Chcedźa serbske temy načeć
Budyšin/Cluj (SN/JaW). Zastupnicy Domowiny chcedźa na 62. kongresu Federalistiskeje unije europskich narodnych mjeńšin (FUEN) wot 17. do 21. meje w rumunskim měsće Cluj-Napoca tež serbske temy načeć. To připowědźa třěšny zwjazk w nowinskej zdźělence.
Předsyda Domowiny Dawid Statnik, kotryž delegaciju Serbow – jej přisłušeja čłon Zwjazkoweho předsydstwa Domowiny a wiceprezident FUEN Bjarnat Cyž, čłon prezidija zwjazkoweho předsydstwa William Janhoefer, jednaćel třěšneho zwjazka Marko Kowar kaž tež zastupjerka młodźinskeho towarstwa Pawk Rejzka Lipičec a nawodnica mjeńšinoweho sekretariata Judith Wałdźic – na kongres nawjeduje, chce tam nadrobnje wo digitalizaciji serbskeje rěče přednošować. Dale chcedźa zastupjerjo Serbow kongresej FUEN namjetować, přizamknyć so rezoluciji Domowiny nastupajo serbsku a bilingualnu wučbu w Delnjej Łužicy, kotruž je 18. hłowna zhromadźizna Domowiny wobzamknyła. Třěšny zwjazk Serbow je wot lěta 1990 z čłonom FUEN.
Serbske adresy wobzamknyli
Čłonojo zwjazkoweho předsydstwa do „złoteje knihi“ zapisani
Budyšin (SN/JaW). Domowina swoje skutkowanje dale modernizuje, wužiwajo při tym nowe medije. Kaž předsyda třěšneho zwjazka Dawid Statnik na zašłym posedźenju zwjazkoweho předsydstwa, kotrež bě zdobom prěnje po hłownej wólbnej zhromadźiznje, zdźěli, chcedźa čłonam gremija přichodnje wšitke za posedźenja trěbne podłožki tež internetnje spřistupnić. Tak njelutuja jenož papjeru, ale dźiwaja tež na škit přirody, tak měnjachu přezjednje na zhromadźiznje kónc apryla w Budyskim Serbskim domje. Wutworić chce Domowinski zarjad k tomu wotmjezowany wobłuk na swojich internetnych stronach, ke kotremuž změja jeno přistup čłonojo zwjazkoweho předsydstwa a zamołwići z klučowym hesłom. Kaž předsyda Domowiny dale informowaše, dóstanu wšitcy dwě e-mailowej adresy jako čłonojo gremija, jednu ze serbskim a jednu z němskim mjenom. Diskusija nasta wo tym, kotra z njeju měła hłowna adresa za elektronisku póštu być.
Dudy w Bayerskej
Slepo (WK/SN). Čłonojo Serbskeho folklorneho ansambla Slepo hotuja so na zetkanje dudakow w muzeju Oberpfälzer Freilandmuseum Neusath-Perschen pola Nabburga 21. meje. Prěni raz chcedźa tam sobuskutkowacy wšitkich spartow ansambla – hudźbnicy, rejwarjo, spěwarjo – serbsku folkloru předstajić. Hižo w lětomaj 2007 a 2011 bě hudźbna skupina Slepjanskeho ćělesa na bayerskim zetkanje dudakow wobdźělena, 2015 přidruži so chór. Lětsa chce tam 30 ansamblowcow wjacore wustupy wuhotować. Na cyłym terenje muzeja pod hołym njebjom zwjeseleja wšelakore skupiny zwjetša z Čěskeje a Bayerskeje mnohich wopytowarjow z tradicionalnej hudźbu.
Slepjenjo chcedźa tež tónraz składnosć wužiwać, na 400 kilometrow zdalene bydlacych Serbow skedźbnić. Na rollupje předstaja sydlenski rum a narodne drasty. Z prospektami a informaciskimi łopješkami rozłoža w Neusathu-Perschenje kulturne wjerški, nałožki a tradicije Serbow. Za lětuši Mjezynarodny folklorny festiwal „Łužica“ w Chrósćicach a za klětuši Mjezynarodny festiwal dudakow w Slepom chcedźa tohorunja wabić.
