Awgust Lapštich je serbsku rěč a kulturu spěchował
Ćišćernja při Teschenowej dróze we Wojerecach słušeše wot lěta 1897 hač do 13. julija 1926 Awgustej Lapštichej. Wo tym zhonichu wčera wopytowarjo wopomnjenskeho zarjadowanja składnostnje jeho 100. posmjertnin. Dźensa je na tymle městnje hosćenc.
Wojerecy (KD/SN). Werner Sroka je wo žiwjenju a skutkowanju serbskeho prócowarja slědźił. Předsyda Domowiny Dawid Statnik je wuzběhnył, zo „bě Lapštich wuznamna wosobina Łužicy, kotrejž bě šěrjenje serbskeho słowa wažne“. Spěwytwórc Bernd Pittkunings je zarjadowanje hudźbnje wobrubił.
Lapštich bu 5. oktobra 1862 we Wulkich Zdźarach narodźeny. Tamniši wučer Jan Mrosak je hólcej hódnotu serbšćiny a łužisku kulturu zbližił. Pozdźišo je serbski młodźenc we Wojerowskej ćišćerni Gustava Wencela powołanje pismikistajerja nawuknył, wón je knihi a spisy za delnjoserbsku wědomostnu towaršnosć Maśica Serbska a Bramborski Casnik ćišćał. „1897 potom je Lapštich zhromadnje z Janom Mrosakom swójsku firmu załožił“, tak Werner Sroka.
Projekt Zari chcedźa dale wjesć
Slepo (SN/MiP). Krótko do zahajenja 10. mjezynarodneho festiwala dudakow w Slepom je so Zwjazkowe předsydstwo Domowiny (ZP) minjeny pjatk nawječor w tamnišim Serbskim kulturnym centrumje (SKC) na swoje pjate posedźenje zešło.
Do wothłosowanja, hač měła Syć za serbsku rěč a regionalnu identitu Zari swoje dźěło w lětach 2027 do 2031 pokročować a próstwu wo spěchowanje na Załožbu za serbski lud zapodać, předstaji nawjedowaca projektna koordinatorka Diana Pawlikowa zaměry, wobłuki a dotalne wuskutki projekta za rewitalizaciju serbskeje rěče. W tutym zwisku naspomni jako přikład kurs Slepjanšćiny bywšeje rěčneje motiwatorki Juliany Kaulfürstoweje, kotryž je na kóncu pjeć zajimcow wopytało. „Tež hdyž so tuta ličba zwonkastejacemu wosebje wysoka być njezdawa, hladajo na proces rewitalizacije je mnóstwo wobdźělnikow wuspěch. Wobdźělnicy skutkuja w swojich kónčinach hustohdy jako katalyzator a přiwabjeja dalšich zajimcow“, Pawlikowa wuzběhny. Čłonojo ZP so na to jednohłósnje za pokročowanje projekta Zari wuprajichu.
Prezidij ze župu wuradźował
Prezidij Domowiny je so wčera w Choćebuskim Serbskim domje schadźował. Gremijej je wažne, zo so aktiwnje z ludźimi na bazy wuměnja. Wčera wuradźowachu z předsydstwom župy Delnja Łužica. Zdobom su čłonojo prezidija wo dalšich naprawach rozsudźili.
Choćebuz (SN). Prezidij Domowiny je swoje wčerawše posedźenje z trójnej sławu zahajił. Župne předsydstwo a prezidij dźakowaštej so angažowanej čłonce Mariji Elikowskej-Winklerowej, kotraž je njedawno jubilejne narodniny woswjećiła. „Nam je wažne, zo mamy direktnu wuměnu ze župami“, zahaji předsyda Domowiny Dawid Statnik rozmołwu z jědnaće přitomnymi čłonami župneho předsydstwa. W dalšej rozmołwje wuměništej so gremijej mjez druhim wo wosebitym připóznaću mytowanja młodeje delnjoserbskeje ekscelency, wo skónčenju doby rady Załožby za serbski lud a wo dalšich projektach. Na kóncu skedźbni Statnik na terminy, kaž na hłownu zhromadźiznu Domowiny, kotraž budźe klětu 24. apryla w Brětni.
Župa přiwza towarstwo
Chrósćicy (SN/mb). Župa „Michał Hórnik“ Kamjenc lěto a bóle rozrostuje. Na wčerawšim posedźenju župneho předsydstwa w Chrósćicach bu dalše towarstwo jako čłon přiwzate. Hižo z prěnim dypkom dnjoweho porjada wuradźowanja najwjetšeje župy Hornjeje Łužicy su wotpowědnej próstwje wjesneho towarstwa Ralbicy jednohłósnje přihłosowali. Předsyda Křesćan Janca bě do toho swoje towarstwo předstajił, kotremuž přisłuša tuchwilu 58 čłonow. Z tym ma župa po słowach regionalneje rěčnicy Kathariny Jurkoweje 1 615 sobustawow.
Nětko měri so župa na projektny dny za šulerjow sedmeho lětnika serbskich wyšich šulow a Serbskeho gymnazija Budyšin. Tute dny wuhotuja na nowy tydźeń hromadźe ze župomaj „Jan Arnošt Smoler“ Budyšin a „Handrij Zejler“ Wojerecy w Budyšinje. Lětušu kubłansku jězbu přewjedu srjedź awgusta do jamy Wjelcej a do srjedźneje Łužicy. Župny swjedźeń wotměje so 3. oktobra w Pěskecach w kooperaciji z tamnišim sportowym towarstwom. Na winowy a spěwny swjedźeń wočakuja serbsku skupinu Chmjelowanka a cymbalowu skupinu z Morawy.
