20lětne wobstaće woswjeća w oktobrje
Takrjec „dźěćo“ swjatočnosćow składnostnje 750lětneho wobstaća Ćiska pola Wojerec je tamniša serbska rejwanska skupina. Wona wobsteji mjeztym 20 lět. To bě přihódna přiležnosć Hance Zahrodnikec, praktikantce w redakciji SN, so z předsydku kulturneho cyłka Gabrielu Linakowej rozmołwjeć.
Wy sće nětko hižo 20 lět z čłonku Ćišćanskeje rejwanskeje skupiny. Kotre dopomnjenki maće na jeje załoženje?
G. Linakowa: Nastała je naša skupina před 20 lětami, w zwisku ze 750. róčnicu naspomnjenja Ćiska. Tehdy chcychmy jónkrótnje k jubilejej ludowe reje předstajić. Dokelž pak je nam to telko wjesela wobradźało, prajachmy sej: Chcemy rejwansku skupinu załožić. A tak smy sej choreografku pytali, zo by nam choreografije k znatym serbskim spěwam wuwiwała. Tak smy dale činili, a tuchwilu přisłuša skupinje 34 čłonow.
Zawěsće sće tež tójšto kuriozneho dožiwili?
Manfred Hermaš wostanje župan
Župa „Jakub Lorenc – Zalěski“ Slepo so dale prócuje serbskosć w Slepjanskej kónčinje zachować a dale wuwiwać. Zdobom podpěruje próstwy a prócowanja ludźi na městnje, tež hdyž dyrbjała raz přećiwo prudej płuwać.
Slepo (SN/JaW). Manfred Hermaš wostanje na čole Domowinskeje župy „Jakub Lorenc Zalěski“. Na hłownej a wólbnej zhromadźiznje minjeny pjatk w Slepjanskim kulturnym centrumje je jemu 33 ze 34 přitomnych delegatow dowěru wuprajiło a jeho jako župana wobkrućiło. Za městožupanku wuzwolichu z 32 hłosami Dianu Maticowu. Jednaćelske předsydstwo tworja Ingrid Lejnikowa, Kathleen Reichertowa (wobě dóstaštej 32 hłosow) a Hartmut Hančo (31 hłosow). Rozšěrjenemu předsydstwu přisłuša jědnaće wosobow, mjez kotrymiž su Stephanie Bierholdtec, Wolfgang Kotisek a Petra Rübesamowa.
Jónu na wjesnej šulskej ławce sedźeć
Nowy předsyda
Nowa Wjeska (CŠ/SN). Damian Dyrlich je nowy předsyda župy „Jan Skala“ – Zwjazka serbskich studowacych (ZSS). Předsydstwo bě čłona Lipšćanskeje Sorabije na swojim posedźenju sobotu w Nowej Wjesce wuzwoliło. Zastojnstwo městopředsydy dowěrichu Romanej Kralej z Drježdźanskeho studentskeho towarstwa „Bjarnat Krawc“.
Dale zaběrachu so sobotu z přihotami lětušeho proboweho lěhwa wot 22. do 24. septembra w Namysłowje. Wšitkich, kotřiž w studentskim chórje spěwaja abo přinošk za schadźowanku planuja, na wuprawu přeprošuja. Městna su na 35 wobmjezowane. Přizjewić móža so zajimcy pola Damiana Dyrlicha abo přez Facebookowu stronu towarstwa hač do 15. julija. Rejzka Krügerowa rozprawješe wo tučasnje nastawacej młodźinskej přiradźe, kotraž ma so 12. awgusta skonstituować. Jako zastupjerja studentow w gremiju wuzwoli předsydstwo ZSS tohorunja Damiana Dyrlicha.
Zastupjer Serbskeje murje předstaji tučasne aktiwity a zhromadnje z předsydstwom ZSS wuradźowachu wo móžnym zhromadnym dźěle.
Zamóže ludźi zahorić
Festiwalne powěsće
Chrósćicy. Za XII. mjezynarodny folklorny festiwal pyta přihotowanski wuběrk pomocnikow wot 16 lět, kotřiž chcyli hłownje jewišća sobu na- a wottwarjeć. To płaći za čas wot wutory, 20., do póndźele, 26. junija. Zajimcy njech so w regionalnym běrowje Domowiny w Chrósćicach přizjewja, a to pod telefoniskim čisłom 035796/ 96 254 abo e-mailnje pod .
Dale přihotowanski wuběrk a Radworske Šmitec wozydłownistwo planujetej, zarjadować wosebity shuttlowy bus za wopytowarjow folklorneho festiwala sobotu, 24. junija, do Chrósćic. Tohodla proša zajimcow, hač do 14. junija zdźělić, z kotrych wsow a městow bychu sej rady do Chrósćic dojěli.
