To a tamne (08.08.25)
Atomowy reaktor na měsačku je w lěće 2030 bjeze wšeho móžny. Wo tym je němski swětnišćowy projektowy manager europskeho swětnišćoweho zarjada ESA, Markus Landgraf, přeswědčeny. Fachowcy hižo dołho tajke technologije wuwiwaja a spochi na tym slědźa, wón nowinarjam rjekny. Přiwšěm je sej wón wěsty, zo móhło wuwiće hižo dale być, bychu-li so móžnosće nuklearneje technologije lěpje wuzbytkowali.
Golden Retrievera z nuzy wuswobodźili su čłonojo hórskeje słužby w Awstriskej. Z pomocu helikoptera móžachu psycu sewjerorynsko-westfalskich dowolnikow wuchować, kotraž pak so při njezbožu ćežko zrani. Swójba bě w Vorarlbergu po horach po puću, jako so psyk druheje swójby do psycy da. Ta reagowaše strachoćiwje a padny 40 metrow do nahłeje hłubiny.
To a tamne (07.08.25)
Kupanske wjedro a horcotu wjedrarjo wulkim dźělam Němskeje přichodne dny wěšća. Na juhu Němskeje wočakuja hač do 30 stopnjow, zwjetša wostanje sucho. Jenož na sewjeru drje su šwihele móžne. Hrimanja horcoty dla tohorunja wuzamknjene njesu. Ludźo njesměli na škitnu kremu pře słónco zabyć. W nocach budźe přiwšěm poměrnje chłódno.
Monogamija je po měnjenju wjetšiny wobydlerjow Němskeje najlěpša forma lubosćinskeho žiwjenja. 72 proc. dorosćenych njemóže sej předstajić, z wjacorymi partnerami runočasnje žiwy być. Tole je woprašowanje instituta Civey wunjesło. Jenož 18 procentow sympatizuje z alternatiwnymi žiwjenskimi formami. Přičina wulkeho přihłosowanja monogamiji je jednora: Ludźo su z tutej formu zhromadnosće přewažnje spokojom.
To a tamne (06.08.25)
Wo 1 400 kilogramow přećežki bě transporter na awtodróze A 7, jako jón zastojnicy kontrolowachu. Nan a syn běštaj požčeny wóz za přećah z Bayerskeje do Bremena napakowałoj. Policistam je awto napadnyło, dokelž je zadni dźěl hižo chětro přewisował. Waha na parkowanišću pokaza 4 900 kilogramow město dowolenych 3 500. Šoferej hrozy chłostanka 235 eurow a dypk w Flensburgu.
Dokelž je pawiany w Nürnbergskim zwěrjencu morił, hroža direktorej nětko ze smjerću. Dźesać konkretnych hroženjow su policiji sposrědkowali, direktor Dan Encke zdźěli. W socialnych medijach kopja so njekonkretne hroženja. Tež z listami abo mejlkami jemu hroža. W zwěrjencu su minjeny tydźeń dwanaće pawianow morili, dokelž bě jich wobhrodźenje přepjelnjene. Nichtó nochcyše wopicy přewzać, tohodla dyrbjachu je zasparnić.
To a tamne (05.08.25)
W jastwje wostać dyrbi rapper Sean „Diddy“ Combs z USA hač do spočatk oktobra planowaneho sudniskeho wusuda přećiwo njemu. Přisłušny sudnik w New Yorku je próstwu rappera wo dočasne pušćenje z jastwa wotpokazał. Prawiznicy hudźbnika su próstwu z tym wopodstatnili, zo rapper nikoho njewohrožuje a zo nochce ćeknyć. Woni poskićichu kawciju 50 milionow dolarow, zo by Diddy w domjacym aresće přebywał.
Atomowu milinarnju na měsačku planuje NASA, swětnišćowa agentura USA. Po internych rozprawach přiwza NASA w přichodnych 60 dnjach konkretne poskitki ze stron industrije za reaktor z wukonitosću sto kilowattow. Reaktor ma najpozdźišo 2030 na měsačku dźěłać. Pozadk je přiběraca konkurenca ze stron Chiny. Kraj planuje runočasnje misiju kosmonawtow na trabanće zemje.
To a tamne (04.08.25)
Wójsko Južneje Koreje wotnětka wótřerěčaki podłu mjezy Sewjerneje Koreje wottwarja. Tole je „praktiska naprawa“, kotraž ma napjatosće mjez sewjerom a juhom korejskeje połkupy znižić, zakitowanske ministerstwo w Seoulu zdźěla. Južna Koreja bě z wótřerěčakami přinoški wusyłała, kotrež so přećiwo režimej Sewjerneje Koreje měrjachu. Nowe knježerstwo prezidenta Lee Jae Myunga chce napjatosće z Pjöngjangom redukować.
Wulkan Krašeninnikow je po 400 lětach znowa wudyrił. Stało je so tole na połkupje Kamčatka na dalokim wuchodźe Ruskeje něšto dnjow po zemjerženju před Kamčatku. Mróčel popjeła a płuna saha šěsć kilometrow wysoko. Dotal lawa wulkana lěsy a sydlišća w přirodnym rezerwaće Kronozki njewohrožuje. Krašeninnikow je jedyn z cyłkownje wosom wulkanow w tutej kónčinje.
