Přichod towarstwa rozjimali
Pod hesłom „Kak dale ze ZSW?“ planuje Zwjazk serbskich wuměłcow přewjesć w nowym lěće forum z čłonami towarstwa kaž tež ze wšitkimi za wuměłstwo a kulturne dźěło so zajimowacymi, předewšěm młodymi ludźimi.
Budyšin (AW/SN). Předsydstwo Zwjazka serbskich wuměłcow je wčera w Haslowje wo přichodźe swojeho towarstwa wuradźowało. Dotalne předsydstwo pod nawodom Istvána Kobjele, kotrež ma po rozsudźe hłowneje zhromadźizny z nowembra w Haslowje hač do kónca apryla 2017 dale skutkować, rozjimowaše předewšěm prašenje, kak móhli młodych kandidatow za nowe předsydstwo cyłka zdobyć. Tohodla bě tež Budyšan Bosćan Nawka do wuradźowanja zapřijaty. Wón bě so na zašłej hłownej zhromadźiznje zwólniwy wuprajił w nowym předsydstwje sobu dźěłać.
Přitomni so tuž wčera dojednachu, bórze po Nowym lěće w Budyšinje přewjesć z čłonami ZSW a ze wšitkimi zajimcami za wuměłstwo a kulturne dźěło, předewšěm młodymi ludźimi, forum pod hesłom „Kak dale ze ZSW?“. Chcedźa nowe ideje za dalše spomóžne skutkowanje wuspěšneho serbskeho towarstwa zezběrać a zdobom młodych Serbow za sobudźěło zahorić.
Ze sobu rěčeć pomha
Klětu popołdnjo za młode swójby
Na kónclětnym zarjadowanju Domowinskeje župy „Jan Arnošt Smoler“ w Budyšinje su přitomni zastupjerjo Domowinskich skupin a towarstwow na lětušu dźěławosć zhladowali.
Budyšin (SN/at). Wo skutkowanje Domowiny w Budyskej župje staraja so zwjetša zasłužbni skupinarjo, kotrymž je narodny angažement po tymle puću naležnosć wutroby. Tónle zaćišć je so minjeny štwórtk na žurli Serbskeho domu znowa wobkrućił, hdźež stej županka Jana Pětrowa a regionalna rěčnica Domowiny za župny teritorij Sonja Hrjehorjowa wjerški Smolerjoweho lěta kaž tež hłowne mysle nastupajo klětuše zarjadowanja předstajiłoj. Bohužel njeběchu wšitke ćělesa pod župnej třěchu zastupjene byli.
Jako kruty stołp wopokaza so předewzaće ze šulerjemi. 26 B-serbšćinarjow ze zakładnych šulow Bošecy, Bart, Wulka Dubrawa a Hodźij wobdźěli so na projekće k 100. posmjertnym narodninam Jurja Brězana w Hornim Hajnku. Za wubědźowanje Krabat 2.0 pak běchu jeno dźěći Wulkodubrawskeje šule swoje dźěła zapodali.
Na wuprawje we Waliziskej
Delegacija Serbow je so wčera na studijnu jězbu do Waliziskeje podała. Chcedźa so tam mjez druhim wobhonić, kak Walizojo swoju mjeńšinowu rěč zachowuja.
Cardiff (SN/MiR). „Chcemy-li swoje wočakowanja a diskusije minjenych lět k zachowanju a rewitalizaciji hornjoserbšćiny a delnjoserbšćiny chutnje zwoprawdźić, dyrbimy sej plan naprawow zdźěłać“, rjekny předsyda Domowiny Dawid Statnik, kiž delegaciju nawjeduje. Wuprawa ma wuměnje nazhonjenjow mjez Serbami a Walizami słužić. A z njeje, tak so wobdźělnicy nadźijeja, dóstanu woni inspiraciju, kak móhli mjenowany plan naprawow wobohaćić.
Mjez wobdźělnikami wuprawy su dalši zastupjerjo Domowiny kaž tež direktor Załožby za serbski lud Jan Budar, dr. Madlena Norbergowa z Rěčneho centruma WITAJ, dr. Fabian Jacobs ze Serbskeho instituta, zastupjerka intendanta za serbske dźiwadło w Němsko-Serbskim ludowym dźiwadle Madleńka Šołćic, Měto Nowak z ministerstwa za wědomosć, slědźenje a kulturu w Braniborskej a nawodnica Budyskeho studija MDR Bogna Korjeńkowa.
Krabatowych dobyćerjow w Serbskim muzeju wuznamjenili
Z mytowanskej swjatočnosću je so minjeny pjatk wubědźowanje „Krabat – pisaj, basni, moluj“ za dźěći 2. do 4. lětnika a „Krabat 2.0“ za młodostnych na žurli Budyskeho Serbskeho muzeja skónčiło.
Budyšin (SN/CoR). Dorost postaješe minjeny pjatk čiłu atmosferu na połnej žurli muzeja. „Kóždy je dobyćer, wšako smy zhromadnje něšto zdokonjeli“, dźakowaše so předsyda Domowiny Dawid Statnik wšitkim, kotřiž běchu so na kreatiwnym wubědźowanju kołowokoło serbskeho kuzłarja wobdźělili. Třěšny zwjazk bě je składnostnje 100. posmjertnych narodnin Jurja Brězana zhromadnje ze župami Michał Hórnik Kamjenc, Jan Arnošt Smoler Budyšin a Handrij Zejler Wojerecy wupisał. Kuzłać ma tež něšto z wědu činić, rozjasni direktorka Serbskeho muzeja Christina Boguszowa zakładnu mysličku dźěćom, a „wěda je móc, z kotrejž móžeš swět na dobro přeměnić“.
