To a tamne (15.11.18)
Pokładźene całty je muž na awtodróze w Porynsko-Pfalcy njedaloko Koblenza na šofera druheho wosoboweho awta mjetał. 21lětny bě ze swojim awtom na awtodróze A 48 po puću, jako jeho druhe awto přesćahny a so krótko před nim zaso zarjadowa. Po wospjetnym pospyće přesćehnjenja sobujěducy druheho awta całty na njeho mjetaše a jeho z gestami ranješe. Wobě stronje na to k policiji jědźeštej. Mjetar całtow dyrbi nětko z chłostanskim jednanjom ličić.
Na konju ćeknyła je padušnica w delnjoporynskim Weselu. Do toho bě 22lětna we wobchodźe nawušne słuchatka pokradnyła, na čož so alarmowy system při durjach zaswěći. Žona šwikny so na konja a wotjěcha. Policistam, kotřiž ju z awtom přesćěhowachu, wona přez polo ćekny. Skónčnje móžachu młodu jěcharku w jednym z konjacych dworow namakać.
To a tamne (14.11.18)
W dwaceći centimetrow hłubokim betonje ze swojim awtom třacy wostał je 57lětny šofer w Stuttgarće. Zawčerawšim njebě wón twarnišćo při kolijach měšćanskeje železnicy spóznał, hdźež běchu twarscy dźěłaćerjo beton kidali. Na zbožo njebě twarska maćizna hišće wuschnyta, tak zo móžachu jězdźidło zaso z twarnišća wućahnyć. Beton móžachu samo tež hišće zhładkować.
Z črjódu kruwow so spřećelił je łós w Coswigu. Wšědnje tam ze swojimi dołhimi nohami płót wokoło pastwy přewinje. W nocy so potom zaso zhubi. Zadźerženje wulkeho zwěrjeća njemóže sej bur Hartmut Schröter wuswětlić, tuka pak na to, zo chce rólu howjada přewzać. Na swojej pastwje dźě so tuchwilu jenož kruwy pasu. Přichodnje maja skoćeća přećahnyć. Hač chce jim njewšědny hósć sćěhować, budźe tuž napjata naležnosć.
To a tamne (13.11.18)
Dosć ćežku rubiznu su sej paduši před twarskimi wikami w durinskim Schleizu wupytali. Woni pokradnychu minjeny štwórtk 135 kilogramow ćežki dekoraciski kamjeń, policija zdźěla. Jednaćelej wobchoda bě pjatk napadnyło, zo je kamjeń preč. Paduši pak njemějachu so lochko: Něhdźe 120 centimetrow wulke kamjenisko bě na betonje přilěpjene.
Do swinjaceho chlěwa padnyła je šoferka wosoboweho awta w Heidelbergu. Po informacijach policije bě 57lětna w křiwicy na mokrej dróze kontrolu zhubiła a do ratarskeho statoka zajěła. Tam zrazy do bywšeho sila, kiž bě na swinjacy chlěw přetwarjeny. Wona padny z awtom wjacore metry do hłubiny. Najebać to so žona jenož snadnje zrani. Hišće wjace zboža měješe šěsć swini w chlěwje. Žane z nich so njezrani. Policija komentowaše podawk ze słowami: Koče zbožo měła.
To a tamne (12.11.18)
Mylnje je belgiska woclownja kóždemu ze swojich 230 sobudźěłaćerjow tutón měsac 30 000 eurow přewjele přepokazała. Při tym jedna so wo wopak přepokazane premije, belgiske medije rozprawjeja. Firma Thy-Marcinelle w měsće Charleroi chcyše sej pjenjezy – dohromady sydom milionow eurow – hišće dźensa wróćo kazać. Wupłaćili běchu bonus tež dźěłaćerjam, kotřiž hewak runje 1 600 eurow měsačnje dóstawaja.
Swoje pjate narodniny su pjatniki w Münsterskej uniwersitnej klinice woswjećili. Pjeć holčkow Maria, Melissa, Josefina, Justina a Evelyn zetka so tam z ludźimi, kotřiž běchu při porodźe dnja 12. nowembra 2013 pódla. Chorobne sotry, hladarjo, sobudźěłaćerjo chorownje a wězo lěkar, kiž bě holčki swój čas wurězał. Porod pjatnikow je w Münsteru dotal jónkrótny podawk.
To a tamne (09.11.18)
Swoju wowku z awta wuzamknył je dźesać měsacow stary hólc w Mnichowje. Po wulěće do bayerskeje krajneje stolicy chcyše so wona z wnučkom zaso na dompuć podać. Hólčk sedźeše hižo připasany w swojim dźěćacym sydle – a měješe klučik awta z dalokoposłužowakom w ruce. Jako chcyše žona do jězdźidła zalězć, pak běchu durje zamknjene. Wohnjowi wobornicy dyrbjachu wokno awta rozbić. Po sporjedźenju wokna móžeštaj skónčnje wotjěć.
Mučnota bě za paducha w badensko-württembergskim Crailshaimje zahubna. 20lětny bě wčera hižo nabóčny fašk awta wurumował, jako jeho spar přemó. Rano 28lětnej žonje napadny, zo awto jeje sotry hinak steji hač hewak, a dźěše pohladać. Při tym wuhlada cuzeho, kiž w awće sedźo spaše. Policija muža, kiž steješe pod wliwom alkohola a drogow, na to wubudźi a zaja.
