To a tamne (05.11.25)
Na wšěch 300 brónjow, dźěle brónjow kaž tež municiju a rozbuchadło je policija w domje zemrěteho rentnarja w bayerskim Augsburgu našła a sćazała. Za wjace hač połojcu brónjow njeměješe muž, kiž bě přirodneje smjerće zemrěł, žanu dowolnosć, policija zdźěla. Policija trjebaše cyły tydźeń, zo by ilegalnu zběrku dokumentowała a wotwjezła. Kriminalna policija nětko slědźi, zwotkal brónje pochadźeja.
Z „Mytom přećelstwa“ je ruski prezident Wladimir Putin němskeho pianista a dirigenta Justusa Frantza w Moskowskim Krjemlu wuznamjenił. „Justus Frantz přinošuje hižo wjele lět spomóžnje přibliženju a mjezsobnemu wobohaćenju kulturow Ruskeje a zwjazkoweje republiki Němskeje“, rjekny Putin w swojeje narěči składnostnje spožčenja rjadu na Dnju narodneje jednoty Ruskeje. Frantz bě najebać sankcije do Moskwy přijěł.
To a tamne (04.11.25)
Pačenosć towaršnosće njeje scyła tak wulka, kaž so na prěni napohlad zdawa. Wo tym su wědomostnicy organizacije „Wědomosć w dialogu“ w swojej rozprawje 2025 přeswědčeni. Byrnjež 77 procentow woprašanych ludźi měnjenja było, zo towaršnosć přiběracy rozpaduje a 54 procentow samo znjepřećelenej lěhwje widźało, su sej ludźo w zasadnych prašenjach přezjedni, slědźerjo twjerdźa.
Smjertnje znjezboženi krosnowarjo, kotřiž běchu na swjedźenju wšěch swjatych a južnym Tirolu žiwjenje přisadźili, přińdu wšitcy z Bayerskeje. Tole je italska policija w Bozenje powěsćerni dpa wobkrućiła. Krosnowarjo běchu sobotu krótko do 16 hodź. po puću na 3 545 metrow wysoki Cima Vertana w Ortlerowym masiwje, jako jich lawina překwapi. Čehodla běchu woni při ćmičkanju přeco hišće po puću na horu, njeje znate.
To a tamne (03.11.25)
Z wjerćatym rěblom je wohnjowa wobora ćeknjeneho papagaja z třěchi domu w sewjerorynsko-westfalskim Bocholće wuchowała. Wobydlerjo běchu pisaneho ptačka wuhladali a wohnjowu woboru informowali. Runočasnje prošeše swójba w interneće wo pomoc při pytanju za zhubjenym ptačkom. Wohnjowa wobora so pola swójby přizjewi. Zhromadnje z pomocnikami so skónčnje poradźi, papagaja z mjenom Zazu z dźewjeć metrow wysokeje třěchi wuchować.
Njewšědny nuzowy telefonat je policiju w Erfurće zaběrał. Wobydler domu je so sam z ručnymi putami při tepjenju přiwjazał – njeměješe pak žadyn klučik wjace. Zastojnicy jeho wuswobodźichu, po tym zo bě jim muž kluče z woknom ćisnył. Policisća zwěsćichu, zo njebě to prěni pad tajkeho razu pola wobydlerja a ručne puta z jeho dowolnosću sćazachu.
To a tamne (30.10.25)
Mjeza spěšnosće za pěškow w Słowakskej, wo kotrejž powěsćernje wčera z Bratislavy rozprawjachu, bě drje wuslědk njedorozumjenjow. Pěškam tajka mjeza njehrozy, zapósłanc Ľubomír Vážny, kiž bě naćisk zakonja zdźěłał, hišće raz wujasni. W zwisku ze zražkami mjez pěškami a wužiwarjemi rolerow na chódnikach bě rěč wo tak mjenowanej „spěšnosći běhanja“ šěsć km/h. Tole běchu tak wukładowali, zo chcedźa tež pěškam předpisać, kak spěšnje maja so pohibować.
Po spektakularnym zadobywanju do Pariskeje wustajeńcy Louvre staj zajataj paduchaj njeskutk zdźěla přiznałoj. Wonaj mataj nětko do přepytowanskeje jatby přińć. Rubizna pak wostanje dale zhubjena, policija zdźěla. Po informacijach medijow je policija dalšich podhladnych zajała. Historiske debjenki w hódnoće wjace hač 88 mio. eurow su jónkrótne.
To a tamne (29.10.25)
Mjezu spěšnosće dyrbja přichodnje tež pěšcy w Słowakskej dodźeržeć. Tole wobsahuje nowe postajenje wobchadneho zakonika, kotryž je parlament w Bratislavje wčera wobzamknył. Potajkim njesmědźa so tam přichodnje ludźo pěši spěšnišo hač šěsć km/h pohibować. Nowy zakoń płaći wot 1. januara 2026. Zaměr je, zo ličbu zražkow mjez pěškami a skaterami kaž tež wužiwarjemi e-rolerow a scooterow zniža. Hač dyrbja ludźo z chłostanjom ličić, hdyž k čakacemu busej spěchaja, njeje znate.
