To a tamne (06.09.19)
Honač Maurice w Francoskej smě dale spěwać. Skóržbu přećiwo jeho wobsedźerce je krajne sudnistwo w Rocheforće wčera wotpokazało. Nimo toho ma jej skóržbnik 1 000 eurow wotškódnjenja płaćić. Porik, kotryž ma na kupje Île d’Oléron dowolowy domčk, bě so spěwaceho honača dla njesměrnje hóršił, dokelž bě to po zdaću přewótře. Wobsedźerka pak měni, zo maja dowolnicy zwuki wjesnych kónčin znjesć.
Je to Bože znamjo?, praša so muž, kotremuž je 250 kilogramow ćežki dźěl zornowcoweje biblije nohu złamał. Skulptura, wustajena tuchwilu we Wasserburgu nad Bodamskim jězorom, hodźi so na štyrjoch městnach wočinić. 43lětny zajimc to činješe, biblija padny jemu na nohu a złama jemu podkoleno.
To a tamne (05.09.19)
Bayerski komunalny politikar AfD ma sej w interneće chětro wusměšowace komentary lubić dać, dokelž je wuslědki populistiskeje strony krajneju sejmow Sakskeje a Braniborskeje aděrował. René Jentzsch z frankskeho Höchstadta bě twjerdźił, zo je AfD w Sakskej a Braniborskej z 51 procentami hłosow najlěpje wotrěznyła. Kaž Jentzsch mjeztym zdźěli, bě sej jeno žort dowolił. Reakcije ludźi pak běchu wšo druhe hač žortne.
Z wopačnym urinom spyta wodźer awta policiju wobšudźić. Ta bě jeho přespěšneho jědźenja dla w Lünenje pola Dortmunda lepiła a chcyše šofera na drogi testować. 23lětny pak wobsta na tesće urina. Za to měješe titku z „čistym urinom“ spřihotowanu, kotryž je do nopaška pjelnił, njemóžeše pak policiju za nós wodźić.
To a tamne (04.09.19)
Gumijowa atrapa hłowy krokodila drje přińdźe bórze do měšćanskeho muzeja badensko-württembergskeho Kirchheima unter Teck. Atrapa symbolizuje dny trajacy wopačny alarm srjedź junija. Tehdy je město wjacore jězory we wokolinje zawrěło, po tym zo běchu ludźo twjerdźili, zo su krokodile we wodźe. Tež jako so jedyn tajki jako atrapa wukopa, ludźo dale wo nich rěčachu. Gumijowy krokodil je tuž jako „dźěl měšćanskich stawiznow“ wažny za muzej města.
Noweho sobuwobydlerja na swojim dźěłowym městnje ma wot najnowšeho britiski premierminister Boris Johnson. Na Downing Street čisło 10 w Londonje bydli wotnětka młody Jack-Russell-terrier. Johnson bě 15 tydźenjow stareho psa ze swojej přećelku Carrie Symonds ze zwěrjatownje přiwzał. Pos ma wšak so nětko z kocorom Larryjom jako dawnym wobydlerjom Downing Street 10 aranžować.
To a tamne (03.09.19)
Japanscy turisća su w Europje najwoblubowaniši dowolnicy. To je wuslědk naprašowanja slědźenskeho instituta YouGov mjez nimale 30 000 ludźimi w 26 krajach Europy. Wšudźe mějachu skromni a zdwórliwi Japanjenjo najlěpše wuslědki, w Finskej samo 26 procentow. Porno tomu njejsu Němcy we wukraju tak rady widźani. W Španiskej runje šěsć procentow wo nich rodźi. Najnjewoblubowaniši su Rusojo a Britojo.
Chětro smjerdźaty nadawk spjelnić mějachu policisća na awtodróhowym parkowanišću njedaloko Aachena. Z małotransportera dyrbjachu 151 kilogramow skaženeje ryby zrumować. Hižo při kontroli awta bě zastojnikam grawoćiwy smjerd dych wotrazył. 61lětny šofer bě rybu njechłódźenu z Brüssela přiwjezł, zo by ju w Němskej předawał. Jemu hrozy nětko bolostna pokuta.
To a tamne (02.09.19)
Hnydom prěnju šulsku hodźinu w powětře je awstralski lětanski šuler Max Sylvester ze swojej małej Cessnu wěsće přizemił, ale z nuzy, dokelž bě wučer w mašinje do womory padnył. Z pomocu lotsy so 30lětnemu šulerjej skónčnje poradźi, na wulkolětanišću zapadoawstralskeje metropole Perth přizemić. Wučerja dowjezechu do chorownje. W protokolu škričkoweje rozmołwy rěkaše na prašenja towera, hač móže šuler z lětadłom wobchadźeć: „To je moja prěnja hodźina.“
Sowu z kamina wuswobodźili su wobornicy we wuchodofriziskim Großefehnje. Ptak bě so prawdźepodobnje přez wuheń do kamina sunył a sedźeše za škleńčanymi durčkami kamina. Po krótkim času móžachu wohnjowi wobornicy sowu wuswobodźić, kotraž wosta na zbožo njezranjena. Wobydlerjo běchu ju sobotu popołdnju wuhladali.
