Młodostni diskutuja wo prawach mjeńšinow
Na jutrownym seminarje Młodźiny europskich narodnych skupin (MENS) schadźuja so tele dny młodostni ze wšelakich mjeńšin, zo bychu wo politiskim wobdźělenju rěčeli. W bretonskim měsće Montroulez steji při tym wosebje dialog wo prawach, wužadanjach a zhromadnych perspektiwach w srjedźišću.
Montroulez (SN/VaŽ). Wot póndźele wotměwa so tradicionalny jutrowny seminar MENS pod hesłom „Sobu měšeć!“. Něhdźe 25 młodostnych zaběra so w dźěłarničkach z prašenjemi politiskeje participacije a rozdźělenja mocy znutřka narodnych mjeńšin. Z podpěru dweju trenarjow analyzuja wobdźělnicy struktury, diskutuja wo konkretnych přikładach a wuwiwaja strategije, kak móhli mjeńšiny swoje prawa lěpje zastupować.
Nowu jednaćelku zeznali
Serbski sejm pyta žórła pjenjez
Budyšin (SN/mb). Wulku hłownu temu posedźenja Serbskeho sejma sobotu w Budyšinje su drje krótkodobnje wotprajili: Z poručenjemi prof. Matthiasa Theodora Vogta z lěta 2009 za přichod serbskich institucijow budźe so gremij hakle na swojim přichodnym wuradźowanju 16. meje we Wojerecach zaběrać. Diskutowali pak su sejmarjo wo naćisku Tomaša Wornarja za financowanje dźěławosće Serbskeho sejma hač do kónca wólbneje periody. Wón namjetowaše wšelake puće za internetne zběranje pjenjez, na přikład přez crowdfunding. Jedyn zaměr je wutworjenje jednaćelnje na zakładźe minijoba. Konkretne rozsudy sobotu tworili njejsu. Dokelž bě přemało sejmarjow do rumnosće Serbskeho gymnazija w Budyšinje přichwatało, hdźež wuradźowachu, ničo wobzamknyć njemóžachu. Online-wobdźělenje njebě móžne.
Serbski sejm so schadźuje
Budyšin (SN/mb). Serbski sejm so zajutřišim, sobotu, wot 10 do 16 hodź. w rumnosćach Budyskeho Serbskeho gymnazija schadźuje. Kaž zastupowacy rěčnik gremija Rainer Vogel informuje, chcedźa so na swojim 52. zjawnym posedźenju najprjedy z poručenjemi prof. Matthiasa Theodora Vogta za přichod serbskich institucijow zaběrać. „Cyłkowny koncept za spěchowanje serbskeje rěče a kultury“, kotryž bu w lěće 2009 w nadawku Załožby za serbski lud wot Instituta za kulturelnu infrastrukturu Sakskeje zdźěłany, bě swój čas wulku diskusiju zbudźił. Naposledk su so zakitowarjo statusa quo přesadźili a ničo so změniło njeje. Nětko chce so Serbski sejm potencialej idejow w Vogtowych poručenjach wěnować a wo konkluzijach za přitomnosć diskutować. Tuta tema steji na spočatku dnjoweho porjada.
Nimo toho maja kónčnu rozprawu změrcowskeje komisije na wědomje brać, kotraž wo pohórškach Ronnyja Böhme w zwisku z wólbami Serbskeho sejma před lětom rozsudźi. Dalše temy su rozprawy wuběrkow, naćisk financneho plana a namjet, minijob za jednaćelnju Serbskeho sejma zarjadować.
Přeja sej rěčneho motiwatora
Župa „Michał Hórnik“ Kamjenc je swoju hłownu a wólbnu zhromadźiznu za to wužiła, puće do přichoda rubać. Dotalne předsydstwo a županku su přitomni wobkrućili.
Chrósćicy (SN/MG). Na swojej hłownej a wólbnej zhromadźiznje su delegatki a delegaća Domowinskeje župy „Michał Hórnik“ wčera, štwórtk, Dianu Wowčerjowu w zastojnstwje županki wobkrućili. Wona dósta wšitke z 52 móžnych hłosow. Tež dotalne župne předsydstwo přitomni w jich funkciji wobkrućichu. Tak skutkuja Zala Cyžowa, Hańžka Deleńkowa, Marhata Deleńkowa, Jana Hiccyna, Marlis Młynkowa, Katharina Jurkowa, Jadwiga Kubašowa, Klawdija Kilankec, Alfons Korjeńk, Kathrin Młynkowa a Markus Šołta tež přichodnej lěće na čole Kamjenskeje župy.
Hižo do wólbow bě hłowna a wólbna zhromadźizna jednohłósnje dwě nowej sobustawskej towarstwje do kruha župy přiwzała. Stej to spěchowanske towarstwo serbskeje zakładneje šule Ćišinskeho w Pančicach-Kukowje a Róžeńčanske wjesne towarstwo „Při Marijinej studni“. Z tym je w župje nětko wjace hač 1 500 ludźi w sobustawskich towarstwach organizowanych.
