To a tamne (28.04.26)
Swój prěni dener je 92lětna rjadniska sotra w porynsko-pfalcskim Koblenzu jědła. Jeje sobusotra je podawk ze šmóratkom dokumentowała a na Instagramje wozjewiła. Rjadniske sotry běchu z awtom do Triera putnikowali a chcychu na kóncu hišće powječerjeć. Pytajo za hosćencom z wulkim parkowanišćom – zo njetrjebali sotry we wysokej starobje daloko běžeć – dojědźechu sej na přemysłowy areal. 92lětna Irmingard bě wot prěnjeho denera dospołnje zahorjena.
Prawidłownje kumštneje inteligency (KI) w dušinych a lubosćinskich naležnosćach so prašeć, je dźeń a wjace młodostnym samozrozumliwe. Tole je Załožba za bój přećiwo depresijam w Lipsku při woprašowanju zwěsćiła. Na wšěch 65 procentow ludźi hač do 39 lět wužiwa KI. Při tym dźe wo wšědny stres a lubosćinsku ból, lědma pak wo depresije.
To a tamne (27.04.26)
Po nimale měsacu chcedźa w pěsku tčacu wjelrybu w Baltiskim morju nětko z pomocu nakładneho čołma wuswobodźić a do hłubokeho morja dowjezć. Nakładny čołm bě wčera do Kiela dojěł. Wottam ma po kanalu Baltiske morjo docpěć. Najzašo jutře wočakuja čołm na městnje, hdźež wjelryba přeco hišće we wodźe leži. Zwěrjo je mjeztym chětro słabe. Najebać to maja fachowcy wuchowanje za móžne. Nowy pospyt wuswobodźenja financuja priwatnicy.
Njemdri šoferojo, kotřiž so doprědka tłóča a so při tym wěstotneho wotstawka wohladaja, su na dróhach najnjewoblubowaniši. Tole je wuslědk woprašowanja mjez dobrymi tysac šoferami wosobowych awtow. 44 procentow z nich tole najbóle hněwa, mjez žonami je jich samo 47 procentow.
To a tamne (24.04.26)
Dźesać kruchow złota, kotrež běše gmejnski sobudźěłaćer w Bannewitzu loni w oktobrje při syčenju trawy nadešoł, móže sej gmejna zdźeržeć. W šěsć měsacach předpisaneje čakanskeje doby so nichtó přizjewił njebě, kiž by dopokazać móhł, zo jemu wjacore dźesaćitysacy eurow hódny pokład słuša, zdźěli wjesnjanosta gmejny Heiko Wersig.
Princ Harry je Kijewčanow wčera ze swojim njewočakowanym wopytom překwapił. Mjez druhim wobdźěli so w ukrainskej stolicy na wěstotnym forumje a zetka so z wobdźělnikami wubědźowanja Invictus Games za zranjenych wójnskich weteranow, kotrehož załožićel wón je. Nimo toho wopyta organizaciju za wotstronjenje minow Halo Trust. Princ Harry njeběše w nadawku britiskeho kralowskeho domu po puću, ale priwatnje.
To a tamne (23.04.26)
Dokelž je přewótře šnicle klepał, bu muž w Baworskim Geiselhöringu wot swojeho 61lětneho susoda atakowany. Tón bě klepanja dla čuwy zhubił a zaklinka pola hobby-kucharja, kotryž sej runje wječer přihotowaše. Po tym zo bě tón ničo złeho njewočakujo durje wočinił, jeho rozhorjeny a njemdry susod werbalnje kaž tež ćělnje nadběhowaše. Policija dyrbješe zapřimnyć.
Lubowarjo hwězdźinow měli dźensa w nocy njebjo dokładnje wobkedźbować. Šansa, wulku ličbu tajkich wuhladać, je wulka. Dokelž je młody měsačk lědma widźeć, su wuměnjenja za wobkedźbowanje tak mjenowanych Lyridow idealne. W času wot połnocy hač k schadźenju słónca móžemy z 15 do 20 hwězdźinami na hodźinu ličić, připowědźi předsyda Zjednoćenstwa přećelow hwězdow Uwe Pilz.
To a tamne (22.04.26)
Alfons Schuhbeck nadal do jastwa hić njetrjeba. Z telewizy znateho kucharja a gastronoma su loni mjez druhim wobšudnistwa a dlijenja insolwency dla k štyrjom lětam a třom měsacam jatby zasudźili. Mjeztym je 76lětny na raka schorjeł a tohodla tuchwilu jatbykmany njeje, kaž posudźowar potwjerdźi. Mnichowske statne rěčnistwo je započatk jatby tohodla znajmjeńša hač do septembra přestorčiło. Po tym chce strowotu Schuhbecka znowa přepruwować dać.
W arenje w španiskim měsće Sevilla je wjac hač 500 kilogramow ćežki ćělc ze swojimaj rohomaj woblubowaneho španiskeho torera Morante chutnje zranił. Dwě hodźinje dołho su 46lětneho w chorowni operowali, rozprawja nowina El País. Arena z mjenom La Maestranza je jedna z najznaćišich městnosćow wulkich coridow – bojow z bykami – we kraju.
