To a tamne (05.05.26)
Pod hashtagom „Wopušćimy X“ su frakcije a strony SPD, Zwjazka 90/Zelenych a Lěwicy zwjazkoweho sejma internetnu platformu za krótkopowěsće X Elona Muska demonstratiwnje wopušćili. „Mjezsobna wuměna je zakład politiskeje debaty. Platforma X pak přisporja dale a bóle jenož desinformaciju“, rěka w zdźělence zastupjerjow stronow. Na druhich platformach socialnych medijow pak wostanu strony nadal prezentne, woni wuzběhnychu.
Hačrunjež płaćizny kakawa hižo wjacore měsacy spadowali, njejsu wulke zežiwidłowe koncerny swoje płaćizny za wudźěłki ze šokolady znižili. To praji nawoda drobnowikowanskeho koncerna REWE Lionel Souque w rozmołwje z magacinom „Der Spiegel“. Jako špatny přikład mjenuje w tutym zwisku konkretnje marki Milka, Lindt a Mondelēz.
To a tamne (04.05.26)
39lětneho podhladneho je awstriska policija wčera w zwisku ze zajědojćenymi škleńčkami jědźe za ćěšenki firmy Hipp w awstriskim zwjazkowym kraju Salzburg zajała. Tuchwilu jeho hišće přesłyšuja. W běhu dnja chcedźa muža do jastwa Eisenstadt na wuchodźe Awstriskeje dowjezć. Za dalšej zajědojćenej škleńčku policija nadal slědźi. Hač je skućićel w padźe wudrěwanja sam jednał abo hač měješe pomocnikow, tuchwilu jasne njeje.
Za něhdźe 56 miliardow dolarow chce předewzaće Gamestop, kiž je so na widejowe hry specializowało, eBay přewzać. Gamestop hižo něhdźe pjeć procentow akcijow eBay wobsedźi. Šef předewzaća Ryan Cohen zdźěli, zo chce wón eBay – najwjetše online-wikowanišćo swěta za trjebane twory – ke chutnišemu konkurentej předewzaća Amazon přetwarić.
To a tamne (30.04.26)
Jehnjatko Henry je najmłódši sobudźěłaćer gmejnskeho zarjada w Čornym lěsu. Šefina radnicy gmejny Enzklösterle Sabine Zenker so wšědnje wo nje stara. Jako dźak ju jehnjo na wšěch jeje terminach přewodźa. Dokelž młodźo hižo mać nima, jemu nětko wjesnjanostka kóždu druhu hodźinu mloko dawa. Mało spara wona za swojeho „synka“ rady akceptuje.
Na awtodróze A 4 w směrje na Drježdźany je wčera popołdnju jězdźidło wójska USA z awtokranom hromadu zrazyło. Kak je k njezbožu blisko přijězda Frankenberg dóšło, policija hišće njewě. Wona pak pad nětko přepytuje. Šofer jězdźidła so lochce zrani. Awtodróha bě w směrje na Drježdźany wjacore hodźiny zašlahana. Škodu trochuja eksperća na něhdźe 50 000 eurow. Nawječor bě jězdnja zaso swobodna.
To a tamne (29.04.26)
Dokelž je sej priwatnje z wojerskim helikopterom wójska USA wulećał, dyrbi sej zakitowanski minister Pete Hegseth tójšto kritiki lubić dać. Hegseth bě so „z přećelom“ a někotrymi pilotami wójska USA zetkał. Hłowny hósć bě hudźbnik Kid Rock, „patriot a podpěraćel našich wojakow“, Hegseth internetnje piše. Kaliforniski guwerner Gavin Newsom nima za to zrozumjenje: Čehodla dyrbja dawkipłaćerjo wulět Kida Rocka „w sto milionow dolarow drohim helikopteru“ financować?
Dźesać dulow złota chce gmejna Bannewitz pola Drježdźan towarstwam a iniciatiwam rozdźělić. Kaž komuna ze 11 000 wobydlerjemi zdźěla, ma 30 towarstwow ze sensacionalneje namakanki lěpšiny měć. Mjez nimi su wohnjowa wobora, póstniske, hudźbne a rejwanske towarstwa. Gmejnscy dźěłaćerjo běchu złoto w oktobru našli, jako trawu syčechu.
To a tamne (28.04.26)
Swój prěni dener je 92lětna rjadniska sotra w porynsko-pfalcskim Koblenzu jědła. Jeje sobusotra je podawk ze šmóratkom dokumentowała a na Instagramje wozjewiła. Rjadniske sotry běchu z awtom do Triera putnikowali a chcychu na kóncu hišće powječerjeć. Pytajo za hosćencom z wulkim parkowanišćom – zo njetrjebali sotry we wysokej starobje daloko běžeć – dojědźechu sej na přemysłowy areal. 92lětna Irmingard bě wot prěnjeho denera dospołnje zahorjena.
Prawidłownje kumštneje inteligency (KI) w dušinych a lubosćinskich naležnosćach so prašeć, je dźeń a wjace młodostnym samozrozumliwe. Tole je Załožba za bój přećiwo depresijam w Lipsku při woprašowanju zwěsćiła. Na wšěch 65 procentow ludźi hač do 39 lět wužiwa KI. Při tym dźe wo wšědny stres a lubosćinsku ból, lědma pak wo depresije.
