Chětro twjerdy worjech

wutora, 14. januara 2020 spisane wot:

Financowanje jězby Smjerdźečanow na swětowy festiwal dale njejasne

Smjerdźaca/Budyšin (SN/JaW). Rejwanskej skupinje Smjerdźaca financować wobdźělenje na 6. folkloriadźe, swětowym folklornym festiwalu mjezynarodneje organizacije za přewjedźenje folklornych festiwalow CIOFF, wot 16. julija do 2. awgusta je zamołwitym dale twjerdy worjech. Wšako płaći wuprawa ně­hdźe 35 000 eurow. Najwažniše prašenje při tym je, zwotkel pjenjezy brać.

Nowa łužiska zapósłanča Lěwicy w Sakskim krajnym sejmje Antonia Mertsching je so wčera na swojim prěnim wopyće w Serbskim domje z našim ludom zeznajomiła. Předsyda Domowiny Dawid Statnik pokaza politikarce Serbsku kulturnu informaciju. Dale informowaše ju wo serbskich institucijach a načasnych wužadanjach na polu kubłanja kaž tež strukturneje změny. Wobaj běštaj­ sej přezjednaj, zo njesmě w zwisku ze strukturnej změnu jenož nadróžna infrastruktura w srjedźišću stać, ale runje tak spěchowanje regionalneje identity, serbskeje kultury a němsko-słowjanskeje wjacerěčnosće. Foto: SN/Hanka Šěnec

Serbski prócowar pochowany

pjatk, 10. januara 2020 spisane wot:
Na Berlinskim pohrjebnišću Lichterfelde su wčera bywšeho gymnazialneho wučerja a mnohostronskeho serbskeho prócowarja Měta Pernaka pochowali, kiž bě 8. decembra 81lětny zemrěł. Mjez něhdźe 120 žarowacymi bě połojca Serbow z Hornjeje a Delnjeje Łužicy. Dwurěčne němsko-delnjoserbske kemše swjećeštaj fararjej na wuměnku Helmut Hupac z Prjawoza a Cyril Pjech z Berlina, kiž je tež prědował. Měto Pernak bě na serbskim rěčnym polu tójšto zdźěłał a skutkowaše mjez druhim 13 lět jako předsyda Maśicy Serbskeje. Foto: Ludwig Sachsa

Wulce radźeny jubilej

póndźela, 06. januara 2020 spisane wot:
Rjanej to koncertaj, z kotrymajž sej chór Meja sam k swojim 125. narodninam gratulowaše.­ Dwuhodźinski, wotměnjawy a překwapjacy program, nimale połsta spěwarkow a spěwarjow – mjez nimi tež tójšto­ dźensa wjace sobu njeskutkowacych – na jewišću, historiske fota a widejowe sekwency na płachće, we wobłuku moderacije někotražkuli anekdota, z wobrazami a portretami wšitkich dotalnych dirigentow wupyšene blida: Programowy wotběh kaž tež ambiente stej wusahowacemu podawkej tak cyle wotpowědowałoj. A wopyto­warjo su wukon a prócu ze sylnym při­kleskom mytowali. Tak smě jedna z najwažnišich instancow serbskeje kultury publikum rady znajmjeńša dalše 125 lět zawjeselić. Apropos publikum: Kak da by było, přichodnje raz w offbeaće město­ mučnje w pruskim pochodowym rytmusu sobu kleskać – kak to dźe, su dźě akterojo sobotu w Radworskej „Meji“ demonstrowali. Bosćan Nawka

„Sto procentow wjesela“

póndźela, 06. januara 2020 spisane wot:

Lajska dźiwadłowa skupina Bratrowstwa wuspěšnu premjeru měła

Budyšin (SN/JaW). „Kulowske Bratrowstwo je žiwe, na čož sym jara hordy!“ To rjekny čestny předsyda towarstwa Serbow Kulowskeje wosady dr. Pětr Brězan na kromje sobotneho lětneho swjedźenja Bratrowstwa w delnich Sulšecach. Tam je lajska dźiwadłowa skupina towarstwa swoju nowu inscenaciju „Namrěwstwa dla za­wrjene“ w režiji dźiwadźelnika Němsko-Serbskeho ludoweho dźiwadła Měrka Brankačka premjernje předstajiła.

Hižo cyłu chwilu do toho, zo so zawěšk zběhny a Serbja z Kulowskeje wosady kaž tež dalši hosćo – mjez nimi zastupnicy Chróšćanskeje a Šunowsko-Konječanskeje dźiwadłoweje skupiny, a samo intendant NSLDź Lutz Hillmann wosobinsce a jeho zastupjerka za serbske dźiwadło Madleńka Šołćic –, jednanje komedije w třoch aktach sćěhowachu, bě žurla tamnišeho kulturneho domu dospołnje wupředata. Tež na wčerawšim předstajenju w Sulšecach bě zajim zaso wulki.

