To a tamne (10.06.25)
Staru granatu je žona w Neuruppinje na sewjeru Braniborskeje z rěki wućahnyła. Wona bě z magnetom za swojimi klučemi pytała, kotrež běchu do wody padnyli. Při tym měješe naraz zerzawy kruch železa w rukomaj. Sobudźěłaćerjo zarjada za wotškódnjenje municije jón jako staru rusku tankowu granatu identifikowachu a wottransportowachu. Hač je žona tež swoje kluče namakała, njeje znate.
Stary tačelak w spěšniku ICE je na Hamburgskim dwórnišću Altona wjetše zasadźenje policije zawinował. Sobudźěłaćer železnicy bě wosamoćeny paket pjatk wuhladał. Na to policija dźěl dwórnišća wokoło ćaha zaraći. Dokelž spočatnje njewědźachu, hač njejsu w pakeće strašne maćizny, zawołachu fachowcow za znješkódnjenje. Woni paket přeswětlichu a tačelak namakachu. Policija ludźi namołwja, swoje wačoki stejo njewostajić.
To a tamne (06.06.25)
We woknje swojeje kupjele tčacy wostał je muž w Nürnbergu. Hornje ćěło sahaše z wokna, brjuch bě hišće w kupjeli. Wohnjowa wobora muža wuchowa. Wobornicy wokno wutwarichu a muža z runje 21 centimetrow wulkeho wokna wuswobodźichu. Muž po swojich mocach pomhaše a brjuch „do so sćahny“. Čehodla bě muž z woknom zalězć chcył, njeje znate.
Na wšěch 124,7 kilometrow wróćo storkało je elektriske nakładne awto na motorowym wubědźowanišću w Oscherslebenje w Saksko-Anhaltskej. Jězba traješe šěsć hodźin a 22 mjeńšin při spěšnosći 20 km/h. Čara wobsahowaše 476 křiwicow. Za wodźidłom sedźeše oficěr zwjazkoweje wobory Marco Hellgrewe. Dotalny rekord z lěta 2020 wučinješe 89 kilometrow. Z akciju chcychu na elektrifikowanje wobchada, wěstotu na dróhach a połoženje šoferow skedźbnić.
To a tamne (05.06.25)
Pokradnjena wóskowa figura francoskeho prezidenta Emmanuela Macrona steji zaso na swojim městnje w muzeju w Parisu. Aktiwisća wobswět škitaceje organizacije Greenpeace běchu postawu před centralu energijoweho koncerna EDF nastajili, zo bychu přećiwo dale trajacym stykam Macrona k ruskim energijowym koncernam protestowali. Direktor muzeja paducham wobkrući, zo su jara kedźbliwje z wóskowym Macronom wobchadźeli.
Na wšěch 28 000 eurow pokuty nakopił je přistajeny italskeje kupnicy na sewjeru kraja. Šěsć měsacow bě wón wšědnje ducy na dźěło ze swojim awtom přespěšnje jěł a sej při tym do pasli derje schowaneho błyskača zalězł – bjez toho zo by to pytnył. Mjeztym chłostanki běžnje z póštu dochadźeja. Wšitke pospyty přistajeneho, sej w zarjadach smilnosć wuprosyć, su dotal zwrěšćili.
To a tamne (04.06.25)
200 lět stary kondom z erotiskim pomolowanjom pokazuje Amsterdamski Rijksmuseum w swojej najnowšej wustajeńcy k stawiznam splažnosće a prostitucije. Kondom zhotowili su 1830 prawdźepodobnje ze slepeho črjewa wowcy. Na nim zwobraznjena je scena rjadniskeje knježny z třomi mnichami. Wustajeńca dokumentuje, zo so ludźo při wšej zabawje hižo přeco tež splažnych chorosćow a njewotpohladneje samodruhosće bojachu.
Plyšowe zwěrjatka na dróze su we Wilhelmshavenje zasadźenje policije zawinili. Wobsadce policajskeho awta běchu wčera wječor wjacore tajke zwěrjatka napadnyli, kotrež bě drje něchtó z wokna ćisnył. Zastojnicy zwěsćichu 13lětneho w toho bydlenju, kiž bě so při rumowanju stwy rozsudźił, zwěrjatka z woknom wotbyć. Pod dohladom policistow smědźeše wón wšitke zaso zezběrać.
To a tamne (03.06.25)
Mylnje smjerć zwěsćili su pola 88lětneje staruški w Čěskej. Jeje muž bě nuzowe čisło wolił a rjekł, zo žona hižo njereaguje a zo je drje mortwa. Přiwołana lěkarka smjerć žony pisomnje wobkrući. Jako chcychu sobudźěłaćerjo pochowanskeje słužby ćěło do kašća połožić, seniorka woči wočini. W chorowni žonje wobkrućichu, zo je najebać wšelake chorosće hišće poměrnje čiła.
3 333 króć je 85lětna rentnarka po seklowej čarje we wólnočasnym parku w Cleebronnje njedaloko badensko-württembergskeho Heilbronna jěła. Swojich jězbow dla je žona mjeztym atrakcija parka. Ursula Dees twjerdźi, zo su so bolosće w jeje chribjeće nimale dospołnje pominyli. Mjeztym je jej park jězdźenku na čas žiwjenja přepodał. Žona kóždu jězbu dokładnje zapisuje. Tohodla tež wě, zo bě mjeztym 3 333 króć na čarje.
