To a tamne (01.07.22)

pjatk, 01. julija 2022 spisane wot:
Horce wino, wóń za nalikami a cymtom, swěca swěčkow a adwentne spěwy – wšitko to přisporja hodownej atmosferje, kotruž móža ludźo kónc tydźenja w šwabskim Dinkelscherbenje dožiwić. Na dworje tamnišeje starownje chcedźa mjenujcy hodowne wiki nachwatać, kotrež dyrbjachu loni koronawirusa dla wupadnyć dać. Zarjadowarjo chcedźa ­ludźi z klasiskej hudźbu a hodownej ­atmosferu wabić, so ze swojimi lubymi zetkać, tak kaž je to w adwenće poprawom z wašnjom. Kaž organizator Paul Schreiber z hospodarskeho spěchowanskeho towarstwa Reischenau wuswětli, su hodowne wiki hižo dwě lěće wupadnyli. Nětko chcedźa zarjadowanje we wobłuku kulturnych tydźenjow wotměć. „Čehodla nic“, wón wuzběhny.

To a tamne (30.06.22)

štwórtk, 30. junija 2022 spisane wot:

Po wjacorych nadpadach barow na ludźi dyrbješe so słowakski wobswětowy minister Jan Budaj starosćić, zo swoje zastojnstwo zhubi. Tole bě sej skupina prawicarskoekstremistiskich zapósłancow słowakskeho parlamenta žadała a próstwu njedowěry zapodała, štož dźěl zapósłancow Lěwicy podpěrachu. Wobswětowy minister wšak žiwjenje ludźi riskěruje, wšako njeda bary zatřělić. Za­wčerawšim je parlament wo próstwje wothłosował a ju wotpokazał.

Dźesać wosobow je na juhu Irana w minjenych něhdźe 40 dnjach hoberski přestrjenc zhotowiło. Postajeny je kumštny rjemjeslniski wudźěłk za lětuše swětowe koparske mišterstwa, čehoždla mějachu dźěłaćerjo wulki časowy ćišć. Přestrjenc je něhdźe 100 kwadratnych metrow wulki a z ruku zhotowjeny. Zo njebychu sej dźěłaćerjo wusnyli, su stajnje hromadźe spěwali.

To a tamne (29.06.22)

srjeda, 29. junija 2022 spisane wot:

Mały kenguru je policiju w Gochje při Delnim Rynje zaběrał. Po tym zo su pasanća eksotiske zwěrjo wuhladali a to přizjewili, su je tež zastojnicy na dróze lepili. Kenguru pak twochny. Hakle skótny lěkar zamó zwěrjo z pomocu kłoka z pohłušowacym srědkom zadźeržeć. Swědcy podawka wědźachu dosć derje přirjadować, komu kenguru słuša a zastojnicy móžachu spinkace zwěrjo wobsedźerjej wróćić.

Z pomocu rołki prochsrěbaka je muž na parkowanišću dwórnišća w Hammje koleso pokradnył, při čimž policija jeho na městnje lepi. Wustróžany 20lětny z kolesom ćekny. Najprjedy je po puću rołku preč ćisnył a po tym hišće pokradnjene koleso. Paduch spyta pěši dale ćěkać, doniž sej do kontejnera za wotpadki njezalěze. Chowanku pak je policija wuslědźiła a 20lětneho nachwilnje zajała.

To a tamne (28.06.22)

wutora, 28. junija 2022 spisane wot:

Zbožo w njezbožu měješe předwčera­wšim wosomlětna holčka w awstriskim Linzu. Wona wisaše z woknom wjaceswójbneho domu a dźeržeše so z poslednjej mocu woknoweje deski, kaž policija wčera informowaše. Nimojěducemu holca napadny a wón doběža sej k domej, stupi pod holcu a ju popadny, jako wona nimale štyri metry do hłubokosće padny. 41lětny móžeše holcu njezranjenju maćeri přepodać.

Z njesměrnje chrobłymi paduchami ma so policija tuchwilu w Thesalonikach roze­stajeć. Tam su njeznaći z bydlenja debjenki a pjenjezy w hódnoće nimale milion eurow rubili. Kaž grjekska policija zdźěli, bě dźěl rubizny w 400 kilogramow ćežkim trezorje zamknjeny. Tón su paduši z balkona bydlenja w šestym poschodźe na drohu ćisnyli, jón do awta spakowali a ćeknyli. Štož zwosta je wužłobina na dróze.

To a tamne (27.06.22)

póndźela, 27. junija 2022 spisane wot:

Wosrjedź nocy su cyrkwinske zwony w Nordhornje něhdźe 45 mjeńšinow zwonili a wulku njewěstosć wuwabili. Wjacori ludźo zawołachu wčera w nocy policiju a so za přičinu zwonjenja wobhonichu. ­Jedyn ze zawołarjow wuchadźeše samo z toho, zo je wójna wudyriła. Mjeztym wuchadźa policija z toho, zo bě zwonjenje techniski zmylk. Tež z běrowa tamnišeje ewangelskeje wosady wopodstatnichu, zo njebě nócne zwonjenje wotpohlad. Zwóńk chce dźensa za zmylkom pytać, tak zo je přichodny nócny měr zaručeny.

Před wočomaj policije je sej napity šofer nakładneho awta wusnył. Poprawom chcyše 66lětny na parkowanišću Donautal-wuchod w Delnjej Bayerskej trochu wotpočnyć. Město toho pak je přehłuboko do škleńcy hladał. Zastojnicy lepichu šofera wčera wječor na parkowanišću a jemu kluče jězdźidła wotewzachu.

