To a tamne (22.07.25)
Myto 5 000 eurow poskićuje Bielefeldski galerist tomu, kiž jemu pokradnjeneho, dwanaće centimetrow wulkeho barika wróći. Dotal je wón tysac eurow poskićił. Wyše myto ma paduchej „lukratiwny poskitk“ być. Małeho barika „mini“ su njeznaći spočatk junija w Berlinje spakosćili, jako wuměłc w hosćencu w Berlinje sedźeše. Wot toho časa za barikom pytaja. Tón ma za galerista wulki wuznam, dokelž je dar jeho zemrěteje maćerje.
Policija warnuje turistow na španiskej dowolowej kupje Mallorca před ilegalnymi předawarjemi napojow na brjoze. „Konsum cocktailow kaž mojito abo sangrija, kiž ilegalni wikowarjo na brjoze Playa de Palma předawaja, chowa w sebi wulki strach za strowotu“, piše lokalna policija. Njedawno běchu wobkedźbowali, kak wikowarjo płody za napoje na próšnej zemi parkowanišća nakraja.
To a tamne (21.07.25)
Bananu, kotraž bě z lěpjacym banćikom při wuměłskej mólbje w Centre Pompidou w francoskim Metzu přičinjena, je nižozemski wopytowar zjědł. Banana wisaše tam wot 8. meje a bě dźěl sławneje wuměłskeje twórby „Comedian“ italskeho wuměłca Maurizia Cattelanana. Tuta je šěsć milionow eurow hódna, muzej zdźěla. Bananu su spěšnje narunali. Nižozemjan nowinarjam rjekny, zo je tajku drohu bananu raz woptać chcył.
Winowatostnu płuwansku wučbu na zakładnych šulach Němskeje žada sej Lěwica. Hladajo na přiběracu ličbu zatepjenych je tole nuznje trěbne, strona zdźěla. Wona je mjeztym akciski plan předstajiła. Dalše žadanja su mjez druhim inwesticiski program na dobro kupjelow a wjace personala. Nimo toho měł zastup do kupjelow „wšudźe a trajnje“ za dźěći a młodostnych zapłaćomny być.
To a tamne (18.07.25)
Felix Baumgartner, awstriski ekstremny sportowc, je smjertnje znjezbožił, jako ze swojim płujadłowym parašutom lećeše. 56lětny zrazy z dotal njeznateje přičiny w italskim pobrjóžnym městačku Adrije, Porto Sant‘Elpidio, na zemju, kaž policija zdźěla. Awstričan bu 2012 po wšěm swěće znaty, jako ze stratosfery na zemju skoči a jako prěni čłowjek zwukowu murju přewiny.
Wolfgang Grupp, bywši šef koncerna Trigema, je spytał sej žiwjenje wzać a je tole mjeztym wozjewił: „Sym w 84. lěće swojeho žiwjenja a ćerpju na tak mjenowanej depresiji starych ludźi. Tohodla sym spytał swoje žiwjenje skónčić“, piše 83lětny w lisće swojim něhdyšim sobudźěłaćerjam. Wón bě so prašał, hač je scyła hišće trěbny. Grupp wobžaruje, štož je so stało, a radźi wšitkim potrjechenym, sej profesionalnu pomoc pytać.
To a tamne (17.07.25)
Wulki woheń je hłowne jewišćo najwjetšeho festiwala elektroniskeje hudźby w belgiskim Boomje krótko do jutřišeho zahajenja chětro wobškodźił. Organizatorojo chcedźa festiwal Tomorrowland najebać to kaž planowane přichodny kónc tydźenja přewjesć. Wočakuja 400 000 wopytowarjow z 200 krajow. Cyłkownje planuja wjace hač 600 wustupow skupin na wjacorych jewišćach. Wohnjowa wobora měni, zo bě lochkomyslnosć při wobchadźenju z pyrotechniku přičina wohenja.
Jako rjemjeslnikaj zdrasćenaj paduchaj staj staršeju mandźelskeju w Berlinje-Steglitzu wobkradnyłoj. Njeznataj twjerdźeštaj, zo dyrbitaj syć pitneje wody pruwować, dokelž je so w susodstwje roła puknyła. Jako mandźelskaj po woli „rjemjeslnikow“ wodu w kuchni wobkedźbowaštaj, paduchaj bydlenje přeborkaštaj a pjenjezy a debjenki kradnještaj.
To a tamne (16.07.25)
Dalejězbu ćaha je žona w Hessenskej skomdźiła. Jako dyrbješe regionalny ćah čerwjeneje swěcy dla pozastać, bě wona ze swojim psom wustupić šła. Po tym zo bě signal zaso zeleny a ćah wotjěł, steješe žona ze Šwedskeje ze swojim psom hišće na łuce při kolijach. Dalši ćah, kotryž dyrbješe tohorunja čakać, žonu sobu wza. Na dwórnišću w Fuldźe nječakaše jenož mandźelski, ale tež policija.
Dokelž staj sławny štom Robina Hooda ilegalnje pušćiłoj, dyrbitaj mužej w Jendźelskej wjacore lěta do jastwa. Sudnistwo w Newcastlu zasudźi kóždeho za štyri lěta a tři měsacy do jastwa. Njeskutk měješe „wulke socialne wuskutki“, sudnica rjekny. Worakawstwo 32- a 39lětneho bě we Wulkej Britaniskej a po wšěm swěće zludanje zbudźiło. Wobaj běštaj sto lět staru kulisu mnohich filmow w septembru 2023 podrězałoj.