To a tamne (30.08.19)
Přepytowanja wobchadneho njezboža, po kotrymž bě zawinowar ćeknył, wjedźechu policiju k 15lětnemu młodostnemu. Tón bě klučiki swójbneho awta wzał, zo by sej z přećelom wulećał. Při wróćostorkanju zrazy wón z tajkim wotmachom do druheho awta, zo zadnja storkawa z čisłowej tafličku wotpadny. 15lětny na to z awtom ćekny a staji je zaso do garaže. Krótko po tym zo běchu zastojnicy wobsedźerja tamneho woza zazwonili, přińdźe tón zhromadnje ze synom k městnu njezboža. Nastata škoda wučinja 6 000 eurow.
Kuriozneho podawka na swětowych mišterstwach wjesłowarjow dla dyrbjachu wubědźowanje w Awstriskej wospjetować. Po zražce pólskeje dwójki z čołmom sudnikow w štwórćfinalu na pódlanskej rěce Dunaja so swětowy zwjazk rozsudźi, wurisanje hišće raz přewjesć. Při hawariji je so wjesło pólskeho čołma złamało.
To a tamne (29.08.19)
Njewšědne zasadźenje za wohnjowych wobornikow w Braunschweigu: Dźěd bě z wnučku „policiju“ hrał a jej z wjeselom ručne puta přičinił. Wšako tajke hišće z časa pola policije wobsedźeše. Skónčnje pak njemóžeše železne puta wočinić, dokelž njehodźeše so klučik wjace wjerćeć. Tak pytachu dźěd, wnučka a jeje mać pomoc pola wohnjoweje wobory, kotraž holcu z klěšćemi wuswobodźi. Jako dźak za swoju zmužitosć smědźeše sej wnučka jězdźidłowu halu wobhladać.
Něhdźe 22 000 ludźi wobdźěli so wčera we wuchodošpaniskim Buñolu na tradicionalnej bitwje „La Tomatina“. Kaž přeco poslednju srjedu w awgusće je něhdźe 9 000 wobydlerjow Buñola zhromadnje z hosćimi tomaty na so mjetało. Po informacijach zarjadowarja bě to 150 tonow, 5 000 kilogramow wjace hač loni. Po Guinnessowej knize rekordow je to najwjetša žiwidłowa bitwa swěta.
To a tamne (28.08.19)
Wuraz „Malle“ za španisku dowolowu kupu Mallorca wužiwać móže so z drohej naležnosću stać. To dyrbjachu tež zamołwići internetneho pućowanskeho předewzaća „Reisetiger“ nazhonić. Předewzaćel z Hildena pola Düsseldorfa bě sej wobchadnorěčne zapřijeće „Malle“ wot europskeho markoweho zarjada škitać dał a žada sej nětko wotpowědne popłatki. Prawiznik pućowanskeho portala je mjeztym skóržbu zapodał. Z wobchadnorěčnym „Malle“ wabja za hudźbu a partyje na dowolowej kupje.
Symbol wikinga na ampli pěškow je wot najnowšeho w danskim měsće Aarhus widźeć. Ideju, čerwjeny signal z ilustraciju historiskich předchadnikow Skandinawičanow narunać, měješe měšćanski radźićel. Wón pokazuje na to, zo měješe Aarhus za čas wikingow w 10. lětstotku wulki wuznam.
To a tamne (27.08.19)
Mjerzajo so na nócnu haru je wobydler we westfalskej wsy šofera chłódźenskeho awta do njeho zamknył. Šofer bě rano w 4.20 hodź. twory do wobchoda přiwjezł, jako wobydler jeho do awta zamkny. Muž drje móžeše chłódźenje hasnyć, dyrbješe pak poł hodźiny čakać, prjedy hač něchtó jeho wołanje wusłyša a jeho z chłódneho jastwa wuswobodźi. Wobydler policiji wšitko přizna, měješe pak swoje postupowanje přiwšěm za woprawnjene. Tak ma nětko ze skóržbu ličić.
Trójce wob dźeń chodźi kołp w badensko-württembergskim Riedlingenje pola Biberacha k swójbnemu domej, zo by so tam nažrał. Zwjetša jeho partnerka a młodźata sobu přińdu. Ritual pěstuje kołp hižo wjacore lěta, kaž wobydlerjo rozprawjeja. Hižo jako młodźo bě tam ze staršimaj rano, připołdnju a wječor po chlěb chodźił. Hdyž wonka nikoho njewidźi, klepa kołp wo wokno a prosy wo žratwu.
To a tamne (26.08.19)
Na wšě dźesać lět bjez jězbneje dowolnosće po puću był je 66lětny ze swojim awtom w Bayerskej. Policisća zadźeržachu šofera sobotu njedaloko Neuburga nad Innom w Passauskim wokrjesu, zo bychu jeho kontrolowali. Jako tón jězbnu dowolnosć při sebi njeměješe, započachu zastojnicy dokładnišo slědźić. Při tym so wukopa, zo dyrbješe muž před dźesać lětami papjery wotedać, dokelž bě pjany z awtom jěł. Nětko dyrbi ze sudniskej skóržbu ličić.
60. narodniny telewizijneho pěskowčika swjećachu kónc tydźenja w Babelsbergskim filmowym parku. Mjez gratulantami bě tójšto přećelow małeho mužika z běłej brodu a čerwjenej čapku, kaž pitiplač a liška. Dźěći w kostimje pěskowčika mějachu darmotny zastup do parka. Woblubowaneho pěskowčika pokazuja wot nowembra 1959 w telewiziji.