To a tamne (21.04.26)
Za „bohahanjenje“ ma Nancy Sinatra, dźowka legendarneho US-ameriskeho entertainera Franka Sinatry, zo je Donald Trump na swojim kanalu w socialnych medijach „truth-social“ widejo wozjewił, hdźež Sinatra swój evergreen „My Way“ spěwa. Na prašenje fanow, hač nochce přećiwo wozjewjenju zakročić, wona praji, zo móhli to jenož zamołwići nakładnistwa, dokelž sama prawa na spěwje nima.
Ličba kmótřistwow za wjelryby je so zrazom zwyšiła. To je wuskutk kopicy zdźělenkow wo wjelrybje „Timmy“ w poslednich tydźenjach, zdźěli přirodoškitna organizacija WWF. W najkrótšim času je dohromady 113 nowych kmótřiskich zrěčenjow za škit najwjetšich mórskich cycakow dóšło. Tež druhe přirodo- a zwěrinoškitne organizacije wo stupacej ličbje pjenježnych darićelow w poslednim času rozprawjeja.
To a tamne (20.04.26)
Tragedija kołowokoło wjelryby w Baltiskim morju dźe traje. Něhdźe dwě hodźinje po tym zo bě ryba dźensa dopołdnja zaso płuwać započała, je nětko pječa zaso z tym přestała. Ze zaliwa, kotryž mjenuja Kirchsee, bě so wjelryba najprjedy w prawym směrje na wotewrjene morjo hibała. Při tym běchu ju čołmy přewodźeli.
20 ptačich pawkow bě žona w regionalnym ćahu zabyła. Šafner je pakćik z napismom „Pawki a skorpiony“ w ćahu našoł, krótko prjedy hač ćah z Herrenberga na směr Tübingen wotjědźe. Na to bě zwjazkowu policiju alarměrował. Ta wuhlada w kartonje 20 jednotliwje zapakowanych ptačich pawkow družiny Avicularia geroldi. Tute běchu po informacijach policije w dobrym stawje. Prawdźepodobnje je jich wobsedźerka wědźała, kak ze zwěrjatami wobchadźeć.
To a tamne (17.04.26)
Dulu złota je muž z hornjeje Bayerskeje w starym trezorje namakał. Złoto bě w tajnym fašku schowane, kotryž so připadnje wočini, jako muž trezor powali. 90lětny wobsedźer bě drje na złoto zabył, jako woclany kamor za runje 15 eurow předa. Nowy wobsedźer jemu złoto bjez wahanja wróći. „Štož mi njesłuša, mi žane wjeselo njewobradźa“, 56lětny rjekny. Ćim bóle so 90lětny wjeseleše: Złoto je 32 000 eurow hódne.
Dalšich 129 skóržbow su dźěći w awstralskim Sydneyju přećiwo bywšemu hladarjej zapodali, kotryž wot lěta 2025 znjewužiwanja dźěći dla w přepytowanskej jatbje sedźi. Dotal wumjetuja jemu wosom padow znjewužiwanja. Nowe skóržby potrjechja zhotowjenje materiala wo znjewužiwanju, filmowanje ludźi bjez jich dowolnosće a splažne znjewužiwanje dźěći. Njeskutki su so po dotalnych přepytowanjach w času mjez 2009 w 2025 w dźěsćowni wotměli.
To a tamne (16.04.26)
Zemrěty hrajer loterije je w Porynsko-Pfalcy w loteriji Eurojackpot wjace hač 700 000 eurow dobył. Muž bě lisćik wupjelnił, potom pak zemrěł. Najebać to wostanje jeho tipowanje płaćiwe, loterijowa towaršnosć Lotto24 zdźěla. Po prawniskim pruwowanju su wudowej 703 600 eurow wupłaćili. W hrě Eurojackpot tipuja hrajerjo pjeć z 50 ličbow kaž tež dwě euroličbje. Loteriju hraja we wjacorych europskich krajach. Dwójce wob tydźeń dobyćerjow zwěsća.
Hoberski nawal mejskich brukow wočakuja lětsa zaso na juhu Hessenskeje. Fachowcy wočakuja 500 milionow zwěrjatow, wosebje wokoło Darmstadta. Šoferojo awtow měli so na to nastajić, zo bruki při ćmičkanju chětro nisko leća a do awtow prasnu. Masowy nawal wotměwa so prawidłownje kóžde štyri lěta. Přičiny su sucha póda a melioracija polow.
To a tamne (15.04.26)
Lochke zemjerženje su fachowcy wčera wječor w regionje Lipsk/Groitzsch zwěsćili. Zemjerženje měješe nisku hódnotu 3,2. Po prěnich wobličenjach geofyzikarjo Freibergskeje Hórnistwoweje akademije z toho wuchadźeja, zo ležeše epicentrum rženja mjez Neukieritzschom, Lucka a Groitzschom. We wobkruhu něhdźe 60 do 70 kilometrow su ludźo třasenje zemje wčera pytnyli.
Sobudźěłaćerjej třěchikryjerskeho zawoda staj wčera popołdnju w hessenskim Altenhagenje třoch muži wobkedźbowałoj, kotřiž so do jězdźidła jeju firmy zadobychu a dźěłowy grat pokradnychu. Třěchikryjerjej měještej z rěbla najlěpši wuhlad. Wonaj dołho njechabłaštaj a spytaštaj skućićelow popadnyć, štož so jimaj tež poradźi. Dweju paduchow staj rjemjeslnikaj zadźeržałoj, doniž policija njepřijědźe.
