To a tamne (06.05.20)

srjeda, 06. meje 2020 spisane wot:

Pjećlětneho za wodźidłom awta lepiła je policija na awtodróze w zwjazkowym staće USA Utah. Policistam pachoł rjekny, zo je po puću do Kaliforniskeje, zo by sej Lamborghini kupił. Měješe pak runje tři dolary při sebi. Zastojnikam bě napadnyło, zo awto jara njewěsće jědźeše. Kaž staršej měnještaj, njebě hólc hišće ženje sam jěł.

Mysteriozne to zadobywanje na zakładnej šuli w sewjerorynsko-westfalskim Kerpenje. Tam běchu skućićeljo wšelake sportowe nastroje ze składa wzali a je wužiwali, mjez druhim trampolin. Prawdźepodobnje běchu dołhi mejski kónc tydźenja wužili, zo bychu so přez třěšne wokno zadobyli a zaso raz porjadnje sportowali. Pokradnyli ničo njejsu.

To a tamne (05.05.20)

wutora, 05. meje 2020 spisane wot:

Zelenina město telewizora: Zhromadnje z dźěćimi w bydlenju kórki a tomaty plahować je w Japanskej w času korona­pandemije dźeń a woblubowaniše. Wikowarjo symjenja w stolicy Tokiju maja ­widźomnje wjace kupcow, kotřiž chcyli w milionowej metropoli z dźěćimi doma w sadźenskich kašćikach zeleninu plahować. Wuwzaćny staw płaći hač do kónca meje, tuž maja hišće trochu chwile.

Po měsacy trajacym čakanju na morju su namórnicy 59lětneho płachtakowarja ze Singapura wuchowali a na kraj dowjezli. Wong Tetchoong bě so spočatk ­februara na tři lěta trajacy dyrdomdej po oceanu nastajił. Po wudyrjenju koronakrizy pak su wšitke přistawy zawrěli. Na Fidźiskich kupach su muža nětko přiwzali: Do karanteny wón njetrjeba, wšako njeje jeho na morju nichtó na­tyknyć móhł.

To a tamne (04.05.20)

póndźela, 04. meje 2020 spisane wot:

Kaču swójbu wuchowali su policisća zhromadnje z dalšimi pomocnikami w delnjosakskim Einbecku. Pilatka hrožachu do gullyja padnyć, na čož ludźo policiju informowachu. Pomocnicy tyknychu je do kartona a donjesechu pilatka k bliskej rěčce. Kačka slědowaše z wěstotnym wotstawkom. Zastojnik akciju nimo toho z policajskim awtom zawěsći. Dospołna kača swójba so skónčnje na rěčce zminy.

Pozdatny mortwy je w Lipsku zasadźenje policije zawinował. 75lětna wobydlerka wjaceswójbneho domu bě ju zazwoniła, po tym zo bě nježiwu wosobu na zadnim dworje ležo widźała. Zastojnicy hnydom přijědźechu, wuhladachu pak tam chětro čiłu młodu žonu. Wona zastojnikam rozłoži, zo bě yoga zwučowała, po tym pak hišće trochu na trawniku wotpočnyła. W tym wokomiku drje bě ju 75lětna wuhladała a so stróžiła.

To a tamne (30.04.20)

štwórtk, 30. apryla 2020 spisane wot:

Z pišćelemi na nakładnym awće je znaty organist Cameron Carpenter z USA tele dny w Berlinje po puću. Ze swojim instrumentom chce 39lětny ludźi zwjeselić, kotřiž dyrbja koronawirusa dla doma wostać. Zahajił bě swoju štyri dny trajacu turneju pod hesłom „All you need is Bach“ wčera w měšćanskim dźělu Spandau. Hač do soboty chce wón před 30 hladarnjemi a starownjemi města twórby Bacha přednjesć.

Ze smjerdźacym kokošacym hnojom chce juhošwedske studentske město Lund tomu zadźěwać, zo so dźensa wječor tysacy młodych ludźi na tradicionalnu Wałporu w měšćanskim parku zhromadźa. Korony dla dyrbi swjedźeń lětsa wupadnyć. Hewak bě so tam w tej nocy stajnje hač do 30 000 ludźi zetkało. Tónraz dominuja tam pryskawy hnoja. To pozitiwne: Trawnik budźe za to ćim rjeńši.

To a tamne (29.04.20)

srjeda, 29. apryla 2020 spisane wot:

Na zadnim sydle awta hólčka porodźiła je žona w Stuttgarće. Nan dźěsća bě ju wčera rano do chorownje wjezł, jako so hrona započachu. Wustróžany zrazy muž na to do před nim jěduceho awta, dokelž bě přepozdźe borzdźił. Nichtó so na zbožo njezrani. Jako pomocnicy přijědźechu, bě žona hižo porodźiła. Chorobne awto dowjeze ju a synka do chorownje.

Z něhdyšich słužbnych košlow cłownikow nastawaja w Berlinje škitne zakryća za wšědny dźeń. Škity zhotowjeja we wobłuku recyclingoweho projekta ze składowanych zelenych košlow, kaž zastupnicy cła zdźěleja. Z jedneje tajkeje šija štyri škity. Trěbny gumij maja ze starych kabatow cłownikow. Košle předźěłuja w Berlinskich dźěłarnjach zbrašenych. Tam nastawaja z košlow tež toboły a nachribjetniki. Wšitke dochody su na dobro dźěłarnjow zbrašenych.

