To a tamne (24.10.24)
Dramatisku wuchowansku akciju je młoda žona w awstralskim Hunter Valleyju přetrała. 23lětna chcyše swoje šmóratko wuchować, kotrež je so do škałby mjez hoberskimi kamjenjemi sunyło. Wona wisaše w škałby, noze hladachu z dźěry won. Sama njemóžeše so wuswobodźić a dyrbješe sydom hodźinow njepřijomnu situaciju zmištrować. Hakle potom so wuchowanskim pomocnikam poradźi, žonu ze škałby wućahnyć.
Po wopyće w Karlsruheskim zwěrjencu, hdźež běše sej Elina Öfele ze swojim synkom prózdnjeńcu njetopyrjow wobhladała, je doma překwapjenku dožiwiła. Tak je so njetopyr do jeje drastow zapopadnył. W prěnim wokomiku měješe to za žort, kotryž bě sej jeje mandźelski Halloweena dla dowolił. Tola zwěrjo so na raz hibaše.
To a tamne (23.10.24)
Hižo dwě lěće přenocuje sorna na zapadźe Schleswigsko-Holsteinskeje w bydlenskej stwě swójby. Wodnjo pak so zwěrjo z mjenom Timmi z tamnymi sornami po přirodźe honi. Jako młodźato je swójba njezboža dla młodu sornu přiwzała a je z mlokom zastarała. Poprawom chcychu młodźato zaso do přirody pušćić, čemuž pak so Timmi wobaraše. Mjeztym ma zwěrjo transponder. Tak swójba stajnje wě, hdźe Timmi je. Tež hajnicy jeho na nastroju spóznawaja.
Kwas a wšitke wažne etapy swójskeho žiwjenja a stawiznow je dźensa 67lětny Italčan Luciano d’Adamo prosće zabył. Na 39 lět swojeho žiwjenja wón žanych dopomnjenkow nima. Njezboža w lěće 2019 dla ma amneziju. Na šmóratko abo měnu euro dyrbješe so najprjedy zaso zwučić.
To a tamne (22.10.24)
Skurilna tafla ze zakazom na lětanišću w Neuseelandźe tuchwilu w socialnych syćach wulku kedźbnosć zbudźi. Pućowacy w pasmje lětanišća, hdźež swoje wačoki a kófry wotedadźa, smědźa so tam maksimalnje tři mjeńšiny wobjimać. „Za dlěše rozžohnowanje prošu parkowanišćo wužiwajće“, je na tafli napisane. Na lětanišćach je zakazane, dlěši čas we wěstych pasmach přebywać. Dotal pak njeje so tole kontrolowało. Taflu na lětanišću w Neuseelandźe maja ludźo za kurioznu.
Nawal ludźi, kotřiž chcedźa sej dorost pandy w Berlinskim zwěrjencu wobhladać, je jara wulki. Minjenu srjedu su tam dwójnikaj zjawnosći prezentowali. Srjedu, štwórtk a pjatk je stajnje něhdźe 5 000 wopytowarjow do zwěrjenca přišło, štož je rozrost wo 50 procentow.
To a tamne (21.10.24)
James Blunt smě dale James Blunt rěkać a njedyrbi swoje mjeno na Blunty McBluntface změnić. Nowonakład swojeho hitoweho albuma „Back to Bedlam“ je mjenujcy sedme městno w britiskich chartach docpěło – a nic hnydom prěnje. Za tón pad bě znaty hudźbnik přilubił, swoje mjeno oficialnje tak změnić, kaž ludźo po namjetach w social media wothłosuja. Dobyło je tam mjeno „Blunty McBluntface“. 50lětny nětko wobkrući, zo by marketingowy gag chutnje zwoprawdźił. K tomu je James Blunt w socialnych syćach nětko tež satiriski widejo wozjewił.
Njeznaći paduši su we vogtlandskim Elsterbergu 150 blešow wina pokradnyli. Cyłkowna hódnota alkoholiskich napojow wučinja 2 000 eurow, policija nětko zdźěli. Čas njeskutka njemóžachu zastojnicy dokładnje postajić. Hižo wot nalěća njejsu wobsedźerjo wina za swojimi napojemi w pincy hladali.
To a tamne (18.10.24)
Kostim znateje postawy za wodźidłom awta njeje šofera před chłostanku wuchował. Policija bě na awtodróze A45 pola Dortmunda w septembru awto błyskła, kotrež bě přespěšnje po puću. Na foće widźeć bě šofer z wjesołym kostimom na hłowje, kiž dopominaše na „srjódkaty monster“ z dźěćaceje telewizy. Jědnaće km/h přespěšnje a kostim na hłowje wunjesechu pokutu 40 eurow. Ta je mjeztym zapłaćena.
Měd pod pódušu je paducha w Mannheimje přeradźił. Policisća wuhladachu lěpjatu maćiznu, kotraž wjedźeše jich ze šule k bydlenskemu domej. Tam zajachu 27lětneho muža. W bydlenju namakachu zastojnicy lěpjatu z mjedom zamazanu drastu a dźěl rubizny. Paduch bě so do šule zadobył a při pytanju za pjenjezami kistu z mjedom powalił. Na to so někotre škleńcy rozbichu.