Hač do pjatka, 16. junija, předawaja za folklorny festiwal w Chrósćicach kartki w předpředani, a to w Budyskej Serbskej kulturnej informaciji, pola časnikarja Jürgena Njeka w Chrósćicach a w Ralbičanskej kwětkarni „Kostorjanc“. Za wotewrjenske zarjadowanje 22. junija w Budyšinje předawaja kartki přez dźiwadłowu kasu.
Młodostni su přichod rejwanskeho ćělesa
Na probje dorosta Serbskeho folklorneho ansambla Wudwor
Je sobotu po 16 hodź. W sportowni Chróšćanskeje „Jednoty“ dorostowa skupina Serbskeho folklorneho ansambla Wudwor intensiwnje probuje. Wona zwučuje za 12. mjezynarodny folklorny festiwal „Łužica 2017“, wotměwacy so kónc junija mjez druhim tež w serbskej wsy nad Satkulu.
Kónc brunicy bywa realita
Zwjazkowe předsydstwo Domowiny je na swojim zašłym posedźenju na wotbagrowane wsy spominało. Zdobom je gremij wobzamknył, jedyn fachowy wuběrk wjac hač dotal wutworić.
Choćebuz (SN/JaW). Zwjazkowe předsydstwo Domowiny ma wotnětka šěsć fachowych wuběrkow. Su to wuběrk za serbsku ciwilnu towaršnosć, kubłanski wuběrk, wuběrk za kulturu a wuměłstwo, wuběrk za hospodarstwo a infrastrukturu, wuběrk za prawniske naležnosće kaž tež wuběrk za zjawnostne a wukrajne dźěło. To je zwjazkowe předsydstwo na swojim wuradźowanju minjeny pjatk w Choćebuzu wobzamknyło.
Štó budźe we wuběrkach skutkować, dotal jasne njeje, dokelž so hišće wšitcy čłonojo zwjazkoweho předsydstwa zapisali njejsu. To dyrbi prezidij kontrolować a wuběrki dowutworić. Kaž předsyda Domowiny Dawid Statnik rozłoži, su wuběrki „na dźěłowe pola wusměrili“. Dotal měješe zwjazkowe předsydstwo pjeć wuběrkow, lětsa su šěršo zapołoženych dźěłowych polow dla wjac wutworili.
Zasonjene kućiki, wuske haski
Wuprawa seniorow do Bayerskeho lěsa južnych Čech wjedła
Seniorojo Serbskeho šulskeho towarstwa a dalši zajimcy su so tež lětsa w nalěću na wjacednjowsku kubłansku jězbu podali. 8. meje rano je šoferka Poldrakec wozydłownistwa Cordula z 28 wosobami do směra na Drježdźany wotjěła. Dokelž běchu w Němskej wjacore dróhi zašlahane, jědźeše wona přez Čěsku do směra na Šumawu.
Škleńcudujerjej přihladowali
Prěnja stacija bě w Bayerskim lěsu město Arnbruck „wjes škleńcy – Weinfurtner“. Tam móžachmy škleńcudujerjej přihladować, kak z małeje kulki wulka waza nastawa. Po tym wobhladachmy sej we wjacorych wulkich halach hotowe produkty ze škleńcy a sej tež tón abo tamny wudźěłk kupichmy. Wječor dojědźechmy do hotela w městačku Büchlberg. Wone ma něhdźe 4 000 wobydlerjow a je 15 km wot Passauwa zdalene. W dawnych časach su sej tam nimo tkalcow a lěsnych dźěłaćerjow mnozy swój wšědny chlěb z transportom sele zasłuželi.
Žane přidatne podłožki žurnalistam
Zwjazkowe předsydstwo Domowiny ma płaćiwy dźěłowy plan. Jón su čłonojo gremija pjatk wječor w Choćebuzu wobzamknyli.
Choćebuz (SN/JaW). Dźěłowy plan Zwjazkoweho předsydstwa Domowiny za lětsa je schwaleny. Wón wobsahuje nimo terminow a městnosćow zetkanjow tež temy, kotrež chcyli rozjimować.
Tohorunja schwalili su pjatk w Choćebuskim delnjoserbskim internaće lětuši hospodarski plan zarjada Domowiny. Kaž zdźěli jednaćel třěšneho zwjazka Marko Kowar, je plan wurunany a Załožba za serbski lud je jón přizwoliła. W diskusiji zwurazni Jan Nuk, zo ma ćeže, dokelž njesteji w materiji a wšitko prawje njerozumi. Předsyda Dawid Statnik poskići přewjesć klawsuru a sej naležnosć rozjimać dać. Manfred Hermaš skedźbni na to, zo „měli so na ludźi w zarjedźe spušćeć“. Nuk měnješe, zo njeńdźe wo dowěru, ale „dyrbimy rozumić, wo čim rěčimy“. Předsyda skedźbni na to, zo tež prezidij plany w předpolu rozjimuje.
