To a tamne (08.05.25)
Z cylindrom na hłowje a předešćnikom w ruce je britiski kral Charles III. tysacy hosći na zahrodźe Buckinghamoweho palasta w Londonje witał. Dešćikojte wjedro njeje dobrej naledźe zeškodźało, wšako njejsu prošeni kralej hišće nihdy takle blisko byli. Swjedźenje na zahrodźe su tradicija w žiwjenju kralowskeje swójby. Lětsa wočakuja na wjacorych zarjadowanjach na wšěch 30 000 hosći.
Najwoblubowaniše dźěćace mjena Němskeje chcyše Towaršnosć za němsku rěč dźensa wozjewić. Lońšu lisćinu faworitow młodych starši nawjedowaštej mjenje Sophia a Noah. Organizacija wozjewja wot lěta 1977 kóždolětnje lisćinu w Němskej najčasćišo wužiwanych předmjenow. Zakład toho su daty něhdźe 750 němskich stawnistwow, kotrež sposrědkuja towaršnosći nimale 900 000 zapiskow mjenow.
To a tamne (07.05.25)
Digitalny škričkowy system policije a wuchowanskeje słužby je wčera zdźěla wupadnył. Po informacijach zamołwitych bě to cyłoněmski zjaw. Hłowna přičina běchu problemy w syći. Cyberowy nadpad dotal wuzamknu. Potrjechene běchu wjacore zwjazkowe kraje, mjez druhim tež Sakska. Čłonojo słužbow dyrbjachu sej z druhimi komunikaciskimi srědkami, kaž z priwatnymi šmóratkami, wupomhać.
Pod wliwom drogow stejaceho jězbneho šulerja je policija w sewjerorynsko-westfalskim Mönchengladbachu lepiła. We wobłuku powšitkowneje kontrole chcychu zastojnicy tež awto jězbneje šule přepruwować. 27lětny nerwozny a hektiski šuler jim wosebje nadpadny. Prěni test na drogi bě pozitiwny. 27lětnemu na policajskej straži krej wotewzachu. Jězbna hodźina bě za njeho nimo.
To a tamne (06.05.25)
Božu słužbu ze swětnišćowej tematiku woswjećili su w ewangelskej cyrkwi w sewjerorynsko-westfalskim Bensbergu. Cyle pod znamjenjom filmoweje trilogije Star Wars bě farar Samuel Dörr (37) ze swojimi sobudźěłaćerjemi cyrkej wupyšił a wěriwych prosył, wotpowědnje zdrasćeni kemši přińć. „Dyrbimy jako cyrkej po nowych pućach kročić a tak tež młodych ludźi narěčeć“, je sej duchowny wěsty. Wothłós bě pječa jara dobry.
Krematorij wurubili su njeznaći skućićeljo w Rutesheimje njedaloko badensko-württembergskeho Ludwigsburga. Minjeny kónc tydźenja su tam wokno rozbili a so do domu zadobyli. Zaměrnje měrjachu so na běrow, dokelž njejsu nihdźe druhdźe slědy zawostajili. Tam pokradnychu wjace hač tysac eurow z pjenježneje kasety a so zminychu. Policija pyta za swědkami, kiž su něšto widźeli.
To a tamne (05.05.25)
Na awtodróze A 5 rejowała je kwasna hosćina njedaloko Freiburga. Do toho běchu wjacore awta kwasneje kolony wobchad zadźerželi. Potom někotři wulězechu a na dróze rejowachu. Šoferojo za kolonu njemějachu žane zrozumjenje a wołachu policiju. Zastojnicy kwasarjow z awtodróhi přewodźachu a kontrolowachu. Nětko dyrbja z chłostanjom ličić.
Sławny popowy spěwar Dieter Bohlen wosobinsce je paduchow prosył, wjesnu taflu sydlišća Tötensen w delnjosakskim wokrjesu Harburg zaso wróćić. „Moji přećeljo, sće tole byli?“ praša so Bohlen swojich fanow na Instagramje. Wón móhł sej derje předstajić, zo je něchtó taflu jako fanowu trofeju so wzał. 71lětny Bohlen w Tötensenje bydli. Spěwar, producent a sudnik pola „Němska pyta za superstarom“ přilubja sprawnemu paduchej zastupny lisćik za koncert.
To a tamne (02.05.25)
Horcota minjenych dnjow so pominje – a to poměrnje spěšnje. Tole wěsća nam wjedrarjo. Wčerawši mejski swjedźeń steješe hišće cyle pod wliwom wyšiny „Quendolin“ z temperaturami snadnje pod 30 stopnjemi – najćoplišo bě ze 29,7 stopnjemi w badensko-württembergskim Waghäusel-Kirrlachu. Nětko pak přińdźe přewrót. Nižina „Henry“ přinjese hižo dźensa wječor chłódny a mokry powětr ze sewjera. Jutře wočakuja tež we Łužicy njewjedra, zliwki, krupy a wichor.
Rój pčołkow je wčera na Trierskim hłownym torhošću njeměr mjez ludźimi na dróze kaž tež we winarnjach a kofejownjach zbudźił. Někotři mějachu pčołki za strašne aziske šeršenje. Pčołar, kotremuž běchu wobrazy překasancow pósłali, móžeše ludźi změrować. Jednaše so woprawdźe wo pčołki, kotrež wón popadny a přesydli. Policija naměsto zaraći.