Worklecy (SN). Budyski krajny rada Michael Harig (CDU) je zhromadnje ze społnomócnjenej wokrjesa za čestnohamtske skutkowanje Dunju Reichelt wjelelětny čestnohamtski angažement Worklečana Pawoła Šěraka z „Čestnym hamtom měsaca januar 2020“ wuznamjeniła. To zdźěli nowinarski wotrjad wokrjesa minjeny pjatk popołdnju.

„Ze swojim čestnohamtskim angažementom a swojimi idejemi sylniće duch zhromadnosće – hižo jeničce tohodla, dokelž z dalšimi ludźimi hromadu přińdźeće a w gmejnje něšto zahibaće“, rjekny Harig na počesćenju, kotrež běchu hižo we wobłuku 28. haloweho koparskeho turněra 30. decembra we Worklečanskej ćěłozwučowarni wotměli. Tež Worklečanski wjesnjanosta Franc Brusk (CDU) je hordy, zo ma tajkeho angažowaneho wobydlerja w swojej gmejnje. „Nochcu aktiwne skutkowanje Pawoła Šěraka k žanym móžnym přiležnosćam kaž tež jeho pomoc na žadyn pad parować.“

Na wuspěchi nawjazać

pjatk, 03. januara 2020 spisane wot:

Smjerdźečanske swójbne a kubłanske srjedźišćo LIPA je w lěće 2019 znowa zajim­cam dało­ w zešiwku přehlad swojich poskitkow, rjadowany do štyrjoch tematiskich wobłukow. Runje tak informowaše srjedźišćo w interneće.

Smjerdźaca (aha/SN). W poziciji „rěče a tradicije“ mějachu 14 kursow, wosom zapřijachu do „swójbneho kubłanja“. Wažne běchu dalekubłanske móžnosće za kubłarki a kubłarjow, dźěłacych w pěstowarnjach w njeserbskim nošer­stwje.

W swójskej naležnosći

pjatk, 03. januara 2020 spisane wot:
W teksće „Serbstwo jemu nutřkownje stajnje najbliše było“, wopominacym Jurja Grósa, je so we wčerawšim wudaću SN bohužel zmylk stał. Prawje ma rěkać, zo bě so Jurij Grós Nowe lěto 1931 narodźił a tuž w 89. žiwjenskim lěće 28. decembra 2019 zemrěł. Redakcija misnjenje jara wobžaruje.

Hodowny zdobom jubilejny koncert

štwórtk, 02. januara 2020 spisane wot:

Chór Meja swjeći lětsa 125. róčnicu swojeho załoženja. Sobotne zarjadowanje ćělesa w Radworju budźe tuž zdobom tradicionalny hodowny kaž tež swjedźenski narodninski koncert.

Radwor (SN/bn). „Nochcychmy jubilej z wulce wosebitej swjatočnosću na přikład ze wšěmi aktualnymi kaž tež by­wšimi čłonami woswjećić, a smy so tuž rozsudźili narodniny do našeho tradicionalneho wjerška spočatk lěta zapřijeć“, powěda předsydka chóra Angelika Häneltowa. To pak njewoznamjenja, zo „smy na wjelelětnych čłonow, hač nětko spěwarjow, dirigentow abo na organizatoriskim polu skutkowacych, kaž na přikład Jana Nuka, Bjarnata Cyža a Judith Kubicec, zabyli. Smy jich samozrozum­liwje přeprosyli, zhromadnje z nami sobotu w hosćencu „Meja“ swjećić.

Jubilejny koncert wuhotuje Meja dwój­ce, a to w 15.30 hodź. a 19 hodź. Wječor přizamknu so reje ze skupinu Con-takt.

Poskitk fararja Delana přiwzali

štwórtk, 02. januara 2020 spisane wot:
Muski chór Delany je minjenu njedźelu w Ralbicach hodowny nyšpor wuhotował. Nimo serbskich, čěskich a ruskich hodownych pěsnjow kaž „Cionska dźowka“, kotruž bě za chór wjelelětny spěwar cyłka njeboh Rafael Wowčer z němčiny přenjesł, zaspěwachu mužojo pod nawodom swojeho noweho dirigenta Mateja Kowarja tež Jana Pawoła Nagelowu motetu za muski chór a tenorowe solo „Strowa sy, Marija“. Solowej pasaži přewza předsyda chóra Janek Wowčer. Wěriwi dźakowachu so mužam z přikleskom. Wosadny farar Šćěpan Delan so podźakowa, zo su jeho poskitk, časćišo w Ralbičanskej cyrkwi wustupić, přiwzali, a zwjaza swój dźak z nadźiju na dorost w muskim spěwnym cyłku. Foto: Rafael Ledźbor

nawěšk

SERBSKE NOWINY podpěruja:

Novi Sad – kulturna stolica Europy

nowostki LND