodźe – LEAG horda, druzy dwěluja
Choćebuz (SN/mb). Powěsć połna superlatiwow: Na najwjetšim jězorje w krajinje něhdyšeho hórnistwa je po cyłej Němskej najwjetša płuwaca solarna připrawa nastała. Kaž koncern LEAG zdźěla, je projekt planowany rozměr 16 hektarow docpěł. Z tym je jedyn procent płoniny wodźizny pokryty, kotrejž oficielnje „wuchodny jězor“ rěkaja a Serbja „Liškojski jazor“. Tute mjeno je tež Choćebuska wobswětowa skupina Zeleneje ligi hižo 2013 měšćanskej radźe namjetowała, zo bychu na jednu z wotbagrowanych wjeskow dopominali. Tola wjetšina radźićelow chcyše „Ostsee“ měć, najskerje, dokelž někak kaž Baltiske morjo klinči.
Jan Wjenk z Wotrowa spomina na zemrěteho Jurja Šěraka:
Zhonich z wječornika zrudźacu powěsć, zo je Jurij Šěrak z Lejna zemrěł. Hakle před něšto njedźelemi sym z nim telefonował.
Před něhdźe štyrjomi lětami na wopyće w zapadźe widźach rjany wobraz z napisom, wopisowacy swójby a jich byće w němskej rěči. Wón so mi tak zalubi, zo chcych jón za Serbow w skrótšenej formje napodobnić, ale na wosomróžkatu desku jako znamjo wěčnosće, kaž su zwjetša zakładne murje kóždeje cyrkwje twarjene.
Sym tute wužadanje z Jurjom Šěrakom zhromadnje zeskutkownił jako wuznamny napis a k rozmyslowanju za swójbu a wězo tež za wopytowarjow. Kaž foto pokazuje, je so to namaj tež derje radźiło. Sym hižo dwoje jutry křižerjam, a to nowačkam, slěbornym a tež złotym jubilaram, w nocy po kemšach, kaž je to we Wotrowje z wašnjom, wot kantora wobraz z napisom darić dał, zo by so jim a jich swójbam na tute wašnje dźak za to bytostne zwuraznił.
Luby Jurjo, njezabudu twoje wosobinske dźěło na tutym wobrazku, z kotrymž móžu najwažniše słowa w serbšćinje – tež wopytowarjam, hdyž do domu zastupja – za rozmyslowanje darić.
Pisany swjedźeń w Slepom jako přinošk k Europskemu dnjej rěčow
.Serbšćina móže so z wjeselom, rozpalom a kreatiwitu nawuknyć. To wotbłyšćowaše so njedawno na rěčnym swjedźenju, kotryž wotmě so na Slepjanskim farskim dworje. Organizowali a wuhotowali su jón rěčnimotiwatorojo syće za serbsku rěč a regionalnu identitu (ZARI). „Swjedźeń zarjadowachu we wobłuku prěnich akciskich dnjow po cyłej Sakskej kołowokoło susodstwa a rěčow. To je naš přinošk za Europski dźeń rěčow“, podšmórny organizatorka Juliana Kaulfürstowa. Wona je sobudźěłaćerka Domowiny a wot 2023 motiwatorka za serbsku rěč w regionje Slepo a Wochozy.
Mjenje zwyšenja wotedawkow
Budyšin. Krajnoradny zarjad Budyšin je naćisk za etat 2025/26 změnił: Tak namjetuja wokrjesnemu sejmikej zwyšenje wotedawkow gmejnow na 34,5 proc. a nic kaž planowane na 35 proc. (2025) resp. 35,5 (2026). Dotalna sadźba je 33,5 proc. To staj krajny rada Udo Witschas a jeho zastupjer a zamołwity za financy Jörg Szewczyk zdźěliłoj. Přičina je wjac dochodow z dawkow hač su wočakowali.
Krosnowanje wuznamjenjene
Drježdźan. Sakske krosnowanje wuznamjenja so jako imaterielne kulturne herbstwo Unesco, zo bychu swoju tradiciju a specielne prawidła wobchowali a pěstowali. Oficialne wopismo přepodadźa wutoru we Wiesbadenje, po tym zo bu titul w měrcu wobzamknjeny. Tuta družina krosnowanja, bazuje na principje wólneho krosnowanja bjez kumštnych pomocnych srědkow, zo by so mjechki pěskowc Sakskeje Šwicy škitał.
Worklečanska šula nominowana
Wopačni policisća seniora zjebali
Slepo. Njeznaći skućićeljo su sobotu wječor w Slepom 90lětneho muža zjebali. Jako policisća so wudawajo běchu škodowaneho w běhu dnja wospjet zawołali a jemu zdźělili, zo přepytuja pad wobšudnistwa w jeho susodstwje a zo dyrbja w tutym zwisku tež jeho bydlenje přepytować. To sta so bórze po tym, jako přińdźe jedyn ze skućićelow jako zastojnik kriminalneje policije předrasćeny mužej „na wopyt“, zo by přepytowanje přewjedł a mjez druhim zwěsćił kelko hotowych pjenjez ma w bydlenju „składowanych“. Wobšudnik nadeńdźe dohromady něhdźe 20 000 do 30 000 eurow, kotrež w njewobkedźbowanym wokomiku pokradny a spěšnje bydlenje wopušći. Nětko je „prawa“ kriminalna policija přepytowanja zahajiła. Policija zjawnosć na to skedźbnja, zo nihdy přepytowanje nastupajo w bydlenju składowane zamóženstwa njepřewjeduje.
