To a tamne (29.01.26)
Skućićelow, kotřiž běchu w Gelsenkirchenje před štyrjomi tydźenjemi wotnožku lutowarnje wurubili a při tym wjacore miliony eurow spakosćili, policija dale pyta. Paduši běchu z hoberskim točenskim nastrojom betonowu murju přerazyli a 3 100 kašćikow z hódnotnym wobsydstwom kupcow wurumowali. Na hodźiny trajacej harje točenja dla njeje so nichtó postorkował. Wěstotne systemy banki njeběchu kónc tydźenja pječa aktiwizowane.
Bruce Springsteen, legenda rockoweje hudźby, je wobydlerjam ameriskeho města Minneapolis protestny spěw wěnował, w kotrymž wón rabiatne akcije zarjada za zapućowanje ICE po přikazu prezidenta USA Donalda Trumpa šwika. W spěwje „Streets of Minneapolis“ kritizuje Springsteen priwatnu armeju krala Trumpa, kiž prawa ludźi tepta.
To a tamne (28.01.26)
Wótriše mjezy alkohola za kolesowarjow, zniženje wudawkow za jězbnu dowolnosć a razniše chłostanje za wužiwanje mobilnych telefonow za wodźidłom – wo tutych temach diskutuja přichodne dny wobchadni sudnicy na zeńdźenju w Goslaru. Tři dny trajace wuradźowanje fachowcow je najwažniše zetkanje wobchadnych fachowcow, hdźež nadźěłaja doporučenja za zakonjedawarja.
Zakaz wužiwanja socialnych medijow za dźěći a młodostnych pod 15 lětami je francoska narodna zhromadźizna nastorčiła. Zapósłancy su wotpowědnemu naćiskej w Parisu přihłosowali. Nowy zakoń předwidźi, małolětnym pod 15 lětami zakazać, wužiwać „internetnu syć, kotruž internetna platforma z onlinowej słužbu poskićuje“. Dokładny tekst chcedźa w senaće, w druhej komorje parlamenta, wuformulować.
To a tamne (27.01.26)
Słónčne nawoči, kotrež je francoski prezident Emmanuel Macron na swětowym hospodarskim forumje w Davosu wužiwał, su w Francoskej mjeztym jara požadane. Zhotowjer luksusowych nawočow njemóže so naprašowanjow dowobarać. Internetna strona firmy „Henry Jullien“ bě nachwilnje přećežena. Tuchwilu produkuja sto modelow wob lěto. Nětko chcedźa produkciju na tysac eksemplarow rozšěrić. Nawoči płaća tuchwilu 659 eurow.
Milion eurow jako myto lubi zwjazkowy kriminalny zarjad tomu, kotryž da rozsudny pokiw za zajeće skućićelow, kotřiž běchu 3. januara 2026 na juhu Berlina wjacore milinowody namócnje wobškodźili. Po tym bě 45 000 domjacnosćow wjacore dny w krutej zymje bjez miliny a tepjenja. Přepytowanja policije běchu dotal bjez wuspěcha.
To a tamne (26.01.26)
Krosnowar po fasadach wysokodomow Alex Honnold je sej dalši són spjelnił. 40lětny zalěze w běhu połdra hodźiny bjez kóždeje techniskeje pomocy na 508 metrow wysoki Taipeh 101 w stolicy Taiwana. Akciju su na platformje Netflix dokumentowali a live w interneće pokazali. Tole je raznu kritiku zbudźiło. Honnold bě dospołnje přemóženy a zbožowny, po tym zo bě wjeršk mróčeleškrabaka docpěł. Tam sčini najprjedy raz selfie.
Za krućišu mjezu alkohola pola kolesowarjow wupraja so jasna wjetšina ludźi w Němskej. Tole je wuslědk reprezentatiwneho woprašowanja instituta Forsa w nadawku Němskeje wobchadneje wěstotneje rady. Na wšěch 82 procentow je za mjezu 0,5 promilow a mjenje, nimale třećina je za dospołny zakaz alkohola pola kolesowarjow. Tuchwilu smědźa kolesowarjo hač do 1,6 promilow měć.
To a tamne (23.01.26)
Z wulkej módrjeńcu na ruce napadnył je prezident USA Donald Trump na swětowym hospodarskim forumje w šwicarskim Davosu. Na to narěčany wón rjekny, zo je so wo blido storčił. 79lětny při tym tež rjekny, zo bjerje Aspirin. To drje jeho wutrobje tyje, módrjeńcam pak polěkuje. Hematomy pječa tež nastanu, hdyž dyrbi Trump tójšto ludźom ruku dawać.