To a tamne (27.04.26)
Po nimale měsacu chcedźa w pěsku tčacu wjelrybu w Baltiskim morju nětko z pomocu nakładneho čołma wuswobodźić a do hłubokeho morja dowjezć. Nakładny čołm bě wčera do Kiela dojěł. Wottam ma po kanalu Baltiske morjo docpěć. Najzašo jutře wočakuja čołm na městnje, hdźež wjelryba přeco hišće we wodźe leži. Zwěrjo je mjeztym chětro słabe. Najebać to maja fachowcy wuchowanje za móžne. Nowy pospyt wuswobodźenja financuja priwatnicy.
Njemdri šoferojo, kotřiž so doprědka tłóča a so při tym wěstotneho wotstawka wohladaja, su na dróhach najnjewoblubowaniši. Tole je wuslědk woprašowanja mjez dobrymi tysac šoferami wosobowych awtow. 44 procentow z nich tole najbóle hněwa, mjez žonami je jich samo 47 procentow.
To a tamne (24.04.26)
Dźesać kruchow złota, kotrež běše gmejnski sobudźěłaćer w Bannewitzu loni w oktobrje při syčenju trawy nadešoł, móže sej gmejna zdźeržeć. W šěsć měsacach předpisaneje čakanskeje doby so nichtó přizjewił njebě, kiž by dopokazać móhł, zo jemu wjacore dźesaćitysacy eurow hódny pokład słuša, zdźěli wjesnjanosta gmejny Heiko Wersig.
Princ Harry je Kijewčanow wčera ze swojim njewočakowanym wopytom překwapił. Mjez druhim wobdźěli so w ukrainskej stolicy na wěstotnym forumje a zetka so z wobdźělnikami wubědźowanja Invictus Games za zranjenych wójnskich weteranow, kotrehož załožićel wón je. Nimo toho wopyta organizaciju za wotstronjenje minow Halo Trust. Princ Harry njeběše w nadawku britiskeho kralowskeho domu po puću, ale priwatnje.
To a tamne (23.04.26)
Dokelž je přewótře šnicle klepał, bu muž w Baworskim Geiselhöringu wot swojeho 61lětneho susoda atakowany. Tón bě klepanja dla čuwy zhubił a zaklinka pola hobby-kucharja, kotryž sej runje wječer přihotowaše. Po tym zo bě tón ničo złeho njewočakujo durje wočinił, jeho rozhorjeny a njemdry susod werbalnje kaž tež ćělnje nadběhowaše. Policija dyrbješe zapřimnyć.
Lubowarjo hwězdźinow měli dźensa w nocy njebjo dokładnje wobkedźbować. Šansa, wulku ličbu tajkich wuhladać, je wulka. Dokelž je młody měsačk lědma widźeć, su wuměnjenja za wobkedźbowanje tak mjenowanych Lyridow idealne. W času wot połnocy hač k schadźenju słónca móžemy z 15 do 20 hwězdźinami na hodźinu ličić, připowědźi předsyda Zjednoćenstwa přećelow hwězdow Uwe Pilz.
To a tamne (22.04.26)
Alfons Schuhbeck nadal do jastwa hić njetrjeba. Z telewizy znateho kucharja a gastronoma su loni mjez druhim wobšudnistwa a dlijenja insolwency dla k štyrjom lětam a třom měsacam jatby zasudźili. Mjeztym je 76lětny na raka schorjeł a tohodla tuchwilu jatbykmany njeje, kaž posudźowar potwjerdźi. Mnichowske statne rěčnistwo je započatk jatby tohodla znajmjeńša hač do septembra přestorčiło. Po tym chce strowotu Schuhbecka znowa přepruwować dać.
W arenje w španiskim měsće Sevilla je wjac hač 500 kilogramow ćežki ćělc ze swojimaj rohomaj woblubowaneho španiskeho torera Morante chutnje zranił. Dwě hodźinje dołho su 46lětneho w chorowni operowali, rozprawja nowina El País. Arena z mjenom La Maestranza je jedna z najznaćišich městnosćow wulkich coridow – bojow z bykami – we kraju.
To a tamne (21.04.26)
Za „bohahanjenje“ ma Nancy Sinatra, dźowka legendarneho US-ameriskeho entertainera Franka Sinatry, zo je Donald Trump na swojim kanalu w socialnych medijach „truth-social“ widejo wozjewił, hdźež Sinatra swój evergreen „My Way“ spěwa. Na prašenje fanow, hač nochce přećiwo wozjewjenju zakročić, wona praji, zo móhli to jenož zamołwići nakładnistwa, dokelž sama prawa na spěwje nima.
Ličba kmótřistwow za wjelryby je so zrazom zwyšiła. To je wuskutk kopicy zdźělenkow wo wjelrybje „Timmy“ w poslednich tydźenjach, zdźěli přirodoškitna organizacija WWF. W najkrótšim času je dohromady 113 nowych kmótřiskich zrěčenjow za škit najwjetšich mórskich cycakow dóšło. Tež druhe přirodo- a zwěrinoškitne organizacije wo stupacej ličbje pjenježnych darićelow w poslednim času rozprawjeja.
