To a tamne (13.03.26)
We wokrjesu Prignitz bě wčera dźewjeć bykow ćeknyło. Za nimi zamołwići přeco hišće pytaja. „Nimamy woprawdźe hišće žane slědy“, rjekny nowinski rěčnik wokrjesa. Weterinarny zarjad pytańcu podpěruje. Transporter ze 27 skoćatami bě so štwórtk na nakrajnej dróze powróćił. Dźesać bykow bě při tym twochnyło, jednoho dyrbjachu hišće na městnje zatřělić.
Změna klimy wuskutkuje so na dołhosć dnjow. Tole su slědźerjo z Awstriskeje a Šwicarskeje nětko zwěsćili. W minjenych milionach lět njeje so rotacija zemje hišće nihdy tak masiwnje spomaliła, kaž zašłe lětdźesatki, rjeknychu wědomostnicy. Rotacija zemje so wo 1,33 milisekundy wob lětstotk podlěši. Tole drje so na wšědny dźeń njewuskutkuje, wobwliwuje pak precizne wobličenja, na přikład za nawigaciju w swětnišću.
To a tamne (12.03.26)
Twarski kran je so wutoru w Erkrathće pola Düsseldorfa při składowanju twaršćiznow powalił a na hruby twar padnył. Hoka krana pak zrazy do susodneho bydlenskeho domu. Fachowcy trjebachu hač do wječora, zo bychu kran zaso zběhnyli. Wjacore twarjenja dyrbjachu ewakuować. Wobydlerjo přebywachu tak dołho pola znatych. Hakle wječor wokoło 22 hodź. smědźachu ludźo zaso do swojich bydlenjow.
Po hodźiny trajacej hawariji wšitke nuzowe telefony podłu awtodróhow Němskeje zaso funguja. Tuchwilu nuzowe stacije zaso normalnje funguja, awtodróhowy zawod Zwjazka zdźěla. Wutoru wječor běchu telefony podłu awtodróhow wupadnyli. Přičina bě techniski defekt pola eksterneje firmy, kotraž system dohladuje. Po wšej Němskej steji 17 000 nuzowych stacijow.
To a tamne (11.03.26)
Plěch třihać dać chce sej generalna sekretarka badensko-württembergskeje FDP Nicole Büttner, kaž bě wona w padźe poražki strony we wólbach krajneho sejma přilubiła. „Na liberalnych móžeće so spušćeć, tež po poražce“, Büttner rjekny. Hdy chce swoje přilubjenje spjelnić, njeje znate. FDP bě minjenu njedźelu na mjezy pjeć procentow zwrěšćiła. W januaru bě Büttner nowinarjam rjekła, zo swoje kudźerjate włosy lubuje. Dyrbjała-li pak strona we wólbach přěhrać, su „radikalnje preč“.
Dale w jastwje wostanje najstarši syn norwegskeje krónprincesny Mariau Borg Høiby. Próstwu wo hnydomne pušćenje 29lětneho je sudnistwo wotpokazało. Sudnicy skedźbnja na wobšěrne wumjetowanja přećiwo mužej wumocowanja dla. Prawiznicy běchu argumentowali, zo ze stron 29lětneho hižo žadyn strach njehrozy.
To a tamne (10.03.26)
Po ćežkich zapławjenjach na sewjeru Awstralskeje zamołwići ludźi doraznje proša, so do rěkow abo zapławjenych kónčin njepodać. Z wulkej wodu je tež syła krokodilow do regiona přišła, w kotrymž hewak njejsu. Po zliwkach su rěki wjacore kónčiny zapławili. Něhdźe tysac wobydlerjow dyrbjachu ewakuować. Při tym su tež lětadła a helikoptery zasadźili. Je to najhórše powodźenje po lěće 1998.
Mjenje ludźi zatepiło je so prěnje dźewjeć měsacow 2025 hač lěto do toho. Tole je Němska towaršnosć za wuchowanje žiwjenja dźensa w swojej kóždolětnej statistice zdźěliła. Hač do rozsudneho dnja, 15. septembra lońšeho lěta, bě 321 ludźi na tute wašnje zemrěło. To je 33 mjenje hač lěto do toho. Wódni wuchowarjo z toho wuchadźeja, zo wostanje cyłkowna ličba smjertnych njezbožow w rěkach a jězorach lětsa jasnje pod 400.
To a tamne (09.03.26)
Přewšo rědki to podawk: Dźěl meteorita je w Koblenzu w Porynsko-Pfalcy třěchu domu wobškodźił. Při zražce sobotu wječor nasta dźěra, wulka kaž koparski bul, zarjad za škit před katastrofami zdźěla. Meteorit přerazy třěchu domu a wosta w spanskej stwě ležo. Nichtó pak so njezrani. Do toho běchu ludźo wobkedźbowali, kak so objekt na njebju žehleše.
Nješwarni paduši su w Monheimje pola Düsseldorfa na kěrchowje popjelnicy a metalowe přidawki do rowa pokradnyli. Při tym wobškodźichu wjace hač 150 rowow, policija zdźěla. Wopytowarjo pohrjebnišća njedźelu rano wobšěrnu škodu wuhladachu. Njeznaći běchu so wočiwidnje na kopor a bronzu měrili. Krótko po tym přizjewi so nižozemska policija: Na pomjeznym přechodźe su zastojnicy w awće z Němskeje wjacore popjelnicy a koporowe přidawki do rowa sćazali.