To a tamne (30.04.25)
Z wulkim apetitom a samo chětro wušiknje su so paduši do rěznistwa w Hohenstein-Ernstthalu zadobyli. Kaž policija zdźěli, pokradnychu njeznaći w nocy na wutoru rězniske wudźěłki w hódnoće 200 eurow. Při namócnym wotewrjenju elektriskich suwacych so duri načinichu pak jenož snadnu škodu dźesać eurow. Što su dokładnje spakosćili, policija hišće rjec njemóžeše, prosy pak swědkow – kiž su něšto widźeli – wo pomoc.
Maturitne pruwowanje w němčinje wospjetować dyrbja na gymnaziju w Uetersenje pola Hamburga. Wohnjowy alarm bě pruwowanja přetorhnył. Na to su kubłanišćo dospołnje ewakuowali. Paliło pak so njeje. Policija tuka na techniski defekt, kiž je alarm zbudźił. Po informacijach kubłanskeho ministerstwa dyrbja klawsuru nětko wospjetować, dokelž mějachu šulerjo składnosć, sej wuměnić.
To a tamne (29.04.25)
Pohladnicu pasažěra łódźe „Titanic“, kotruž je na dnju wotjězda wotpósłał, su w Jendźelskej za rekordnu płaćiznu přesadźowali. Z 300 000 puntami (350 000 eurow) wuzbytkowachu na kóncu pjeć króć telko, kaž běchu do toho trochowali. Pasažěr prěnjeje klasy colonel Archibald Gracie bě kartu 10. apryla 1912 w Southamptonje wotpósłał. Štyri dny pozdźišo so łódź podnuri. Gracie bě mjez přežiwjencami.
Antikske meble zemrěteho znateho entertainera Haralda Juhnkeho su blisko Stuttgarta přesadźowali. Za komodu w stilu francoskeho krala Louisa XVI. zapłaći zběrar 5 000 eurow, awkciski dom zdźěla. Meble pochadźachu z wile Juhnkeho w Berlinje. Dźiwadźelnik zemrě před 20 lětami w starobje 75 lět. Doma bě so wón rady z meblemi wobdawał, kotrež pochadźachu z 19. lětstotka.
To a tamne (28.04.25)
Na zadnim sedle awta je žona wčera rano w Aachenje dźěćo porodźiła. Policistam napadny muž na kromje dróhi, kotryž zastojnikow rozpjeršeny k sebi kiwaše. Žona w awće měješe hižo hrona. Tuž zastojnikaj awto wobeju do přichodneje chorownje přewodźeštaj, ignorujo při tym błyskače. Dźěćo pak měješe nuzne a so hišće na parkowanišću před chorownju narodźi. Lěkarjo chorownje spěšnje pomhachu. Žona a dźěćo stej strowej.
Rozžohnowanje nježenjenca je w Drježdźanach zasadźenje policije a helikoptera zawinowało. Zakuklenaj běštaj 38lětneho na parkowanišću namócnje do awta tykłoj a z nim do směra na Pirnu wotjěłoj. Swědkojo hnydom policiju zazwonichu, kotraž pytansku akciju zahaji. Hodźiny pozdźišo namakachu „zawlečeneho“ w Radebeulu na swjedźenju. Wobdźěleni dyrbja akcije dla z chłostanku ličić.
To a tamne (25.04.25)
Jako sobudźěłaćer banki wudawacy so skućićel je mandźelskeju w Neuruppinje na sewjeru Braniborskeje wo 45 000 eurow wobšudźił. 60lětnemu mužej bě paduch telefonisce napowědał, zo so kriminelni na toho konto měrja a zo měł muž pjenjezy spěšnje na druhe konto přepokazać. Jako mandźelskaj jebanstwo spóznaštaj, bě přepozdźe.
Ličba padustwow we wobchodach we Wulkej Britaniskej raznje přiběra. Loni je policija 517 000 padow zličiła. To je 20 procentow wjace hač lěto do toho a mjeztym absolutny rekord. Woprawdźita ličba padustwow je drje wo wjele wyša. Wobchodnicy rěča wo 20 milionach padustwow a wo „epidemiji“. Paduši noša wulke mnóstwa kradnjenych tworow nimo kasow z wobchodow. Sobudźěłaćerjo móža jenož přihladować.
To a tamne (24.04.25)
Z kradnjenym płachtakom do nuzy přišłoj staj bjezdomnaj njedaloko kupy Mallorca. Španičanaj w starobje 53 a 59 lět, kotrajž poprawom na lětanišću dowoloweje kupy žiworitaj, běštaj dwanaće metrow dołhu łódź jutry njedźelu w přistawje pokradnyłoj a z njej na morjo jěłoj. Tam pak zhubištaj orientaciju a wołaštaj wo pomoc. Paduchaj běštaj widźomnje wolóženaj, jako jeju policija zaja, kotraž za pokradnjenym płachtakom hižo pytaše.
Na wšěch 50 kilogramow konopa w kófru měješe 18lětna žona na Berlinskim lětanišću BER, jako z Doha do Němskeje přileća. Dalša žona chcyše z 30 kilogramami cannabisa z Bangkoka zapućować. Namakał je wopojny jěd wukubłany policajski psyk. Minjeny čas so pospyty kopja, drogi w kófrach do kraja pašować.
