Serbske filmy na wulkej płachće
Budyšin (SN/bn). Pod hesłom „Serbske kino“ je župa „Jan Arnošt Smoler“ předwčerawšim wosebity cineastiski dźeń w Budyskim Filmowym palasće wuhotowała. Dopołdnja dožiwichu dźěći z třoch pěstowarnjow sprjewineho města na połnje wobsadźenej žurli trikowe filmy, kaž na přikład „Myškolinku“. Swójbne popołdnjo ze serbsce synchronizowanym paskom „Mała wjera“ přiwabi něhdźe 25 zajimcow. Dwójce telko wopytowarjow zličichu na wječornym programje z dohromady štyrjomi přinoškami. Najprjedy pokazachu dokumentaciji „Serbscy ludowi hercy“ wo tudyšej hudźbnej tradiciji a typiskich serbskich instrumentach kaž tež „Njepřetrachu jenož mólby“, portretowaceje čěskeho wuměłca, ludoweho slědźerja a přećela Serbow Ludvíka Kubu. Slědowaše nahrawanje telewizijneho wusyłanja „Serbske wokno“ z lěta 2002, wopřijimace mjez druhim premjeru hry „Swěca abo měca“ a wotewrjenje Smolerjec kniharnje na Budyskej Pchalekowej. Hybridny, z animěrowanych a realnje sfilmowanych scenow montěrowany pask „Z wójny jědu“ Maje Nageloweje a Juliusa Günzela wječor skulojći.
Kino, originalnje
Zhromadnje kermušowali
Koncert a spěwny wječor mjez skupinarjemi dobry wothłós žnjałoj
Hórki (SN/MWj). Tak kaž minjeny kónc tydźenja w Radworju a přichodny w Delanach su předwčerawšim tež w Hórkach kermušu swjećili. Nic wosadnu, ale tu župy „Michał Hórnik“, kotraž je zarjadowanje na Smolic statoku zhromadnje z Hórčanskim wjesnym towarstwom wuhotowała. Něhdźe 90 wopytowarjow je přewšo zabawny a bjesadny wječor z koncertom spěwneje skupiny PoŠtyrjoch, ze zhromadnym spěwanjom a słódnej wječerju dožiwiło.
Dwě lěće dyrbjachu korony dla na tele zarjadowanje čakać. Ćim bóle so županka Diana Wowčerjowa wjeseleše, zo bě telko ludźi přichwatało. Žony župneho předsydstwa a wjesneho towarstwa njeběchu jeno zymne platy po přikładźe antipasti přihotowali, ale tež přewšo słódnu kirbsowu poliwku, wot kotrejež by něchtóžkuli zawěsće hišće wjace znjesł.
Zhromadne popołdnjo dožiwili
Župa a Kulowske towarstwo zarjadowanje za swójby zmóžniłoj
Kulow (DFG/SN). Wojerowska župa „Handrij Zejler“ a towarstwo Kulowskeje wosady Bratrowstwo běštej předwčerawšim na swójbne popołdnjo přeprosyłoj. Hač na posledni stólc běše žurla Jakubecoweho wustawa wobsadźena a wšitcy hosćo sćěhowachu pisanemu programej, kotryž dźěći pěstowarnjow Křesćansko-socialneho kubłanskeho skutka ze Sulšec a z Kulowa kaž tež šulerjo a šulerki Krabatoweje zakładneje šule z městačka wuhotowachu. Jako palčiki předrasćene abo z instrumentami w rukach zaspěwachu sep dźěćacych spěwow. Tež znatu pěseń „Pod Kulowom we holi“ zanjesechu, wabjo hosći do sobuspěwanja a přikleskowanja.
Ideja zhromadneho swjedźenja je wušła ze zhromadneho dźěła župy a towarstwa. „Hdyž kóždy za sebje dźěła, to tež mocy płaći“, rjekny předsydka Bratrowstwa Sonja Hrjehorjowa, kotraž je zdobom regionalna rěčnica Domowiny za Wojerowski region. Po jeje słowach maja dźěći, wosebje serbsce wuknjace, składnosć swoje nawuknjene tež raz šěršej zjawnosći předstajić.
Serbski referat do Sakskeje statneje kenclije?
