Prezidij wabi za załožbowu radu
Budyšin (SN). Na wčerawšim posedźenju prezidija Domowiny staj předsyda Dawid Statnik a městopředsyda Hartmut Leipner, kotryž je zdobom městopředsyda prezidija FUEN, wo lětušim kongresu třěšneho zwjazka narodnych mjeńšin w Europje rozprawjałoj. Tutón bě so srjedź septembra w Finskej wotměł. Nimo njeju je so ze stron Domowiny čłonka zwjazkoweho předsydstwa Šarlota Kušcyc wobdźěliła. Hłowny zaměr serbskeje delegacije běše wobzamknjenje rezolucije, z kotrejž sej wobdźělnicy kongresa zaručenje serbšćiny w šulach žadaja. Serbšćina nima być jenož rěč we wučbje, ale tež we wšědnym dnju a zo Braniborska a Sakska měłoj rěčne planowanje podpěrać. Nimo toho je so nowa dźěłowa skupina FUEN za předźěłanje wustawkow wutworiła. Předsyda Dawid Statnik w njej sobu skutkuje.
Dale zaběraše so prezidij z přihotom wólbow serbskich zastupjerjow ze Sakskeje do załožboweje rady. Hač do 30. oktobra 2026 móža so zajimcy pola Domowiny z mejlku na přizjewić. Prezidij wospjet wšěch zajimowanych a aktiwnych Serbow namołwja, za wólby kandidować.
Wuhotuja dalši sympozij bajow
Budyšin (kl/SN). Čłonojo župneho předsydstwa župy „Jan Arnošt Smoler“ Budyšin su so na swojim měsačnym wuradźowanju wčera w Budyskim Serbskim domje na wjacore terminy za přichodne zarjadowanja dorěčeli. Adwentničku za čłonow župy wuhotuja štwórtk, 3. decembra, popołdnju na žurli Budyskeho Serbskeho domu. Čłonojo Domowinskich skupin a towarstwow župy su wutrobnje přeprošeni.
Dale steješe plan klětušich předewzaćow na programje. Hłownu a zdobom wólbnu zhromadźiznu Budyskeje župy přewjedu klětu 10. apryla. Zhromadnje z Drježdźanskim towarstwom Carl Gustav Jung wuhotuje župa wot 18. do 20. junija 2027 w Domje tysac hatow w Stróži třeći Łužiski sympozij bajow z naročnym serbskim podźělom. Po tym zo je lětuša kubłanska jězba tójšto zajimcow přiwabiła, planuja tajku zaso klětu w septembrje.
Nazymski koncert njewotměje so lětsa w Budyšinje, ale w Hodźiju, a to hižo tónle sobotu, 3. oktobra. Chór Budyšin jón w tamnišej cyrkwi na česć Jurja Pilka wuhotuje.
Předsydstwje wuradźowałoj
Chrósćicy/Choćebuz (SN/MG). Předsydstwo župy „Michał Hórnik“ je so wčera schadźowało. Kaž regionalna rěčnica Katharina Jurkowa na naprašowanje našeho wječornika zdźěli, su so čłonki a čłonojo wosebje wo lětušich a klětušich projektach wuměnili. Tak dopřihotuja winowy swjedźeń, kotryž wotměje so sobotu w Pěskecach. W nowembrje přewjedu dźěłarničce, jednu za zhotowjenje plakatow a druhu přećiwo prawicarstwu. Klětu chcedźa so wosebje na zhromadne projekty ze skupinami a towarstwami župy koncentrować, rjekny Jurkowa.
Regionalna rěčnica župy Delnja Łužica Heike Apeltowa rozprawješe w rozmołwje ze Serbskimi Nowinami wo posedźenju župneho předsydstwa w Choćebuzu. Tam staj sobudźěłaćerjej Serbskeho instituta Fabian Jacobs a Měto Nowak projekt předstajiłoj, z kotrymž chcedźa delnjoserbske mjena do imaterielneho kulturneho herbstwa UNESCO zapisać. Dale pomjenowachu čłonki a čłonojo serbskich zastupjerjow za sydom šulow, w kotrychž maja Serbja městno w šulskej konferency. Nimo toho wuhódnoćichu hłownu zhromadźiznu župy Delnja Łužica.
