To a tamne (07.10.24)
Njewšědneho paducha je sudnistwo w Šotiskej k jastwu 22 měsacow zasudźiło. Muž bě so do dowoloweje chěžki zadobył a tam dlěši čas bydlił, jako by tam doma był. Wón wužiwaše kupjel, bjerješe sej žiwidła z chłódźaka a płokaše drasty w płokanskej mašinje. Awtomatiska kamera wobsedźerja domu informowaše. Přichodny syn wopiteho paducha na to namołwješe, chěžu wopušćić. Policija muža zaja. Před sudnistwom paduch na to pokaza, zo bě bjezdomny a we wuskosćach.
Po wšej Němskej jónkrótny muzej pinguinow w Cuxhavenje nad Sewjernym morjom swoju zběrku předawa. Mějićelej Birgit Berends a Stefan Kirchhoff zběrataj 30 lět pinguiny, wot lěta 2009 matej muzej, kiž njese so z darow. Ličba pinguinow je na 26 000 rozrostła. Hišće hač do 9. nowembra maja zajimcy składnosć, sej pinguina we wupředani kupić.
To a tamne (04.10.24)
Z kapsnym nožom, z kotrymž sej hewak jabłuko přihotuje, je chirurg w jendźelskim Brightonje operował. Lěkar bě hrudźno pacientki z nožom wočinił, sćelak BBC tele dny rozprawješe. Chorownja zwurazni, zo bě to nuzowy pad, dokelž njeje chirurg w chwatku sterilny skalpel namakał. Dale zamołwići měnja, zo njeje tajke jednanje lěkarja z wašnjom. Pacientka pak je operaciju derje přetrała. Policija pad pak přiwšěm přepytuje, dokelž je tam prawdźepodobnje wjele njedostatkow w zwisku z lěkowanjom.
Dokelž bě šofer busa jězdźidło strašnje wodźił a samo do wodźaceje planki jěł, su sobujěducy ze strachom nuzowe čisło narunanskeho busoweho wobchada zazwonili. Přichwatani policisća su šofera potom w Dessau kontrolowali. Kaž so wukopa, měješe 43lětny 1,6 promilow alkohola w kreji.
To a tamne (02.10.24)
Pjenjezy na awtodróze A 1 rozdźělił je wětřik njedaloko Wuppertala. 50lětny hosćencar bě po přestawce swoju móšeń na třěše awta zabył. Na to běchu so papjerjane pjenjezy kilometer daloko po dróze rozdźělili, cyłkownje něhdźe 2 000 eurow, policija zdźěla. Šoferojo informowachu policiju wo lětacych pjenjezach. Hrožeše strach, zo někotři zastanu a za pjenjezami běhaja. Policija awtodróhu zawrě a pjenjezy zezběra.
Na wšěch sydom milionow eurow drje zrumowanje sypnjeneho Carolinoweho mosta w Drježdźanach płaći. Z tuteje sumy město w prěnim „hrubym trochowanju“ wuchadźa. Po wulkej wodźe Łobja chcedźa móst přichodnu póndźelu dale torhać a rumować. Beton mosta móža hišće trjebać. Łódźnistwo pak wostanje dlěši čas blokowane, město zdźěla.
To a tamne (01.10.24)
Wopačny muzej za padustwo wupytał je sej 35lětny muž w Diusburgu. Muž bě njedźelu rano wokno muzeja rozbił a so do njeho zadobył. Při tym zaskoči alarmowa připrawa. Policija na to twarjenje wobstupi a paducha zaja. W nachribjetniku podhladneho namakachu zastojnicy grat za padustwo, ale žanu rubiznu. To wšak by tež wobćežne było: Muzej je specializowany na wulke a ćežke skulptury. Paduch drje měrješe so na muzejowu kasu. Ta pak bě zrumowana.
W pjanosći z trašawku wokoło so třěleli su třo mužojo w Berlinje. Na to přijědźe specialny komando policije do štwórće Prenzlauskeje hory, po tym zo běchu wobydlerjow wobrónjenych na balkonje wuhladali. Zastojnicy so namócnje do bydlenja zadobychu a muži w starobje 63, 34 a 19 lět zajachu. W bydlenju namakachu pistole, municiju a nože.
To a tamne (30.09.24)
Při pytanju hribow w lěsu pola Regensburga je 64lětneho muža dźiwje swinjo nadběhało. Kaž muž nowinje „Donaukurier“ rozprawja, měješe wón strach wo swoje žiwjenje a je 20 mjeńšinow ze skoćećom wojował, doniž njeje skónčnje ćeknyło. Muž a dźiwje swinjo staj so při tym zraniłoj. Jako nadpadnjeny k swojemu awtu chwataše, zetka dalšeho muža, kotrehož je skoćo tohorunja atakěrowało. Tón pak móžeše so z kijom wobarać. Wobaj mužej stej na to zhromadnje do chorownje jěłoj. Policija a lěsnicy za dźiwim swinjećom pytachu a je naposledk zatřělichu.
Turistaj z Vietnama staj tele dny spytałoj z sportowymi črijemi a ćeńkimaj cholowomaj na 4 478 metrow wulku horu Matterhorn zalězć, štož so wězo zymy, sněha a loda dla njeporadźi. Pomocnicy dyrbjachu jeju na 3 500 metrach wuchować.
