W Budyskim wokrjesu kroča po nowych pućach mediciniskeho zastaranja

Budyšin (CS/SN/MiP). Kóždy z nas znaje situaciju w lěkarskich praksach: Pak će tam přećeženja dla scyła njepřiwozmu, pak dóstanješ termin hakle za poł lěta. Po informaciji Zjednoćenstwa kasowych lěkarjow w Sakskej (KVS) je tuchwilu 400 městnow domjacych lěkarjow w swobodnym staće njewobsadźenych – wosebje we wjesnych kónčinach. Łužica je sobu najbóle potrjechena kónčina.

Zo bychu tutu situaciju polěpšili, su Hornjołužiske kliniki tzwr (OLK) ze sydłomaj w Budyšinje a Biskopicach lětsa spočatk januara nowy modelowy projekt zahajili­. W nim přepytuja nowe puće medicinisk­eho zastaranja we wjesnych kón­činach. Dohromady 225 000 eurow z fondsa simul + su zamołwići za to dóstali.