Analyzu „Pěsničkow“ předpołožił
Sekcija hudźba Maćicy Serbskeje a Towarstwo za staru serbsku ludowu hudźbu stej wčera do Budyskeho Serbskeho domu přeprosyłoj. Rozjimali su tam analyzu Smolerjowych „Pěsničkow“, kotruž bě publicist, nakładnik a předsyda sekcije Měrko Šołta předpołožił.
Budyšin (SN/CoR). Poslednje zarjadowanje Smolerjoweho lěta bě zdobom započatk noweje doby rozestajenja z najwažnišej twórbu Jana Arnošta Smolerja (1816 –1884). Škoda tuž, zo njeje přewjele ludźi wčera wažny wokomik dožiwiło, kak nimale 175 lět po wozjewjenju „biblije serbskeho wozrodźenja“ – kaž Měrko Šołta 1841/1843 wušłu zběrku „Pjesnički hornych a delnych Łužiskich Serbow“ mjenowaše – Serbja započinaja z nowym kritiskim widom na nju hladać.
Wot mytosa k realiće
Wuspěšne lěto
Kulow (SH/SN). Towarstwo katolskich Serbow w Kulowje Bratrowstwo je minjeny pjatk dźěławosć lěta bilancowało. Kaž rozprawješe čłon Jan Čěpic, je chór towarstwa pod nawodom dirigenta Franka Čórlicha 17 króć ze swojimi pěsnjemi kemše, wšelake swjedźenje a jubileje, kaž slěborny měšniski jubilej w Radworju, wobrubił. Dźiwadłowa skupina towarstwa žněješe wulki wuspěch z hru „Hdyž kokula woła“. Tuchwilu přihotuje nowy kruch Jana Aleksandera Fredra „Jědźk a lěnjuch“, kotryž je zdobom dar k 25lětnemu wobstaću skupiny. Premjera ma być 14. januara na lětnym swjedźenju w Bratrowstwa w Sulšecach.
Nimo aktiwitow spěwarjow a dźiwadźelnikow je cyłk mnohe dalše zarjadowanja organizował, mjez druhim zetkanje swójbow. Młodostni wobdźělichu so na rejwanskim kursu a młodym maćerjam pokazachu, kak so prawje narodnu drastu hotuja. Pjatk na Kulowskej Bosćanowej žurli je Bukečan Marko Grojlich swoju słuchoknihu „Wjesni šibałcy“ předstajił. Bratrowčenjo jemu při šalce kofeja abo horceho wina a skibce wosuška rady připosłuchachu.
Na adwentničce ZSW spisowaćela počesćili
Hórki (AW/SN). Adwentnička, na kotruž bě hišće hač do apryla skutkowace předsydstwo Zwjazka serbskich wuměłcow swojich čłonow a předsydstwo Hórčanskeho wjesneho towarstwa Při skale minjeny pjatk do tamnišeho sportoweho domu přeprosyło, měješe něšto wosebiteho. Za nju bě Koło serbskich spisowaćelow pod nawodom Benedikta Dyrlicha přihotowało počesćenje spisowaćela Jurja Kocha składnostnje jeho 80. narodnin. Tak słyšeše po zahajenju programa z dudakom Tomaszom Nawku wjace hač 30 přitomnych wo jubilarje reportažowy portret Alfonsa Wićaza; Jěwa Marja Čornakec čitaše z powědančka „Zabych ći něšto rjec“ a Dorothea Šołćina předstaji Kochowy skečowy manuskript „Rěčespytnikaj“, kotryž bě wón před wjele lětami za serbsku kabaretnu skupinu spisał. Benedikt Dyrlich recitowaše jeho basnje, Cosima, Tomasz a Bosćan Nawkec čitachu wurězki z Kochoweho scenarija za film wo Smolerju, Křesćan Krawc přednjese swójsku recensiju k hrě „Lijeńca“, prof.
K podpěrje so wuznali
Domowina a energijowy koncern LEAG lětnu rozmołwu wotměłoj
Rowno (SN/JaW). Předewzaće Łužiska energija hórnistwo AG a Łužiska energija milinarnje AG (LEAG) wuznawa so k zamołwitosći napřećo serbskej ludnosći we Łužicy. To wobkrućichu zastupnicy zawoda minjeny pjatk na Rownjanskim Njepilic statoku. Tam běchu so naslědnicy Vattenfalla a Domowina k lětnemu wuradźowanju zešli, kaž ze zhromadneje nowinskeje zdźělenki wuchadźa. „Tež za lěto 2017 wostanje zrěčenje, kotrež běštej Vattenfall a třěšny zwjazk serbskich towarstwow lěta 2007 prěni raz podpisałoj, zakład zhromadneho dźěła. LEAG podpěruje klětu dale serbske wobydlerstwo w brunicowym regionje při zachowanju a wuwiwanju socialneje a etniskeje identity“, rěka w zdźělence.