To a tamne (24.06.22)

pjatk, 24. junija 2022 spisane wot:

Wurosćeneho morža (Walroß) su na pólskim pobrjohu Baltiskeho morja wuhladali. Pućowar je zwěrjo na wosamoćenym brjoze njedaloko wsy Mielno widźał a fotografował. Fachowcy su sej wěsći, zo jedna so wo samsne zwěrjo, kotrež su před něšto dnjemi na Rujanach wuhladali. Zo njebychu turistow přiwabili, dokładne městno zwěrjeća njemjenuja. Na Rujanach bě wjele turistow přišło.

Hórske chaty wokoło Garmisch-Partenkirchena su přichodne dny wobsadźene – wot zastojnikow zwjazkoweje policije, kotřiž su w zwisku z wjerškowym zetkanjom G7 na hrodźe Elmau zasadźeni. Najwyša chata Němskeho Alpoweho towarstwa steji 2 366 metrow wysoko a leži nad dołom, w kotrymž je městnosć konferency. Wot hórskeje chaty hač k hrodej trjebaja pućowarjo, a tež policisća, ně­hdźe pjeć hodźin pěši.

To a tamne (23.06.22)

štwórtk, 23. junija 2022 spisane wot:

Sydom metrow wulki swjaty křiž dyrbi wěriwa w Düsseldorfje ze zahrody swo­jeho domu wotstronić. Tole je tamniše krajne sudnistwo rozsudźiło. Křiž je „zakonje ranjace wobmjezowanje wobsydstwa“, sudnicy měnjachu. Skoržiła bě sobuwobydlerka a sobuwobsedźerka dwuswójbneho domu. Wona měješe swój wšědny dźeń z kóždym widom do zahrody za masiwnje myleny. Wěriwa argumentowaše, zo njeje wulkosć křiža připad: Ta wotpowěduje 736 metrow wulkej horje Golgota, na kotrejž běchu Jězusa křižowali. Wusud je płaćiwy.

Baćona smjertnje zranił je motorski sewjernje Drježdźan. Zwěrjo bě dróhu přeprěčiło, jako muž přijědźe. Wón njemóžeše so wuwinyć a zrazy do baćona, kiž hišće na městnje njezboža zahiny. 53lětny motorski wosta njezranjeny. Wěcna škoda njeje wočiwidnje nastała.

To a tamne (22.06.22)

srjeda, 22. junija 2022 spisane wot:

Napity na policajsku stražu přijěł je 73lěty muž w sewjerorynsko-westfalskim Hagenje, zo by so w naležnosći ćeknjenja po njezbožu „na swoje njedobro“ wuprajił. Jako zastojnik wuprajenja zapisa, čuješe alkohol w powětře. Test wunjese nimale 1,5 promilow. Jězbnu dowolnosć jemu nablaku sćazachu. Nimo toho spisachu skóržbu jězdźenja pod wliwom alkohola dla – na njedobro 73lětneho.

Dwanaće metrow do hłubiny padnyła – a njezbožo přežiwiła – je žona na Ru­janach. 41lětna je wčera wječor z třećeho poschoda wjaceswójbneho domu w gmejnje Dranske padnyła. Po wuprajenjach swědkow bě wona na swjedźenju wjetše mnóstwa alkohola piła a na woknowej desce rejwała. Skónčnje bě runowahu zhubiła a z wokna na łuku před domom padnyła. Ju dowjezechu zranjenu do chorownje.

To a tamne (21.06.22)

wutora, 21. junija 2022 spisane wot:

Z awtom swojeho nana je jědnaćelětny hólc do wjacorych awtow zrazył. Do toho běchu wobydlerjo w mecklenburgsko-předpomorskim Wolgasće policiji rozprawjeli, zo jězdźi po bydlenskej štwórći awto z dźěćom za wodźidłom. Krótko po tym zastojnicy awto wuhladachu, kotrež runje do awta prasny. Do toho bě wóz dalšej awće wobškodźił. Za wodźidłom sedźeše woprawdźe dźěćo. Policisća přepo­dachu hólca nanej, kiž wo jězbje syna ničo njewědźeše. Wěcna škoda: 4 500 eurow.

Mjezsobne popryskanje z wodowymi pistolemi je w Berlinskej lěsnej kupjeli raznu zwadu a na kóncu bijeńcu něhdźe sto ludźi zawiniło. Policija dyrbješe z 13 awtami přijěć. Dwě skupinje młodostnych běštej so mjez sobu popryskałoj a so zwadźiłoj. Jako so zwada přiwótři, druzy wopytowarjo kupjele zapřimnychu. Na kóncu so sto ludźi biješe.

To a tamne (20.06.22)

póndźela, 20. junija 2022 spisane wot:

Natwar Mnichowskeho oktoberskeho swjedźenja su dźensa zahajili. Theresina łuka je wotnětka wulke twarnišćo a zdźěla za pěškow zawrjena. Po třoch lětach chcedźa wot 17. septembra hač do 3. oktobra zaso hosći witać. Minjenej lěće ­běchu najwjetši ludowy swjedźeń swěta korony dla wotprajili. Literski karan piwa płaći lětsa přerěznje 13,40 eurow.

Něhdźe tysac wopytowarjow je minjeny kónc tydźenja na lětuše 20. mjezynarodne zetkanje Trabantow do Šwikawy přišło. K zakónčenju jědźeše wčera 55 kultowych awtow z časa NDR z tu- a wukraja po nutřkownym měsće. Na wšě 300 Trabantow z Němskeje, Čěskeje, Pólskeje, Słowakskeje, Madźarskeje a Šwicarskeje bě na teren něhdyšeje twornje Trabanta přijěło. Někotři z nich běchu so dołheje čary dla hižo zašo na dompuć podali. Druhich drje je horcota wottrašiła.

nawěšk

nowostki LND