To a tamne (17.10.24)
Prěnju konop žnjeć móža w Braniborskej prawdźepodobnje w nalěću 2025. Z toho wuchadźa strowotniske ministerstwo kraja. Tam pruwuja tuchwilu 15 próstwow wo załoženje konopjoweho kluba. Cluby lubja swojim čłonam, kotřiž maja čłonski přinošk płaćić, přijomniše płaćizny hač na ilegalnych wikach a wosebje čisty material bjez škódnych maćiznow. Za gram konopje chcedźa sej šěsć do wosom eurow žadać, kaž rěkaše.
Pedalej płuna a borzdźidła zaměnił je 86lětny muž na parkowanišću kupnicy w Treuenje we vogtlandskim wokrjesu. Z wotmachom zrazy wón do twarjenja superwikow. Poprawom chcyše wón swój wóz zaparkować. Sobujěducu 85lětnu dyrbjachu zranjenu do chorownje dowjezć. Šofer so snadnje zrani. Škodu na fasadźe twarjenja wobliča na 8 000 eurow. Awto je dospołnje skóncowane.
To a tamne (16.10.24)
Wobručowa pana je pola třoch muži w Neumarktće w Hornjej Pfalcy swojoraznu ideju zbudźiła: Woni pokradnychu koleso parkowaceho awta a je při swojim awće přišrubowachu. Swědkojo tole wobkedźbujo informowachu policiju. Ta paduchow na bliskej awtodróze A3 lepi. Mužojo w starobje mjez 36 a 43 lětami mějachu samo hišće šruby kolesa při sebi. Wšěch třoch nachwilnje zajachu.
Na wšěch 24 000 šrubow je britiski wuměłc Darren Timby w sewjerowuchodnym Sunderlandźe trjebał, zo by legendarnych Beatlesow zwobraznił. Wuměłc dźěłaše něhdźe 120 hodźinow na swojoraznej twórbje. Ta je zdobom wuznaće k industrijnemu městu, kotrež je wusko z łódźnistwom, hórnistwom a woclowej industriju zwjazane. Železny wobraz štyrjoch hudźbnikow je 1,80 metrow šěroki a 90 centimetrow wysoki.
To a tamne (15.10.24)
Tradicionalne rudnohórske kurjački maja nowych prominentnych čłonow w swojich rjadach: W nowej kolekciji Seiffenskeho ludoweho wuměłstwa wusahujetaj wotnětka bywši statny šef NDR Erich Honecker a jeho tehdyši politiski přećiwnik, bywši zwjazkowy kancler Helmut Kohl. Zawod w Seiffenje nadźija so podobnje wulkeho wuspěcha kaž z kurjačku Angelu Merkel. Kohl a Honnecker płaćitaj stajnje 89,90 eurow. Figurka Merkel je hižo za 85,70 eurow k dóstaću.
Wopity a bjez jězbneje dowolnosće je 35lětny muž na awtodróze A4 pola Limbacha-Oberfrohny wobchadne njezbožo zawinił. Jako chcyše awtodróhu wopušćić, prasny won do napřećo jěduceho woza. Při zražce so šoferaj wobeju awtow zraništaj. Policija zwěsći pola zawinowarja njezboža 2,36 promilow alkohola. Jězbnu dowolnosć muž njeměješe.
To a tamne (14.10.24)
Infarkta wutroby dla njeje pilot w USA hižo dale lećeć móhł. Na to je mandźelska 78lětneho wodźidło małeje mašiny přewzała. Mandźelskaj běštaj z dwajmotorowym lětadłom po puću z Nevady do Kaliforniskeje, jako muž infarkt poćerpi. Žona, kotraž njeměješe žane lětarske nazhonjenja, je na to z pomocu škričkowych pokiwow lotsow lětanišća mašinu w Bakersfieldźe w Kaliforniskej přizemić móhła. 78lětneho dowjezechu do chorownje, hdźež wón wudycha.
Cyłu fabriku za produkciju syntetiskich drogow je policija w Lettiskej namakała a zawrěła. Mjezynarodna cwólba bě tam drogi we wulkim stilu zhotowiła. Zastojnicy namakachu ilegalne substancy w hódnoće 400 milionow eurow. W składźe ležeše cyła tona moderneje drogi Clephedrone. W nadróžnym wikowanju płaći jedyn gram drogi něhdźe 25 eurow.
To a tamne (11.10.24)
Kuriozny pad w zwisku z ilegalnej migraciju w Letiskej zjawnosć kraja a medije zaběra. Po hodźiny trajacej honjeńcy je policija skupinu 46 ludźi zajała. Tući běchu mjezu ilegalnje překročili a ćěkachu před policiju w napodobnjenym policajskim awće. „Kak móže so stać“, prašeja so nowiny, „zo wudawamy hoberske sumy za płoty, zadźěwki a betonowe bloki. Samsny čas jědu migranća z jězdźidłom w barbach policije prosće po kraju“?
W Němskej dale a wjace awtow pokradnu. Po informacijach zwjazkoweho kriminalneho zarjada su loni 15 924 wosobowych awtow pokradnyli, dźewjeć procentow wjace hač w lěće 2022. Policija wobkedźbuje tež nowe postupowanje paduchow. Přiběrajcy zadobywaja so do bydlenjow, zo bychu kluče awtow pokradnyli a z nimi wotjěli. Zasadźuja tež škričkowe nastroje k wotamknjenju awtow.
