„... wón so přeco gratu přima!“
„Hdyž so we wsy za jeho skutkami prašeš, potom ći ludźo praja: ‚Franc njeje wulke hamty měł, hdyž- a hdźežkuli pak pomoc trjebaš – wón so přeco gratu přima!“ – Z tutymi słowami je čłonka mytowanskeho wuběrka Gabriela Linakowa, w swojej lawdaciji wosobinu Franca Langi wopisała. Jeho je Domowina lětsa ze swojim Čestnym znamješkom wuznamjeniła.
Wot Jana Cyža chcyše županka tójšto wědźeć
Budyšin (kl/SN). Adwentnička župy „Jan Arnošt Smoler“ Budyšin słuša k wokomikam Domowinskeho skutkowanja, hdźež skupinarjo hromadźe z čłonami pod třěchu župy skutkowacych towarstwow na aktiwity nachilaceho so lěta zhladuja. 35 čłonow z wosom Domowinskich skupin a towarstwow je wčera na žurlu Serbskeho domu přichwatało.
Prěni wjeršk lěta 2023 bě župna hłowna zhromadźizna w měrcu, hdźež wuzwolichu delegaća nowe předsydstwo a nowu županku. W lěću wěnowaše so župa skerje zarjadowanjam za swójby. Předsydstwo je nastorčiło rjad přednoškow za skupiny, kotrež same hižo zarjadowanja njeorganizuja, ale serbsku rěč a zhromadnosć rady pěstuja. Koncerty wobohaćichu Domowinske žiwjenje w nalěću a nazymu w Malešecach, Radworju a w Budyšinje. Z tutej tradiciju chcedźa klětu pokročować.
Županka Leńka Thomasowa rysowaše předewzaća w nowym lěće. Župna kubłanska jězba, tak wona připowědźi, powjedźe hižo w aprylu do Berlina na wustajeńcu wo pčołkach a čłowjekach. Z tym chcedźa 300. posmjertniny Hadama Bohuchwała Šěracha spominać.
Na Malešanskej farje „Udu“ wudebili a na njej zahudźili
Malešecy (SN/AN). „Wjesołe hodźinki z Bohom“ wotměwachu so minjenu wutoru popołdnju za dźěći na Malešanskej farje raz cyle hinak. Claudija Wićazowa, katechetka wulkowosady při Lubaće (Löbauer Wasser), běše sej rěčneju motiwatorow Luciana Kaulfürsta, zamołwiteho za Malešanski region, a Mariju Šołćic, zamołwitu za Wojerowski region, na tamnišu faru přeprosyła.
Marija Šołćic běše na tutym popołdnju wosebite instrumenty z mjenom „Udu“ sobu přinjesła, kotrež wobsteja z hliny a na prěni napohlad kaž brjuchate wazy wupadaja. W běhu poł hodźiny wudebichu je dźěći z najwšelakorišimi mustrami. Wudebjene instrumenty dyrbja so hišće palić. Wokoło 3. adwenta chce Marija Šołćic je dźěćom wróćić.
Witaj-skupinya swójby podpěrać
Budyšin (kl/SN). Na prěnim městnje projektow župy „Jan Arnošt Smoler“ Budyšin w lěće 2024 steja rěč spěchowace předewzaća ze swójbami a Witaj-skupinami. Je chce župne předsydstwo wosebje podpěrować. Na swojim wuradźowanju wčera w Budyšinje su čłonki a čłonojo gremija wobkrućili, zo maja při tym zetkanja swójbow a spěchowanje serbskich ludowych nałožkow za faworizowanej formje.
Župa podpěruje planowany třidnjowski sympozij wo serbskich bajach. Dr. Christian Kessner z Towaršnosće Carla Gustava Junga chce jón hromadźe z partnerami w juniju 2024 w Domje tysac hatow w Stróži wuhotować. Klětušu kubłansku jězbu planujetej župje „Jan Arnošt Smoler“ a „Michał Hórnik“ hromadźe. Chcedźa přehladku „Wo pčołkach a čłowjekach“ w Berlinskim Muzeju europskich kulturow wopytać a so na slědy wuznamneju pčołarjow, Serba Hadama Šěracha a Słowjenca Antona Janše, podać.
Beno Sćapan, zastupjer župy w Zwjazkowym předsydstwje Domowiny, rozprawješe wo wuznamjenjenju za hospodarske zawody, kajkež chce Domowina za widźomnu serbšćinu mytować.
„Wupraju wulku chwalbu wšěm kursistam“
Dešno (SN/MG). Projekt „Zorja“, kotryž je sebi rewitalizaciju delnjoserbskeje rěče přez dospołnu imersiju do njeje jako cil stajił, traje hižo nimale 60 dnjow. Wučba rěče je kóždy dźeń znowa jara intensiwna. Wupłody jich dźěła su hižo derje widźeć, kaž piše Domowina w nowinskej zdźělence. Zajimawe na projekće su drje wosebje tež najwšelakoriše motiwacije, kotrež pohnuja wobdźělnicy a wobdźělnikow delnjoserbšćinu nawuknyć: Hač rěč wšědnje na dźěle abo priwatnje nałožować; ju zaso w swojej domiznje zakótwić; ju dźěćom dale dać abo samo serbske filmy produkować. „Widźomnje su wšitcy horliwi“, rěka w zdźělence dale.
Studenća šulerjow poradźowali
Nic jenož hač, ale kak
Přeco a wšudźe so wuznawacy Serb
W swojej lawdaciji na Dytara Freihoffa na lětušim spožčenju Čestnych znamješkow Domowiny wuzběhny Uta Henšelowa, čłonka mytowanskeho wuběrka: „Přeco a wšudźe wuznawa so jako Serb a zasadźuje so za zajimy Serbow.“ Dytar Freihoff je so we Welikich Linjach (Groß Leine) narodźił a tu tež wotrostł. Hižo jako dźěćo a młodostny je zwěsćił, zo su swjedźenje a nałožki w jeho wokolinje jasnje ze stawiznami Serbow zwjazane. W swojim času wojerskeje słužby pola NVA zezna Budyskich Serbow, kotřiž su jeho zajim „za to serbske“ doskónčnje zbudźili.
Namjety za logo hižo předleželi
Domowina chce prócowanja předewzaćow wo serbsku rěč w jich wobłuku z „Mytom za serbske hospodarstwo“ wuznamjenjeć. Jeje zwjazkowe předsydstwo je maćiznu z wuměnu za blidami minjeny pjatk we Wojerecach tworićelsce wobjednało.
Wojerecy (SN/at). W komunalnym wobłuku wobsteji z titlom „Rěči přichilena komuna“ forma, z kotrejž Sakska a Braniborska prócowanja na dobro serbskeje rěče w městach a gmejnach připóznawatej. Aktiwity w hospodarstwje na tutym polu dotal podobne připóznaće njedóstawja. W zawodźe do pjatkowneje wuměny čłonow zwjazkoweho předsydstwa je Pětr Brězan, referent Domowiny za hospodarstwo a infrastrukturelne naležnosće, prajił, wo čo z tajkim wuznamjenjenjom dźe: Skedźbnjeć na serbske poskitki a wudźěłki, tworić nowe rěčne rumy we wobłuku hospodarstwa, zo by wulka hospodarska syć ze serbskim pozadkom nastała. Brězan wuzběhny, zo „njeměła z tym žana konkurenca k Zwjazkej serbskich rjemjeslnikow a předewzaćelow nastać.“
