Wobdźiwajomna pisanosć
Serbske jutrowne wiki w Budyšinje znowa kónctydźenski magnet byli
Budyšin (JK/SN). Hižo 26. raz wotměchu so kónc tydźenja w Budyskim Serbskim domje serbske jutrowne wiki. Něhdźe 2 500 wopytowarjow je na nje sobotu a wčera přichwatało, z čimž bě Spěchowanski kruh za serbsku ludowu kulturu jako wuhotowar jara spokojom.
Na chódbje prěnjeho poschoda, w foyeru druheho a wosebje na žurli pokazowachu debjerjo jutrownych jejkow z Delnjeje, srjedźneje a Hornjej Łužicy swoje wušikne dźěło. K spokojenju znajerjow a lubowarjow jejkow běchu woni ze wšitkimi znatymi debjenskimi technikami zastupjeni. Dominanca někajkeje techniki njehodźeše so zwěsćić, hačrunjež chila trend po wuprajenju debjerjow k bosěrowanju.
Kandidatam hnydom nadawk sobu dali
Chrósćicy (KJu/SN). Županka Zala Cyžowa bě kandidatow župy „Michał Hórnik“ za Zwjazkowe předsydstwo Domowiny – wjesnjanostu gmejny Chrósćicy Marka Klimana a bywšeho jednaćela Domowiny Bjarnata Cyža – na wčerawše posedźenje župneho předsydstwa w Chrósćicach přeprosyła. Zala Cyžowa tohorunja kandiduje. Kandidaća su hnydom prěni nadawk dóstali. Někotre lěta hižo njewotměwaja so posedźenja zwjazkoweho předsydstwa wjace na teritoriju župy „Michał Hórnik“. Zo móhło župne čłonstwo kontakt z třěšnym zwjazkom hajić, je wažne tež tu na městnje posedźenja přewjesć. To měło so w nowej wólbnej periodźe změnić.
Župne předsydstwo schwali wčera dźěłowy plan za lěto 2017. Štyri ćežišća su dźěći, młodźina a swójby; rěč, kultura stawizny; Domowinske skupiny, towarstwa, swjedźenje a přećelske poćahi do Pólskeje. Wjetše a mjeńše projekty měrja so na čłonstwo kaž tež na dalšich zajimcow na teritoriju župy. Župa planuje dale projektaj za wyšej šuli Ralbicy a Worklecy w Hornim Hajnku. Chcedźa so tematisce z knihomaj Jurja Brězana „Naš wuj z Ameriki“ a „Stary nan“ zaběrać.
Namjety zapodać
Wojerecy (SN). Swoje namjety nastupajo kandidatow za nowe Zwjazkowe předsydstwo Domowiny su nimo župy Delnja Łužica wšitke towarstwa a župy zapodali. To zwěsći prezidij Domowiny na swojim wčerawšim posedźenju we Wojerecach, kaž předsyda Dawid Statnik zdźěli. Župa Delnja Łužica kandidatow jutře na hłownej zhromadźiznje w Turjeju pomjenuje.
Z přihotami 18. hłowneje zhromadźizny Domowiny su so čłonojo prezidija wčera wobšěrnje zaběrali. Trěbne su hišće namjety za rewizijny kaž změrcowski wuběrk třěšneho zwjazka. Za to kaž tež za dźěłakmanosć hłowneje zhromadźizny trěbnej redakcisku a wólbnu komisiju proša čłonske towarstwa a župy wo zwólniwych Domowinjanow. Čłonojo prezidija delegowachu Serbsku rejowansku skupinu Smjerdźaca na folklorny festiwal, kotryž wotměje so w bołharskim Burgasu. Dale podpěruje Domowina kulturnu wuměnu Delnjoserbskeho dźěćaceho a młodźinskeho ansambla ze spěwnym ćělesom Southend-Boys-and-Girls-Choir z Jendźelskeje a wuměnu Krabatoweho towarstwa z turistiskim zwjazkom Vigred Metlika w Słowjenskej.
„Praski serbski seminar městno zetkawanja“
Praha (jw/SN). Lukáš Novosad wostanje předsyda Towarstwa přećelow Serbow w Praze (SPL). Jasna wjetšina je jemu na hłownej a wólbnej zhromadźiznje sobotu w Serbskim seminarje na Małej stronje znowa dowěru wuprajiła. Jako městopředsydka dale skutkować budźe Eliška Papcunová, mjeztym zo wudospołnitej nowej mjezwoči předsydstwo towarstwa. Nimo dotalnych čłonow Ondřeja Šrámeka, Antonína Kříža a Milana Hrabala staj to Přemysl Černý a Josef Zdobinský. Serbow zastupowaštaj na zhromadźiznje referent Domowiny za kulturne naležnosće a wukraj Clemens Škoda a Judith Wjenkec.
Žane skrótšenja!
Budyšin (SN/at). „Bojimy so, zo z nowym serbskim šulskim postajenjom so poskitk pomjeńši a k stratam w kwaliće dóńdźe.“ Kaž Domowina pjatk zdźěli, piše to předsyda Dawid Statnik w lisće braniborskemu ministrej za kubłanje, młodźinu a sport Günterej Baasce (SPD) nastupajo wotpohladane skrótšenja wučby serbšćina. Statnik informuje zdobom wo tym, zo je so Zwjazkowe předsydstwo Domowiny 25. februara jednohłósnje stejišću braniborskeje Rady za serbske naležnosće přizamknyło.