To a tamne (08.11.18)
Rubježnik je wobchod napojow we Werderu pola Podstupima nadpadnył – chcyše pak jenož dźěl pjenjez měć. Wón žadaše sej wot sobudźěłaćerja pjenjezy z kasy, wohrožejo jeho z pistolu. Jako chcyše muž při kasy něhdźe 50lětnemu skućićelej pjenjezy přepodać, tón jemu znapřećiwi, zo ani telko njetrjeba, a so z dźělom pjenjez zminy. Najebać jeho skromnosć policija nětko za rubježnikom pyta.
Přewjele dowěry do nawigaciskeho nastroja móže strašne być: Šofer nakładneho awta je w jednym z narodnych parkow Awstriskeje na wuskim lěsnym pućiku tčacy wostał a by ze swojim Lkw-jom bjezmała 30 metrow do hłubiny padnył. Při wróćostorkanju šmórny so wón skały a wisaše ze zadnim dźělom 38 tonow ćežkeho woza hižo nad hłubinu. Pućik wužiwa hewak jenož hajnik. Policiji muž rjekny, zo „nawijej“ zasadnje dowěrja.
To a tamne (07.11.18)
Pokiwy za wobchadźenje z němskimi turistami je nižozemski turistiski zwjazk w pomjeznej kónčinje Drenthe wudał. Tak poručeja, Němcow tež němsce narěčeć. Nižozemski akcent wopytowarjo ze susodneho kraja rady słyša. Dalši pokiw: Němcy njelubuja překwapjenja. Woni chcedźa do skazaneje stwy zaćahnyć a do žaneje druheje. Rady maja němscy hosćo informacije wo stawiznach kaž tež wo kraju a ludźoch. Wulku wažnosć kładu woni na wěstotu, dowěru a profesionalnosć, w směrnicach dale rěka.
Pozdatnje wotrězanej porstaj je 15lětny w durinskim Sonnebergu w parkowanskim domje namakał a policiju informował. Jako zastojnicy přijědźechu, njemóžachu žanej tajkej porstaj namakać, město toho pak wotkusnjenej želejowej bananje. Tej bě młodźenc mylnje za wotrězanej porstaj měł.
To a tamne (06.11.18)
Zwada wo spěrawych wotpadkach je w badensko-württembergskim Murgu zasadźenje policije zawiniła. Swědk bě wobkedźbował, kak muž spěrawe wotpadki do kontejnera za metalowy šrot mjeta. Jako tón na kritiku njereagowaše a prosće wotjědźe, hněwny swědk z připowěšakom wotpadki mužej dowjeze a je tam přez kerk na jeho ležownosć zmjeta, při čimž boiler muža na hłowje trjechi a zrani. Tón sej to lubić njeda a wěcy wróćo mjetaše. Hakle policija zwadu skónči.
Lětadło prezidenta je w Běłoruskej na předań. Tupolew-154M prezidenta Aleksandera Lukašenka móžeš za 1,7 milionow eurow kupić. Mašina ruskeje produkcije z lěta 1995 słuša běłoruskemu lětanskemu předewzaću Belavia. Hinak hač tamne modele Typolew smě Tu-154M europske lětanišća wužiwać, dokelž poměrnje mjelčo leći.
To a tamne (05.11.18)
Jónu wokoło Wulkeje Britaniskeje płuwał je 33lětny Ross Edgley. Wón trjebaše za 2 900 kilometrow dołhu čaru 157 dnjow. Jako so wón wčera pobrjohej w juhowuchodnym Margate bližeše, přewodźeše jeho witanski komitej 400 płuwarjow. Tam bě so rekordne „pućowanje“ 1. junija zahajiło. Poprawom chcyše płuwar čaru za sto dnjow zmištrować. Wulke žołmy, zyma a kwale pak tomu zadźěwachu. Edgley płuwaše wšědnje dwanaće hodźin a přenocowaše na čołmje.
Mjeztym 3. swěcowy spektakl w Podstupimje je sej kónc tydźenja na wšě 100 000 ludźi wobhladało. Wot pjatka bě tam něhdźe 30 objektow na wosebite a zdźěla spektakularne wašnje wobswětlenych. Ludźo ćahachu ze swěćacymi powětrowymi balonami po měsće. Na wjacorych městnach wustupowachu hudźbne skupiny a pokazachu wohnjowu show.
To a tamne (02.11.18)
Hrózbu šěrjaceho klawna přebił je swójbny nan na halloween w Lossatalu w Lipšćanskim wokrjesu. 19lětny klawn bě wjacore dźěći w swojim kostimje a z motyku w ruce nastróžił. Mać dźěći sej na to žadaše, zo měł so klawn pola nich zamołwić. Nan jeho samo z motyku přebi a nuzowaše, na kolenach klečo dźěći wo wodaće prosyć. 19lětny je 34lětneho nana mjeztym wobskoržił, po tym zo bě so w chorowni lěkować dał.
Alkoholowych problemow pilotow dla je japanski minister za wobchad prawidła w branši přiwótřił. Minjeny čas bě stajnje zaso k njeluboznym podawkam dochadźało. Hakle njedawno zaja britiska policija w Londonje 42lětneho japanskeho pilota, kiž bě w nocy do wotlěta do Tokija dwě bleši wina a dwaj litraj piwa wupił. Tež personal w mašinje su wospjet lepili, jako alkohol pijachu.