To a tamne (01.08.25)
Na wšěch 3 000 kubiknych metrow sykaneho drjewa su zamołwići heavy-metaloweho festiwala w schleswigsko-holsteinskim Wackenje skazali, zo móhli so planowane koncerty na swjedźenišću najebać błóto wotměć. Dešć minjenych dnjow – dobre 40 litrow na kwadratny meter – je festiwalnišćo za 80 000 wobdźělnikow do błóćaneho žumpadła přeměnił. Nalada je najebać to dobra, zarjadowarjo twjerdźa. Tuchwilne słónčne wjedro spožča jim „wjele optimizma“.
18 000 eurow dołžeše němskemu financnemu zarjadej w Šwicarskej bydlacy Němc, jako chcyše pomjezny přechod Rheinheim do Němskeje přeprěčić. Při kontroli cłownicy zwěsćichu, zo přećiwo mužej wukaz zajeća předleži. Sudnistwo bě jeho dawkoweho jebanstwa dla zasudźiło. Zastojnicy muža zajachu a do přichodneho jastwa dowjezechu.
To a tamne (31.07.25)
Prochsrěbak w nócnych hodźinach je w Neu-Isenburgu pola Frankfurta nad Mohanom zasadźenje policije zawinował. Swědk bě na parkowanišću wobkedźbował, kak mužej z elektriskej piłu awto „wobdźěłataj“, wočiwidnje, zo byštaj so do njeho zadobyłoj. Přiwołani policisća nańdźechu woprawdźe dwě wosobje, kotrajž pak runje kófrowu rumnosć awta wusrěbaštaj. Zastojnicy jimaj wobkrućichu, zo je awto nětko čiste. Nócnu rjedźensku akciju přiwšěm skónčichu.
Wjace mikroplastiki hač dotal myslene kóždy čłowjek wšědnje zadycha. Tole su fachowcy uniwersity w francoskim Toulouse zwěsćili. Wosebje w nutřkownych rumnosćach a w awtach je mnóstwo zadychaneje plasty jara wulke, přerěznje 68 000 móličkich dźělčkow wšědnje. Te zadobywaja so do płucow a zawinuja tam zahorjenja a dalše škody organa.
To a tamne (30.07.25)
W kupanskich drastach po měsće běhać je we woblubowanym francoskim pobrjóžnym městačku Les Sables-d‘Olonne nad atlantiskim morjom přichodnje zakazane. Měšćanosta Yannick Moreau so hižo dołho „njepřistojneho zadźerženja“ dla mjerza. Tuž je na času, zo to jasnje zakazaja. Wotnětka njesměš wjac połnahi abo jenož w kupanskich cholowach po dróze běhać. Za to hrozy pokuta 38 eurow.
W Grimmje je wčera při zwučowanju helikopter zwjazkoweje wobory znjezbožił. Při tym staj wobaj pilotaj swoje žiwjenje přisadźiłoj. Mašinu chcychu dźensa z Muldy wućahnyć. Za dalšej wosobu hišće pytaja, zakitowanski minister Boris Pistorius (SPD) na městnje njezboža zdźěli. Wrak leži wosrjedź rěki. Pomocnicy dyrbja najprjedy raz bencin wotčěrać, kotryž je wuběžał. Potom chcedźa, powostanki helikoptera wuzběhnyć.
To a tamne (29.07.25)
Předsydka Zeleneje młodźiny Jette Nietzard znowa za zastojnstwo kandidować njebudźe. Tole je 26lětna w socialnej syći Instagram zdźěliła. Hač k wólbam noweho zwjazkoweho předsydstwa dorostoweje organizacije Zelenych w oktobru w Lipsku pak wostanje wona w zastojnstwje. W swojim přinošku wona skorži, zo njedóstawa dosć podpěry za swoje namjety. Nietzard bě stajnje zaso z politisce prowokantnymi wuprajenjemi napadnyła.
Hnydom dwaj wukazaj zajeća měješe policija w rukomaj, jako na parkowanišću na awtodróze A4 pólskeho šofera wosoboweho awta kontrolowaše. 20lětny njebě pokutu 2 400 eurow jězdźenja pod wliwom alkohola dla zapłaćił. W dalšim padźe běchu jeho zranjenja ćěła dla k pokuće 3 280 eurow zasudźili. Tež ta njebě zapłaćena. Tuž z wukazom zajeća za nim pytachu. 20lětneho dowjezechu do jastwa.
To a tamne (28.07.25)
Samotwarjene pławidło a třoch muži na nim je policija na jězoru njedaloko města Roth južnje Nürnberga sćazała. Mužojo běchu surfowanske deski zwjazali a piwowe blido z ławku na nje stajili. Z tutej konstrukciju jědźechu po jězorje, doniž so jich policija njedohlada. „Kapitan“ pławidła steješe sylnje pod wliwom alkohola. Kaž zastojnicy zwěsćichu, drje bě tež drogi brał. Mužojo dyrbjachu swój spław wopušćić.
Powostanki britiskeje wójnskeje łódźe z Prěnjeje swětoweje wójny je skupina mjezynarodnych nurjerjow před britiskim pobrjohom sewjerneho morja namakała. Při tym jedna so wo křižak HMS Nottingham. 16. awgusta 1916 bě němski podnurjak U 52 wójnsku łódź z torpedom trjechił a podnurił. 38 jendźelskich namórnikow je tehdy žiwjenje přisadźiło. Za łódźu běchu wjele lět pytali.
