Budyšin (SN/mb). Prezidij Domowiny je so na swojim wčerawšim wuradźowanju w Budyskim Serbskim domje mjez druhim z přihotom přichodneho schadźowanja zwjazkoweho předsydstwa (ZP) zaběrał, kotrež so pjatk, 17. nazymnika, we 18 hodź. w Kulturnej fabrice we Wojerecach wotměje. Na dnjowym porjedźe poslednjeho lětušeho posedźenja ZP steji diskusija wo nowym myće za hospodarstwo, kotrež chce Domowina za přikładne spěchowanje serbšćiny we wobłuku hospodarstwa wot klětušeho spožčić. Za to je wuběrk za naležnosće změny strukturow, hospodarstwo a infrastrukturu namjety nadźěłał, kotrež maja čłonojo ZP w dźěłarničkach diskutować.

Kožupanka župy „Handrij Zejler“ Wojerecy, Gabriela Linakowa, budźe jako hósć wo aktualnym połoženju Serbstwa w regionje rozprawjeć.

Nimo toho chcedźa wo klětušich terminach gremijow třěšneho zwjazka wothłosować. Po naćisku dźěłoweho plana je za lěto 2024 jědnaće posedźenjow prezidija a šěsć zwjazkoweho předsydstwa planowanych. ZP ma namjet přichodny tydźeń schwalić.

Młodostni, wšojedne hač w Bukecach abo Łazu, w Přiwćicach abo Slepom, trjebaja rumy k zetkawanju. Domowina je to rozumiła. To mje jara wjeseli. Iniciatiwu nětko maja – nadawk budźe wotnětka, to, štož su započeli, tež derje dokónčić. Młodźinski klub drje je perfektny spočatk za zabawne wječory a wobohaća wjesne žiwjenje na cyle wosebite wašnje. Zo pak njeby młodźinski klub jeno zarjadnišćo wjesołeho wožlokanja był, je trjeba runje w spočatnej fazy młodostnych inten­siwnje podpěrać a spěchować. Za to móže na jednym boku wjesna zhromadnosć ­rukować, ale snano tež Domowina. Tajke zetkanišćo mjenujcy skići móžnosć, cyle nowy rěčny rum wutworić. Tež hdyž je serbšćina snano někak hišće w regionje a na wsy prezentna, móhli sej zamołwići nadawk na chorhoje napisać, kotryž rěka: Dajmy młodostnym, přichodej našeho ­luda, móžnosć so na cyle nowe wašnje ­ze swojim pochadom a swojej rěču ro­zestajeć. Maximilian Gruber

Do lětušeho rjadu z Čestnym znamješkom Domowiny počesćenych Serbow słuša tež Holger Mäkelburg. Za myto namjetowałoj běštej jeho župa Jakub Lorenc-Zalěski a předsydstwo Domowinskeje skupiny Trjebin, kotrejež čłon wón wot lěta 2007 je. Na mytowanskim zarjadowanju wuzběhny lawdatorka a čłonka mytowanskeho wuběrka Uta Henšelowa „jeho wulki angažement při hajenju serbskich wašnjow, tradicijow a nałožkow.“

Po jeje słowach najlěpši přikład za to su jeho prócowanja w zwisku z wozrodźenjom Šusterojc dwora w Trjebinje. Tu stara so z wulkim zapalom wo hladanje a zdźerženje wustajenskich eksponatow, wosebje ratarskich gratow. Nimo toho je wón iniciator wožiwjenja tradicionalnych ratarskich dźěłow na Šusterojc dworje. Jara woblubowany je Holger Mäkelburg mjez šulerjemi a pěstowarskimi dźěćimi wokoliny. Na projektnych dnjach předstaja jim rady na lóštne kaž tež wobrazliwe wašnje serbske burske žiwjenje abo wšědny šulski dźeń w prjedawšich časach.

Zo by swětło wizije lěpje skutkowało, trjebaš sćin reality. Tón je Cordula Ratajczakowa tak na prezentaciji ZARI wopisała: Sobudźěłaćerjo serbskich institucijow drje na dźěle serbuja, ale potom chodźa w přestawce do susodneje kofejownje a strowja „Guten Tag“. Cil ZARI je, kaž w zdźělence rěka, „zo awtomatisce wšudźe serbsce strowiš“, wšako „budźe po cyłej Łužicy zaso normalne serbować.“ Hač chcu w přichodźe woprawdźe wšě němske předawarki w pjekarnjach abo we wobchodach a wšěch pinčnikow hosćencow po cyłej Łužicy serbsce strowić, drje hišće njewěm, wšako mi misionarska žiłka pobrachuje. Ale sej wo tym – tež z přewodom socio­linguistiskich dopóznaćow – přemyslować, kak móhli šěrše nałožowanje serbšćiny w zjawnosći jako nowu normalitu etablěrować, je perfektny projekt za změnu strukturow. Wšako tči stary strach před złej wotmołwu „Hier wird deutsch gesprochen!“ hišće přehusto w našej kolektiwnej serbskej duši. Marcel Brauman