Samodo Awstralskeje delegowali
Chrósćicy (SN/mb). Domowina drje ma nětko nowy wuběrk „Hornja a Delnja Łužica – zhromadnosć po cyłej Łužicy“, ale najprjedy jenož z třomi čłonami: Na zjawnym posedźenju zwjazkoweho předsydstwa (ZP) zašły pjatk w Chrósćicach su so Franciska Albertowa z Delnjeje Łužicy, Dawid Statnik a Bjarnat Cyž z Hornjeje Łužicy za sobudźěło přizjewili. Ze stron Domowinskeho zarjada budźe kulturny referent Clemens Škoda wuběrkej poboku. Ideju za tutón wuběrk su na klawsurje zwjazkoweho předsydstwa wupjekli.
Syman Hejduška, dotal zastupjer Zwjazka serbskich wuměłcow (ZSW), je swój mandat w ZP złožił. Přičina: Wón je mjeztym „kulturny posrědnik za hudźbu a reje“ w Syći za serbsku rěč a regionalnu identitu Zari w nošerstwje Domowiny. Přistajeni Domowiny pak njesmědźa ZP přisłušeć, wšako ma gremij jich kontrolować. Tohodla su čłonojo ZP rozsud jenož na wědomje brali, ZSW je mjez druhim z předsydu Janom Bělkom dale w najwyšim politiskim gremiju Domowiny zastupjeny.
Wuběrk za zhromadnosć we Łužicy?
Wo mizerje serbskeho kubłanja, z kotrejž je so serbska rada Sakskeje wutoru zaběrała, budźe jutře najskerje tež zwjazkowe předsydstwo Domowiny (ZP) rěčeć. Na dnjowym porjedźe wšak so dotal druhe temy jewja.
Budyšin (SN/mb). Na swojej internetnej stronje prezentuje Domowina tuchwilu wuběrki za politiske a prawniske naležnosće, za widźomnosć Serbow w hospodarstwje, za dom Měrćina Nowaka-Njechorńskeho, za spožčenje Myta za hospodarstwo, mytowanski, změrcowski a rewizijny wuběrk kaž tež wuběrk, kiž ma zdźěłać namjet za wysokosć mytow, kotrež Domowina spožča. Nětko planuja wutworjenje dźewjateho wuběrka: Na dnjowym porjedźe přichodneho posedźenja ZP pjatk wječor w Chrósćicach steji mjez druhim wutworjenje wuběrka, kiž ma so „Hornja a Delnja Łužica – zhromadnosć po cyłej Łužicy“ mjenować.
Župa planuje za nazymu
Wojerecy (SN/CeK). Na wčerawšim posedźenju předsydstwa župy „Handrij Zejler“ Wojerecy su nowu regionalnu rěčnicu Juliette Aulichowu witali. Młoda žona ze Židźinoho je funkciju spočatk septembra přewzała. Po tym wuhódnoćichu kubłansku jězbu do Delnjeje Łužicy, na kotrejž bě so 43 wosobow wobdźěliło. We wjesnym muzeju Janšojce su dohlad do žiwjenja serbskeje ludnosće wokoło lěta 1900 dóstali. Tež wodźenje po serbskej štwórći w Choćebuzu słušeše do programa.
Dalše ćežišćo posedźenja běchu přihoty za nazymski koncert 25. oktobra na žurli hosćenca w Ćisku, županka Gabriela Linakowa na naprašowanje našeho wječornika zdźěli. Hudźbne wuhotowanje wječora přewozmje chór Židźino. W nowembru wuhotuje župa popołdnjo za swójby na ležownosći domu Domowiny. Za to nadźijeja so wustupa Budyskeho klankodźiwadła. Nimo toho budźe župa hodowničku w zakładnej šuli „Handrij Zejler“ we Wojerecach podpěrać a za šulerjow překwapjenku z Božim dźěsćom organizować.
Župa Budyšin planuje mnohe wjerški
Budyšin (kl/SN). Na swojim prěnim wuradźowanju po lěćnej přestawce je předsydstwo župy „Jan Arnošt Smoler“ wčera popołdnju kubłansku jězbu přihotowało, kotraž powjedźe zajimcow sobotu, 26. septembra, do Slepjanskich kónčin. Štóž chce sobu jěć, měł so hač do 11. septembra w regionalnym běrowje Domowiny w Budyšinje přizjewić. Na jězbje chcedźa sej serbski šulski kompleks w Slepom, wjes Miłoraz a Šusterec dwór w Trjebinje wobhladać. Dr. Ruth Mrózkowa budźe wuprawu po wokolinje swojeho dźěćatstwa přewodźeć.