Nowych pčołarjow witali
Serbska pčólnica hłownu zhromadźiznu přewjedła
Čłonojo towarstwa Serbska pčólnica su před nimale tydźenjomaj swoju hłownu zhromadźiznu lěta 2026 w towarstwowym domje w Nowej Wjesce přewjedli. Cyłkownje 31 wot 46 sobustawow towarstwa je za zeńdźenje přišło. Po tym zo bě předsydka Katrin Matkec wšitkich witała, wobzamknychu dnjowy porjad. Tomu přizamkny so rozprawa lěta 2025. Předsydka rozprawješe mjez druhim wo kóždolětnym wopyće sobustawow pola pčołarja towarstwa. Tak pobychu loni pola Ćemjerec we Worklecach. Dale naspomni adwentničku w Smječkecach z přednoškom Wendelina Brězana. Jako wosebje poradźene hódnoćachu wobdźělenje pčólnicy na historiskim přećahu kaž tež na dnju rjemjesła składnostnje 800lětneje róčnicy naspomnjenja Chrósćic. Tohorunja tematizowachu sobustawojo trěbne dźěła pčołarjow w nowej sezonje.
TCM lětsa zaso z normalnym planom
Towarstwo Cyrila a Metoda je na swojej hłownej zhromadźiznje předwčerawšim, wutoru, w Baćonju dźěło lońšeho lěta bilancowało. Po dźěłapołnym lěće 2025 ma lětsa zaso normalita zaćahnyć.
Baćoń (SN/MkWj). Po starodawnej tradiciji towarstwa su tež lětsa zastupnicy wšitkich šěsć sekcijow a štyrjoch korperacijow wo dźěle lońšeho lěta rozprawjeli. Sekcije Łužica pomha, Samostejacy, Wěda a skutk, Katolski Posoł, Swójby a Chróšćanske pasionske zjednoćenstwo su tež loni swěru skutkowali a swoje čłonstwo zesylnili. Tole tež k TCM słušace korperacije Bratrowstwo, Ralbičanski chór Lipa, Chróšćanski cyrkwinski chór a Sportowa jednotka Chrósćicy na farskej žurli w Baćonju wo dźěławosći rozprawjachu.
Z wišninu so fararjej dźakowali
Busowy zwisk gremij zaběrał
Choćebuz (SN). Čłonki a čłonojo předsydstwa župy Delnja Łužica běchu so na swojim posedźenju wčera wosebje z jednej temu zaběrali: Změny busoweje linije 47 mjez Bórkowami a Choćebuzom. Z tutej liniju jědźe wšědnje 52 dźěći ze wsy do města do šule na Delnjoserbski gymnazij. Jich puć w přichodźe hižo tak jednory njebudźe, dokelž so takt a časy wotjězda busow změnja. Župne předsydstwo chce so nětko na krajneho radu wokrjesa Sprjewja-Nysa wobroćić a z nim wo dalšim postupowanju wuradźować. Wokrjes dźě je za planowanje busowych linijow zamołwity.
Delnjołužiska župa pak smě so tež wjeselić. Tak čłonki a čłonojo předsydstwa wčera zhonichu, zo planuje Němsko-Serbske ludowe dźiwadło lětsa pjeć předstajenjow noweje inscenacije „Mej bog Floppy Dolls zasej“. Premjera budźe 11. apryla w Hochozy. Dalše předstajenja budu w Brjazynje, Turjeju, Radušu a Choćebuzu. Nimo toho wobdźěli so na wčerawšim posedźenju žurnalistka sćelaka rbb, kotraž so z tym zaběra, w kotrych wuběrkach města Choćebuz su čłonojo župneho předsydstwa zastupjeni.
Domizniski dźeń wažny termin lěta
Wojerecy (SN/MiP). Serbski ewangelski domizniski dźeń je w protyčce Wojerowskeje župy „Handrij Zejler“ kóžde lěto wažny termin. Lońše zarjadowanje pak běše wosebite – po dźesać lětach je so zaso w Lejnom (Geierswalde) a Ptačecach (Tätzschwitz) wotměło. Hłowny organizator schadźowanja je hižo wjele lět wosada Wojerowskeje Janskeje cyrkwje, tuž domizniski dźeń po tradiciji z kemšemi w Janskej cyrkwi zahaja. Loni pak zeńdźe so něhdźe sto wěriwych w Lejnjanskej wjesnej cyrkwi. Tam swjećachu z dr. Stefanom Reicheltom, fararjom ewangelskeju wosadow Bluń a Lejno-Ptačecy, němsko-serbske kemše. „Wosebje radowali so smy, zo je telko žonow a holcow we Wojerowskej kemšacej drasće přišło“, piše županka Gabriela Linakowa na naprašowanje SN. „Nimo toho běše dźeń wšitkim serbskim wobdźělnikam dobra składnosć, w maćeršćinje pobjesadować a sej serbske ludowe spěwy zaspěwać. To je w našim regionje skerje žadnostka“, wona podšmórnje.