Budyšin (SN). Předsyda frakcije Lěwicy w Sakskim krajnym sejmje Rico Gebhardt a łužiska zapósłanča frakcije Antonia Mertsching staj minjeny pjatk zarjad Domowiny w Budyskim Serbskim domje wopytałoj. Předsyda třěšneho zwjazka Dawid Statnik je so z hosćomaj w dwuhodźinskej rozmołwje mjez druhim aktualnym wužadanjam strukturneje změny wěnował. Woni běchu sej přezjedni, zo měło so z idejowym wubědźowanjom „simul+ fonds ,Čiń sobu‘“ w Sakskej jako dobrym srědkom za spomóžnu podpěru iniciatiwow ciwilneje towaršnosće pokročować. W srjedźišću wuměny steješe wožiwjenje serbšćiny wšědny dźeń we wšelakich regionach Łužicy.
Swěrny angažement za spomóžnu zhromadnosć
„Što druhe čini narod žiwy abo mortwy, hač jeho žiwa rěč a kultura“
Citowane Brězanowe słowa je Brigita Šramina, kotraž narodźi so 13. nowembra 1942 do Skatulic swójby w Pančicach, pragmatisce do skutka stajiła. Njedźelu swjeći wona, wučerka na wuměnku we Wojerecach, swoje wosomdźesaćiny.
Fachowča Kerstin Kaczmar je wčera z přednoškom „Družki“ w ...
Motiwatoraj rozprawjałoj
Budyšin (kl/SN). Na župnym teritoriju skutkowacaj motiwatoraj za serbsku rěč staj na wčerawšim wuradźowanju předsydstwa župy „Jan Arnošt Smoler“ Budyšin wo swojej dźěławosći rozprawjałoj. Staj to Raphaela Wićazowa za kónčiny Wulka Dubrawa, Radwor a Rakecy kaž tež hižo dlěje agěrowacy Lucian Kaulfürst za kónčiny Malešecy, Kubšicy a Bukecy. Čłonojo předsydstwa chcedźa rady do procesa wožiwjenja serbšćiny, štož je hłowny nadawk motiwatorow, zapřijeći być a jón podpěrać.
Dale je so předsydstwo zarjadowanju ze serbskimi filmami přichodnu wutoru w Budyskim kinje přiwobroćiło. Za popołdniše swójbne a wječorne předstajenje su hišće městna swobodne. Přizjewjenja su dale móžne pola Raphaele Wićazoweje, telefonisce pod 03591 550424. K DEFA-filmam, kiž tam wot 19 hodź. pokazaja, budźe stajnje zawod. Wuměłča Maja Naglowa so z krótkofilmom wobdźěli a rady po filmje na prašenja k tworjenju wotmołwja. Rańše předstajenje za pěstowarske dźěći je wuknihowane.
Spočatk decembra přeproša župa na adwentničku do Serbskeho domu.
Wuspěšna premjera w Šunowje
Narownej pomnikaj wobnowić
Na swojim njedawnym wuradźowanju je pomnikowy wuběrk Maćicy Serbskeje wobzamknył namjetowany projekt Towarstwa Cyrila a Metoda (TCM) schwalić.
Budyšin (ML/SN). Kaž předsydka wuběrka Trudla Malinkowa zdźěli, chce TCM narownej pomnikaj za kapłana Michała Rólu a seniora tachantstwa Jakuba Skalu na zapadnej stronje rozwalinow Mikławška restawrować dać. John Petrik ze Załožby za serbski lud rjekny, zo ma kamjenjećesar Markus Mikan ze Zemic-Tumic nadawk přewzać. Narowny pomnik za Michała Rólu je chětro wobškodźeny, a restawracija by wjace hač 7 600 eurow płaćiła, mjeztym zo by za Skalowy pomnik jenož něhdźe 2 000 eurow trěbnych było, wuběrkownicy zhonichu.
Lěta 1851 w Chrósćicach rodźeny Jakub Skala bě w Radworju a Budyšinje z dušepastyrjom, a wón by na rjedźe był stać so z biskopom. Swojeho wulkeho zasadźenja za serbstwo dla, mjez druhim je tójšto nabožnych knihow w maćeršćinje pisał a wudał, jeho cyrkwinska wyšnosć wotpokaza. Za biskopa wuzwolichu němskeho nacionalista Christiana Schreibera. Jakub Skala bě aktiwny městopředsyda a předsyda Maćicy Serbskeje.