Awgust Lapštich je serbsku rěč a kulturu spěchował
Ćišćernja při Teschenowej dróze we Wojerecach słušeše wot lěta 1897 hač do 13. julija 1926 Awgustej Lapštichej. Wo tym zhonichu wčera wopytowarjo wopomnjenskeho zarjadowanja składnostnje jeho 100. posmjertnin. Dźensa je na tymle městnje hosćenc.
Wojerecy (KD/SN). Werner Sroka je wo žiwjenju a skutkowanju serbskeho prócowarja slědźił. Předsyda Domowiny Dawid Statnik je wuzběhnył, zo „bě Lapštich wuznamna wosobina Łužicy, kotrejž bě šěrjenje serbskeho słowa wažne“. Spěwytwórc Bernd Pittkunings je zarjadowanje hudźbnje wobrubił.
Lapštich bu 5. oktobra 1862 we Wulkich Zdźarach narodźeny. Tamniši wučer Jan Mrosak je hólcej hódnotu serbšćiny a łužisku kulturu zbližił. Pozdźišo je serbski młodźenc we Wojerowskej ćišćerni Gustava Wencela powołanje pismikistajerja nawuknył, wón je knihi a spisy za delnjoserbsku wědomostnu towaršnosć Maśica Serbska a Bramborski Casnik ćišćał. „1897 potom je Lapštich zhromadnje z Janom Mrosakom swójsku firmu załožił“, tak Werner Sroka.
Projekt Zari chcedźa dale wjesć
Slepo (SN/MiP). Krótko do zahajenja 10. mjezynarodneho festiwala dudakow w Slepom je so Zwjazkowe předsydstwo Domowiny (ZP) minjeny pjatk nawječor w tamnišim Serbskim kulturnym centrumje (SKC) na swoje pjate posedźenje zešło.
Do wothłosowanja, hač měła Syć za serbsku rěč a regionalnu identitu Zari swoje dźěło w lětach 2027 do 2031 pokročować a próstwu wo spěchowanje na Załožbu za serbski lud zapodać, předstaji nawjedowaca projektna koordinatorka Diana Pawlikowa zaměry, wobłuki a dotalne wuskutki projekta za rewitalizaciju serbskeje rěče. W tutym zwisku naspomni jako přikład kurs Slepjanšćiny bywšeje rěčneje motiwatorki Juliany Kaulfürstoweje, kotryž je na kóncu pjeć zajimcow wopytało. „Tež hdyž so tuta ličba zwonkastejacemu wosebje wysoka być njezdawa, hladajo na proces rewitalizacije je mnóstwo wobdźělnikow wuspěch. Wobdźělnicy skutkuja w swojich kónčinach hustohdy jako katalyzator a přiwabjeja dalšich zajimcow“, Pawlikowa wuzběhny. Čłonojo ZP so na to jednohłósnje za pokročowanje projekta Zari wuprajichu.
Prezidij ze župu wuradźował
Prezidij Domowiny je so wčera w Choćebuskim Serbskim domje schadźował. Gremijej je wažne, zo so aktiwnje z ludźimi na bazy wuměnja. Wčera wuradźowachu z předsydstwom župy Delnja Łužica. Zdobom su čłonojo prezidija wo dalšich naprawach rozsudźili.
Choćebuz (SN). Prezidij Domowiny je swoje wčerawše posedźenje z trójnej sławu zahajił. Župne předsydstwo a prezidij dźakowaštej so angažowanej čłonce Mariji Elikowskej-Winklerowej, kotraž je njedawno jubilejne narodniny woswjećiła. „Nam je wažne, zo mamy direktnu wuměnu ze župami“, zahaji předsyda Domowiny Dawid Statnik rozmołwu z jědnaće přitomnymi čłonami župneho předsydstwa. W dalšej rozmołwje wuměništej so gremijej mjez druhim wo wosebitym připóznaću mytowanja młodeje delnjoserbskeje ekscelency, wo skónčenju doby rady Załožby za serbski lud a wo dalšich projektach. Na kóncu skedźbni Statnik na terminy, kaž na hłownu zhromadźiznu Domowiny, kotraž budźe klětu 24. apryla w Brětni.
