To a tamne (23.06.25)
Dźiwju honjeńcu paducha su policisća w Badensko-Württembergskej dožiwili. Muž bě so do předawarnje awtow zadobył. Jako policisća dojědźechu, jich z nožom wohrožowaše. Na to hrabny sej paduch awto policistow a z nim ćekny. Jako wón na lěsnym pućiku znjezboži, chcychu jeho zastojnicy zajeć. Muž pak z dalšim pokradnjenym awtom znowa ćekny. Po dwěmaj hodźinomaj bě ćěkańca skónčnje nimo a paduch zajaty.
Ze sudniskeje žurle ćeknjeneho skućićela su po dwěmaj dnjomaj zajeli. Policisća nańdźechu 42lětneho w prózdnym bydlenju w Saarbrückenje. Muž bě minjeny pjatk po sudniskim jednanju přećiwo njemu ze sudniskeje žurle twochnył. Wón skoči z wočinjenym woknom a so zminy. Sudnistwo bě muža zadobywanja do bydlenjow a padustwa dla k štyrjom lětam jastwa zasudźiło.
To a tamne (20.06.25)
3,6 tonow kokaina w přistawje Southampton we Wulkej Britaniskej su němskich policistow alarmowali. Na to přewodźachu posyłku bananowych kistow do Hamburgskeho přistawa. W składźe we Winsenje wosebity komando policije štyrjoch dealerow zaja, kotřiž chcychu banany wotewzać. Hódnota kokaina wučinja 90 milionow eurow. Njebě to ani hišće najwjetša namakanka: W Hamburgu běchu hižo wo wjele wjace drogow našli.
Wudźěrakow při njezbožach měli po woli najwyšeho wohnjoweho wobornika Němskeje přichodnje krućišo chłostać. „Wudźěrakojo wostanu při zasadźenjach najwjetši problem. To dyrbi so změnić“, rjekny Karl-Heinz Banse. Dotalne pokuty su přeniske. Wón namjetuje, wudźěranje runje tak chłostać kaž telefonowanje za wodźidłom a ludźom nachwilnje jězbnu dowolnosć sćazać. „To najbóle boli.“
To a tamne (19.06.25)
Chabłaca přichilnosć mjez partneromaj je normalna. Tole je wuslědk psychologiskeho přepytowanja pod nawodom uniwersity w Mainzu, kotruž su w fachowym časopisu Journal of Personality a Social Psychology wozjewili. Potajkim je bjeze wšeho móžne, zo so sympatija za druheho w běhu dnjow abo samo jeničkeho dnja widźomnje změni. Poriki dyrbjeli wědźeć, zo su tajke změny sympatije normalne a nic hnydom znamjo wulkeje krizy.
Pozdatny puma při Geiseltalskim jězorje pola hessenskeho Braunsbedra bě jenož kóčka. Tole je nětko fachowc za wuslědźenje zwěrjećich stopow wobkrućił. Widejo, kotrež pokaza wjetše rubježne zwěrjo, je wočiwidnje skomolene. Kóčka sedźeše před ćernikom na nahłej skłoninje a skutkowaše tak wo wjele wjetša hač je. Za pozdatnym puma su wulce pytali.
To a tamne (18.06.25)
Wo tójšto mjeńše hač myslene je rubježne zwěrjo, za kotrymž tuchwilu w jězoru pola Braunsbebra na juhu Saksko-Anhaltskeje pytaja. Mjeztym maja nowy widejo, kotrež pokazuje zwěrjo podobnje wulkej kóčce. Dotal z toho wuchadźachu, zo je rubježne zwěrjo puma. Na to běchu wulku pytansku akciju z trutami a samo helikopterom zahajili. To su mjeztym skónčili. Škitne naprawy pak najprjedy raz dale wobsteja, zamołwići zdźěleja.
Róčnicu zakaza su w Berlinje na swojorazne wašnje woswjećili: Něhdźe 300 ludźi je wčera w Berlinje njedaloko muzejoweje kupy do Sprjewje skočiło, sto lět po tym, zo je Berlinske knježerstwo kupanje w rěce zakazało. Protest měješe pokazać, zo je kupane tam móžne. Organizowało bě to towarstwo za kupanje w rěce, kiž hižo wjele lět přećiwo zakazej wojuje.
To a tamne (17.06.25)
Powěsće medijow wědomje ignorować je dale a wjace ludźom w Němskej wažne. Tole wuchadźa z najnowšeho woprašowanja powěsćernje Reuters. Při woprašowanju rjekny 71 procentow dorosćenych, zo so powěsćow znajmjeńša druhdy aktiwnje zdaluja. Najčasćišo mjenowany motiw tajkeho zadźerženja su negatiwne wuskutki na dušine derjeměće. Loni bě 69 procentow powěsće wotpokazało.
Dny trajace pytanje za krokodilom w delnjosakskej prowincy je nimo. Zamołwići města Vechta su akciju skónčili. Do toho bě młody muž přiznał, zo njeje widejo z krokodilom sam zhotowił, kaž bě spočatnje twjerdźił. Kajke sćěhi to za njeho změje, njeje znate. Muž bě twjerdźił, zo je krokodila w basenku za dešćowu wodu wuhladał a filmował. Na to započachu za reptilom pytać. Na wideju bě něhdźe meter dołhi aligator widźeć.