To a tamne (15.07.25)
Njewšědna křižowanka mjez lawom a tigrom – tak mjenowany liger – je so w priwatnym zwěrjencu w rumunskim měsće Zaharesti narodźił. Mjeztym dźewjeć tydźenjow stare muske skoćo derje rosće, zdźěli skótny lěkar Gabriel Gaspar. Nan Goliatha, kaž jeho hladarjo mjenuja, je law, mać pak tiger. Wobaj stej w priwatnym zwěrjencu Dorina Soimaruwa žiwej.
Wjetšina ludźi w Němskej nikomu cuzemu swój smartphone njepřewostaja. 64 procentow wobdźělnikow woprašowanja instituta Dynata w nadawku poskićowarja Swappie swoje šmóratko dale njedawa. 26 procentow woprašowanych da swójske šmóratko znajmjeńša partnerej abo partnerce. Młódši ludźo druhim časćišo přistup dowola hač starši. Wosebje přećelkam a přećelam młodostni mjez 18 a 24 lětami časćišo wužiwanje zmóžnjeja.
To a tamne (14.07.25)
W durinskim Mühlhausenje je muž cuzeho pjaneho w swojim bydlenju našoł. Muž bě so štwórtk pozdźe wječor domoj nawróćił. Tam wón zwěsći, zo buchu durje jeho bydlenja z gwałtom rozłamane. Policija zdźěli, zo bě muž na to zastojnikow informował, kotřiž pjaneho z bydlenja přewodźachu. Při tesće alkohola zwěsćichu dohromady dwaj promilej. Čehodla bě so muž do cuzeho łoža lehnył, policija nětko přepytuje.
Jatemu je so poradźiło w toši swojeho runje pušćeneho sobujateho z jastwa w francoskim Lyonje ćeknyć. Jataj běštaj sej celu w dospołnje přepjelnjenym jastwje dźěliłoj. Tež tohodla bě zastojnikam hakle 24 hodźinow po ćeknjenju napadnyło, zo muž pobrachuje. Nětko internje přepytuja, kak je jaty, kotremuž wjacore złóstnistwa wumjetuja, ćeknyć móhł, rozprawjeja wjacore nowiny.
To a tamne (11.07.25)
Agresiwny byk pućowarjow w Šwicarskej mjerza. Narodna warnowanska słužba Alertswiss je přez swoju app ludźi před swobodnje so hibacym skoćećom w pućowanskim regionje Montalchez-Les Prises w kantonje Neuenburg warnowała. Na žadyn pad njeměli so ludźo něhdźe 600 kg ćežkemu bykej bližić. Štóž jeho wuhlada, měł na blaku nuzowu słužbu pod čisłom 117 zwonić. Policija so wo pad stara.
Dlěje hač dźesać dnjow młodu Němku hižo pytaja, kotraž mjeztym dwě lěće po Awstralskej pućuje. Nětko drje su policisća jeje awto nadešli, ale nichtó njewě, dokal je so žona zhubiła. Na awće samym běchu policisća mechaniske brachi zwěsćili. Wo tym rozprawja nowina The West Australian. Zo bychu žonu z mjenom Wilga prawje bórze namakali, su mjeztym přidatnych zastojnikow zasadźili.
To a tamne (10.07.25)
US-ameriskeho influencera a pilota Ethana Guoa je chilska justica po njedowolenym přizemjenju w Antarktice pochłostała. Wón bě pječa wopačny plan wo swojim lěće zapodał a bjez dowolnosće na chilskej slědźenskej staciji w Antarktice přizemił. Guo chce ze swojim lětadłom po wšěch sydom kontinentach lećeć a tak dary za dźěćacy centrum hojenja raka w USA zběrać. Wjace hač milion ludźi jeho akciju na socialnych syćach sćěhuje.
Serval je póndźelu wječor w měsće Reinbek blisko Hamburga ze swojeho chlěwa ćeknył. To je dźiwja kóčka, kotraž móže strašna być, čuje-li so wohrožena, informuje město. Štóž zwěrjo wuhlada, měł so na město abo policiju wobroćić. Popadnyć pak kóčku nichtó njeměł. Servale pochadźeja z Afriki, hdźež su wosebje južnje Sahary žiwe.
To a tamne (09.07.25)
Dźiwadźelnik Lennart Borchert, kotryž je wosebje z telewizijneje serije „GZSZ“ znaty, wočakuje zhromadnje ze swojej partnerku Louisu swoje prěnje dźěćo, tole zdźěli sćelak RTL. Po informacijach sćelaka budźe to hólčk. Za staršeju tole samozrozumliwe njeje, wšako bě Lennart před pjeć lětami diagnozu raka mudow dóstał. Tohodla je tehdy hižo spermije zamjerznyć dał. Porik so tuž ćim bóle nad samodruhosću wjeseli.
Na wšelkich platformach w interneće kursěruja w poslednim času sfalšowane poskitki dźěłowych městnow. Před tutymi warnuje nětko tež sakska centrala přetrjebarjow. Z pomocu poskitkow spytaja jebarjo wosobinske daty swojich woporow pokradnyć. Centrala doporuča tuž poskitki jara dokładnje pruwować a wosebje wopisanje dźěła wobkedźbować.