Kóžde lěto wotměwa so w městačku Ralswieku na kupje Rujanach lěćne dźiwadło pod titulom „Hrajny festiwal Störtebeckera“. W lětušich prózdninach sym tež zhromadnje ze swójbu předstajenje wopytał. Přirodne jewišćo při zaliwje baltiskeho morja je nas wobkuzłało. Dohromady 8 800 ludźi ma na trawersach městno. W inscenaciji skutkuja 150 hrajerjow, 30 koni kaž tež štyri łódźe sobu. Podawki wo historiskej wosobinje Klausa Störtebeckera su při Baltiskim a Sewjernym morju zakótwjene a so tam hižo z lěta 1993 poskićuja. Lětuše předstajenje hraje w lěće 1401 w měsće Hamburgu. Hłowna wosoba Klaus Störtebecker je pirat. Tón bydli we wjesce Marienhafen, w kotrejž je žiwjenje měrne a spokojne. Tam je tež přistaw za jeho łódź. Jeho žiwjenski kredo je: Bohatym brać a chudym dawać. Z tutym nastajenjom njeje wón runjewon přećel Hamburgskich bohačkow. Měšćanska rada chce worakawstwa zakónčić, nima pak prawu ideju. To ma Simon z Ütrechta genialny plan.
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (56).
Mnozy z nas popřewaja sej na kermušu rady raz škleńčku wina, piwa abo palenca. Tón abo tamny tež dwě, tři abo hišće wjace. Hdyž nazajtra z brunčatej heju wotućiš, potom wěš, zo bě to dźeń do toho přewjele alkohola. Tajku konstelaciju mjenujemy kocora, hižo dołho znaty fenomen. Wón wopřijima wšelake symptomy: na přikład hłowybolenje, mjakliwosć, lačnotu, mylenja koncentracije, bolosće w žołdku a w myškach, poćenje, depresiwnu naladu a powšitkownu chorowatosć. Hdys a hdys přez zahorjenje slinokóžki žołdka tež k bluwanju dóńdźe. Kocor wukonliwosć čłowjeka masiwnje wobmjezuje.
Sprjewje. Na wosebite dožiwjenje za cyłu swójbu přeprošuje přirodoškitna stacija wuchodna Hornja Łužica do hrodu w Sprjewjach a to njedźelu, 27. oktobra, wot 10 do 14 hodź. Pod hesłom „Přiroda je sylna – sy ty sylniši?“ chce mjez dźěćimi a młodźinu zahoritosć za přirodu budźić. Mjez druhim nawuknu, kak sej z přirodnych materialijow přirodny dešćowy škit natwarja, sami woheń zapala abo so bjeze šmóratka w lěsu orientuja. Dalše informacije dóstanjeće pod tel. čo. 035893 508571 abo z mejlku na .
Gmejnska rada we Worklecach
Worklecy. Wjesnjanosta gmejny Worklecy Clemens Poldrack přeprošuje wutrobnje na zhromadźiznu gmejnskeje rady, kotraž wotměje so jutře, 23. oktobra, w rjadowni čo. 10 šule „Michał Hórnik“ we Worklecach. Započatk zjawneho dźěla posedźenja je we 18.30 hodź.
Koncert w awli gymnazija
Swójbne mjena su přeco zaso zajimawe swědčenja rěče našich prjedownikow. W serbšćinje maja wone wosebitu hódnotu, dokelž pochadźeja z časa, z kotrehož hišće žane pisomne pomniki njewobsedźimy. Kak su naši prjedownicy před wjele lětstotkami myslili a so rěčnje zwuraznili, wo tym nam wone mjena znajmjeńša něšto přeradźeja.
Chcemy so zaso wěnować někotrym serbskim prócowarjam zańdźenosće, kotřiž maja lětsa kulojtu abo połkulojtu róčnicu narodnin abo posmjertnin, a so zamyslić do jich mjenow. Swójbne mjena nastachu často z mjenow powołanjow, kotrež běchu prěni nošerjo mjenow wukonjeli. Tak je to na přikład pola Šewčika, takrjec „małeho šewca“. Jakub Šewčik, rodźeny w Baćonju a farar mjez druhim w Chrósćicach, wěsty čas předsyda Domowiny, předewšěm pak awtor basnjow patriotiskeho charaktera, změje 6. septembra 150. róčnicu narodnin.
Korla Awgust Fiedler, znaty hudźbnik a sobuwuhotowar spěwanskich swjedźenjow, zemrě 16. meje 1917. Swójbne mjeno Fiedler pochadźa tohorunja z mjena powołanja; w tym padźe wšak je wone němskeho pochada, měnjeny je wězo „husler“.
