Dwanaće ručnych granatow su zastojnicy Berlinskeje policije póndźelu z wotnajateho składu wotnjesć dyrbjeli. Po informacijach dźenika Bild běchu je sobudźěłaćerjo składźišća našli. Dotal njeje znate, štó bě granaty tam zawostajił a čehodla. Pozdźišo su je na wosebitym arealu za rozbuchadła znješkódnili.

Bywša kanclerka Angela Merkel (CDU) je prawidłownje na Instagramje „po puću“. Tole wona wčera w rozmołwje na wikach Digital X w Kölnje přizna. Sama wšak ak­tiwnje zdźělenki njewozjewja. Dokelž pak je wćipna, přeslědźi tam hdys a hdys při­noški a komentary, kotrež ju wšědny dźeń zaběraja, wona wu-zběhny. „Zo pak dóstawam wabjenje za črije za seniorow, kiž maja wosebitu póduš za hładke dróhi, dokelž běch so raz z temu wobsuwanja za­běrała, to mje iritěruje“, Merkel přispomni.

Zawod Leuna Polyamid tzwr blisko města Halle ma so po wšěm zdaću zawrěć. „Pytanje za nowym inwestorom za insolwentne předewzaće je najprjedy raz zwrěšćiło“, jednaćel Martin Naundorf wčera w interviewje z nowinu Mitteldeutsche Zeitung zdźěli. Něhdźe 400 sobudźěłaćerjow w saksko-anhaltskim zawodźe starosći so wo swoje dźěłowe městno. Hišće hač do kónca septembra z produkciju kumštnych maćiznow a hnojiwow pokročuja, zo bychu aktualne nadawki wotdźěłali. Po tym připrawy swoje dźěło krok po kroku zakónča, jednaćel připowědźi.

Dwě- a třilětne dźěćo nadeńdźechu w swojich pjelškach a jenož z přikrywu na ramjenjomaj sobotu rano na dwórnišću w porynsko-pfalcowskim měsće Rülzheim. Mjeztym zo staršej spaštaj, twochnyštej z domu, dokelž chcyštaj sej w předawanskej pasaži dwórnišća nowe črije kupić. Zastojnicy policije móžachu wobeju bórze zaso čiłej a strowej staršimaj přepodać.

„Festiwalej kumštneje inteligency“ zadźěwać chce profesor za matematiku na grjekskej uniwersiće w Patrasu, třećim najwjetšim měsće w Grjekskej. Tohodla maja jemu studenća z nawočemi, kotřiž so na pruwowanjach wobdźěla, z wopismom lěkarja dopokazać, zo je woprawdźe trjebaja. Dźeń a husćišo wón dožiwja, zo wužiwaja studenća smartne KI-nawoči, z kotrymiž spytaja w pruwowanju wobšudźić. To wuzběhny profesor na online-platformje města.

Falowaca nuznikowa papjera na nuznikach ćahow čěskeje statneje železnicy bě jedna z přičinow, zo je šef předewzaća Česke­ drahy (CD) Michal Krapinec swoje zastojnstwo złožił. Naposledk běše jeho toho­dla tež prezident čěskeho par­la­menta Tomio Okamura wótrje kritizował. Krapineca naslěduje Lenka Hamplova, kotraž je prěnja žona na čole předewzaća CD.

Politikar CDU Jens Spahn postu­puje prawnisce přećiwo wideju, kotryž je rapper Ski Aggu w socialnych syćach wo­­zje­wił. Wuměłc spěwa wo party z dro­gami a seksom, na kotrejž je Jensa Spahna ze swojim mužom zetkał. Wón na to skedźbnja, zo je tekst spěwa ryzy satiriski.