To a tamne (05.08.24)
W Frankfurtskim domje je so nětko wulki problem wujewił. Tak bě wjerch za wołtarjom mokry. Wohnjowa wobora je z wosebitym nastrojom wodu nad wjerchom wotklumpała. Sčasami běše to něhdźe 500 litrow. Fachowcy na to zwěsćichu, zo je roła zatykana, tak zo je woda za druhim pućom pytała. Rěčnik wohnjoweje wobory zdźěli, zo bě na wjerchu za wołtarjom jenož mokry blak widźeć. Fachowcy dyrbja nětko škodu zwěsćić.
Swójba z New South Wales bě z bydlenskim wozom po Awstralskej po puću. Zawčerawšim pozastachu při rěce, dokelž chcyše nan wudźić. Tola naraz je so muž zhubił. Wuchowanscy pomocnicy nětko za nim pytaja. Mjeztym maja woni teoriju. Tak wuchadźeja z toho, zo je snano krokodil muža nadpadnył.
To a tamne (02.08.24)
Paducha kolesa lepił a na policajsku stražu přiwjezł je 60lětny muž w Kölnje. Do toho bě jemu paduch koleso před pjekarnju spakosćił a z nim wotjěł. Muž pak jeho krótko na to wuhlada a narěča. Po krótkim rozestajenju 60lětny paducha hrabny a policistam přepoda. 29lětny dyrbi so padustwa dla zamołwić. Nimo toho bě test na kokain pozitiwny.
Klimowych aktiwistow po puću na blokadu lepili su policisća dźensa rano w Hamburgu. Wobsadce policajskeho awta bě skupina młodostnych rano zahe na kolesach njedaloko Hamburgskeho lětanišća napadnyła. Jako kolesowarjo policiju wuhladachu, spytachu ćeknyć. Zastojnicy štyrjoch z nich zadźeržachu a namakachu we wačokach młodostnych nožicy za grót, warnowanske lacy a lěpk. Podhladnych nachwilnje zajachu. Wočiwidnje chcychu woni lětanišćo zlemić.
To a tamne (01.08.24)
Nopawu popadnył je wudźer w Badensko-Württembergskej a je zwěrjo na to wusadźił. Tole su policisća zwěsćili. Kolesowarka bě nopawu na kromje dróhi wuhladała a sobu domoj wzała. Pozdźišo dowjeze zwěrjo na policajsku stražu. Zastojnicy zwěsćichu, zo ma nopawa hóčku wudźerja hišće w klamje. Nitku bě wón drje wotrězał. Zastojnicy dowjezechu nopawu do zwěrjatownje.
Běły mjedwjedź je w Grönlandskej němskeho slědźerja nadběhował a zranił. Muž dźěłaše při slědźenskej staciji Mestersvig, jako so zwěrjo do njeho da. Slědźerja dowjezechu do chorownje, mjedwjedźa su zatřěli. Lětsa wobkedźbuja njewšědnje wjele běłych mjedwjedźow, kotřiž so za picu pytajo sydlišćam bliža. Hakle njedawno dyrbjachu wuhłódnjeneju muskeju mjedwjedźow morić, kotrejž měrještej so na hrajkanišćo.
To a tamne (31.07.24)
Double Rolanda Kaisera steji wot minjeneho kónca tydźenja w kabineće wóskowych figurow Mademe Tussauds w Berlinje. 72lětny Kaiser bě widźomnje hnuty, kak perfektnje běchu jeho napodobnili, hač k fałdam w mjezwoču. Na wšěch pjeć hodźin bě Kaiser swój čas sobudźěłaćerjam kabineta z modelom był. Kopiju mjezwoča su w Londonskej dźěłarni zhotowili. Po terminje w Berlinje poda so wón do Drježdźan na jewišćo při Łobju, hdźež tysacy na njeho čakachu.
Z 85 000 wobdźělnikami zahaja dźensa w Schleswigsko-Holstenskim Wackenje festiwal pod hołym njebjom. Zastupne lisćiki běchu před lětom za štyri hodźiny wupředate. Festiwal traje hač do njedźele. Je to najwjetše zarjadowanje heavy-metal hudźby po wšěm swěće. Spektakl zahaja z koncertom dujerskeje kapały Wackenskeje wohnjoweje wobory.
To a tamne (30.07.24)
Hoberskeho afriskeho pytona namakał je psyk w Korutanskej, jako ze swojim wobsedźerjom so přechodźujo w lěsu čušleše. Wobsedźer natoči spěšnje hišće widejo, prjedy hač so had njedaloko Wörtherskeho jězora w lěsu zminy. Fachowča za hady sej widejo wobhladawši wobkrući, zo njeje had jědojty. Wotkal hoberski pyton pochadźa, njeje znate. Najebać to su wohnjowi wobornicy lěs přepytali a hada skónčnje popadnyli.
Wot wulkeje wody sobu storhnjene awto su po wosom lětach w Delnjej Bayerskej zaso namakali. Masy wody běchu jězdźidło 2016 sobu wzali. Awto wosta we wužłobinje tčacy, pěski rěki je poněčim pokrychu. Při twarskich dźěłach při awstriskej mjezy su je nětko namakali, pjeć metrow pod zemju. Papjery ležachu hišće w armaturowym fašku. Wobsedźer pak hižo w Němskej njebydli.