To a tamne (02.06.25)
Njewšědnje ćopły wětr je płujadłoweho płachtakowarja w Chinje 8 000 metrow wysoko pozběhnył. Muž chcyše w prowincy Gansu poprawom jenož trjebany parašut wuspytać. 55lětny muž njemóžeše so wulkemu ćišćej powětra hižo dowobarać a docpě spěšnje wysokosć 8 589 metrow. Přez spěšny lět do njezwučeneje wysokosće zhubi wón nachwilnje samo wědomje, dokelž kislik pobrachowaše. Njewšědny podawk zamó wón dopokazać, dokelž bě kamera wšitko natočiła.
Hołbikaj w lětadle stej w USA chaos a zapozdźenje zawinowałoj. Jako pasažěrojo na lětanišću w Minneapolisu do mašiny zastupichu, wuhladachu ptačka, kiž pod sedłami běhaše. Při jězbje lětadła na start naraz dalši hołb w mašinje zalětowaše. Wjacori pasažěrojo reagowachu panisce. Někotři spytachu hołbikaj popadnyć. Na to so pilot zawróći.
To a tamne (30.05.25)
Něhdyša wonkowna ministerka Annalena Baerbock je na hłowje stała – za komikarku Carolin Kebekus. W teje wusyłanju bě politikarka Zelenych hru „prawda abo winowatosć“ sobu hrała. 44lětna zwaži so tam radšo na postoj na rukomaj, zo by njediplomatiske prašenje wobešła, kiž rěkaše: „Radšo jenož hišće knihi Roberta Habecka čitać abo ženje wjace wo Roberće Habecku widźeć a słyšeć?“
W sewjeru Guatemale su archeologojo něhdźe 2 900 lět stare město Mayjow wotkryli. Slědźerjo pomjenowachu městnosć „Los Abuelos“ (dźěd a wowka), dokelž běchu tam dwě postawje z kamjenja našli, kiž poćahujetej so prawdźepodobnje na kult česćowanja prjedownikow. Při wurywanjach wotkrychu nimo toho obserwatorij, pyramidy, wołtarnišća, fragmenty stelow a wšelke keramiki stareje wysokeje kultury.
To a tamne (28.05.25)
K jědźi poskićeja mjedwjedźe, kotrež přichodny čas we wobłuku wosebiteho programa w Słowakskej zatřěla. Tole zdźěla wobswětowe ministerstwo w Bratislavje. Wotstronjenje zatřělenych zwěrjećow we wotpowědnych zawodach je brojenje, ministerstwo argumentuje. Wšitke zatřělene zwěrjata, kotrež wuměnjenja spjelnja, móža k jědźi poskićić, „dokelž je mjaso mjedwjedźow słódne“.
Znowa je so dalši pospyt z nowej raketu miliardara Elona Muska nimokulił: Najwjetši hdy twarjeny raketowy system předewzaća SpaceX njeje swój zaměr docpěł. Raketa je drje porno předchadnikam swětnišćo docpěła. Při nawróće do zemskeje atmosfery pak je wona rozpadnyła. „Jako njeby lět hižo rozbudźowacy dosć był, je Starship tež hišće razantnu, njeplanowanu demontažu dožiwił“, předewzaće SpaceX zdźěla.
To a tamne (27.05.25)
Do Bodamskeho jězora skočił je napity kolesowar w Lindauwje, zo by so policajskej kontroli wuwinył. Policisća chcychu 24lětneho kontrolować, kiž bě z kolesom po seklojtej liniji po puću. Kolesowar dojědźe na to na pobrjóh jězora a zalěze do wody. Zastojnicy wołachu wohnjowu woboru wo pomoc, dokelž so bojachu, zo móhła situacija za kolesowarja strašna być. Po třoch hodźinach přemjerznjeneho skónčnje namakachu. Wón steješe pod wliwom alkohola a drogow.
Dwě tonje methamfetamina w hódnoće 270 milionow eurow su indonescy cłownicy sćazali. Je to najwjetše hdy namakane mnóstwo tejele drogi w kupowym staće, medije pisaja. Ilegalnu posyłku su po měsacy trajacym slědźenju tajneje słužby na łódźi před wuchodnym pobrjohom kupy Sumatra namakali. Drogi běchu w 67 kistach schowane a za transport do Europy přihotowane.
To a tamne (26.05.25)
Cyły ćah blokował je muž w delnjosakskim Lehrte. Pytajo na słuchatkami, kotrež běchu mjez sedłom a sćěnu ćaha padnyli, bě muž tam z ruku tčacy wostał. Na kóncu dyrbješe jeho wohnjowa wobora w dlěje trajacej akciji wuswobodźić, dokelž bě ruka zaćekła. Wobornicy sedło wottwarichu a ručnu zepěru wotrězachu. Sobujěducy dyrbjachu do druheho ćaha přelězć. „Wuchowanje“ muža traješe cyłe połdra hodźiny.
Tójšto diskusije a samo protest wuwabi akcija měšćanosty idyliskeho městačka Viechtal w Bayerskej. Zo by kedźbnosć zbudźił a turistow přiwabił, zarjadowaše wón mjezynarodne wubědźowanje w grilowanju swini. Na to bě organizacija za škit zwěrjatow Peta protest připowědźiła. Skónčnje dyrbješe policija zarjadowanje škitać. Na wubědźowanju wobdźěli so cyłkownje 16 skupin.