Spominajana Lapšticha
Wojerecy (SN/hn). We Wojerowskim domje Domowiny je so wčera popołdnju předsydstwo Wojerowskeje župy „Handrij Zejler“ schadźowało. Prěnjotnje wobrěčachu poslednje přihoty zarjadowanja składnostnje 100. posmjertnin Awgusta Lapšticha Wojerowskeho. Tute planuja lětsa 13. julija we Wojerecach. Lapštich bě wuznamny serbski nakładnik, wobsedźer ćišćernje, redaktor a angažowany Wojerowski měšćan. Jako předsyda Serbskeho burskeho towarstwa hraješe wuznamnu rólu při załoženju Domowiny w lěće 1912. Planowane je, zo zahaji so wopomnjenje w 16 hodź. při twarjenju něhdyšeje ćišćernje. Dźensa je w njej aziski hosćenc. Tam předstaji Werner Sroka žiwjenje sławneho Serba Awgusta Lapšticha Wojerowskeho. Bernd Pittkunings zarjadowanje hudźbnje wobrubi.
Dale wobjednawachu na posedźenju župy Serbski ewangelski cyrkwinski dźeń we Wojerecach a Serbski domizniski dźeń w Spalach. Dnja 8. nowembra zarjaduje župa swoje tradicionalne popołdnjo za swójby, lětsa na Horach. Wo kulturny program ma so tamniša pěstowarnja ,,Lutki“ postarać.
Prezidij Domowiny so schadźował
Prezidij Domowiny je so wčera we Wojerecach zešoł. Gremij mjez druhim wobzamkny, štó ma Serbow na seminarje FUEN a w Turistiskim zwjazku zastupować.
Wojerecy (SN). Lětuši seminar dźěłoweje skupiny słowjanskich mjeńšin Federalistiskeje unije narodnych mjeńšinow (FUEN) wotměje wot 4. do 7. junija w albanskej stolicy Tiranje. Prezidij je předsydu Domowiny Dawida Statnika kaž tež čłona zwjazkoweho předsydstwa a předsydu serbskeho młodźinskeho towarstwa Pawk Jana Klimana delegował. Kaž ze zdźělenki rěčnicy Domowiny Boženy Šimanec wuchadźa, třěšny zwjazk wudawki za transport a přebywanje podźělnje přewozmje. Dźěłowa skupina zwjazuje 32 čłonskich organizacijow FUEN a angažuje so za widźomnosć a naležnosće słowjanskich mjeńšin w Europje.
Domowina ma nowu webstronu
Wojerecy (SN/hn). W domje Domowiny we Wojerecach su so zastupjerjo župow a čłonskich towarstwow zašły tydźeń z předsydu Dawidom Statnikom zešli. Nawodnica za wizuelnu komunikaciju a design, Veronika Bjarš, a nowinska rěčnica Domowiny, Božena Šimanec, předstajištej tam nowy corporate design, to je wizuelne wustupowanje Domowiny, a z tym zwisowacu nowu webstronu.
Młodostni diskutuja wo prawach mjeńšinow
Na jutrownym seminarje Młodźiny europskich narodnych skupin (MENS) schadźuja so tele dny młodostni ze wšelakich mjeńšin, zo bychu wo politiskim wobdźělenju rěčeli. W bretonskim měsće Montroulez steji při tym wosebje dialog wo prawach, wužadanjach a zhromadnych perspektiwach w srjedźišću.
Montroulez (SN/VaŽ). Wot póndźele wotměwa so tradicionalny jutrowny seminar MENS pod hesłom „Sobu měšeć!“. Něhdźe 25 młodostnych zaběra so w dźěłarničkach z prašenjemi politiskeje participacije a rozdźělenja mocy znutřka narodnych mjeńšin. Z podpěru dweju trenarjow analyzuja wobdźělnicy struktury, diskutuja wo konkretnych přikładach a wuwiwaja strategije, kak móhli mjeńšiny swoje prawa lěpje zastupować.
Nowu jednaćelku zeznali
Serbski sejm pyta žórła pjenjez
Budyšin (SN/mb). Wulku hłownu temu posedźenja Serbskeho sejma sobotu w Budyšinje su drje krótkodobnje wotprajili: Z poručenjemi prof. Matthiasa Theodora Vogta z lěta 2009 za přichod serbskich institucijow budźe so gremij hakle na swojim přichodnym wuradźowanju 16. meje we Wojerecach zaběrać. Diskutowali pak su sejmarjo wo naćisku Tomaša Wornarja za financowanje dźěławosće Serbskeho sejma hač do kónca wólbneje periody. Wón namjetowaše wšelake puće za internetne zběranje pjenjez, na přikład přez crowdfunding. Jedyn zaměr je wutworjenje jednaćelnje na zakładźe minijoba. Konkretne rozsudy sobotu tworili njejsu. Dokelž bě přemało sejmarjow do rumnosće Serbskeho gymnazija w Budyšinje přichwatało, hdźež wuradźowachu, ničo wobzamknyć njemóžachu. Online-wobdźělenje njebě móžne.