To a tamne (06.03.26)
Zapřijeća kaž „veggie-burger“ abo „tofu-kołbasa“ smědźa so tež přichodnje wužiwać. Na to su so posrědnicy čłonskich krajow EU a Europskeho parlamenta dojednali. Zakazane pak su w přichodźe wurazy, kiž maja jasny poćah k zwěrjećim wudźěłkam kaž „veggie-kokoška“ abo „tofu-rjebleška“. Kompromis je wuslědk wobćežnych wuradźowanjow. Zapósłancy parlamenta EU chcychu wšitke pomjenowanja zakazać, kotrež zwjazuja wegetarisku jědź z mjasom a kołbasu.
Policija je pop-spěwarku Britney Spears w zwjazkowym staće USA Kaliforniskej nachwilnje zajała. Po dźewjeć hodźinach hudźbnicu zaso pušćichu, běrow zamołwiteho šerifa zdźěli. Přičina zajeća njeje znata. Wjacore medije su wo tym přeswědčene, zo je Spears pod wliwom alkohola abo drogow z awtom jěła. Sudniski termin je 4. meje.
To a tamne (05.03.26)
Wosebje zastarske nastajenje napřećo žonam jewi so mjez mužemi w tak mjenowanej „generaciji Z“. Tole je wuslědk woprašowanja slědźenskeho instituta Ipsos: Młodźi ludźo, kotřiž su mjez 1997 a 2012 narodźeni, pěstuja tradicionalne rozdźělenje rólow mjez splahomaj. Třećina mužow generacije Z je měnjenja, zo ma žona muža stajnje posłuchać.
Bjez konkretneho wuslědka su dale přepytowanja policije w padźe rubježnistwa we wotnožce nalutowarnje w Gelsenkirchenje loni kónc decembra. Tuchwilu přesłyšuja wjace hač 3 100 wobsedźerjow kašćikow, kiž bu wurubjenych. Ludźo mějachu chowachu tam wjele pjenjez kaž tež debjenki a ryzy złoto. Njejasne zdobom je, kak móžachu rubježnicy wjacore hodźiny z hoberskim točenskim nastrojom dźěłać, bjez toho zo by to někomu napadnyło.
To a tamne (03.03.26)
Policija warnuje před internetnymi wobšudnikami, kotřiž tuchwilny chaos překnihowanja lětow w krajach Bliskeho wuchoda znjewužiwaja. Žona w Delnjej Bayerskej bě při tym 2 500 eurow přisadźiła. Ludźo měli jenož oficialne internetne strony lětarskich předewzaćow wužiwać, policija namołwja. Pytajo za móžnymi nowymi zwiskami z krajow, w kotrychž wójna howri, dóstanu so mnozy na dubiozne strony wobšudnikow.
Wopity, bjez jězbneje dowolnosće a z wopačnymi čisłowymi tafličkami na awće bě šofer Citroëna po puću, jako jeho policisća w Erfurće kontrolowachu. Test alkohola wunjese 2,6 promilow. Jězbnu dowolnosć muž scyła njewobsedźeše a čisło Citroëna njesłušeše k awtu. Muž dyrbješe zastojnikow na policajsku stražu přewodźeć. Tam jemu krej wotewzachu a chłostanske jednanje zahajichu.
To a tamne (02.03.26)
Šefa drogoweje cwólby je policija w sewjerorynsko-westfalskim Ratingenje zajała. 34lětneho Němca su do přepytowanskeje jatby dowjezli. Muž je podhladny, zo je we wobłuku mjezynarodnje dźěłaceho kruha wikowarjow drogow znajmjeńša dwanaće tonow kokaina z Južneje Ameriki w hódnoće sto milionow eurow do Němskeje importował. W domje muža namakachu zastojnicy luksusowe twory za 800 000 eurow. Pola přiwuznych muža sćazachu imobilije w hódnoće znajmjeńša 15 milionow eurow.
Spěwarka Sarah Engels pojědźe za Němsku na Eurovision Song Contest do Wiena. 33lětna je so sobotu w Berlinje přećiwo wosmjom požadarjam přesadźiła. Ze swojim spěwom „Fire“, kiž ma wosebje žonam móc a žiwjensku radosć spožčić, je sej wona najwjace dypkow zdobyła. Finale w stolicy Awstriskeje je 16. meje.
To a tamne (27.02.26)
Nakładne awto z ruku ćahnyć – a to cyłu hodźinu – chce Felix Zappe z Berlina. 35lětny, kiž je hižo ćahi a awta ćahał, zwaži so tak na nowy rekordny pospyt. Při tym chce wón čaru 750 metrow zmištrować. Přewjesć chcedźa rekordny pospyt jutře w centrumje wobchadneje wěstoty ADAC w braniborskim Linthe. Na ćahanje jězdźidłow bě so Zappe za čas koronapandemije specializował, „jako běchu wšě fitnesowe studija swěta zawrjene“.
Při lawinowych njezbožach je lětsa w Awstriskej dotal 26 ludźi žiwjenje přisadźiło. To je wo wjele wjace hač po wjelelětnym přerězku, awstriski kuratorij za wěstotu w Alpach zdźěla. Wosebje zlě bě mjez 15. a 24. februarom, jako 14 ludźi pod sněhom zahiny. Mjez woporami su štyrjo z Němskeje – pućowar a třo sněhakowarjo kotřiž, běchu zboka přihotowanych čarow po puću.