Stary Airbus zwjazkoweje wobory je z pomocu nakładneho awta derje do Serengetijoweho parka w delnjosakskim Hodenhagenje dojěł. Poslednju dźesać kilometrow dołhu čaru su minjenu nóc derje zmištrowali, rěčnica parka zdźěli. Lětadło A310 běchu minjene tři dny rozebrane transportowali. Hač do pózdnjeho lěća 2026 ma z njeho hosćenc nastać.
To a tamne (28.10.25)
Zwada domjacych nadawkow dla je w delnjobayerskim Landshuće zasadźenje policije zawiniła. Po informacijach zastojnikow so dźewjećlětna holca hejata spjećowaše, swoje domjace nadawki spjelnić. Na to so staršej tak raznje wurěčowaštaj, zo sej nan rady njewědźeše a policiju zazwoni. Zastojnikam so poradźi, zwadu skónčić. Hač je holca domjace nadawki činiła, njeje znate.
Brigitte Macron, mandźelska francoskeho statneho prezidenta Emmanuela Macrona, so sudnisce internetnym wumjetowanjam přećiwo njej wobara. Wot dźensa dyrbi so dźesać wobskorženych sudnisce zamołwić. Woni běchu w interneće rozšěrjowali, zo je so Brigitte Macron jako muž narodźiła. Nimo toho jej wumjetowachu, zo je dźensa 72lětna swój čas jako 39lětna wučerka tehdy 14lětneho Macrona splažnje zawjedła.
To a tamne (27.10.25)
Dosć derje z alkoholom so zastarał je njeznaty paduch w Bendorfje pola Koblenza. Na wšěch 28 blešow Champanskeho a Whiskyja je wón z kupnicy pokradnył. Napadnyło je padustwo hakle při wuhódnoćenju awtomatiskich kamerow wobchoda. Skućićel je bleše do tošow stykał a we wozyčku transportował. Zawodźěł je wón wšitko z měchami drjewjanych třěškow za kóčki. Na kóncu móžeše wón z wozom přez njewobsadźenu kasu z wobchoda twochnyć.
Na wšěch 6,5 tonow kokaina je španiska policija na łódźi na Atlantiskim oceanje namakała a sćazała. Z Panamy jěducu łódź su dobre tysac kilometrow před pobrjohom Kanariskich kupow zadźerželi. Zaměr łódźe bě Vigo na sewjerozapadźe Španiskeje. Wšěch dźewjeć namórnikow su zajeli. Je to jedyn z najwjetšich wuspěchow španiskeje policije.
To a tamne (24.10.25)
Maximilian Krah, sakski zapósłanc AfD w zwjazkowym sejmje, je wčera w interviewje z nowinu Welt swoju stronu namołwjał, so wot awstriskeho prawicarskeho ekstremista Martina Sellnera a jeho koncepta remigracije distancować. „Hdyž zapřijeće ‚remigracija‘ wužiwamy, dyrbimy wujasnić, zo němscy staćenjo wot toho potrjecheni njejsu“, wón wuzběhny a doda: „Hewak zastopnjowanje strony jako prawicarskoekstremistisku njewotbudźemy.“
Chětro njezbožownje zahaji so předwčerawšim zhromadny manewer policije a wójska w baworskim Erdingenje. W běhu zwučowanja su zastojnicy policije mylnje z wótrej municiju na wobdźělnikow zwjazkoweje wobory třěleli, při čimž so jedyn wojak zrani. Za dokładnymi přičinami njezboža slědźi tuchwilu Landshutske statne rěčnistwo.
To a tamne (23.10.25)
Britiski kral Charles III. a kralowna Camilla přebywataj tuchwilu w Romje, zo byštaj dźensa bamža Leja XIV. we Vatikanje zetkałoj. Statny wopyt steji w znamjenju zbliženja mjez katolskej a jendźelskej cyrkwju. Bamž chce mjez druhim Charlesej III. titul kralowskeho konfratera spožčić. Konfrater je cyrkwinske zapřijeće za sobubratra. Spožčenje titula je wuraz spiritualneje zwjazanosće mjez cyrkwjomaj.
Přećiwo Tilmanej Kubanej, zapósłancej CDU w zwjazkowym sejmje, su juristiske přepytowanje zahajili a w tutym zwisku jeho parlamentarisku imunitu zběhnyli. Bywši šef Młodeje unije so sam k tomu wuprajić nochcyše. W internej mejlce běše pisał, zo je so před něšto měsacami ze žonu rozešoł a zo „wumjetuja mi w tutym zwisku wěcy, kotrež wehementnje wotpokazuju“.
To a tamne (22.10.25)
W Lipsku zasadźuje wobskorženy Marcus K. w swojim procesu system kumštneje inteligency (KI) ChatGPT – a to wuspěšnje. Wot KI sformulowanu skóržbu přećiwo zamołwitemu sudnikej je hamtske sudnistwo akceptowało. Hižo měsacy wužiwa 41lětny Lipšćan KI za wšitke swoje juristiske pisma a za přihot procesa, dokelž sej prawiznika dowolić njemóže. W procesu wobara so wón přećiwo wróćopłaćenju 240 eurow bjezdźěłneho pjenjeza.
Njemało nastróžili su so wčera nawječor pasažěrojo powjaznicy (Schwebebahn) we Wuppertalu, jako njejapcy objekty do woknow kabiny prasnychu, tak zo so puknychu. Za dokładnymi pozadkami podawka tuchwilu slědźa, zdźěli rěčnik policije. Potrjecheny wóz w depoće přepytuja. Nichtó so zranił njeje.