To a tamne (27.09.24)
Mobilne telefony w jastwje předawał je 36lětny justicny zastojnik w Berlinskim jastwje Tegel. Policisća su mjeztym bydlenje zastojnika kaž tež toho běrow w jastwje přepytowali. 36lětny bě policiji napadnył, po tym zo běchu pola jateho namakany handy wuhódnoćili. Mjeztym je dopokazane, zo je 36lětny prawidłownje mobilne telefony a druhe wěcy do jastwa nosył a tam jatym předawał.
Po 47 lětach jastwa je japanske sudnistwo muža wuwinowało, kotrehož běchu na zakładźe wot policije falšowanych dopokazow trójneho mordarstwa dla k smjerći zasudźili. Je to jedyn z najhóršich padow justicnych stawiznow kraja. 47 lět trajaca izolacija w smjertnej celi je dźensa 88lětneho ćělnje a dušinje zlemiła, toho 91lětna sotra rozprawja. Muža běchu 1966 zasudźili a 2014 pušćili. Hakle nětko bu dospołnje rehabilitowany.
To a tamne (26.09.24)
Nimale štyri kilogramy kokaina pokradnył je policist w Jendźelskej z aserwatoweje komory policije, a je drogi z pomocu dealera na dróze předawał. Zastojnik so přeradźi, jako titku z wopojnym jědom před šulu dźowki zhubi. Policista su mjeztym pušćili. Namakana titka wjedźeše zastojnikow do běrowa policista. W toho pisanskim blidźe ležachu dalše titki z kokainom. Na to kokain w składźe wažachu a zwěsćichu, zo retomas sćazaneho wopojneho jěda pobrachuje.
Tójšto stresa ma Berlinska policija připowědźeneho wopyta prezidenta USA Joewa Bidena dla. Planowanja běža hladajo na najwyši schodźenk wohroženja „z najwjetšim wotmachom“, policija zdźěla. Biden chce 10. oktobra krótko do zakónčenja zastojnstwa tři dny do Berlina přijěć. Dny do toho su wjacore demonstracije na dobro Israela a Palestiny planowane.
To a tamne (25.09.24)
Tři měsacy do silwestra je policija prěnje ilegalne praskotaki na pólskej mjezy sćazała. Zastojnicy běchu pólski transporter zadźerželi. Mužej w starobje 30 a 32 lět běštaj po puću do Magdeburga. Při kontroli awta namakachu policisća kartony ze 2 500 tyzami praskotakow z Chiny. Zamołwići trochuja mnóstwo rozbuchliny na znajmjeńša 90 kilogramow. Sćazanu pyrotechniku nětko zniča.
Rekord wopytowarjow wunjesła je lětuša parada daklow w Regensburgu minjenu njedźelu. Cyłkownje 1 175 daklow ze swojimi wobsedźerjemi po měsće ćehnješe. Dźesaćitysacy ludźi 1,8 kilometrow dołhi přećah hač na naměsto před katedralu přewodźachu. Wočakowali běchu 20 000 wopytowarjow. Přišło pak bě telko ludźi, zo njemóžeše jich nichtó zličić, policija zdźěli. Zarjadowarjo pokazuja wosebje na kulturny wuznam dakla.
To a tamne (24.09.24)
Šup je w Ratzeburgu w Schleswigsko-Holsteinskej njewšědne zasadźenje policije zawinił. Zwěrjo bě so njedźelu w spanskej stwě zabarikaděrowało. Do toho bě šup kamor wurumował a z drastami durje blokował. Dokelž njemóžachu wobydlerjo wjace do spanskeje stwy a spodźiwnych zwukow dla wołachu policiju. Wo wućah šupa postara so hajnik. Kak je zwěrjo do domu w Lauenburgskim wokrjesu přišło, njewědźa.
Na wšěch 95 kilogramow kokaina w bananowych kistach namakali su sobudźěłaćerjo wobchoda žiwidłow w Mönchengladbachu w Porynskej. Policisća z toho wuchadźeja, zo su kisty z drogami w hódnoće sydom milionow eurow mylnje do wobchoda dowjezli. Banany z Južneje Ameriki běchu w Antwerpenskim přistawje dojěli. Wot tam běchu je drje mylnje do wobchoda dowjezli.
To a tamne (23.09.24)
Hesło „Hdyž wěra pod kožu dźe“ su někotři po Božej słužbje Osnabrückskeho biskopstwa po słowje brali a sej hišće w cyrkwi křesćanski tattoo kałać dali. Z njewšědnej akciju chcyše biskopstwo wćipnosć ludźi na wěru a katolsku cyrkej zbudźić. Bonifatiusowy skutk katolikow Němskeje je projekt podpěrował.
Myška w pasažěrskim lětadle je pilota nuzowała, so zawróćić a w Kopenhagenje přizemić. Mały hrymzak bě ze zapakowaneje jědźe wuskočił, jako pasažěrow posłužowachu. Na to pilot lětadła předewzaća SAS ludźi informowaše, zo wobhladuja myšku jako wěstotne riziko a zo poleća na přichodne lětanišćo. Tajke postupowanje je pječa normalne. Mašina bě po puću z norwegskeje stolicy Osla do turistiskeho centruma Malaga na juhu Španiskeje. Turisća dolećachu dobrej dwě hodźinje pozdźišo do Španiskeje.