To a tamne (16.06.25)
Ćopłu kołbasku sej skazawši je so pjany šofer wosoboweho awta w Eilenburgu na sewjeru Sakskeje sam přeradźił. Swědkej w tankowni bě napadnyło, zo so 46lětnemu mužej jazyk chětro ćežko wjerći. Jako muž z kołbasku w ruce ze swojim awtom dale jědźeše, zawoła swědk policiju. Zastojnicy muža zadźeržachu a 1,8 promilow alkohola naměrichu. Jězbnu dowolnosć na městnje sćazachu.
Jendźelski narodny kopar David Beckham budźe na ryćerja powyšeny. Po wjelelětnym čakanju jemu kralowski dwór wysoku česć spožči. 50lětnemu koparskemu idolej je tole wulke wuznamjenjenje, wo kotrymž je dołho sonił a kiž je tež za jeho swójbu wulki „emocionalny wokomik“, Beckham nowinarjam přeradźi. Za jeho zasłužby za Wulku Britanisku spožča jemu titul ryćerja wosebiteho rjadu „Knight Bachelor“.
To a tamne (13.06.25)
70lětneho wikowarja drogow su policisća na Sicilskej lepili – na mopedźe. Muž bě podhladny, dokelž bě chětro spěšnje po puću. Při kontroli nadpadnyštej policistam kałata wóń hašiša a nerwozita starca. Na to namakachu 50 titkow hašiša, cyłkownje bě to wjace hač pjeć kilogramow. Wočiwidnje běchu drogi za kupcow předwidźane. 70lětneho dealerja zajachu. Wón ma wotnětka domjacy arest.
Hudźbnik Herbert Grönemeyer smě kónc tydźenja w Bochumje a Essenje cyły orchester dirigować. 69lětny popstar nawjeduje na třoch koncertach Bochumskich sinfonikarjow. Na programje steji mjez druhim sławny klawěrny koncert Sergeja Rachmaninowa. Za klawěrom sedźi ruska pianistka Anna Winnickaja. Nimo toho zaklinči suita, kotruž je wjelelětny hudźbnik Grönemeyera, Alfred Kritzer, ze znatych spěwow wuměłca zestajał.
To a tamne (12.06.25)
Brian Wilson – hudźbna legenda a sobuzałožer sławneje skupiny „Beach Boys“ je z 82 lětami zemrěł. Tole je management hudźbnika wobkrućił. Ze spěwami kaž „Fun Fun Fun“, „Good Vibrations“ a „Surfin‘USA“ swjećeše skupina hólcow Beach Boys w 60lětach po wšěm swěće hoberske wuspěchi. Samo Beatles so na jich hudźbnym stilu orientowachu. Wilson je nimale wšitke spěwy sobu spisał. Naposledk ćerpješe wón pod demencu.
Trend dale a wjetšich awtow w Europje spóznawaš tež na wysokosći motorowych hawbow. Tole ma negatiwne wuskutki na wěstotu dźěći, dokelž šoferojo małych ludźi před awtom njewidźa. Nimo toho su zranjenja hrudźe při zražkach ćim hórše. Přerězna wysokosć motorowych hawbow w EU je so wot lěta 2010 wo poł centimetra powyšiła a wučinješe 83,4 centimetrow w lěće 2024.
To a tamne (11.06.25)
Zhromadnje hudźić, spěwać a hudźbu aktiwnje dožiwić, je přewšo wunošne za derjeměće čłowjeka. Wědomostny pospyt při lětušich Drježdźanskich hudźbnych swjedźenskich dnjach je tute dopóznaće doraznje wobkrućił. Wobdźěleni probandźa mějachu wo wjele wyšu koncentraciju oxytocina, znaty jako hormon zbožownosće. Naměrjene mnóstwo hormona bě wyše hač při hubkowanju abo při splažnych aktiwitach.
Nawal zymy je w Južnej Africe nadróžny chaos zawinił. Sněh, wichor a zliwki blokowachu dróhi a zawinowachu zapławjenja a zesuwanje zemje. Wosebje potrjechene běchu wuchodne prowincy. W někotrych kónčinach mějachu telko sněha, zo njemóžachu ludźo wažne wobchadne zwiski wjace wužiwać. Zamołwići wukazachu za někotre gmejny druhi najwyši warnowanski schodźenk sněha dla.
To a tamne (10.06.25)
Staru granatu je žona w Neuruppinje na sewjeru Braniborskeje z rěki wućahnyła. Wona bě z magnetom za swojimi klučemi pytała, kotrež běchu do wody padnyli. Při tym měješe naraz zerzawy kruch železa w rukomaj. Sobudźěłaćerjo zarjada za wotškódnjenje municije jón jako staru rusku tankowu granatu identifikowachu a wottransportowachu. Hač je žona tež swoje kluče namakała, njeje znate.
Stary tačelak w spěšniku ICE je na Hamburgskim dwórnišću Altona wjetše zasadźenje policije zawinował. Sobudźěłaćer železnicy bě wosamoćeny paket pjatk wuhladał. Na to policija dźěl dwórnišća wokoło ćaha zaraći. Dokelž spočatnje njewědźachu, hač njejsu w pakeće strašne maćizny, zawołachu fachowcow za znješkódnjenje. Woni paket přeswětlichu a tačelak namakachu. Policija ludźi namołwja, swoje wačoki stejo njewostajić.