Na hoberske zymske njewjedro kónc tydźenja ze sněhom, lodom a wějeńcami hotuja so miliony Američanow w južnych zwjazkowych statach, na srjedźnym zapadźe a w milionowej metropoli New Yorku. Tež w stolicy USA Washingtonje liča z chaotiskimi poměrami. Hač do njedźele wječora docpěje fronta zymskeho njewjedra wuchodny pobrjóh. Ludźo su namołwjeni so na to přihotować, zo wěsty čas milinu njezměja a zo njemóža swoje domy nachwilnje wopušćić.
To a tamne (22.01.26)
Njewočakowano zahe jako swědk wustupował je britiski princ Harry w ciwilnej skóržbje přećiwo bulwarnej nowinje Daily Mail. Harry a druzy prominentni žurnalistam nakładnistwa wumjetuja, zo su wjele lět ilegalne formy rešerše nałožowali, zo bychu informacije z priwatneho žiwjenja jeho swójby zběrali a tak k nowym napismam přišli. Pječa su priwatnych agentow skazali, telefonaty swójby wotposkali a spytali, w domje Harryja techniku k wobčušlenju zatwarić. Nowina wumjetowanja wotpokazuje.
Najstarše wuměłstwo pračłowjekow w prózdnjency namakali su w Indonesskeje. Fachowcy trochuja, zo ja fragment wotćišća ruki 14 króć dźesać centimetrow znajmjeńša 67 800 lět stary. Šablony ruki su sobu najstarše wuměłske formy. Při tym su ludźo swój čas ruku na skału połožili a ju z barbu popryskali.
To a tamne (21.01.26)
Globus za 600 eurow je sej čěski ministerski prezident Andrej Babiš kupił – zo by dokładnje wědźał, hdźe Grönlandska leži. „Jemu pobrachuja zakładne šulske znajomosće“, jeho ludźo w interneće wusměšuja. Babiš argumentuje, zo wšak skutkuje arktiska kupa na kartach wjetša hač wona je. Hakle na globusu widźiš woprawdźity poměr mjez Grönlandskej a USA abo Europu.
Termometer do horceje pjecy tyknył je sydomlětny hólc w bayerskim Schwandorfje, zo by mać wo swojej zymicy přeswědčił. Prjedy hač móžeše „argument“ wućahnyć, termometer w 200 stopnjow horcych kachlach rozbuchny. Nimo wohnjoweje wobory tež policija přijědźe. Při detonaciji njeje so nichtó zranił. Jědojteho žiweho slěbra dla pak so kachle hižo dlěje za přihotowanje jědźow njehodźa. Swójba dyrbi sej nowe kupić.
To a tamne (20.01.26)
To a tamne (19.01.26)
W zahrodach su šlinki často najwjetši horor zahrodkarjow, w Madridźe je katolski duchowny nětko eksemplar žohnował. Zwěrjo bě w marmeladowej škleńcy, jako jemu měšnik něšto swjećeneje wody na ćěło kapaše. Kóžde lěto 17. januara wšě móžne zwěrjata žohnuja. Tón dźeń swjeća katolscy wěriwi mjenujcy wopomnjenski dźeń patrona zwěrjatow, swj. Antoniusa.
Němska hotuje so na póstnicy. W baworskej stolicy Mnichowje poskićuja póstnisku wutoru samo kulinarisku wosebitosć: běłu kołbasu w pampuchowym ćěsće. Wjacore hosćency w nutřkownym měsće chcedźa tutu delikatesu předawać. Mějićel hosćenca Augustiner Stammhaus Thomas Vollmer bě ideju za kołwrótnu kombinaciju zrodźił. Do pječwa tež dwě družinje žonopa zapřija. Z tym chcedźa kulinariske dožiwjenje skulojćić.
To a tamne (16.01.26)
Přećiwo gripje měli so póstnicarjo do wjerška lětušeje sezony šćěpić dać. Tole doporuča Zwjazk apotekarjow Němskeje. Hižo nětko někotre šćěpiwa wjace k dispoziciji njesteja. Wosebje serum za ludźi nad 60 lětami lědma hišće dawa. Někotre lěkarnje šćěpiwo tuchwilu w Italskej kupuja, zo móhli pacientow zastarać. Předewšěm ludźo, kiž hižo wšelke chorosće maja, wšitcy nad 60 a samodruhe měli so šćěpić dać.
Do wjetšeje jastwoweje cele přepołožili su bywšeho brazilskeho prezidenta Jaira Bolsonara. Najwyše sudnistwo kraja je tomu přihłosowało, dokelž je so strowota 70lětneho minjeny čas pohubjeńšiła. Bolsonaro smě nětko wulku celu z kuchnju a balkonom wužiwać, kotraž je poprawom za štyrjoch jatych myslena. Bywši prezident sedźi wot nowembra 2025 planowaneho puča dla w jastwje.
