Dom Měrćina Nowaka zachować
Njechorń (SN/at). Dźensa před 25 lětami, 19. junija 1999, bu Dom Měrćina Nowaka-Njechorńskeho po wobšěrnych zachowanskich a wobnowjenskich dźěłach zjawnosći jako muzej a schadźowanišćo přepodaty. Areal je pokład za Domowinjanow w narańšich kónčinach župy „Jan Arnošt Smoler“. Mjez tym staja so tam znowa prašenje „Kak dale z domom?“, a to pod wšelkimaj aspektomaj.
Z předmjetom zaběrachu so čłonojo předsydstwa Budyskeje župy na wuradźowanju wčera w Njechornju. Pozicija předsydstwa je jasna. Zetkawanišćo je wažne, hewak ludźo cyle na serbske korjenje w kónčinje zabudu, regionalna rěčnica Domowiny Katja Liznarjec zdźěli. Župa ma nětko stejišćo zdźěłać, dokelž dyrbjał so dom wotwonka w murjach runje tak kaž wotnutřka ponowić. „W drjewje tykowaneho domu je škódnik, kiž móže jenož fachowc z wosebitymi maćiznami wotstronić“, wuzběhny Katja Liznarjec. Župne předsydstwo namjetuje nětko ideje zběrać, za što hodźi so dom w přichodźe wužiwać. Za to chcedźa wjesnjanow a wšitkich zajimowanych Serbow nazymu na dźěłarničku přeprosyć.
Serbja w Drježdźanach hladaja zesylnjeni do přichoda
Na prawym puću
Na „hłownej“ w Lěšćoch tež wo wólby noweje Serbskeje rady ...
Lěšće (HA/SN). Ze wšěmi mocami wólby noweje braniborskeje Rady za naležnosće Serbow podpěrać, w tym widźi Domowinska župa Delnja Łužica za přichodne měsacy swój najwažniši nadawk. K tomu słuša dobyć wjele wolerjow a wolerki za listowe wólby a kandidatki a kandidatow za tón wažny politiski serbski gremij w Braniborskej. To steješe w srjedźišću 22. hłowneje zhromadźizny župy Delnja Łužica minjenu sobotu w bróžni šokoladoweje konfiserije „Felicitas“ w Lěšćoch (Hornow) w prjedawšej župje Grodk. Předsydka a čłon wólbneho wuběrka za listowe wólby Margit Neugebauer, zdobom dotalna předsydka Serbskeho wuběrka we wokrjesu Sprjewja-Nysa, a dr. Hartmut Leipner, městopředsyda Domowiny, staj přitomnym nimale 60 delegatam a hosćom konkretny wotběh listowych wólbow hižo 7. Serbskeje rady rozkładłoj. Lětsa 15. decembra wotedate hłosy wuliča, to je hižo postajene. Serbja trjebaja w Podstupimje jara sylny swójski hłós, staj podšmórnyłoj. Na „hłownej“ su wobdźěleni hižo podłožk za wobdźělenje na listowych wólbach wupjelnili a wotedali.
Hornjoserbske „Zorja“ trěbne
Budyšin (SN/at). Mnohe Domowinske skupiny a towarstwa pod třěchu Budyskeje župy „Jan Arnošt Smoler“ trjebaja podpěru při organizaciji zarjadowanjow. Što móhło to konkretnje być, wo tym je so župne předsydstwo z jich zastupjerjemi hižo w měrcu w Radworskim dwórnišću wuměniło. Wšitke cyłki tehdy přitomne njeběchu, předsydstwo pak tež jich měnjenje a wočakowanja zajimuja.
W měrcu zahajenu analyzu dokónčić rěka, zo čłonka abo čłon župneho předsydstwa „jedyn ze zbywacych pjeć cyłkow w přichodnych měsacach wopyta“, rjekny županka Leńka Thomasowa po wčerawšim wuradźowanju gremija, a z nimi – kaž na přikład w Lemišowje abo Jaseńcy – wuměnu pokročuje. Wědźa, zo mnozy skupinarjo staroby dla sej wjace njepřicpěwaja wšelake zarjadowanja sami organizować. „Wěmy pak tež, zo woni sej serbsku bjesadu we wobłuku Domowinskeje skupiny abo towarstwa dale jara waža a tam rady chodźa“, wujasni Katja Lizarnjec, regionalna rěčnica Domowiny za teritorij župy. Analyza ma zwěsćić, za čo podpěru wočakuja, hač su to přednoški, wulět abo dalše formy zarjadowanjow.
Serbska rěč a serbski spěw
Prěnja społnomócnjena rozprawjała
Župa Delnja Łužica hotuje so na swoju hłownu zhromadźiznu 8. junija w Lěšćoch (Hornow). Z přihotami je so župne předsydstwo předwčerawšim, wutoru, w Choćebuzu zaběrało. Zdobom su nowu seriju zahajili: Wo dźěle społnomócnjenych za naležnosće Serbow je jako prěnja Hanka Rjelcyna z wokrjesa Hornje Błóta-Łužica rozprawjała.
Myto Domowiny w přichodźe jenož hišće kóžde třeće lěto?
Wojerecy (SN/mb). Mjezystaw planowaneho projekta „Via Sorabica Hoywoj“, šćežka z pokiwami na serbske stawizny města, je z wida předsydstwa župy „Handrij Zejler“ njespokojacy. To zwěsćichu čłonojo gremija na swojim wčerawšim posedźenju w bróžni pola domu Domowiny we Wojerecach po rozprawje županki Gabriele Linakoweje wo njedawnym wuradźowanju ze zastupjerjemi měšćanskeho zarjada. Najebać to, zo je Werner Sroka hižo lěta dołho zdźěla dotal njeznate fakty za informaciske tafle wuslědźił, klaca z přilubjenej podpěru ze stron města. Wyši měšćanosta Torsten Ruban-Zeh (SPD) bě drje w narěči na swojim lońšim přijeću připowědźił, zo chcedźa projekt hromadźe z Domowinu zwoprawdźić. Ale nětko su zastupjerjo města njejapcy zdźělili, zo njemóže so město na financowanju wobdźělić. Problematiku budźe Domowina tež na posedźenju serbskeje přirady města přichodnu srjedu tematizować.
Wólbne kopolaki wozjewjene
Budyšin (SN). Na wčerawšim posedźenju wothłosowachu čłonojo prezidija 2. naćisk programa Domowiny. Wuběrk za nutřkownu demokratiju a serbsku ciwilnu towaršnosć je so poslednje tydźenje z namjetami zjawnosće za program zaběrał a dotalny naćisk kwalifikował. Tutón so na přichodnym wuradźowanju Zwjazkowemu předsydstwu 7. junija předstaji.
Spočatk februara je Domowina zjawnosć namołwjała prašenja zapodać, kotrež móhli jako wólbne kopolaki politiskim stronam sposrědkować. Tute nětko předleža za wotpósłanje. Zastupjerjo stronow maja něhdźe šěsć tydźenjow chwile na nje wotmołwić. Formulowane prašenja su wotnětka na webstronje Domowiny wozjewjene.
Prezidij je tež tři próstwam wo delegowanje přihłosował. Tak pojědźe serbska drastowa a rejowanska skupina Barbuk na mjezynarodny festiwal „International Carnival Tivat“ wot 6. do 10. junija w Montenegru, serbska rejowanska skupina Smjerdźaca wot 23. do 25. awgusta na mjezynarodny festiwal Pisek w Čěskej.
Chór Lipa změje 8. septembra 2024 koncert w Serbskim seminarje w Praze.