Domowina namołwi Güntera Baasku podpěrać, zo bychu so w krajnej wustawje zakótwjene prawa serbskeho ludu dodźerželi a so znajmjeńša tuchwilny staw podawanja serbšćiny zachował. „W tymle sensibelnym wobłuku njesmědźa so skrótšenja dopušćeć“, rěka w lisće. Statnik skedźbnja na delnjoserbšćinu jako jednu z najbóle wohroženych rěčow. Po Charće regionalnych a mjeńšinowych rěčow je wona wosebje škitana. Tež wustawa a Serbski zakoń Braniborskeje matej jasne rjadowanja nastupajo sposrědkowanje delnjoserbšćiny w šulach a dźěćacych dnjowych přebywarnjach.
Manfred Hermaš zaso předsydstwo SKT znowa přewzał
Manfred Hermaš je zaso předsyda towarstwa Serbski kulturny turizm. Jednohłósnje su jeho čłonojo cyłka minjeny pjatk na wólbnej zhromadźiznje w Rownom do zastojnstwa wolili.
Dźěłarnička z přednoškomaj a hru
Wosebitosće serbskeje rěče a móžnosće jeje nawuknjenja stejachu w srjedźišću dźěłarnički ewangelskich Bjesadow, kotraž wotmě so sobotu na Rakečanskej Pawołskej šuli.
Rakecy (GH/SN). Wot lěta 2013 zetkawaja so serbske ewangelske Bjesady z Bukec, Hodźija a Rakec jónu wob lěto k zhromadnej dźěłarničce. Sobotu bě Rakečanska Bjesada mjeztym druhi raz hosćićelka tohole zetkanja. Po hižo zwučenym wašnju zahajichu wobdźělnicy dźěłarničku z krótkej nutrnosću, kotruž nawjedowaše superintendent Jan Malink. Na žurli Pawołskeje šule móžeše wón nimale 30 wopytowarjow witać.
Hłowna a wólbna zhromadźizna ZSW zwołana
Budyšin (AW/SN). Předsydstwo Zwjazka serbskich wuměłcow pod nawodom jeho předsydy Istvána Kobjele je minjeny pjatk na swojim posedźenju w Budyšinje hłownu a wólbnu zhromadźiznu ZSW za 28. apryl 2017 wot 17 hodź. w Budyskim hosćencu „Zum Echten“ zwołało.
Hižo loni 18. nowembra bě ZSW w Haslowje hłownu a wólbnu zhromadźiznu přewjedł, na kotrejž poda předsystwo wobšěrnu dźěłowu a financnu rozprawu swojeje dwulětneje legislaturneje periody. Nowe předsydstwo njejsu wuzwolili, dokelž běštaj jenož dwaj čłonaj ZSW zwólniwaj za gremij kandidować. Wotpowědnje statutej towarstwa pak maja znajmjeńša třo kandidaća k wólbam k dispoziciji być. Z dotalneho předsydstwa njebě nichtó znowa kandidował. Wone pak bu w Haslowje zawjazane, čestnohamtsku funkciju hač do apryla dale wukonjeć a w tym času so za kandidatami rozhladować a jich zdobyć. Tuchwilu su štyrjo zwólniwi kandidować, jedyn z nich tež jako nowy předsyda ZSW. Dalši sobustawajo zwjazka wuměłcow móža hišće na wólbnej zhromadźiznje swoju kandidaturu přizjewić.
Na jara spodobne, žortne a informatiwne wašnje je Franc Čornak ...
Pobrachowacu serbšćinu kritizowali
Budyšin (SN/at). Lětuše planowane projekty stejachu w srjedźišću wuradźowanja předsydstwa župy „Jan Arnošt Smoler“ wčera w Budyskim Serbskim domje. Kaž regionalna rěčnica Domowiny za teritorij Budyskeje župy Sonja Hrjehorjowa na naprašowanje zdźěli, přihoty za swójbne popołdnjo zaměrnje postupuja. Zarjadowanje je za 18. nowember w Hodźiju předwidźane. Wothłós z gmejny je dosć pozitiwny, kaž zwěsćichu po prěnich rozmołwach z wjesnjanostu Geraldom Meyerom (njestronjan) a ze zastupjerjemi pěstowarnje a towarstwow.
Župne předsydstwo je so za cil lětušeje kubłanskeje jězby rozsudźiło. Tak podadźa so 23. septembra do Ochranowa. Dalši namjet, w reformaciskim lěće do Lutheroweho města Wittenberga jěć, njebu wot wjetšiny přiwzaty.
Ptačokwasne předstajenje Serbskeho ludoweho ansambla za dźěći w Budyšinje je mjez čłonami župneho předsydstwa pobrachowaceje serbskeje rěče dla kritiku zbudźiło. Woni wobžaruja, zo njeje zarjadowanje šulerjam, kotřiž serbšćinu wuknu, składnosć skićiło ju na jewišću w spěwach abo druhich dźělach programa SLA dožiwić.