To a tamne (29.07.24)
Němske mišterstwa w suwanju po mórskim błóće su kónc tydźenja w sewjernomórskim Dangasće přewjedli. Při tym dyrbjachu wobdźělnicy 150 metrow błóćaneje čary na drjewjanym suwadle zmištrować, z jednej nohu klečo na krosnje, z druhej so wotsuwajo. Něhdźe tysac ludźi je sej spektakl wobhladało, kotryž wotmě so mjeztym dźesaty króć we wobłuku festiwala. Na nim přewjeduja nimo toho koncerty a informaciske zarjadowanja wo jónkrótnym watowym morju.
Do kupnicy zabłudźił je so młody sornik w Landsbergu pola Halle. Młode zwěrjo njeje drje wjace wuchod wobchoda namakało, běhaše panisce mjez regalemi a njeda so změrować. Sobudźěłaćerjam so skónčnje poradźi, sornika do składa zaćěrić a tam zamknyć. Přiwołanaj hajnikaj zwěrjo popadnyštaj a na susodnym polu do swobody pušćištaj.
To a tamne (26.07.24)
Mechaniski dinosawrier je so z dožiwjenskeje wustajeńcy „Jurassic World: The Exhibition“ w Mexiku zhubił. Nětko přepytuja padustwa dla, policija zdźěli. Kradnjeny objekt je podobizna młodeho pterodactylusa, kiž je dźěl wustajeny w mexiskej stolicy. W interaktiwnej přehladce, kotraž bě w decembru tež w Berlinje, zatkawaja wopytowarjo podobizny originalnych dinosawrierow, kaž suroweho tyrannosaurusa rexa. Kradnjeny eksemplar je 100 000 eurow hódny.
Mylnje na lisćinu zakazanych wotnožkow Hamburgskeho islamskeho centruma zapisała je zwjazkowa nutřkowna ministerka Nancy Faeser (SPD) tež modowu a parfimowu marku Chanel. Nastało je tole přez redakcionalny zmylk w zwjazkowym powěstniku, nutřkowne ministerstwo zdźěli. Zmylk chcedźa po najspěšnišim puću korigować.
To a tamne (25.07.24)
Šěsćlětneho syna prosće zabył je muž na awtodróhowym parkowanišću na A 13 pola Radeburga. Policija dyrbješe žałosćace dźěćo z małym barikom tróštować, doniž so nan njenawróći. Tón bě po krótkej přestawce dale jěł a njebě ani pytnył, zo je hólc mjeztym z awta wulězł. Skónčnje móžeštaj nan a syn zhromadnje z jězbu do Berlina pokročować.
Prěni spionažny skandal maja na olympiskich hrach w Parisu, prjedy hač su so hry započinali. Žónske koparske mustwo Neuseelandskeje bě při treningu wospjet trut wuhladało, kotryž žony wobkedźbowaše. Lětacy objekt słušeše kanadskim koparkam, prěnim přećiwnikam neuseelandskich žonow dźensa wječor. Kanada je asistencnu trenarku Jasmine Mander mjeztym domoj pósłała. Trenarka mustwa Bev Priestamnn njebudźe dźensa na kromje hrajnišća stać.
To a tamne (24.07.24)
Balony wotpadkow ze Sewjerneje Koreje su na ležownosći prezidentskeho palasta w južnokorejskej stolicy Seoulu přizemili. Po informacijach wěstotneje słužby njewobsteji strach kontaminacije. Je to druhi króć, zo sćele Pjöngjang wotpadki do Južneje Koreje. Pječa reaguja na južnokorejskich aktiwistow, kotřiž sćelu z balonami lětaki do komunistiskeho kraja. Seoul nětko zaso z wótřerěčakami podłu mjezy swojeho susoda agituje.
Kölnsko-Bonnske lětanišćo zlemili su klimowi aktiwisća dźensa rano. Pjeć ludźi je so na čarje přilěpiło, kotrež wužiwaja lětadła, zo bychu čaru wotlěta a přizemjenja docpěli. Lětanišćo dyrbješe dźěło najprjedy raz přetorhnyć. Aktiwisća běchu groćany płót lětanišća přerězali. Demonstranća skupiny Poslednja generacija žadaja sej kónc fosilnych energijowych nošakow hač do lěta 2030.
To a tamne (23.07.24)
Połnaheho a napiteho muža je policija w nocy na sobotu w Dortmundźe z 45 metrow wysokeho krana na twarnišću wuchować dyrbjała. 54lětny měješe so za wodźerja twarskeho nastroja. Swědkojo běchu muža wosrjedź nocy w kabinje krana wuhladali. Po tym zo njemóžeše policija jeho přeswědčić, sam z krana zalězć, zasadźichu teleskopowy rěbl. W kabinje krana namakachu alkoholiske napoje. Muž bě chětro napity a jenož spódnje cholowy zdrasćeny.
Protestny camp přećiwo kapitalizmej su punkerojo na kupje Sylt zahajili. Wobdźělnicy su wjace hač 30 stanow njedaloko lětanišća nastajili. Započeli běchu akciju před lětomaj, jako móžachu z jězdźenku za dźewjeć eurow přijomnje na kupu dojěć. Tam protestuja přećiwo gentrifikowanju: Bohačcy kupuja imobilije a domoródnych dale a bóle wutłóča.