Nowy předsyda myslički za přichod ZSW předstajił
Budyšin (SN/CoR). Jan Bělk je nowy předsyda Zwjazka serbskich wuměłcow. Na hłownej a wólbnej zhromadźiznje minjeny pjatk w Budyskim hosćencu „Zum Echten“ su hudźbnika, nakładnika a kulturneho organizatora z Berlina z 19 wot móžnych 22 hłosow na čoło ZSW wuzwolili. „Njewobhladujće dźensniše wólby jako wólby jeničce mojeje wosoby respektiwnje wosobow, kotrež su zwólniwe w předsydstwje sobu dźěłać, ale jako rozsud za abo přećiwo přichodej ZSW“, prošeše Bělk přitomnych do wólbow. Čłonow noweho předsydstwa su wuspěšnje wolili, po tym zo njeběchu nimale wšitcy dotal w gremiju sobuskutkowacy wjace kandidowali. Jenož dotalny předsyda István Kobjela wostanje z čłonom předsydstwa. Dale přisłušeja gremijej nětko komponist Jan Cyž, swobodny hudźbnik a publicist Bosćan Nawka, spisowaćelka a dramaturgowka SLA Jěwa-Marja Čornakec kaž tež nowaj čłonaj, nawoda Budyskeho studija Sakskeho wukubłanskeho a wupruwowanskeho kanala Michał Cyž a zastupjerka intendanta za serbske dźiwadło NSLDź Madleńka Šołćic.
Namjety zapodać
Jutrowne melodije zaklinčeli
Na probje Serbskeho muskeho chóra Delany w Konjecach
Kóždu wutoru wječor zetkawaja so spěwarjo Serbskeho muskeho chóra Delany, zo bychu zwučowali, tak tež 4. apryla, jako jich na probje wopytach.
Je krótko do sedmich. Steju před zachodom burskeje stwy pod Konječanskej wjesnej žurlu. W njej mužojo probuja. Jako prěni přińdźe spěwar Jurij Kurink z Nowoslic. Wón je hakle dźeń prjedy 77. narodniny swjećił. Rady a lóštnje Nowosličan w muskim chórje sobu čini. „Spěwam 1. basu, w kotrymž smy pjećo spěwarjo. W 2. basu su tež pjećo“, wón powěda.
Wo pomniku naležnje debatowali
Towarstwo Cyrila a Metoda chce přichodny čas dźěłowu skupinu wutworić, kotraž ma postajenje pomnika za zbóžneho kapłana Alojsa Andrickeho přihotować. Na to su so čłonojo TCM na swojej wčerawšej hłownej zhromadźiznje w Kulowje dojednali.
Bazowa demokratija
Kóždy měł reprezentować župu
Nowe předsydstwo župy Delnja Łužica je so wčera w Choćebuskim Serbskim domje prěni króć schadźowało. Mjez druhim wuhódnoćichu lětušu hłownu zhromadźiznu Domowiny.
Choćebuz (HA/SN). K swojemu prěnjemu wuradźowanju po hłownej a wólbnej zhromadźiznje župy Delnja Łužica 10. měrca w Turjeju je so nowowuzwolene předsydstwo župy wčera w Choćebuskim Serbskim domje zetkało. Do předsydstwa běchu delegaća 13 čłonow wuzwolili. Jako župan skutkuje William Janhoefer, kiž je tež předsyda Brjazynskeje Domowinskeje skupiny. Na lětušej hłownej zhromadźiznje Domowiny we Wojerecach su Janhoefera z wulkej wjetšinu wobdźělnych delegatow tež wuzwolili za jednoho z dweju městopředsydow Domowinskeho předsydy Dawida Statnika. Mjez čłonami noweho župneho předsydstwa, kotrež ma nawjetšu Domowinsku župu hač do lěta 2020 nawjedować, je pjeć nowych čłonow. Mjez nimi je Marja Elikowska-Winklerowa, wjelelětna nawodnica Choćebuzkeje Šule za delnjoserbsku rěč a kulturu kaž tež kulturnik Gerald Schön, serbski spěwar a nawoda wšelakich serbskich chórow.