To a tamne (28.04.20)

wutora, 28. apryla 2020 spisane wot:

Z wulkimi a nadměrnymi kłobukami na hłowje chcedźa wuknjacy zakładneje šule w chinskim měsće Hangzhou socialny wotstawk dodźeržeć pomhać. Pisane, meter wulke kłobuki běchu sej dźěći z pomocu staršich doma same zhotowili. We wuchodochinskim měsće z dźewjeć milionami wobydlerjow su po 99 dnjow trajacej přestawce koronawirusa dla šule zaso wotewrjene.

Hišće hač do lěća chcedźa Lipšćanske dźiwadłowe dźěłarnje škit za hubu a nós produkować. Hač do julija móhło jich tak 46 000 hromadu přińć, přiwšěm so šwalče nadźijeja, zo móža so potom zaso swojemu poprawnemu dźěłu wěnować a kostimy za přichodnu hrajnu dobu šić. Dźěłarnje běchu w měrcu po zawrjenju hrajnišćow koronapandemije dla započeli tajke škitne srědki zhotowjeć.

To a tamne (27.04.20)

póndźela, 27. apryla 2020 spisane wot:

Stara a jednora šijawa je so w hornjobayerskim Morsbachu wo rjany podawk postarała. Wobsedźer nastroj wjace njetrjebaše a wotstaji jón na kromu puća ­jako dar. Zo bě mašinu něhdy jako schow pjenjez wužiwał, je 56lětny dawno zabył. 21lětny wza šijawu sobu domoj a namaka w njej tysac eurow. ­Dokelž wobsedźerja njeznaješe, prošeše policiju wo pomoc, a ta 56lětneho wuslědźi, kiž bě telko sprawnosće dla hnuty.

Pjany kolesowar je so w Zhorjelcu dowěrliwje na zastojnikow Zwjazkoweje policije wobroćił. Zastojnicy běchu w nocy na njedźelu wobkedźbowali, zo 20lětny chětro chabłajo po dróze jědźe. Prjedy hač móžachu jeho zadźeržeć, muž pola nich zasta a so přećelnje wopraša: „Móžeće mje domoj dowjezć?“ Woni pak wzachu jeho sobu na policajsku stražu, hdźež je test alkohola 1,8 promilow wunjesł.

To a tamne (24.04.20)

pjatk, 24. apryla 2020 spisane wot:

Přetwarjene žwjenkačkowe awtomaty na dobro pčołkow so w Němskej dale rozšěrjeja. Za projekt, kotryž běchu před poł lětom w Dortmundźe z jeničkim awto­matom zahajili, je mjeztym po wšej Němskej 20 sobuwojowarjow. Přetwa­rjene nastroje wudawaja nopaški ze symješkami, kotrež překasancam w časach zazyglowanych płonin, pesticidow a monokulturow pomhaja přežiwić. Wuchowarjo pčołkow akcija jara zwjesela.

Małeho leoparda mylnje za kóčku měli a sobu domoj wzali su dźěći w Nepalu. Woni běchu małe rubježne zwěrjo při hrajkanju na kromje lěsa namakali. Jako pak wone naraz cyle hinak mjawčeše hač kóčka, informowaše swójba sobudźěła­ćerjow weterinarneho zarjada. Tući dowjezechu małeho leoparda do stacije za namakane dźiwje zwěrjata, dokelž njeby w lěsu sam přežiwił.

To a tamne (23.04.20)

štwórtk, 23. apryla 2020 spisane wot:

Sławny běh po schodach New-Yorkskeho Empire State Building su tónraz koronapandemije dla wotprajili. Zarjadowanje chcedźa hakle klětu zaso přewjesć, kaž organizatorojo zdźěleja. Wobdźělnikow su mjeztym informowali. Poprawom bě 43. běh toho razu 12. meje planowany. Loni bě Polak Piotr Łobodziński 1 576 schodźenkow znateho twarjenja w Manhattanje w dźesać mjeńšinach a pjeć sekundach zmištrował a tak dobył.

Koronawirus pola domjaceho skotu zwěsćili su prěni króć w USA. Dwě kóčce w zwjazkowym staće New York su pozitiwnje na wirus testowali. Skoćeći, kotrejž bydlitej na rozdźělnymaj městnomaj zwjazkoweho stata, měještej problemy při dychanju. W jednym padźe bě tež wobsedźer kóčki pozitiwny. Dotal njeje dopokazow, zo móže domjacy skót wirus přenjesć.

To a tamne (22.04.20)

srjeda, 22. apryla 2020 spisane wot:

Twarcy elektriskich šijawow w Japanskej njemóža tuchwilu dočinić, dokelž sej dale a wjace ludźi w kraju škit za hubu a nós samych šije, kaž nowiny rozprawjeja. Zawody maja trójce telko skazankow kaž hewak w tym času na blidźe. Dokelž nimaja w Japanskej dosć škitow, sej mnozy nětko šijawy kupja. Mustry za šiće firmy internetnje poskićeja.

Hudźba z wótřerěčakow ma zwěrjatam w bayerskich lěsnych parkach pomhać wostudu přewinyć, kotruž pobrachowacych wopytowarjow dla tuchwilu pasu. Za to hladarjo zwěriny wšědnje hudźbny program zestajeja a jón wot ranja we wosmich do wječora w šesćich wusyłaja. Při tym su wiolinowe koncerty runje tak słyšeć kaž twjerdy rock skupiny AC/DC. Mjez spěwami wothrawaja wodźenja wopytowarskich skupin. Koronawirusa dla su wšitke bayerske parki dźiwjeje zwěriny hač do 3. meje zawrjene.

słowo lěta 2020

nawěšk

SERBSKE NOWINY podpěruja:

Novi Sad – kulturna stolica Europy

nowostki LND